Taniel A Nóm lón Pwangen Ekkewe Laion

A pwal wor emén kingen Papilon itan Tarius i chón Metia. Tarius a kúna pwe Taniel a sókkóló seni meinisin. A ewisa ngeni Taniel an epwe meilapen ekkewe mwán mi tekia lón ewe leeni. Ekkena mwán ra lólówóiti Taniel me ra mochen nieló. Ra silei pwe Taniel a iótek ngeni Jiowa fán úlúngát iteiten rán, iwe ra ereni Tarius: ‘Ám king, kopwe féri eú allúk pwe meinisin repwe iótek ngonuk chék. Ién chék ese álleasochisi óm we allúk epwe kóturulong lón pwangen ekkewe laion.’ Tarius a tipeeú ngeni met ra erá, me a sainei ewe allúk.

Atun chék Taniel a silei ussun ewe mineféén allúk, a feiló ren imwan we. A fótopwúkútiw me a iótek ngeni Jiowa ren asammwachoon we mi suuk. Ekkewe mwán mi lólówóiti ra téfocholong lón imwan we me ra kúna pwe a iótek. Ra feiló ren Tarius me ra ereni: ‘Taniel a álleasolapak. A ikkiótek ngeni an we Kot fán úlúngát iteiten rán.’ Tarius a sani Taniel me ese mochen an epwe máló. Unusen ewe rán, a sótun ekieki ifa ussun epwe álisi Taniel. Nge pwal mwo nge ewe king ese tongeni siwili ewe allúk a fen sainei. A ereni néún kewe chón angang fán osenimu ar repwe oturaalong Taniel lón pwangen ekkewe laion.

Lón ena pwinin, Tarius ese chúen tongeni annut pwe a aúreki Taniel. Lesossor, a ssáló ren ewe pwaang me a kéri Taniel: ‘Óm we Kot a túmúnuk?’

Tarius a rong méngúngúún Taniel! Taniel a ereni Tarius: ‘Néún Jiowa we chónláng a pinei awen ekkewe laion. Rese fókkun efeiengawaei.’ Tarius a fókkun pwapwa! A erá pwe repwe atowu Taniel seni ewe pwaang. Ese fókkun wor och kinás wóón inisin Taniel. Mwirin ewe king a allúkú: ‘Oupwe oturaalong ekkewe mwán re oturu Taniel lón ewe pwaang.’ Atun ekkena mwán ra kóturulong lón ewe pwaang, ekkewe laion ra ocheer.

Tarius a atowu ei allúk ngeni néún kewe aramas: ‘Meinisin repwe niwokkusiti án Taniel we Kot. A túmúnú Taniel seni ekkewe laion.’

Ka iótek ngeni Jiowa iteiten rán ussun chék Taniel?