Jises A Echikara Aramas lón ewe Ránin Sapat

Ekkewe Farisi ra oput Jises me ra mochen aresini. Ra apasa pwe esap mumu ngeni an epwe echikara aramas lón ewe Sapat. Iwe lón eú ránin Sapat, Jises a kúna emén mwán mi chuun a tittingor wóón ewe al. A ereni néún kewe chón káé: ‘Oupwe katol ifa ussun án Kot manaman epwe álisi ei mwán.’ Jises a nofiti attufan ngeni och pwúl, me a toofi ngeni mesen ena mwán. Iwe Jises a ereni: ‘Kopwe feiló télú mesom lón ewe konikin Siloam.’ Ena mwán a féri ena, iwe a kerán kúna mwan.

Ekkewe aramas ra fókkun máirú. Ra apasa: ‘Esap pwe iei ewe mwán ekkan soun mwot me tingor wóón ewe al, iká pwal emén nge e chék taitap mesemeser?’ Nge ewe mwán a erá: ‘Ngang ewe mi chuun seni leuputiwei!’ Ekkewe aramas ra eisini: ‘Pwata kese chúen chuun?’ Atun a ereniir met a fis, ra uwealó ngeni ekkewe Farisi.

Ena mwán a ereni ekkewe Farisi: ‘Jises a toofi ngeni mesei och pwakak me a ereniei pwe úpwe feiló oresini. Iwe úa féri, iwe iei úa kúnaei.’ Ekkewe Farisi ra erá: ‘Iká Jises a echikara emén lón ewe ránin Sapat, iwe an manaman ese feito seni Kot.’ Nge ekkóch ra erá: ‘Iká an manaman ese feito seni Kot, iwe esap tongeni echikara aramas.’

Iwe ekkewe Farisi ra kéri semen me inen ena mwán me eisiniir: ‘Pwata néúmi we át a tongeni kúna iei?’ Seman kewe me inan ra niwokkus pokiten ekkewe Farisi ra erá pwe ié a lúkú Jises epwe towu seni ewe sinakok. Iwe ra erá: ‘Áúse silei. Oupwe pwisin eisini.’ Ekkewe Farisi ra kapas eis chómmóng ngeni ena mwán tori an a apasa: ‘Úa fen erenikemi meinisin met úa silei. Pwata oua chúen eis?’ Ekkewe Farisi ra song, iwe ra oturawu.

Jises a feiló kútta ewe mwán, me a eisini: ‘Ka lúkú ewe Messaia?’ Ewe mwán a erá: ‘Úpwe lúkú iká úa silei i ié.’ Jises a erá: ‘Ngang ewe Messaia.’ Esap pwe a mmen éch met Jises a féri? Ese chék echikara ena mwán nge a pwal álisi pwe epwe wor an lúkú.