Ewe Irá Félúfél Mi Ngetenget

MOSES a feito ngeni ewe chuuk itan Horep pwe epwe kút enen néún kewe siip fetil. Me ikeei ie a kúna och irá félúfél mi ngetenget, nge ese kareló!

Moses a ekieki: ‘Mi fet ei mettóch. Upwe kine ngeni me nengeniéchú.’ Lupwen a kine ngeni, eú méngúngú a fósowu me lón ewe irá félúfél, a apasa: ‘Kosap chúen kineto. Pwiliti noum kana choori, pún ka úkkúútá wóón ei pwúl mi pin.’ Kot a fós ngeni Moses ren emén chónláng, iwe Moses a álleasochisi me apwélú mesan.

Mwirin Kot a apasa: ‘Ngang ua kúna riáfféún nei kewe aramas lón Isip. Ina minne upwe angasereló, iwe en ewe emén upwe tiinukoló pwe kopwe emmwenawu nei kewe aramas seni Isip.’ Jiowa a aota an epwe emmweni néún kewe aramas ngeni ewe fénú mi lingéch, Kanaan.

Nge Moses a apasa: ‘Ese wor itei me lein aramas. Epwe ifa usun ai upwe tongeni féri ei mettóch? Nge ika upwe feiló, ekkewe chón Israel repwe apasa ngeniei: “Ién a tiinuketo?” Iwe, met upwe apasa?’

Kot a pélúweni: ‘Iei ewe mettóch kopwe apasa. “JIOWA, ewe Koten Apraham, ewe Koten Isaak me ewe Koten Jakop a tiinieito ngenikemi.”’ Iwe, Jiowa a pwal apasa: ‘Ina itei tori feilfeiló chék.’

Moses a pélúweni: ‘Nge epwe ifa usun ika rese lúkúei lupwen upwe apasa pwe en ewe ka tiinieito?’

Kot a eisini: ‘Met ena lón poum?’

Moses a pélúweni: ‘Efóch wok.’

Kot a apasa: ‘Oturatiw lepwúl.’ Iwe, lupwen Moses a oturatiw, a wiliti emén serepenit. Mwirin, Jiowa a áiti ngeni Moses pwal eú manaman. A apasa: ‘Waalong poum lón úfom na.’ Moses a waalong, iwe lupwen a wawu, a fókkun pwech! A usun itá nge a úri ewe semmwen mi chou itan keinepan. Mwirin, Jiowa a ngeni Moses och manaman pwe epwe féri ewe aúlúngátin manaman. Iwe mwirin a apasa: ‘Ika kopwe féri ekkeei manaman, ekkewe chón Israel repwe lúkú pwe ngang ua tiinukoló.’

Mwirin Moses a ló lón imwan we, iwe a ereni Setiro: ‘Kese mochen kopwe mut ngeniei ai upwe liwiniti aramasei kewe lón Isip pwe upwe ppii ika ifa usur.’ Iwe, Setiro a kapong ngeni Moses, iwe Moses a poputááni an sái le liwinló ngeni Isip.