Ra Makkeei Pwóróusen Jesus

En mi kúna ekkeei mwán lón ei lios?— Iter Mateus, Markus, Lukas, Johannes, Petrus, James, Jutas me Paulus. Ekkeei mwán ra manawppék me Jesus me ra makkeei pwóróusen Jesus. Sipwe káé pwal ekkóch pwóróus usur.

Úlúmén me leir, iir aposel mi fiti Jesus le afalafal. En mi sile ié kana úlúmén?— Mateus, Johannes me Petrus. Aposel Mateus me Johannes ra fókkun sissilei Jesus me iir ra en me makkeei eú puk usun manawen Jesus. Ewe aposel Johannes a pwal makkeei eú puk mi iteni Pwärätä me ekkewe úlúngát puk mi iteni 1 Johannes, 2 Johannes me 3 Johannes. Ewe aposel Petrus a makkeei ruu puk lón Paipel. Ra iteni 1 Petrus me 2 Petrus. Petrus a makkeei lón néún we oruuen puk, ewe atun Jiowa a fósetiw me láng nge iei met Jiowa a apasa usun Jesus: ‘Iei i nei we. Ua tongei me ua pwapwa ren.’

Ekkóch ekkeei mwán lón ei lios ra pwal asukulakich usun Jesus lón ekkewe puk ra makkeei. Emén me leir Markus. Neman Markus a nóm ewe atun ekkewe soufiu ra turufi Jesus me a kúna meinisin minne a fis. A pwal wor emén itan Lukas. I emén tokter me neman a wiliti emén Chón Kraist mwirin málóón Jesus.

Rúúemén me lein ekkeei chón makkeei Paipel ka kúna me lón ei lios, iir pwiin Jesus kúkkún. En mi silei iter?— Iter James me Jutas. Lepoputáán rese lúkú Jesus. Ra pwal mwo nge ekieki pwe Jesus mi ekis umwes. Nge mwirin, ra lúkú Jesus me ra wiliti Chón Kraist.

Ewe sáingoon chón makkeei Paipel ka kúna lón ei lios, ina i Paulus. Mwen an wiliti Chón Kraist, a iteni Saul. A oput Chón Kraist me a fókkun kirikiringaw ngeniir. En mi silei met a efisi án Paulus mochen wiliti Chón Kraist?— Eú rán, Paulus a nóm wóón ewe al ngeni Tamaskus, iwe a rong án emén fósetiw me láng. Ina i Jesus! A eisini Paulus: ‘Pwata ka fókkun kirikiringaw ngeni chókkewe mi lúkúei?’ Mwirin ena, Paulus a siwil me wiliti emén Chón Kraist. Paulus a makkeei 14 puk lón Paipel, seni puken Rom ngeni Ipru.

Sia kan álleani ewe Paipel iteiten rán, ika met?— Sia káé chómmóng mettóch usun Jesus ren ach álleani ewe Paipel. Ka pwal mochen káé ekkóch mettóch usun Jesus?—