Ewe Irá Félúfél mi Ngetenget

Moses a nónnóm lón Mitian ren úkúúkún 40 ier. A pwúpwúlú me a wor néún. Eú rán atun a túmúnú néún kewe siip kane ngeni ewe Chuuk Sinai, a kúna eú mettóch mi amwarar. Efóch irá félúfél mi ngetenget nge ese kareló! Atun Moses a feiló pwe epwe katol iká pwata ese kkar, a rong eú méngúngú me lón ena irá félúfél, a erá: ‘Moses! Kosap kineto. Kopwe pwiliti noum suus pwe ei leeni ka útá wóón a pin.’ Jiowa a fós ngeni ren an néúnéú emén chónláng.

Moses a niwokkus, iwe a pwélú mesan. Ewe méngúngú a apasa: ‘Úa kúna riáfféún ekkewe chón Israel. Úpwe angasereló seni ekkewe chón Isip me uweiirelong lón eú leeni mi múrinné. En ewe kopwe emmwenawu nei kewe aramas seni lón Isip.’ Óm lúkú Moses esap máirú ren ena?

Moses a eis: ‘Met úpwe erá iká ekkewe aramas ra eis iká ié a tiinieito?’ Kot a pélúweni: ‘Ereniir pwe ngang Jiowa án Eperiam, Jekop, me Aisek we Kot, úa tiinukoló.’ Mwirin Moses a ereni: ‘Nge met iká ekkewe aramas rese mochen aúseling ngeniei?’ Jiowa a pwáári ngeni Moses pwe i epwe álisi. A ereni Moses an epwe oturatiw wokun we wóón ewe pwúl. Mwirin ewe wok a wiliiti emén serepenit! Atun Moses a turufi úkkún ewe serepenit, a wiliitisefál efóch wok. Jiowa a erá: ‘Atun kopwe féri ena manaman, epwe pwáári ngeniir pwe úa tiinukoló.’

Moses a erá: ‘Esap ngang emén mi angéch le kapas.’ Jiowa a pwon ngeni: ‘Úpwe áiti ngonuk met kopwe apasa, me úpwe tiinaaló pwiium we Aaron pwe epwe álisuk.’ Moses a silei pwe Jiowa epwe eti, ina popun a angei pwúlúwan we me néún kewe me liwiniti Isip.