Jonatan A Pwora me Túppwél

Néún King Saul we mwánichi itan Jonatan, i emén soufiu mi pwora. Tafit a erá pwe Jonatan a fókkun mwittir lap seni emén ikel me a péchékkúl lap seni laion. Eú rán Jonatan a kúna 20 soufiun Filistia ra nóm wóón ewe chuuk. A ereni ewe chón uwei an pisekin maun: ‘Sipwe chék mauner iká Jiowa a ngenikich och esissil pwe sipwe maun. Iká ekkewe chón Filistia ra erenikich ach sipwe feitá, iwe sia silei pwe sipwele mauner.’ Ekkewe chón Filistia ra púchér le erá: ‘Ou feito sipwe fiu!’ Iwe ekkena rúúemén mwán ra feitá wóón ewe chuuk me ra okkufu ekkewe soufiu.

Pokiten Jonatan i néún Saul mwánichi, iwe itá úrúrún i epwe king mwirin. Nge Jonatan a silei pwe Jiowa a filaatá Tafit an epwe kingen Israel mwirin, nge ese lólówóiti. Jonatan me Tafit ra fókkun chiechiéchfengen. Ra pwonfengen pwe repwe túmúnúfengeniir me álillisfengen. Jonatan a ngeni Tafit úfan we, néún we ketilas, nikáppich, me an we penit pwe esissillen ar chiechifengen.

Atun Tafit a sú seni Saul, Jonatan a feiló ren me a ereni: ‘Kopwe apéchékkúlok, me kopwe pwora. Jiowa a filuketá pwe kopwe king. Pwal mwo nge semei we a silei ena.’ Ka mochen epwe wor chienom mi múrinné ussun chék Jonatan?

Fán chómmóng, Jonatan a atolonga manawan lón feiengaw pwe epwe álisi chienan we Tafit. A silei pwe King Saul a mochen nieló Tafit, ina popun a ereni seman na: ‘Epwe eú tipis ngonuk iká ka nieló Tafit. Ese wor met mi ngaw e ffér ngonuk.’ Saul a fókkun song ren Jonatan. Fite ier mwirin, Saul me Jonatan ra máló fán eú chék lón eú maun ra fiti.

Mwirin án Jonatan máló, Tafit a kútta néún Jonatan we át itan Mefiposet. Atun Tafit a kúna, a ereni Mefiposet: ‘Pokiten semom we a chiechiéch ngeniei, iwe úpwe túmúnuk lón ánein manawom. Kopwe nónnóm lón imwei imwen king me mwéngé wóón ái cheepel.’ Tafit ese fókkun ménúkaaló chienan we Jonatan.