An Chon Kraist Awasolaoch Lon Ei Fonufan Mi Kinikinfesen

“Ina minne, wisach ach sipwe awasolaochu ekkena sokkun aramas, pwe sipwe wiliti chiener chon angang lon ewe enlet.”​—3 JON 8.

1. Ikkefa ekkewe liffang mi fokkun auchea ewe Chon Forikich a fen ngeni aramas?

“ESAP WOR och mettoch mi murinno ngeni aramas lap seni ar repwe mongo o un fan pwapwa. Mwirin ra pwal tongeni pwapwa lon ar angang weires lupwen ranin manauer Kot a ngenir fan ewe akkar.” (Än Salomon Afalafal 8:15) Ren ekkena kapas ewe re Ipru lom, nge i ewe sou amwicha aramas, a erenikich pwe sap minne Jiowa Kot a chok mochen pwe aramas repwe chengel me pwapwa, nge a pwal awora ekkewe mettoch pwe repwe ina ussun. Lon uruwo meinisin, a ussun ita nge aramas ekis meinisin ra mochen ar repwe pwapwafengen me kunoufengen.

2. (a) Ifa ussun aramas ra fen turunufasei minne Jiowa a akkota fan asengesir? (b) Met a fen fisilo mwirin?

² Ikenai sia manau lein aramas mi kukutta pwisin letiper, iwe, ra kan chechei ekkewe minen apwapwa me fansoun kunou. A kon lap me lein aramas ar ra fen wiliiti “chon tongei pwisin ir, . . . chon tongei minen apwapwa nge esap ir chon tongei Kot,” ussun an ewe Paipel oesini. (2 Timoti 3:1-4) Pwungun pwe ina eu mettoch mi fokkun mwaalfesen me minne Kot a akkota. Lupwen aramas repwe manau fan iten ar repwe chei fansoun apwapwa chok, are lupwen repwe kutta apwapwaan inisir chok, iwe, esap nom rer pwapwa me kinamween letip mi enlet, me ‘mettoch meinisin mi poon chok, me a ussun ar chechei asepwal.’ (Än Salomon Afalafal 1:14; 2:11) Ina ewe popun fonufan a ur ren aramas mi metip me lichipung, iwe mwirin, ra kan efisata chommong osukosuk. (Än Salomon Fos 18:1) Aramas ra kan akamosonfengen lefiler, me ra kan kinikinfesen pokiten an a sokkofesen aluwen unucher, ar lewo, nonnomur, me tufichin manauer.

3. Epwe ifa ussun sipwe tufichin kuna chengel me kinamween letipach mi enlet?

³ Epwe ifa sokkoloon nonnomun aramas ika repwe appiru fofforun Jiowa, weween, ika repwe eani kirokiroch, kisaseu, me awasolaoch! A affata pwe sap minne pwapwa mi enlet a longolong won ach achocho le apwonueta pwisin mochenich. Nge iei ewe mettoch alongolong won: “Pwapwaan liffangolo a lap seni pwapwaan angei.” (Fofor 20:35) Ren ach sipwe kuna chengel me pwapwa mi enlet, sipwe pworaiti ekkewe minen pinepin me minen kinikinfesen mi tufichin eppetikich. Sipwe pwal achocho le alisi ekkewe mi fitikich lon ach angang ngeni Jiowa. A wesewesen lamot ach sipwe apwonueta ei fon: “Ina minne, wisach ach sipwe awasolaochu ekkena sokkun aramas, pwe sipwe wiliiti chiener chon angang lon ewe enlet.” (3 Jon 8) Ruu sokkun feioch epwe toto rech ika sipwe awasolaochu aramas ukukun ach tufich, weween, kich pwisin sipwe feioch me ir kewe sipwe awasoler repwe feioch. Iwe, io ekkena mi fich ngenir ach sipwe ‘awasolaochu’?

“Tuttumunu Semirit mi Masen me Ekkewe Fefin mi Ma Senir Puluwer”

4. Met sokkun siwil lon ririin famili a fen pwalo lein pwal mwo nge noun Jiowa kewe aramas?

⁴ Ikenai, ese kon lien wor famili mi lukulukoch me pupulu mi pwapwa. Won unusen fonufan, lapaloon mufesen me chommongoloon ekkewe fefin mi nounou, iwe nge, rese pupulu, a fen wesewesen siwili lapalapen ewe famili. Ina minne, chommong mi fen wiliiti Chon Pwarata Jiowa lon ekkewe ier mi kanoto ra feito seni ekkewe famili mi fen tatiu. Eli ir mi mufesen are nomfesen seni puluwer kewe, are, ir mi alaemon chok le atufichi ar famili. Ussun Jises a fen pwal oesini, ewe poraus enlet i mi esileilo a fen efisata kinikinfesen lon chommong famili.—Mattu 10:34-37; Luk 12:51-53.

5. Me ren alon Jises, met epwe tongeni apochokkula ekkewe mi nom lon famili mi kinikinfesen?

⁵ Letipach a kan pwapwata ren ach kuna ekkewe mi keran tolong lon ewe enlet ar ra uppwos lon, me fan chommong sia apochokkulereta ren ach awewei ngenir ei pwon seni Jises: “Enlet, upwe apasa ngenikemi, pwe ese mwo wor emon a likitalo imwan, are pwiin kewe, are mongean kewe, are inan, are seman, are noun kewe, are fonuan kewe, pokitei pwal ewe kapas allim, nge esap angei fan ipuku iei, imw, pwal pwiin, mongean, inan, noun, o fonufan, eti riaffou, nge lon ewe fansoun epwe feito, epwap angei manau esemuch.”​—Mark 10:29, 30.

6. Epwe ifa ussun sipwe tongeni wiliiti ‘pwiin, mongean, fefinen, inen, me noun’ ekkewe “semirit mi masen me fefin mi ma senir puluwer” mi nom leich?

⁶ Nge, ‘pwiin, me fefinan, me mongean, me inan, me noun’ ra wewe ngeni io? Ach kuna chommong aramas lon eu Kingdom Hall, nge fan chommong ra tori ipuku are lap seni, me ar apasa pwe ir brother me sister, esap ina ewe mettoch mi ammef ngeni emon pwe ir pwiin, fefinan, mongean, inan, are noun. Ekieki mwo ei mettoch: Ewe chon kaeo Jemes a achema ngenikich pwe Jiowa epwe pwapwa ren ach fel ngeni i ika sipwe ‘tuttumunu ekkewe mi masen me ekkewe fefin mi malo senir puluwer lon ar riaffou me tumunukich pwe esap nom rech tikitikippwulun fonufan.’ (Jemes 1:27) A wewe ngeni pwe sisap mut ngeni ekiekin fonufan, awewe chok ren lamalam tekia ren pisekisekin fonufan are ren ach nom lon tettelin aramas tekia, an epwe apungalo asamach, asamen tong ngeni ekkena “semirit mi masen me fefin mi malo senir puluwer.” Nge sipwe tinikken le chiechi ngenir me awasolaochur.

7. (a) Ifa wesewesen popun ach sipwe awasola “semirit mi masen me fefin mi ma senir puluwer”? (b) Pwal io epwe tongeni eani an chon Kraist awasolaoch?

⁷ Sap minne fansoun meinisin ach awasolaochu “semirit mi masen me fefin mi ma senir puluwer” a wewe ngeni ach alisir ren osupwanger lon pekin aion. Eli ekkewe mi alaemon le tumunu ar famili are ekkewe famili mi kinikinfesen pokiten lamalam rese osupwang ren tufichin manauer. Iwe nge, mi auchea ngeni aramas chiechi mi murinno, ewe sokkun riri mi fis lon famili, chiechi ngeni aramas mi sokkopat ierir, me ar aeafengenni mettoch mi murinno lon pekin ngun. Ika sipwe chechemeni pwe sap minne a lamot an epwe kawor chommong mettoch, nge a chok lamot ewe ngunun tong me tipeeu, iwe, epwe fokkun murinno ika ekkewe pwal mwo nge “semirit mi masen me fefin mi ma senir puluwer” repwe pwarata awasolaoch ngeni chiener kewe chon Kraist!​—Alollo ngeni 1 Kings 17:8-16.

Mei Wor Chon Ekis Leich?

8. Met sokkun siwil a pwalo lon chommong mwichefelin Chon Pwarata?

⁸ Sia manau lon eu fansoun lupwen chommong aramas ra kan mwokut seni wesetan fonuer. World Press Review a apasa pwe “Lap seni 100 million aramas won unusen fonufan, ir chon ekis lon ekkewe fonu ra nonnom lon, me 23 million, ir chon siamu lon wesetan fonuer.” Pokiten ena mettoch, a fen fisilo pwe lon chommong leeni, nge akkaewin, lon ekkewe telinimw watte, chon ekkewe mwichefelin noun Jiowa kewe aramas ra feito seni chommong fonu, nge me lom, a kon lap me leir, ir chon eu chok lewo are fonu. Eli a enlet ena lon leeniom. Iwe nge, epwe fet ach ekiek usun ekkena “chon ekis” me “chon eifen won”, pwe a ina ussun an fonufan eiten ngenir, a sokkolo senikich ar fos, ar eoreni, me nonnomur?

9. Ifa ussun ach ekiek ussun “ekkewe chon ekis” epwe tongeni rikilo ngeni minne ese pwung?

⁹ Sipwe chok apasa pwe sisap mut ngeni ewe sokkun niuokkus ngeni chon ekis an epwe ameef ngenikich pwe mi chok fich ngenikich ach sipwe silei ewe enlet lap seni chokewe mi feito seni och fonuen ekis are fonuen lukun, me sisap ita meefi pwe ese kon lien och an ekkena warefo aea ewe Kingdom Hall are pwal ekkoch leeni. Ewe aposel Paul a achema ngeni ekkoch chon Kraist mi eani ena sokkun ekiek lon ewe aewin senturi, nge ir chon Jus, pwe ese fokkun fichiti emon an epwe kuna chen, nge umoumochun Kot a atufichi an aramas kuna amanau. (Rom 3:9-12, 23, 24) Sipwe ita meefi chengel pwe iei umoumochun Kot a tottori chommong aramas mi ppet seni ar repwe rong ewe poraus allim me lom. (1 Timoti 2:4) Ifa ussun sipwe tongeni pwarata pwe sia efichir seni wesewesen letipach?

10. Ifa ussun sipwe tongeni pwarata pwe sia kan enletin awasolaoch ngeni ekkewe “chon ekis” leich?

¹⁰ Sipwe tongeni apwonueta ei fon seni Paul: “Oupwe etiwa lefilemi emon me emon ussun chok Kraist a etiwakemi ngeni lingen Kot.” (Rom 15:7) Pokiten ach weweiti pwe fan chommong chon ekkewe fonuen ekis ra kan osupwang, sipwe ita pwarata ngenir kirokiroch me tong ika sia tufich ngeni. Sipwe ita etiwer leich, eani ewe ekiek pwe ir mi “ussun chon wilippwosun fonuach,” me “tonger ussun ach tongei pwisin kich.” (Lifitikos 19:34) Eli esap mecheres ach sipwe ina ussun, nge sipwe tongeni apwonueta wisach ika sipwe chechemeni ei fon: “Ousap appiru pwomwen fonufan, nge oupwe wiliilo ren asefosefallin letipemi, pwe oupwe pwarata minne letipen Kot, minne mi murinno o fich o unusoch.”​—Rom 12:2.

Awasolaochu Ekkewe mi Fel

11, 12. Met sokkun alillis mi kkolo a kawor ngeni ekkoch noun Jiowa chon angang lon (a) Israel lom (b) ewe aewin senturi?

¹¹ Lein ekkewe mi enletin fichitir ach sipwe ekiekir me awasolaochur, a wor chon Kraist mi asimau, nge ra mmen angang weires le alisikich lon pekin ngun. Jiowa a awora och alillis mi kkolo aucheaan fan iten ekkewe samol fel me chon Lifai lon Israel lom. (Numbers 18:25-29) Lon ewe aewin senturi, a wor kapasen pesepes ngeni ekkewe chon Kraist pwe repwe tumunu chokewe mi angang ngenir lon ekkoch wis mi kkolo aucheaar. Ewe poraus lon 3 Jon 5-8 a mwar ekis awewei ngenikich ewe ririin tong mi nom lefilen ekkewe popun chon Kraist.

¹² Ewe aposel mi chinnap itan Jon a fokkun aucheani ewe kirokiroch me awasolaoch Kaios a pwarata ngeni ekkewe brother mi titiilo pwe repwe chuuri ewe mwichefel. Kaios ese kan sissilei ekkena brother me mwan, pachelong Temetrius, nge neman i mi wisen uwei ewe taropwe. Nge Kaios a awasolaochur pun “ra titiilo fan asengesin iten [Kot].” A iei ussun makkeien Jon: “Ina minne, wisach ach sipwe awasolaochu ekkena sokkun aramas, pwe sipwe wiliiti chiener chon angang lon ewe enlet.”​—3 Jon 1, 7, 8.

13. Ikenai, ion leich mi akkaewin fichitir ar repwe ‘kuna awasolaoch’?

¹³ Ikenai, lon an Jiowa mwicheich, a wor chommong mi angang weires fan iten unusen ewe mwicheichen pwipwi. A kapachelong ekkewe elter mi saifetal, nge ra aea ar fansoun me ar pochokkul iteiten wiik pwe repwe apochokkula ekkewe mwichefel. A wor ekkewe misineri mi lo seni ar kewe famili me chiener kewe pwe repwe afalafal lon fonuen ekis. A wor ekkewe mi angang lon Bethel are lon ekkewe ofes, iwe, ra angang weires fan iten ewe angangen afalafal mi fis won unusen fonufan. A wor ekkewe mi pioneer, me ra aea watten ar fansoun me pochokkul lon ewe angangen afalafal. Chokena meinisin ra kan angang weires, sap ren pwisin linger are liwinir, pwe pokiten ar tong ngeni ewe mwicheichen chon Kraist me Jiowa. Mi fichitir ach sipwe appirur pokiten ar tiniken le angang ren unusen letiper me mi fichitir ach sipwe ‘awasolaochur.’

14. (a) Epwe ifa ussun kich chon Kraist sipwe murinnolo lupwen sipwe awasolaochu ekkewe mi tuppwol? (b) Pwata Jises a apasa pwe Meri a filata “minne mi murinno”?

¹⁴ Ewe aposel Jon a makkei pwe lupwen sipwe ”awasolaochu ekkena sokkun aramas,” sipwe “wiliti chiener chon angang lon ewe enlet.” Ren och awewe, sipwe kan murinnolo lon manauach, manauen chon Kraist pokiten ena mettoch. A ina ussun pun fofforoch ngeni chienach chon luku a kapachelong lon fofforun chon Kraist. (Proverbs 3:27, 28; 1 Jon 3:18) Mei wor pwal ekkoch feioch. Lupwen Meri me Marta ra awasola Jises lon imwer, Marta a ammolnata “chommong mettoch” ren Jises pwe epwe awasolaochu i. Meri a pwarata an awasolaoch lon pwal och lapalap. Neminewe a “mommot orun pechen ewe Samol o rongorong an afalafal,” iwe, Jises a apunga neminewe ren an filata “minne mi murinno.” (Luk 10:38-42) Fan chommong, ach kakkapas me popporaus ngeni ekkewe mi ierettam lon ewe enlet, epwe ina ewe mettoch mi kon auchea epwe toto rech seni ach awasoler.​—Rom 1:11, 12.

Lon Ekkewe Fansoun mi Kkolo Aucheaar

15. Met sokkun fansoun mi kkolo aucheaar epwe tongeni atoto pwapwa ngeni noun Jiowa kewe aramas?

¹⁵ Inaamwo ika chon Kraist rese fiti ekkewe eoreni mi choufetal are ekkewe ran mi fel me ranin apwapwa chon fonufan ra eani, nge fan ekkoch ra kan chufengen me repwe pwapwafengen. Awewe chok, Jises a fiti eu fetellapen apupulu lon Kana me a alapalo chengelin ekkewe chon fiti ren an fori an akkaewin manaman ikewe ie. (Jon 2:1-11) Iwe pwal ussun chok, noun Jiowa kewe aramas ra kan pwapwafengen lon ekkewe fansoun mi kkolo aucheaar, me ekkewe mettoch mi fich repwe fori lon ekkena fansoun ra kan alapalo ar pwapwa. Iwe nge, met sokkun mettoch a fichiti ekkena fansoun apwapwa?

16. Ikkefa ekkewe emmwen mi nom rech fan iten foffor mi pwung lon pwal mwo nge ekkewe fansoun mi kkolo aucheaar?

¹⁶ Seni ach kaeo ewe Paipel, sia kan silei met sokkun foffor a fichiti chon Kraist, me sia kan appiru ekkena alluk fansoun meinisin. (Rom 13:12-14; Kalesia 5:19-21; Efisus 5:3-5) Ekkewe fansoun apwapwa, ese lifilifil ika epwe fis fan iten apupulu are pwal och popun, ese kan mut ngenikich ach sipwe likitalo allukun chon Kraist are mutata ach fori och mettoch ese pwung me sap minne sipwe fiti meinisin ekkewe eoreni chon fonuach ra kan eani. Chommong ekkena eoreni ra popu seni ekkewe foffor me ekiek lon lamalam mi chofona, me pwal ekkoch ra weneiti ekkena sokkun foffor chon Kraist resap tongeni eani.​—1 Piter 4:3, 4.

17. (a) Met sokkun mettoch ra pwarata pwe ewe fetellapen apupulu lon Kana a fis fan kokkotoch me emmwen? (b) Met a pwarata pwe Jises a pwapwa ren mettoch meinisin mi fis lon ena fansoun apwapwa?

¹⁷ Fansoun sipwe alleani Jon 2:1-11, esap weires ach sipwe weweiti pwe ina eu fansoun mi kkolo aucheaan, me a wor chommong wasola mi fiti. Iwe nge, sap minne Jises me noun kewe chon kaeo ra pwisin meefata ar repwe fiti ena fetellap, pwe emon a etiwer ngeni, inaamwo ika neman ekkoch leir mararin ewe emon mi fori ewe fetellap. Sia pwal kuna pwe a wor ekkewe “chon angang” me pwal emon “samol” are chon emmwen, nge i epwe wisen apasa met epwe kawor are fis. Ekkena mettoch meinisin ra affata pwe ewe fetellap a kokkotoch me a nom fan emmwen. Le muchuloon ewe poraus, a apasa pwe ren minne Jises a fori lon ewe fetellap, a “pwarata an ling”. Epwe ita filata ena fansoun fan iten an epwe fori ena mettoch ika chon fiti ena fetellap ra sarauarau me akurang? Esor tipemwaramwar pwe esap.

18. Met sipwe ekilapei ussun meinisin ekkewe fansoun apwapwa?

¹⁸ Iwe, ifa ussun ekkewe fansoun apwapwa sipwe wisen etiwa aramas ngeni? Sipwe chechemeni pwe iei ewe popun ach sipwe awasola aramas, pwe sipwe “wiliiti chiener chon angang lon ewe enlet.” Ina minne, esap naf ach sipwe chok apasa pwe ewe fansoun apwapwa a fis fan iten “Chon Pwarata.” Eli sipwe tongeni eani ei kapas eis: Epwe ina eu mettoch mi pwarata ussun met sokkun aramas kich me met sia luku? Sisap fokkun eani ewe ekiek pwe lon ekkena fansoun, sipwe tongeni pi ika epwe ifa ukukun ach sipwe tufichin fiti ekiekin me fofforun fonufan ren ach “eani mocheniangauen futuk, mocheniangauen mesach, o lamalam tekian ach pisek.” (1 Jon 2:15, 16) Nge ekkena fansoun apwapwa repwe aitochukich lon wisach, wisen Chon Pwarata Jiowa, me sipwe pi pwe minne sipwe fori epwe alinga me asamolu Jiowa.​—Mattu 5:16; 1 Korint 10:31-33.

‘Oupwe Awasolaoch nge Esap Fiti Ngunungun’

19. Pwata a lamot ach sipwe “awasolaoch lefilach nge esap fiti ngunungun”?

¹⁹ Lon ei atun lupwen a kan lapalo ngauolon fonufan me kinikinfesen lein aramas, a lamot ach sipwe akapochokkula ewe ririoch lein chon Kraist mi enlet ukukun ach tufich. (Kolose 3:14) Ren ach sipwe fori ena mettoch, epwe wor “tong mi alollol lefilach,” nge a ina ussun an Piter peseikich. Iwe mwirin, a pwal makkei: “Oupwe awasolaoch lefilemi, nge esap fiti ngunungun.” (1 Piter 4:7-9) Sia ita tipeni ach sipwe pwisin mwokut pwe sipwe awasolaochu pwiich kewe, me achocho le pwarata kirokiroch me alillisoch? Are sia kan ngunungun lupwen epwe suuk ngenikich ena alen awora alillis? Ika sipwe ina ussun, sipwe amoielo ewe chengel epwe tufichin toto rech, me epwe pwal pout senikich ewe pwapwa mi kan fis pokiten foffor mi murinno.​—Än Salomon Fos 3:27; Fofor 20:35.

20. Met sokkun feioch epwe toto rech ika sipwe kan awasolaoch lon ei fonufan mi kinikinfesen ikenai?

²⁰ Ach fitipach ngeni chienach kewe chon Kraist le angang, me ach pwarata kirokiroch me awasolaoch lefilach epwe atoto feioch chommong. (Mattu 10:40-42) Jiowa a pwonei ngeni chokena pwe epwe “aueta imwan we imw mangaku wor. Resap chuen echik me resap chuen kaka.” Ach nonnom lon imwen Jiowa imw mangaku a wewe ngeni ach sipwe pwapwaesini an tumunu me awasola kich. (Pwarata 7:15, 16; Aisea 25:6) Ewer, ewe apilukulukun ach sipwe pwapwaesini an Jiowa awasolakich tori feilfeilo chok a nom ekiselo chok mwach.​—Kol Fel 27:4; 61:3, 4.

En mi Tufichin Awewei?

◻ Ifa ewe mettoch sisap tunalo ika sia mochen kuna chengel me kinamween letip mi enlet?

◻ Io ekkewe “semirit mi masen me fefin mi ma senir puluwer,” me ifa ussun sipwe ita “tuttumunur”?

◻ Ifa ewe ekiek sipwe ita eani ussun ekkewe “chon ekis” me “chon eifen won” mi nom leich?

◻ Io ekkewe mi akkaewin fichitir ach sipwe awasolaochur ikenai?

◻ Ifa usun ekkewe fansoun mi kkolo aucheaar repwe ita pwarata enletin weween ewe ngunun awasolaoch?

[Ekkewe sasing lón pekin taropwe 26, 27]

Lon fansoun apwapwa sipwe tongeni awasolaochu chon ekis, semirit esor semer, ekkewe mi angang ngeni Kot full-time, me sokkun wasola meinisin