Kapas Eis Seni Chón Állea

Pwata 2 Samuel 21:7-9 a erá pwe Tafit “a achika Mefiposet,” nge mwirin a ngeni ekkewe aramas pwe repwe nieló?

Ekkóch mi chék emwittiri ar álleani ei pwóróus ra fen eáni ena kapas eis. Nge ei pwóróus a fós usun rúúemén mwán iter Mefiposet, iwe ika sipwe etittina minne a fis sipwe tongeni káé eú lesen seni.

King Saul ewe kingen Israel, a wor fúmén néún át me rúúemén néún nengngin. Néún we mwánichi itan Jonatan. Mwirin, ena king a pwal néúni emén át itan Mefiposet me wóón Rispa úlúpwúlúwan we. Nge, Jonatan a pwal wor néún át itan Mefiposet. Ina popun, King Saul a wor rúúemén néún át iter Mefiposet, emén néún, me pwal emén néún néún.

King Saul a poputá le oputa ekkewe chón Kipeon iir mi nónnóm lein ekkewe chón Israel, me a sótun arosereló. A ffat pwe chómmóng me leir ra ninniiló. Iwe, met ena e féri ese fókkun pwúng. Pwata? Pokiten lón fansoun Josua we, ekkewe souemmwenin Israel ra féri eú pwonen etipeeúin kinamwe ngeni ekkewe chón Kipeon.​—Jos. 9:3-27.

Ena pwonen etipeeú a chúen wor manamanan lupwen King Saul a nemenem. Ena king a ú ngeni ena pwonen etipeeú ren an sótun arosaló ekkewe chón Kipeon. Pokiten ena féffér, “Saul me chon leimwan ra tipisin nimanau.” (2 Sam. 21:1) Ló, ló, ló, Tafit a wiliti king. Iwe, ekkewe chón Kipeon iir mi chúen manaw rese ninniiló, ra fós ngeni Tafit usun ena watteen féffér mi ngaw. Tafit a eisiniir ika met epwe eáni ácháchá fán iten án Saul we tipis, pwe Jiowa epwe tongeni efeiéchú ewe fénú. Ekkewe chón Kipeon rese tingor moni, nge ra tingor pwe Tafit epwe ngeniir ekkewe fúmén mwán néún Saul ewe mi ‘ekiekin arosereló’ pwe repwe nireló. (Num. 35:30, 31) Iwe, Tafit a tipeeú ngeni ar na tingor.​—2 Sam. 21:2-6.

Lón ena atun, Saul me Jonatan ra fen máló lón eú maun, nge néún Jonatan we át itan Mefiposet a chúen manaw. Mefiposet a peló pechen seni me lekúkkúnún lón eú ákseten, iwe ese fiti seman we chinnap lón an we sótun arosaló ekkewe chón Kipeon. Tafit a fen eáni eú pwonen pwipwi ngeni Jonatan, iwe ena pwon a efeiéchú mwirimwirin Jonatan kewe kapachelong néún we át Mefiposet. (1 Sam. 18:1; 20:42) Ewe Paipel a erá: “King Tafit a achika Mefiposet nöün Jonatan we, nge Jonatan nöün Saul, pokiten ewe pwon a fis fän iten ewe Samol mi Lapalap lefilen i me Jonatan.”​—2 Sam. 21:7.

Nge Tafit a chúen tipeeú ngeni án ekkewe chón Kipeon we tingor. Iwe a ngeniir rúúemén néún Saul kewe mwán, emén me leir itan Mefiposet, me a pwal ngeniir nimmén néún néún Saul kewe mwán. (2 Sam. 21:8, 9) Minne Tafit a féri a aúkatiw ewe tipisin nimanaw wóón ewe fénú.

Ei pwóróus, esap chék eú pwóróusen uruwo. A ffat met án Kot ei allúk a apasa: “Ekewe nau resap ninnila fän iten än semer tipis.” (Tut. 24:16) Jiowa ese tipeeú ngeni ninniilóón néún Saul kewe rúúemén mwán me néún néún kewe nimmén ika pwe iir rese fiti Saul lón met a féri. Ewe allúk a pwal apasa: “Iteiten eman me eman epwe ninnila fän iten püsin an tipis.” Iwe, usun néún Saul kana fúmén mi ninniiló, ra fiti lón an sótun arosaló ekkewe chón Kipeon. Pokiten ena, ekkena fúmén ra angei chappen ar féffér mi ngaw.

Ei pwóróus a áiti ngenikich pwe emén ese tongeni kúnetipingen le ekieki are apasa pwe a féri minne mi ngaw pokiten chék an fiti án emén éúréúr. Eú mwitún a apasa: “Kopwe akotöchü mine kopwe föri, mürin epwe fisiöch meinisin mine kopwe föri.”​—SalF. 4:24-27; Ef. 5:15.