Met Epwe Efisi Pwapwaan Famili?

MINNE EWE PAIPEL A APASA

“Iei oua sinei ekkei mettoch mi ennet, iwe oupwe pwapwa ika oupwe apwonueta.”​—Johannes 13:17, Ewe Kapasen God.

IFA USUN ENA PWÓRÓUS EPWE ÁLISUK

Le kúna enletin tong.​—Efisos 5:28, 29.

Le eáni súfél mi enlet.​—Efisos 5:33.

Le eáni lúkúlúkfengen.​—Markus 10:6-9.

KICH MI TONGENI WESEWESEN LÚKÚ MET PAIPEL A APASA?

Ewer, ikkeei ruu popun:

• Kot ewe Chón Poputááni kókkótun famili. Ewe Paipel a apasa pwe “iteiten famili . . . ra angei iter me ren” Jiowa Kot. (Efisos 3:14, 15) Are a pwal tongeni wewe ngeni pwe ewe kókkótun famili a fisitá pokiten Jiowa a efisatá. Nge pwata a aúchea ena?

  Ekieki ei, ika ka sani och mwéngé mi anné nge ka mochen káé ifa usun kopwe kuku, ié kopwe eisini? Kopwe eisini ewe emén mi wisen féri ena mwéngé.

  Pwal ina usun ren famili, ika ka mochen silei met epwe efisi pwapwaan famili, iwe kopwe káé seni Jiowa, ewe Chón Poputááni kókkótun famili.​—Keneses 2:18-24.

• Kot a chúnguk. A eú alen tipachem ngeni famili meinisin ar repwe kútta án Jiowa emmwen mi kawor me ren an we Kapas. Pwata? ‘Pun i a tumunuk.’ (1 Petrus 5:6, 7) Jiowa a fókkun ekieki met epwe échitikich, me an kewe kapasen emmwen ra álilliséch iteitan!​—Än Salomon Fos 3:5, 6; Aisea 48:17, 18.