Ewe Át Jises

Josef, Meri, Jises me néúr kewe pwal ekkóch ra nónnóm Nasaret. Josef a féri angangen táikú ren an epwe atufichi an we famili, me a pwal asukuler ussun Jiowa me an we Allúk. Ra kan ló ren ewe sinakok iteitan pwe repwe fel ngeni Jiowa, me ra kan ló Jerusalem iteiten ier fán iten ewe Pasofer.

Lupwen a 12 ierin Jises, iir me an we famili ra sáittam ngeni Jerusalem ussun met ra kan féfféri iteitan. A chómmóng aramas ra feito ngeni ena telinimw pwe repwe fiti apwapwaan ewe Pasofer. Mwirin ewe Pasofer, Josef me Meri ra poputááni ar sái le liwiniti leenier we, me tittiper pwe Jises a nóm leir. Nge lupwen ra kútta i lein aramaser kewe, rese kúna.

Ra liwiniti Jerusalem, me lón úkúúkún úlúngát rán ra kútta néúr na át. Iwe, ra feiló lón ewe imwenfel, me ra kúna Jises an mómmóót lein ekkewe sense me aúselingéch ngeniir me kakkapas eis. Pokiten ekkewe sense ra fókkun mwaar ren Jises, iwe ra poputá le kapas eis. Ra mwaar ren met a pélúwen ngeni ar kewe kapas eis. Ra kúna pwe Jises a weweiti án Jiowa we Allúk.

Josef me Meri ra fókkun lólilen. Meri a apasa: ‘Nei, áúa resin kúttafetálek! Ia ke ló ie?’ Jises a apasa: ‘Ouse silei pwe úpwe nóm lón imwen Semei?’

Jises a fiti seman kewe me inan le liwiniti Nasaret. Josef a áiti Jises angangen táikú. Met meefiom, met sókkun aramas Jises leátin we? Atun Jises a mámmááritá, a lallapoló an tipáchem me a pwal lallapoló chenin me ren Kot me aramas.