Esra A Asukula án Kot Allúk

A fen 70 ier a ló seni ewe atun lape ngeni ekkewe chón Israel ra liwiniti Jerusalem, nge mi chúen wor ekkóch ra nóm lón sókkopaten kinikinin fénú mi nóm fán nemenemen Persia. Emén me leir, ina i ewe souasor itan Esra, ewe mi asukula án Jiowa Allúk. Esra a rong pwe ekkewe aramas lón Jerusalem rese álleasochisi ewe Allúk me a mochen feiló me álisiir. Ewe kingen Persia itan Artaksasta, a ereni: ‘Kot a etipáchemak pwe kopwe tongeni asukula an Allúk. Kopwe feiló, uwei chókkewe ka mochen ar repwe fituk.’ Esra a fós ngeni meinisin chókkewe mi mochen liwiniti Jerusalem. Ra tingorei Jiowa an epwe túmúnúúr lón ar sáittam, iwe ra ló.

Mwirin rúáánú maram, ra tori Jerusalem. Ekkewe néúwis ikena ie, ra ereni Esra: ‘Ekkewe chón Israel ra álleasolap ngeni Jiowa me pwúlúweni ekkewe fefin mi fel ngeni kot chofona.’ Iwe, met Esra a féri? Me mwen mesen ekkewe aramas, Esra a fotopwásukutiw me iótek: ‘Jiowa, en ka fen féri chómmóng mettóch fán item nge áúa tipis ngonuk.’ Ekkewe aramas ra áier, nge ra chúen féri ekkewe mettóch mi mwáál. Esra a filaatá ekkewe mwán me soukapwúng ar repwe angang wóón ekkena mettóch. Lón ekkewe úlúngát maram mwirin, chókkewe rese mochen fel ngeni Jiowa ra késúló seni ewe leeni.

Iei a engol me ruu ier a ló. Unusen ewe ttitin Jerusalem a fen wesiló. Ina popun Esra a emwichafengeni ekkewe chón Jus lón ewe leenien emwicheich pwe epwe álleani ngeniir án Kot we Allúk. Lupwen Esra a suuki ewe puk, ekkewe aramas ra útá. A mwareiti Jiowa, me ra eitietá péúr pwe epwe pwáári pwe ra tipeeú ngeni. Mwirin, Esra a álleani ewe Allúk me áweweei, iwe ekkewe aramas ra fókkun aúselingéch ngeni. Ra apasa pwe ra álleasolapa Jiowa, iwe ra kechiw. Lón ewe rán mwirin, Esra a pwal sópweeló le álleani ngeniir ewe Allúk. Iwe, ra silei pwe ekiseló chék repwele féri ewe Fetellapen Likachoch. Iwe, ra mwittir poputá le ammólnatá ngeni ena rán.

Lón ekkewe fisu ránin ewe fetellap, ekkewe aramas ra pwapwa me kilisou ngeni Jiowa ren an efeiéchú uwaan ar kewe atake. Seni fansoun Josua, ese wor eú Fetellapen Likachoch mi léllé ngeni ena. Mwirin ena ránin fetellap, ekkewe aramas ra kochufengen me iótek: ‘Jiowa, ka selánikem seni ám slave, amwéngéénikem lón ewe fénúapé, me ka fang ngenikem ei fénú mi múrinné. Nge fán chómmóng, áúa álleasolap ngonuk. Ka tiinaato soufós ar repwe fénékemi, nge áúse aúseling ngeniir. Iwe nge, ka chúen mosonottam ngenikem. Ka apwénúetá óm pwon ngeni Eperiam. Iei áúa pwon pwe áúpwe álleasochisuk.’ Ra makkeetiw met ra eáni pwon, me néúr kewe néúwis, chón Lifai, me néúr kewe souasor ra impwangei.