Manau Ren Ewe Allukun Kraist

“Oupwe uwoufengen ami chourek, iei usun oupwe apwonueta ewe allukun Kraist.”​—KALATIA 6:2.

1. Pwata sipwe tongeni era pwe ewe allukun Kraist, ina eu manaman fan iten minne mi murinno ikenai?

LON Rwanda, Hutu me Tutsi Chon Pwarata Jiowa ra tipeeu ngeni ar repwe kuna feiengau fan iten ar repwe selani chiener kewe seni ninniloon ekkewe einang mi nnifengennir lon ena fonu. Chon Pwarata Jiowa lon Kobe, Japan, ra fokkun letipechou ren an a pout senir attonger kewe lon eu chechchechin fonu. Iwe nge, ra muttir mwokutukut pwe repwe selani pwal ekkoch mi feiengau. Ewer, poraus mi murinno seni ekis meinisin won fonufan ra pwarata pwe allukun Kraist a angang ikenai. Ina eu manaman mi watte fan iten minne mi murinno.

2. Ifa usun Kristendom ese mirititi popunlapen ewe allukun Kraist, iwe, met sipwe tongeni fori pwe sipwe apwonueta ena alluk?

² Lon chok ena fansoun, eu oesini lon Paipel usun ekkeei “ranin le sopwolon” mi weires a pwonueta. Chommong ra eani “pwomen ewe manau mi fich ngeni Kot” nge ‘ra amam manamanan.’ (2 Timoti 3:1, 5) Akkaeuin lon Kristendom, aramas ra eani pwomen ar we pekin lamalam, nge ese wesewesen popu seni letiper. A ita wewe ngeni pwe a kon weires an aramas repwe manau ren allukun Kraist? Apw! Sap minne Jises epwe ngenikich eu alluk sisap tongeni alleasochisi. Kristendom a chok wewengaueiti allukun ewe Kraist. Ese auseling ngeni ekkeei kapas mi mak fan emmwenien ngun mi fel, a era: “Oupwe uwoufengen ami chourek, iei usun oupwe apwonueta ewe allukun Kraist.” (Kalesia 6:2) Sipwe “apwonueta ewe allukun Kraist” ren ach sipwe uwoufengenni ach kewe chourek, nge sap ren ach appiru ekkewe Farisi me apacha ngeni osen pwiich kewe.

3. (a) Ikkefa ekkoch alluk mi kapachelong lon ewe allukun Kraist? (b) Pwata epwe mwaal ach sipwe ekieki pwe esor lamoten ewe mwichefelin chon Kraist epwe eani ekkoch kapasen emmwen lukun ekkewe alluk Jises a pwisin isetiu?

³ A kapachelong lon allukun Kraist an Kraist Jises kewe alluk meinisin​—awewe chok, afalafal me asukul, tumunu pwe mesach epwe limelimoch me murinno, angang pwe sipwe kinamwefengen me chon oruch kewe, are atou foffor mi limengau seni me lon ewe mwichefel. (Mattu 5:27-30; 18:15-17; 28:19, 20; Pwarata 2:14-16) Enlet, Chon Kraist repwe wisen alleasochisi ekkewe alluk meinisin lon ewe Paipel mi weneiti chon appiru Kraist. Iwe, mei wor pwal ekkoch wiser. An Jiowa we mwicheich, pwal eu me eu mwichefel, repwe foratiu kapasen emmwen me kokkot mi lamot fan iten an epwe kokkotoch mwokutukutun ewe mwichefel. (1 Korint 14:33, 40) Popun, pun chon Kraist resap tongeni mwichefengen ika esor kapasen emmwen ren inet, ia, me ifa usun ar repwe forata ekkena mwich! (Ipru 10:24, 25) Ach alleasochisi ekkewe kapasen emmwen mi lamot mi foretiu ren chokewe mi seikita lon ewe mwicheich a pwal kapachelong lon ewe allukun Kraist.​—Ipru 13:17.

4. Ifa ewe minen amwokutu fel mi enlet?

⁴ Iwe nge, chon Kraist mi enlet resap mut ngeni ar fel an epwe wiliti eu pinukun alluk mi lamot-mwaal. Rese angang ngeni Jiowa pokiten chok emon aramas are mwicheich a erenir ar repwe fori. Iwe nge, tong epwe amwokutur ar repwe fel ngeni. Paul a makkei: “Ewe tongen Kraist a nemenikich.” (2 Korint 5:14, footnote) Jises a alluku ngeni noun kewe chon appiru pwe repwe tongfengen lefiler. (Jon 15:12, 13) Tong mi enlet, ewe esin tong ese ekieki chok pwisin i, ina longolongun ewe allukun Kraist, iwe, epwe amwokutu chon Kraist ekis meinisin, lon ewe famili pwal lon ewe mwichefel. Sipwe pi ifa ussun.

Manau ren Allukun Kraist lon ewe Famili

5. (a) Epwe ifa usun ekkewe sam me in repwe apwonueta ewe allukun Kraist lon imwer kewe? (b) Met a lamot ekkewe sam me in repwe awora ngeni nour kewe semirit, iwe, ikkefa ekkoch minen eppet ekkewe sam me in repwe pworaiti fan iten ar repwe awora?

⁵ Ewe aposel Paul a makkei: “Ami mwan kena, oupwe tongei puluemi, usun chok Kraist a tongei ewe mwichefel, o a pwisin fangelo manauan fan asengesin i.” (Efisus 5:25) Lupwen emon mwan pupulu epwe appiru Kraist me foffor murinno ngeni puluwan ren tong me mirit, epwe apwonueta eu kinikinin ewe allukun Kraist mi lamot chapur. Pwal eu, Jises a pwarata an tongei kukkun semirit, a foropacher, iseta poun wor, me efeiochur. (Mark 10:16) Ekkewe sam me in mi apwonueta ewe allukun Kraist repwe pwal pwarata ar tongei nour kewe semirit. Pwungun, a wor ekkoch sam me in ra kuna weires le appiru Jises lon ena mettoch. Ekkoch rese tongeni pwarata ar kewe memmef. Ami kana sam me in, ousap mut ngeni ena sokkun lapalap an epwe eppetikemi seni ami pwarata ngeni noumi kewe semirit ami tong! Esap naf pwe ami oupwe silei pwe oua tongei noumi kewe semirit. A lamot repwe pwal silei. Iwe, resap silei ika ousap pwarata ami tong ren ami foffor.​—Alollo ngeni Mark 1:11.

6. (a) A lamot ngeni semirit kapasen emmwen seni semer kewe me iner, iwe, pwata kopwe polueni ina usun? (b) Met popun semirit repwe weweiti pwe a lamot allukun imwer? (c) Met sokkun minen efeiengau sipwe ttielo senikich lupwen ewe allukun Kraist epwe nemenem lon imwach?

⁶ Iwe, a pwal lamot ngeni semirit kapasen emmwen me fon, weween pwe semer kewe me iner repwe isetiu ekkoch alluk me apwonueta ekkena alluk fan ekkoch ren ar emiritir. (Ipru 12:7, 9, 11) Ina minne, a lamot ngeni semirit alillis ekis me ekis pwe repwe kuna popunlapen ekkena alluk: semer kewe me iner ra tonger. Iwe, a fokkun lamot ar repwe silei pwe tong, ina ewe popunlapen ar repwe alleasochisi semer kewe me iner. (Efisus 6:1; Kolose 3:20; 1 Jon 5:3) Emon sam me in mi mirit epwe achocho le aiti ngeni nour kewe ar repwe aea ar “tufichin ekiek” pwe repwe pwisin filioch. (Rom 12:1; alollo ngeni 1 Korint 13:11.) Iwe nge, esap kon chommong ekkewe alluk are kon weires ewe fofforun emirit. Paul a apasa: “Ami sam kena, ousap asonga noumi, pwe rete apilukingau.” (Kolose 3:21; Efisus 6:4) Lupwen ewe allukun Kraist epwe nemenem lon eu famili, lingeringer are kapas mi kirikiringau esap eti ar fofforun emirit. Lupwen epwe ina usun, semirit ra mefi lukulukoch me pochokkul, nge sap letipechou are apilukingau.​—Alollo ngeni Kol Fel 36:7.

7. Ifa ussun ekkewe imwen Bethel ra kan isetiu eu leenien appiru ren ar foratiu ekkoch kapasen emmwen fan iten chon le imwer kewe?

⁷ Ekkoch mi fen visit ekkoch imwen Bethel lon ekkoch fonu ra apasa pwe ra isetiu eu leenien appiru mi murinno ren ar itepok me ruuepek ren ar foratiu ekkoch alluk fan iten ar kewe Bethel famili. Inaamwo ika chon Bethel, ir watte meinisin, nge ra usun chok chon eu famili.a A fokkun chommong angang a kan fis lon ekkewe Bethel, ina popun, a pwal lamot an epwe wor chommong kapasen emmwen me alluk, lap seni an epwe wor lon an aramas kewe famili. Iwe nge, ekkewe elter mi eani wis lon ekkewe imwen Bethel, ekkewe ofes, me leenien for puk ra achocho le apwonueta ewe allukun Kraist. Ra mefi pwe ina wiser ar resap chok akkotaochu ewe angang nge repwe pwal apochokkulata lein chiener kewe ar feffeita lon pekin ngun me ar eani “pwapwan Jiowa.” (Nehemiah 8:10) Ina minne, ra achocho le fori mettoch meinisin pwe epwe apochokkulata ekkewe chon angang lon eu lapalap mi pwarata mirit. (Efisus 4:31, 32) Ina minne ewe ngunun pwapwa a choufetal lein Bethel famili!

Lon ewe Mwichefel

8. (a) Met sipwe achocho ngeni fansoun meinisin lon ewe mwichefel? (b) Fan met sokkun lapalap ekkoch aramas ra tingor alluk are sotun foratiu alluk?

⁸ Lon ewe mwichefel sipwe pwal mochen aufichieta emon me emon lon ewe ngunun tong. (1 Tesalonika 5:11) Iwe, chon Kraist meinisin repwe tumunu pwe resap apacha ngeni osen pwiir kewe ren ar wisen filita met pwiir kewe repwe eani ekiek nge ita emon me emon epwe wisen filata. Fan ekkoch, ekkoch ra mak ngeni ewe Watch Tower Society me tingorei kapasen emmwen ren porausen met repwe eani ekiek usun ekkoch kachito, puk, me pwal mwo nge minen urumot. Iwe nge, ewe Society esap wisen chosani ekkena mettoch me apwungur. Lon lap ngeni ekkena poraus meinisin, emon me emon are mokuren ewe famili epwe wisen filata, nge epwe alongolong won an tongei ekkewe kapasen emmwen lon Paipel. Pwal ekkoch ra sotun siwili an ewe Society kewe kapasen emmwen ngeni alluk. Awewe chok, lon ewe Watchtower, minen March 15, 1996, a wor eu lesen mi murinno a pesei ekkewe elter ar repwe chuchuuri chon ewe mwichefel usun chok chon masen siip. A ita forata alluk? Apw. Inaamwo ika ir kewe mi tongeni alleasochisi ena kapasen emmwen ra kuna chommong feioch, nge ekkoch elter rese tongeni fori. Pwal eu, ewe poraus, “Kapas Eis Seni Chon Allea” lon ewe Watchtower, minen April 1, 1995, a ouroura usun an aramas sufolungaueiti ewe fansoun papatais ren ar lu seni minne mi fich, awewe chok, ren ar fori pari are minen apwapwa ese fich. Ekkoch ra wewengaueiti ena kapasen fon mi asimau me foratiu eu alluk pwe epwe mwaal ach sipwe tinalo echo kato ngeni emon mi keran papatais!

9. Pwata a lamot ach sisap kon akkapii me apwungu pwiich kewe?

⁹ Pwal ekieki pwe ika “ewe allukun ngaselo mi unusoch” epwe nemenem leich, sipwe nguuri ewe poraus pwe miritin letipen emon me emon chon Kraist ese wewe chok. (Jemes 1:25) Sipwe ita osukosuk ika aramas repwe pwisin filata ar mochen ika rese atai an Paipel kewe kapasen emmwen? Apw. Ach fori ena epwe efisata tipefesen. (1 Korint 1:10) Lupwen Paul a ourourakich pwe sisap apwungu chienach kewe chon Kraist, a apasa: “Atewe epwe uta are turutiu fan mesen an we chok Samol. Iwe, epwe uta, pun Jiowa a tongeni auta i.” (Rom 14:4) Sipwe tongeni aletipengaua Kot ika sipwe apwungu emon usun och mettoch sipwe ita likiti ngeni miritin letipen emon me emon.​—Jemes 4:10-12.

10. Io kewe ra seikita pwe repwe mammasa ewe mwichefel, iwe, ifa usun sipwe alisir?

¹⁰ Sipwe pwal chechemeni pwe ekkewe elter ra seikita pwe repwe mammasa noun Kot kewe siip. (Fofor 20:28) Ina wiser ar repwe awora alillis. Sipwe tongeni arap ngenir me tingor kapasen fon, pun ir chon kaeo ewe Paipel me ra silei minne a mak lon ewe puk mi peres ren ewe Watch Tower Society. Lupwen ekkewe elter ra kuna foffor mi tongeni emmwen ngeni an emon purei emmwenien ewe Paipel, repwe pwora le awora kapasen fon. (Kalesia 6:1) Sipwe apwonueta allukun ewe Kraist ren ach sipwe tipemecheres le alleasochisi ekkena chon mas, ir kewe mi wisen emmweni ewe mwichefel.​—Ipru 13:7.

Ekkewe Elter Ra Apwonueta ewe Allukun Kraist

11. Ifa ussun ekkewe elter ra kan apwonueta ewe allukun Kraist lon ewe mwichefel?

¹¹ Ekkewe elter ra fokkun mochen apwonueta ewe allukun Kraist lon ewe mwichefel. Ra wisen emmweni ewe angangen afalafala ewe kapas allim, kait ngeni aramas seni Paipel pwe repwe tikeri letiper, iwe, ekkena chon masen siip mi tong me kirokiroch ra kapas ngeni “aramas mi letipechou.” (1 Tesalonika 5:14) Ra ti senir ewe sokkun ekiek ese popu seni Kraist mi nom lon chommong an Kristendom kewe lamalam. Pwungun, ei otot epwe muttir morolo, me usun chok Paul, ekkewe elter repwe tongeni mefi aurek fan iten ewe pwiin siip; nge ra achocho le amwochu ar itepok me ruuepek atun repwe angang won ekkena osukosuk.​—2 Korint 11:28.

12. Lupwen emon chon Kraist epwe kutta alillis seni emon elter, met ewe elter epwe fori?

¹² Awewe chok, eni emon chon Kraist epwe mochen fos ngeni emon elter usun eu poraus mi lamot nge esor och wokisin seni Paipel mi wesewesen weneiti are epwe lamot ar repwe atipeeufengenni ekkoch kapasen emmwen mi sokkofesen. Neman lon an we leenien angang epwe tongeni angei eu wis tekia me awattei peioffun nge epwe pwal watteta wisan kewe. Are, semen emon chon Kraist sarafo mi ese luku a echimwa noun we an epwe fori och mettoch mi tongeni u ngeni an angangen afalafal. Fan ekkena lapalap ewe elter esap apasaou pwisin an memmeef. Iwe nge, epwe suuki ewe Paipel me alisi atewe an epwe ekieki ussun ekkewe kapasen emmwen lon Paipel mi weneiti ewe poraus. Epwe tongeni nounou ewe Watch Tower Publications Index, ika mei tufich, pwe epwe kutta met “ewe chon angang mi tuppwol me tipatchem” a fen apasa ussun ewe itelap lon The Watchtower me ekkewe ekkoch puk. (Mattu 24:45) Iwe, met epwe fis ika minne ewe chon Kraist epwe filata mwirin esap tipatchem me ren ewe elter? Ika minne a filata ese u ngeni an Paipel kewe kapasen emmwen are alluk, ewe chon Kraist epwe kuna pwe ewe elter a esinna an atewe pwung an epwe pwisin filata, pun a silei pwe “emon me emon epwe uwei en me osan.” Iwe nge, ewe chon Kraist epwe chechemeni pwe “minne emon epwe fotukatiu, iei chok epwe pwal kini.”​—Kalesia 6:5, 7.

13. Met popun ekkewe elter repwe alisi pwiich kewe ar repwe eani ar tufichin ekiek ussun ar kewe osukosuk, nge resap pwisin polueni kapas eis are uwawu pwisin ar ekiek?

¹³ Pwata ewe elter mi asimau epwe fori ena? Mei wor ruu popun. Aeuin, Paul a ereni eu mwichefel pwe esap i ‘samolun ar luku.’ (2 Korint 1:24) Ewe elter epwe appiru ekiekin Paul ren an epwe alisi pwiin we pwe epwe ekiek won ekkewe wokisin lon Paipel me pwisin filata me ren minne a fen silei. A esinna pwe mei aukuk an nemenem usun chok Jises a esinna pwe mei aukuk an nemenem. (Luk 12:13, 14; Juta 9) Iwe, ekkewe elter repwe pwal awora alillis ren kapasen fon seni Paipel, iwe, fan ekkoch epwe pochokkul. Oruuan, ewe elter epwe emiriti chienan chon Kraist. Ewe aposel Paul a era: “Mongo pochokkul a och ngeni aramas asimau, ngeni ir ekkewe ra fen akaoren ngeni ir pwe repwe tongeni esinna lefilen minne mi murinno o minne mi ingau.” (Ipru 5:14) Iwe, ika sipwe feffeita ngeni asimau, epwe lamot ach sipwe aea ach tufichin ekiek, nge sisap apilukuluku pwe pwal emon epwe wisen filata fan asengesich. Ren an aiti ngeni chienan we chon Kraist ifa usun an epwe ekiek won ekkewe wokisin lon Paipel, ewe elter epwe alisi an epwe feffeita.

14. Epwe ifa ussun chon Kraist mi asimau repwe pwarata pwe ra lukuluk won Jiowa?

¹⁴ Sipwe tongeni luku pwe Jiowa Kot ren an we ngun mi fel epwe amwokutu letipen chon fel mi enlet. Ina minne, chon Kraist mi asimau repwe kapas ngeni pwal pesei letipen pwiir kewe, usun chok ewe aposel Paul a fori. (2 Korint 8:8; 10:1; Filemon 8, 9) Paul a silei pwe epwe akkaeuin lamot ngeni ir kewe rese pwung, nge sap ngeni ir kewe mi pwung, alluk mi titchik fan iten ar repwe foffor murinno. (1 Timoti 1:9) A pwarata an luku pwiin kewe nge esap apilukingau are tipemwaramwar. A mak ngeni eu mwichefel: “Am aia chok lukukemi lon ewe Samol.” (2 Tesalonika 3:4) An Paul luku, lukuluk, me apilukuluk a wesewesen amwokutu ekkena chon Kraist. Ekkewe elter me overseer mi saifetal ikenai repwe pwal achocho ngeni ena. A ifa me watten alillisoch ekkena mwan mi tuppwol ra awora, atun repwe mammasa noun Kot kewe siip ren tong!​—Aisea 32:1, 2; 1 Piter 5:1-3.

Manau ren ewe Allukun Kraist

15. Ikkefa ekkoch kapas eis sipwe eisini pwisin kich pwe sipwe pi ika sia kan apwonueta ewe allukun Kraist lon ach foffor ngeni pwiich kewe?

¹⁵ A lamot ngenikich meinisin ach sipwe chosani pwisin kich iteitan pwe sipwe pi ika sia kan manau ren me apochokkulata ewe allukun Kraist. (2 Korint 13:5) Enlet, kich meinisin sipwe feioch ren ach kapas eis: ‘Ngang ua kan aufichieta aramas are akkapir? Ngang mi itepok me ruuepek are kon ssenuk? Ngang ua ekieki usun ekkewe ekkoch are fori chok ai kewe mochen?’ Emon chon Kraist esap sotun nemeni met pwiin we epwe fori are esap fori lon ekkewe poraus ese ffatalo lon ewe Paipel.​—Rom 12:1; 1 Korint 4:6.

16. Epwe ifa ussun sipwe tongeni alisi ir kewe mi eani ekiek mi ingau ussun pwisin ir me apwonueta eu kinikinin ewe allukun Kraist mi fokkun lamot?

¹⁶ Lon ekkeei ran mi weires, a lamot pwe kich sipwe kukkutta ifa usun sipwe apochokkulafengennikicheta. (Ipru 10:24, 25; alollo ngeni Mattu 7:1-5.) Lupwen sipwe nennengeni pwiich kewe, esap lamot ngenikich ar kewe lapalapoch nge sap ar kewe apwangapwang? Ngeni Jiowa, emon me emon mi auchea. Solapan pwe sap meinisin ra mefi ina usun, pwal mwo nge usun pwisin ir. Chommong ra chok kuna pwisin ar kewe apwangapwang me mwaal. Ren ach sipwe apochokkulereta, sipwe tongeni sotun fos ngeni emon are ruuemon lon eu me eu mwich, aiti ngenir met popun sia kan aucheani ar nonnom me minne ra awora ngeni ewe mwichefel? A ifa me apwapwan ach sipwe alisir le uwei en me osan me apwonueta ewe allukun Kraist!​—Kalesia 6:2.

Ewe Allukun Kraist A Kan Angang!

17. Ren minne ka kuna, ifa ussun ewe allukun Kraist a kan akkangang lon om we mwichefel?

¹⁷ Ewe allukun Kraist a kan akkangang lon ewe mwichefelin chon Kraist. Sia kukkuna iteiten ran​—lupwen chienach kewe chon Pwarata ra tinikken le pwarata ewe kapas allim, lupwen ra aururufengennir me apochokkulafengennir, lupwen ra achocho le angang ngeni Jiowa fan osukosuk watte, lupwen ekkewe sam me in ra achocho le amarata nour kewe ar repwe tongei Jiowa ren letiper mi pwapwa, lupwen ekkewe elter ra afalafala an Kot we Kapas ren tong me kirokiroch, me peppesei ekkewe siip ar repwe tinikken le angang ngeni Jiowa tori feilfeilo chok. (Mattu 28:19, 20; 1 Tesalonika 5:11, 14) Lupwen emon me emon leich sipwe anganga ewe allukun Kraist lon pwisin manauach, a kan apwapwai letipen Jiowa! (An Salomon Fos 23:15) A mochen ir meinisin mi tongei an we alluk mi unusoch ar repwe kuna manau esemuch. Lon ewe Paratis epwe feito, sipwe kuna eu fansoun lupwen aramas repwe unusoch, eu fansoun esap wor chon atai alluk, me eu fansoun lupwen iteiten ekiekin letipach epwe nonnom fan nemeniach. Ina eu liwinich mi murinno pun sia mammanau ren ewe allukun Kraist!

[Footnote]

Met Ka Kan Ekieki?

◻ Pwata Kristendom ese mirititi popunlapen ewe allukun Kraist?

◻ Epwe ifa ussun sipwe apwonueta ewe allukun Kraist lon ach kewe famili?

◻ Met sipwe ttielo senikich ika sipwe apwonueta allukun Kraist lon ewe mwichefel, me met sipwe fokkun fori?

◻ Epwe ifa ussun ekkewe elter repwe alleasochisi ewe allukun Kraist lon ar kewe foffor ngeni chon ewe mwichefel?