Paul me Timoty

Timoty i emén alúwél Chón Kraist lón ewe mwichefel lón Listra. Seman we, i chón Krik, nge inan we i chón Jus. Inen Timoty we itan Iunis, me inan we chinnap itan Lois ra kan áiti ngeni ussun Jiowa seni chék lekúkkúnún.

Atun Paul a ló Listra lón an we oruuen sái lón an angangen misineri, a esilla pwe Timoty a fókkun tongei pwiin kewe Chón Kraist me a pwapwa le álisiir. Paul a etiwa Timoty an epwe fiti lón an sái. Ló, ló, ló, Paul a áiti Timoty an epwe emén chón afalafal mi lipwákéch me senseen ewe kapas allim.

Ewe ngún mi fel a emmweni Paul me Timoty ekis meinisin ia ra feiló ie. Lón eú pwinin, a wor kúnaen Paul ussun án emén mwán ereni an epwe feiló Masetonia me álisiir. Iwe, Paul, Timoty, Sailas, me Luk ra feiló ikena me afalafal me féraatá ekkewe mwichefel.

Lón ewe telinimw Masetonia lón Tesalonika, a chómmóng mwán me fefin ra wiliiti Chón Kraist. Nge ekkóch ekkewe chón Jus ra lólówóiti Paul me chienan kewe. Ra emwichafengeni eú kúmiin aramas me ra átekinaló ekkewe Chón Kraist ren ekkewe meilapen telinimw, me ra kékké fán léúwommóng: ‘Ekkeei mwán iir chón ú ngeni ewe mwúún Rom!’ Paul me Timoty ra nóm lón feiengaw, ina popun ra sú ngeni Perea atun a pwin.

Ekkewe aramas lón Perea ra pwapwa le káé ewe kapas allim, me ekkewe chón Krik me chón Jus ikena ra wiliiti Chón Kraist. Nge atun ekkóch chón Jus ra feito seni Tesalonika me efisi osukosuk, Paul a sú ngeni Aten. Timoty me Sailas ra nómotiw Perea pwe repwe apéchékkúla pwiir kewe Chón Kraist. Ekiseló mwirin, Paul a tiinaalósefál Timoty Tesalonika pwe epwe álisi pwiir kewe Chón Kraist pwe repwe likiitú fán ewe watteen riáfféúmwáál mi fis ikena. Ekiseló mwirin, Paul a tiinaaló Timoty pwe epwe chuuri ekkóch mwichefel an epwe apéchékkúler.

Paul a ereni Timoty: ‘Chókkewe mi mochen angang ngeni Jiowa repwe kúna riáfféúmwáál.’ Timoty a kúna riáfféúmwáál me a kalapus ren an lúkú. A pwapwa pwe a suuk ngeni an epwe ánneta an túppwél ngeni Jiowa.

Paul a ereni ekkewe chón Filipai: ‘Úpwe tiinaaló Timoty remi. Epwe áiti ngenikemi weween án emén fetál lón ewe enlet, me epwe asukulakemi lón ewe angangen afalafal.’ Paul a silei pwe a tongeni lúkúlúk wóón Timoty. Ren fite ier ra fókkun chiechiéch lón ar angangfengen.