Jesus A Álleasochis Iteitan

Mi mecheres óm kopwe álleasochisi semom kewe me inom iteitan?— Fán ekkóch a weires. En mi silei pwe Jesus a álleasochisi Jiowa me seman kewe me inan?— Pwóróusan a tongeni álisuk le álleasochisi semom kewe me inom pwal mwo nge atun a weires. Sipwe káé pwal ekkóch pwóróus usun ena.

Mwen án Jesus feito fénúfan, a nóm ren Seman we, Jiowa lón láng. Nge a pwal wor semen me inen Jesus, wóón fénúfan. Iter Josef me Maria. En mi silei ifa usun ra wiliti semen me inen Jesus?—

Jiowa a waalong manawen Jesus me láng lón luken Maria pwe epwe uputiw me manaw wóón fénúfan. A ina eú manaman! Jesus a mámmáár lón luken Maria usun chék máárin meinisin ménúkol lón luken iner kewe. Órun tiu maram mwirin, Jesus a uputiw. Ina usun án Maria me pwúlúwan we Josef wiliti semen me inen Jesus wóón fénúfan.

Atun a chék 12 ierin Jesus, a féri och mettóch mi pwári úkúkún an tongei Seman we, Jiowa. A fis atun Jesus me an we famili ra fetál towau ngeni Jerusalem fán iten ewe Pasofer. Ina, ránin áchechchemenien án chón Israel ngaseló seni Isip. Atun ra feffetál le liwiniti leenier we, Josef me Maria ra resin kútta Jesus. En mi silei ia a nóm ie?—

Josef me Maria ra mwittir liwinsefáliti Jerusalem me resin kútta Jesus. Ra fókkun lólilen pokiten rese tongeni kúna. Nge mwirin úlúngát rán, ra kúna me lón ewe imwenfel! En mi silei pwata Jesus a nóm lón ewe imwenfel?— Pokiten me ikena ie, a tongeni káé usun Seman we, Jiowa. A tongei Jiowa me mochen káé ifa usun epwe apwapwaai i. Pwal mwo nge atun Jesus a mááritá me ierin mwán, a álleasochisi Jiowa iteitan. Jesus a álleasochis pwal mwo nge atun a weires ngeni, me a wewe ngeni an epwe kúna riáfféú. Jesus a pwal álleasochisi Josef me Maria?— Ewer, ewe Paipel a apasa pwe a álleasochis.

Met ka tongeni káé seni pwóróusen Jesus?— A lamot óm kopwe álleasochisi semom kewe me inom pwal mwo nge atun a weires. Iwe met, kopwe féri ena?—