Paul A Tiitiiló Ngeni Rom

Án Paul aúlúngátin sái lón an angangen misineri, a muchúló me lón Jerusalem. A ares me kóturulong lón kalapus me ikena ie. Atun a pwin a wor kúnaan, Jises a ereni: ‘Kopwe feiló Rom me afalafal ié.’ Paul a mwékút seni Jerusalem ngeni Seseria, ikewe a kalapus ie ren úkúúkún ruu ier. Atun Paul a kapwúng mwen mesen Governor Festus, a erá: ‘Úpwe feiló kapwúng ren Sisar lón Rom.’ Festus a erá: “Pokiten ka mochen án Sisar epwe apwúnguk, kopwe kapwúng ren Sisar.” Iwe, Paul a fiti efóch siip ngeni Rom, me chienan kewe Luk me Aristarkus, ra fiti.

Atun ra sái lemataw, a fis eú watteen mélúmél ren úkúúkún ruu wiik. Meinisin ra ekieki pwe repwele máló. Nge Paul a ereni ekkewe mwán wóón ewe siip: ‘A wor emén chónláng a ereniei lón ái we ttan: “Paul, kosap niwokkus. Kopwe feiló Rom me meinisin chókkewe mi etuk lón ei sái repwe kúna manaw.” Oupwe tipepwora! Sisap fókkun máló.’

A fis ewe mélúmél ren úkúúkún 14 rán. Iwe mwirin, ra kúna ewe fénú Malta. Ewe siip a ffan wóón óch me a tatakkis, nge meinisin ekkewe 276 aramas wóón ena siip ra manaw me tikeri fénú. Ekkóch ra chék á, nge ekkóch ra wawa iráán ewe siip me ra pase ngeni leppi. Ekkewe aramas lón Malta ra túmúnúúr me ra ékúetá eú ekkei pwe repwe ararer.

Úlúngát maram mwirin, ekkewe soufiu ra uwealó Paul ngeni Rom wóón pwal efóch siip. Atun a tori ikena, pwiin kewe Chón Kraist ra feiló chuuri. Atun Paul a kúner a kilisou ngeni Jiowa me a péchékkúletá. Inaamwo iká Paul i emén chón kalapus, nge a mumu ngeni an epwe nóm lón eú imw mi rent nge a wor emén soufiu mi mammasa. A nóm ikena ren úkúúkún ruu ier. Aramas ra kan ló chuuri me a kan afalafala ngeniir pwóróusen ewe Mwúún Kot me áiti ngeniir ussun Jises. Paul a pwal mak taropwe ngeni ekkewe mwichefel lón Eisia Minor me Jutia. Jiowa a néúnéú Paul le achéúfetálei ewe kapas allim ngeni mwú meinisin.