LESEN 10

Ifa Usun Kopwe Esilla ewe Lamalam mi Enlet?

1. Mi wor eú chék lamalam mi enlet?

Jesus a afalafal — “Oupwe tumunukemi seni ekkewe soufos chofona.”—MATEUS 7:15, TF.

Eú chék lamalam Jesus a áiti ngeni ekkewe chón tapweló mwirin, ina ewe lamalam mi enlet. A usun chék efóch al ngeni manaw esemuch. Jesus a apasa pwe “ekoch chök aramas mi fetal won.” (Mateus 7:14) Kot a etiwa ewe chék sókkun fel mi lóngólóng wóón an we Kapas mi enlet. Meinisin chón fel mi enlet ngeni Kot, ra tipeeúfengen lón eú lúkú.—Álleani Kölfel 25:5; Johannes 14:6; Efisos 4:5.

2. Met Jesus a erá usun ekkewe Chón Kraist chofona?

Emén néúwisin lamalam a afalafal lón fel. Mwirin, a efeiéchú ekkewe soufiu mi fiti maun. — ““Ra apasa pwe ra silei Kot, nge ar föför a pwärätä pwe resap silei i.”—TITUS 1:16.

Jesus a éúréúra ekkewe aramas pwe soufós chofona repwe angawaló ewe lamalamen Chón Kraist. Ekkena soufós chofona ra nikinikini nikinikin chón fel mi enlet. Ar kewe lamalam ra erá pwe iir Chón Kraist. Nge kopwe esilla pwe ekkena sókkun aramas, esap iir Chón Kraist mi enlet. Ifa usun? Fel mi enlet chék epwe uwaani Chón Kraist mi enlet mi silleló ren ar eáni napanap me féffér mi múrinné.—Álleani Mateus 7:13-20.

3. Ifa usun kopwe tongeni esilla chón ewe lamalam mi enlet?

Sipwe ppii ekkeei nimu esissil:

Chón fel mi enlet ra súféliti ewe Paipel pwe Kapasen Kot. Ra achocho le apwénúetá án Paipel kewe kapasen emmwen lón manawer. Iwe, ewe lamalam mi enlet a sókkóló seni ekkewe lamalam iir mi chék alónga ar lúkú wóón áitien aramas. (Mateus 15:7-9) Ekkewe Chón Kraist mi enlet ra apwénúetá met ra eáni afalafal.—Álleani Johannes 17:17; Titus 1:9, TF.
Ekkewe mi wesewesen tapweló mwirin Jesus ra elingaaló iten Kot we, Jiowa. Jesus a elingaaló iten Kot ren an esile ngeni aramas. A álisi aramas ar repwe silei Kot me asukuler ar repwe ióteki pwe iten Kot epwe piniló. (Mateus 6:9) Menni lamalam lón sópwum we ra kan áiti ngeni aramas iten Kot we?—Álleani Johannes 17:26; Sowel 2:32.a
Chón Kraist mi enlet ra afalafala usun án Kot we Mwú. Kot a tiinaato Jesus pwe epwe afalafala ewe kapas allim usun ewe Mwú. Án Kot we Mwú, ina chék ewe ápilúkúlúk fán iten aramas meinisin. Jesus a féri ena tori ewe fansoun epwele máló. (Lukas 4:43; 8:1; 23:42, 43) A erá pwe ekkewe chón tapweló mwirin, repwe afalafala usun án Kot we Mwú. Ika emén a fós ngonuk usun án Kot we mwú, om lúkú nge menni lamalam a fiti?—Álleani Mateus 24:14.
Ekkewe chón tapweló mwirin Jesus rese peni ei fénúfan mi ngaw. Ka tongeni esiller, pwe rese fiti angangen politics are osukosuken mwúúr kewe. (Johannes 17:16; 18:36) Pwal och, rese áppirú án chón fénúfan napanap me féffér mi ngaw.—Álleani James 4:4.
A kkóló watteen án Chón Kraist mi enlet tong lefiler. Ra káé seni án Kot we Kapas ar repwe súféliti aramas meinisin. Inaamwo ika, lamalam chofona ra kon akkapéchékkúla maun lefilen mwú me mwú, nge chón ewe fel mi enlet rese féri ena. (Mika 4:1-3) Iwe nge, Chón Kraist mi enlet ra áeá ar fansoun me tufich seni letiper le álisi me aururu aramas.—Álleani Johannes 13:34, 35, TF; 1 Johannes 4:20.

4. Ka tongeni esilla ewe lamalam mi enlet?

Menni lamalam a alónga meinisin an kewe afalafal wóón án Kot Kapas, elingaaló iten Kot we, me esilefeili pwe án Kot we Mwú ina chék ewe ápilúkúlúk fán iten aramas meinisin? Menni mwichen aramas ra eáni tong lefiler me rese fiti maun? Met meefiom?—Álleani 1 Johannes 3:10-12, TF.

Ren pwal ekkóch pwóróus, ppii ewe puk Met ewe Paipel A Wesewesen Apasa? sópwun 15.

a Ewe kapasen lepoputáán lón ewe Paipel are Testamentin Lom me Testament Söfö, a apasa pwe “lon ewe Testamentin Lom sia nöünöü . . . ‘Samol mi Lapalap’ fän iten Jiowa ika Yahwe.”