Ekkewe Elter Mi Saifetal—Ir Mwan Mi Wewe Ngeni Liffang
“Lupwen a feita asan a uweialo chon fotek; a awora mwan mi wewe ngeni liffang.”—EFISOS 4:8.
1. Porausen menni minefon angang a katowu lon ei chassi lon 1894?
LAP SENI ipuku ier lom, ewe Leenien Mas a atowu och poraus mi fo. A nounou ewe kapas “Pwal Och Keangen ewe Angang.” Ifa weween ena minefon angang? Ina poputaan ewe angangen ren ekkewe elter mi saifetal. Lon ei chassi, minen September 1, 1894, a awewei pwe seni ena fansoun ekkewe mwan mi eani ekkoch sokkun tufich repwe feilo ren ekkewe mwichen Chon Sukulen Paipel ‘pwe repwe apochokkulereta lon ewe enlet.’
2. Met wisen ekekwe circuit me district overseer?
2 Lon ewe aewin senturi C.E., Paul me Parnapaas ra feilo ren ekkewe mwichefelin Kraist. Ekkena mwan mi tuppwol ra ekiekin ‘apochokkula’ ekkewe mwichefel. (2 Korint 10:8) Ikenai, sia feioch pun a wor fite ngerou mwan mi foffori ena mettoch fan kokkotoch. Ewe Mwichen Sou Pwungupwung ren Chon Pwarata Jiowa a seikireta pwe repwe wisen circuit me district overseer. Emon circuit overseer a kan fori an angang lon orun 20 mwichefel fan ruu lon eu ier, me a nom ren eu me eu mwichefel ukukun eu wiik, iwe, a kan nengeni ekkewe repot, a eani ekkoch afalafal, me a fiti ekkewe chon afalafal lon ewe angangen afalafal. Ewe district overseer a wisen chairman lon ewe circuit assembly mi fis fan eu iteiten ier, a fiti ekkewe chon afalafal lon ewe mwichefel a nom ren lon ewe angangen afalafal, me a apochokkula ewe mwichefel ren an eani ekkoch afalafal mi longolong won ewe Paipel.
Ewe Ngunun Pennuku Manau a nom Rer
3. Pwata a lamot ngeni ekkewe elter mi saifetal ar repwe eani ewe ngunun pennuku manau?
3 Ekkewe traveling overseer ra saikkis lon ar angang. Ina eu mettoch mi pwarata ewe ngunun pennuku manau. Epwe tongeni an epwe weires ar saifetal ngeni ekkewe mwichefel, nge ekkena mwan me puluwer kewe ra fori ena mettoch fan chengel. Iei alon emon circuit overseer; “Puluwei a fokkun alillisoch me ese kan ngunungun . . . Ua kan apwunga neminewe pokiten an eani ewe ngunun pennuku manau.” Ekkoch circuit overseer ra sai lap seni 600 mwail lefilen ekkewe mwichefel. Chommong ra wawa chitosa, nge ekkoch ra sai ren ar fiti sein muun, me ar wawa paisiken are oris, are ra chok fetal. Emon circuit overseer lon Africa a kan fetal lon eu chanpupu nge a uwei puluwan won afaran pwe epwe tori eu mwichefel. Lon an kewe sai fan iten ewe angangen misineri, ewe aposel Paul a kuna osukosuk ren fansoun pwichikar me fansoun ffou, ren echik me kaka, ren an ese onnut lepwin, ren sokkopaten mettoch mi efeiengau, me pwal ren an aramas eriaffou i. A pwal meefi “aurek ren ekkewe mwichefel meinisin,” nge ina eu mettoch ekkewe elter mi saifetal ra pwal mefi ikenai.—2 Korint 11:23-29.
4. Ifa ussun samau me apwangapwangen inis epwe tongeni kku manauen ekkewe elter mi saifetal me puluwer kewe?
4 Ussun chienen Paul we Timoti, ekkewe elter mi saifetal me puluwer kewe ra mefi apwangapwang lon iniser fan ekkoch. (1 Timoti 5:23) Ina eu mettoch mi alapalo ar osukosuk. Iei alon puluwen emon circuit overseer: “Ika ngang mi samau, ua mefi chou lupwen ua nom ren pwiich kewe fansoun meinisin. Ina eu mettoch ua kon weires ren lupwen a poputa ai kolu. Ua mmen osukosuk ren ai chotani pisekim kewe meinisin iteiten wiik me lo ngeni pwal eu leeni. Fan chommong ua kaulo me ua iotek ngeni Jiowa pwe epwe apochokkulaei fan iten ai upwe sopweilo ei angang.”
5. Inaamwo ika a wor sokkopaten sossot, nge ekkewe elter mi saifetal me puluwer kewe ra pwarata pwe mi nom rer met sokkun lapalap?
5 Ikaamwo fan ekkoch a apwangapwang inisir me ra kuna pwal ekkoch sossot, nge ekkewe elter mi saifetal me puluwer kewe ra kan kuna chengel lon ar angang me ra pwarata ewe sokkun ngunun pennuku manau mi longolong won tong. Ekkoch ra silei pwe ra tongeni malo lupwen ra awora ar alillis lon pekin ngun lon fansoun riaffou are maun. Lupwen ra angang ngeni ekkewe mwichefel, ra kan pwarata pwe ra eani ewe sokkun ekiek mi ussun ekiekin Paul, pwe iei alon ngeni ekkewe chon Kraist lon Tesalonika: “Nge am aua chok kirokiroch ngenikemi, ussun chok emon inelap a tumunuochu pwisin noun kewe. Iwe, pokiten am tong chapur ngenikemi, am aua chok pwapwa ren am fangolo ngenikemi, esap ewe kapas allim chok, pwe pwal manauem; pun am mi achengicheng rem.”—1 Tesalonika 2:7, 8.
6, 7. Ekkewe elter mi angang weires lon ar saifetal repwe tongeni awora met sokkun alillis mi murinno?
6 Ussun chok ekkewe elter lon ekkewe mwichefelin Kraist meinisin, ekkewe elter mi saifetal ra “angang weires ren kapas o afalafal.” Mi fich ngeni ekkena elter meinisin ach “sipwe fokkun asamolu ir.” (1 Timoti 5:17) Sipwe feioch ren ewe leenien appiru ra isetiu ika mwirin ach ‘ekieki ussun uwan manauer, sipwe appiru ar luku.’—Ipru 13:7.
7 Ifa ussun angangen ekkewe elter mi saifetal a fen kku manauen ekkewe ekkoch? Emon Chon Pwarata fan iten Jiowa a makkei pwe “A ifa watten ewe alillis Brother P— a awora ngeniei! I emon elter mi saifetal lon Mexico poputa seni ewe ier 1960 feffeilo. Le kukkuni, ua witi an waroto fan mwoteres me chengel. Lupwen ua ier engol, a ereniei, ‘En kopwe pwal wiliiti emon circuit overseer.’ Lupwen ua tori ekkewe ierin sarafo mi ur ren osukosuk, fan chommong ua kutta i pun fansoun meinisin a awora emmwen mi mirit. A fokkun pwapwa le alisi chon ewe mwichefel! Iwe iei, pokiten ngang emon circuit overseer, fansoun meinisin ua sotun awora ai fansoun ngeni ekkewe kukkun, iwe, ua kan peser pwe repwe achocho ngeni mettochun ngun ussun atewe a pesei ngeniei. Lon pwal mwo nge ekkewe amuchun ierin manauan, ikaamwo a apwangapwangolo foun ngasangasan, nge fansoun meinisin Brother P—a ekiekin apochokkula aramas. Eu chok ran mwen an malo lon 1995 fan February, a fitiei ngeni eu special assembly me a pesei emon brother mi eani angangen sou alapalapa imw pwe epwe achocho ngeni mettochun ngun. Muttir chok ewe brother a amasoua echo taropwe fan iten an epwe tufichin angang lon Bethel.”
Sia kan Aucheanir
8. Lon Efisus sopwun 4, “ekkewe mwan mi wewe ngeni liffang” ra wewe ngeni io, me ifa ussun ra kan efeiochu ekkewe mwichefel?
8 Ekkewe elter mi saifetal me ekkewe pwal fitemon elter mi eani ekkoch wis mi auchea fan umoumochun Kot ra iteni “mwan mi wewe ngeni liffang.” Jises, lon wisan we wisen chon tupuni Jiowa me Mokuren ewe mwichefel, a fen awora ekkena mwan mi asimau lon pekin ngun pwe sipwe pochokkuleta me wiliiti aramas mi asimau. (Efisus 4:8-15) Sipwe ita pwarata ach aucheani sokkun liffang meinisin, ese lifilifil. Mi akkaewin enlet ena ren eu liffang mi apochokkulakich fan iten ach sipwe likiitu le angang ngeni Jiowa. Iwe, epwe ita ifa ussun sipwe tongeni pwarata pwe sia aucheani angangen ekkewe elter mi saifetal? Lon met sokkun lapalap sipwe tongeni pwarata pwe ‘sia mmen aucheani ekkena mwan’?—Filipai 2:29.
9. Epwe ifa ussun sipwe tongeni pwarata pwe sia aucheani ekkewe elter mi saifetal?
9 Lupwen a esileito warotoon ewe circuit overseer, sia tongeni poputa le akkota ach fansoun pwe sipwe fiti meinisin angangen ewe mwichefel lon ena wiik. Eli sipwe tongeni alapalo ewe fansoun sipwe fiti ewe angangen afalafal lon ena wiik. Eli sipwe tongeni auxiliary pioneer fan ena maram. Sipwe pwal ekiekin apwonueta ekkewe emmwen seni ewe circuit overseer pwe sipwe amurinnolo ach angangen afalafal. Ach tipemecheres epwe efeiochukich me alukuluku ngeni i pwe a alillisoch an feito ren ewe mwichefel. Ewer, ekkewe elter mi saifetal ra feito ren ewe mwichefel pwe repwe apochokkulakich, nge mi pwal lamot ngenir ar repwe pochokkuleta lon pekin ngun. Lon ekkoch fansoun, a lamot ngeni Paul an epwe pochokkuleta, me fan chommong a tingorei chienan kewe chon Kraist pwe repwe iotek ren. (Fofor 28:15; Rom 15:30-32; 2 Korint 1:11; Kolose 4:2, 3; 1 Tesalonika 5:25) Pwal ussun chok, a lamot ngeni ekkewe elter mi saifetal ikenai ach sipwe iotek fan asengesir me apochokkulereta.
10. Ifa ussun sipwe tongeni awora ach alillis fan iten ach sipwe atoto chengel ngeni ekkewe elter mi saifetal lupwen repwe fori ar angang?
10 Sia fen ereni ewe circuit overseer me puluwan we pwe sia kan aucheani ar feito rech? Sia kan ereni atewe ach kilisou ren ekkewe fon a awora ngenikich? Lupwen an kewe emmwen fan iten ach angangen afalafal a alapalo ach pwapwa lon ei angang, sia kan ereni i? Ika sipwe fori ena mettoch, epwe chengel lon an angang. (Ipru 13:17) Emon circuit overseer lon Spain a uwawu mefian ren ifa ussun ir me puluwan we ra mmen aucheani ekkewe taropwe chon ekkewe mwichefel ra mak ngenir fan iten ar repwe pwarata ar kilisou mwirin ar etto le alisir. A apasa pwe “Am aua isoni ekkewe taropwe, iwe, aua alleanir lupwen aua ekis letipechou. Ir mi wesewesen apochokkulakem.”
11. Pwata sipwe ereni puluwen ewe circuit me district overseer pwe sia tonger me aucheanir?
11 A enlet pwe puluwen ewe elter mi saifetal a kuna alillis seni ach apwunga neminewe. Neminewe a fen eani ewe ngunun pennuku manau fan iten an epwe alisi puluwan we lon wisan. Ekkena sister mi tuppwol ra likitalo mwo ar mochen imweni pwisin imwer, iwe, ren chommong, ra likitalo ar ekiekin nounou. Noun Jephthah we fopul emon lein noun Jiowa kewe chon angang mi likitalo an mochen pupulu me an eani eu famili pokiten eu pwon seman a eani. (Soukapwung 11:30-39) Met ekiekin aramas ussun an pennuku manauan? Iei alon Soukapwung 11:40: “Iteiten ier ekkewe fopulun Israel ra kan lo apwunga ewe fopul, noun Jephthah ewe re Gilead, ruanu ran lon eu ier.” A ifa murinnon ach ereni puluwen ewe circuit me district overseer pwe sia kan tonger me aucheanir!
“Ousap Monuki Awasolaoch”
12, 13. (a) Me lon Paipel, ifa longolongun ewe fofforun awasolaochu ekkewe elter mi saifetal me puluwer kewe? (b) Awewei mwo ifa ussun ena sokkun awasolaoch epwe tongeni efeiochu meinisin.
12 Awasolaoch pwal eu mettoch mi pwarata pwe sia tongei me aucheani ekkewe chon Kraist mi saifetal lon ar angang. (Ipru 13:2) Ewe aposel Jon a apwunga Kaios ren an awasolaochu ekkewe mi etto ren ewe mwichefel lon wiser we misineri mi saifetal. Iei makkeien Jon: “En mi achengicheng, ka forata angang mi tuppwol ren om ka alisi pwiich kana soulang, o pwal ekkewe wasola. Ra fen pwarata ussun om tong mwen mesen ekkewe chon mwichefel. Epwe murinno are kopwe alisi ir ren ar sai, ussun chok minne mi fich ngeni angangen Kot. Pun ra feffeilo fan asengesin itan we, nge resap angei och mettoch seni ekkewe chon lukun. Iwe, sipwe fokkun alisi ei sokkun aramas, pwe sipwe angangfengen lon ewe enlet.” (3 Jon 5-8) Ikenai, sipwe tongeni alapalo ewe angangen afalafal fan iten ewe Muu ren ach awasolaochu ekkewe elter mi saifetal me puluwer kewe. Pwungun pwe ekkewe elterin mwichefel repwe pi pwe mi murinno leenier, nge iei alon emon district overseer: “Ach angang ngeni pwiich kewe ese kan longolong won minne repwe tongeni fori fan asengesim. Am ausap mochen akaekis mwo amef ngenir ena sokkun ekiek. Mi lamot am oupwe tipemecheres le etiwa minne chok pwiich kewe repwe tufichin awasolakem ren, ese lifilifil ika ir mi pisekisek are woungau.”
13 Awasolaoch epwe tongeni efeiochu meinisin. Iei alon Jorge, emon mi fen pin wisen circuit overseer me lom, nge iei a angang lon Bethel: “Lon ai famili, aua kan etiwa ekkewe elter mi saifetal pwe repwe nom rem. Ua mefi pwe ewe alillis ra awora a lap seni minne ua ekieki me mwan. A fen wor ai osukosuk lon pekin ngun. Inei a lolilen ussi nge ese silei ifa ussun an epwe alisiei, ina minne, a tingorei ewe circuit overseer pwe epwe kapas ngeniei. Akkom use mochen kapas ngeni, pun ua niueiti an epwe fonouei. Nge mwirin, a siwil letipei pokiten an atewe pwarata pwe a mochen epwe chiechi ngeniei. A etiwaei pwe upwe fiti i le mongo lon eu Sarinfel, me ua uwawu mefiei ngeni pun ua luku nge epwe weweiti ai osukosuk. A auselingoch. An kewe emmwen a wesewesen alisiei, me ua poputa le feffeita lon pekin ngun.”
14. Pwata sipwe aucheani ekkewe elter mi saifetal, nge sap minne sipwe akkapir?
14 Emon elter mi saifetal a kan achocho le alisi meinisin lon pekin ngun. Ina minne, sipwe pwarata pwe sia aucheani an achocho. Iwe nge, epwe ifa ussun ika sipwe akkapi atewe ren minne a apwangapwang won are apasa pwe i ese kon lien angoch ussun ekkewe mi fen wareiti ewe mwichefel me mwan? Neman i epwe letipechou ren ena. Paul ese pwapwa ren an aramas akkapi an angang. A ussun ita nge ekkoch chon Kraist lon Korint ra esiita lapalapan me an tufichin afalafal. Pwisin i a makkei alon ekkena chon esiit pwe iei makkeian: “Noun kewe taropwe mi chou o pochokkul, nge fansoun an nonnom ikei lon inisin, atewe mi chok apwangapwang o an kapas mi chok lamot mwaal.” (2 Korint 10:10) Iwe nge, sia pwapwa pwe ekkewe elter mi saifetal ra kan rong kapas murinno mi pwarata an aramas aucheanir.
15, 16. Ifa ussun ewe tong me tiniken chiener kewe chon luku ra pwarata a kan kku manauen ekkewe elter mi saifetal me puluwer kewe?
15 Emon circuit overseer lon Latin America a fetal unusen ran won alen lemal mi pwokak pwe epwe chuuri chienan kewe lon pekin ngun, nge ir mi nonnom lon eu leeni mi nom fan nemenien sounfiu. Atewe a makkei pwe “Letipei a wenewenen chung ren ai kuna an ekkewe brother pwarata ar aucheani ai feito rer. Ikaamwo a mmen weires ai fetal pwe upwe tori ikewe ie pokiten an a wor chommong mettoch mi efeiengau me minen eppet, nge a wor liwinin ai achocho pokiten ewe tong me tiniken ekkewe brother ra pwarata.”
16 Iei makkeien emon circuit overseer lon Africa: “Pokiten ewe tong ekkewe brother ra pwarata ngenikem, am aua wesewesen tongei ewe fonu Tanzania! Ekkewe brother ra mmolneta pwe repwe kaeo senikem, me ra pwapwa le aleeniakem lon imwer kewe.” A wor tong me pwapwa lon ewe riri lefilen ewe aposel Paul me ekkewe ruuemon mi pupulu, Akwila me Priska, nge ir chon Kraist mi manau lon ewe aewin senturi. Iei alon Paul ussur: “Ai kapong ngeni Priska me Akwila, chienei chon angang lon Kraist Jises. Ra pennuku manauer fan asengesin manauei, iwe, sap ngang chok upwe kilisou ngenir, pwe pwal ekkewe mwichefelin Jentail meinisin.” (Rom 16:3, 4) Ekkewe elter mi saifetal me puluwer kewe ra kilisou ren ar chieneni ekkewe mi ussun Akwila me Priska ikenai pokiten ar awasolaochur me ar chiechioch ngenir.
Apochokkula ekkewe Mwichefel
17. Pwata sia tongeni apasa pwe tipatchem a pwalo lon ewe kokkot fan iten angangen ekkewe elter mi saifetal, me ra kan angei me ia ar emmwen?
17 Iei alon Jises: “Pwungun tipatchem a pwalo ren fofforun kewe.” (Mattu 11:19) A pwalo tipatchemen ewe kokkot fan iten angangen ekkewe elter mi saifetal pokiten an apochokkula ekkewe mwichefelin noun Kot kewe aramas. Lon an Paul we oruuen sai fan iten ewe angangen misineri, ir me Sailas ra “feilfetal won Siria me Silisia, o ra apochokkula ekkewe mwichefel.” Ewe puken Foffor a apasa pwe “Lupwen ra feilfetal lon ekkewe telinimw, ra ngenir ekkewe kapas ekkewe chon kuno me ekkewe elter mi nonnom lon Jerusalem ra tipeeufengen won, pwe repwe amwochu. Iwe, ekkewe mwichefel ra pochokkulelo lon ar luku, o iteiter a chommongolo iteiten ran.” (Fofor 15:40, 41; 16:4, 5) Ekkewe elter mi saifetal ikenai ra angei emmwen lon pekin ngun seni ewe Paipel me ekkewe puk mi kawor me ren “ewe chon angang mi tuppwol me tipatchem,” ussun chok meinisin lusun chon Kraist.—Mattu 24:45.
18. Ifa ussun ekkewe elter mi saifetal ra kan apochokkula ekkewe mwichefel?
18 Ewer, ekkewe elter mi saifetal repwe chuen chok mommongo ren an Jiowa chepel lon pekin ngun. Repwe sileiochu ekkewe kokkot me emmwen an Kot mwicheich a foratiu. Iwe mwirin, ekkena mwan repwe tongeni wiliiti eu feioch ngeni aramas. Ren ewe leenien appiru ra isetiu lon ewe angangen afalafal fan tiniken, repwe tongeni alisi chiener chon luku pwe repwe angochulo lon an chon Kraist we angangen afalafal. Ekkewe afalafal mi longolong won Paipel ekkena elter ra eani a kan apochokkula lon pekin ngun ekkewe chon auseling. Ren ar alisi aramas pwe repwe apwonueta ewe fon seni ewe Kapasen Kot, me angangfengen fan tipeeu ren noun Jiowa kewe aramas won unusen fonufan, me aea ekkewe mettochun ngun mi kawor seni Kot ren ewe ‘chon angang mi tuppwol,’ ekkewe elter mi saifetal ra kan apochokkula ekkewe mwichefel ir mi chuuri lon wiser mi auchea.
19. Ikkefa ekkewe kapas eis esaamwo polu sipwele popporaus ussun?
19 Lupwen an Kot we mwicheich a akkota angangen ekkewe elter mi saifetal lein ekkewe Bible Student arap ngeni ipuku ier lom, ei chassi a apasa pwe “Sipwe pippi met epwe fis me met ewe Samol epwe emmwenikichelong lon.” A fokkun ffat an Jiowa emmwen. Pokiten an feioch me ewe emmwen seni ewe Mwichen Sou Pwungupwung, ena angang a fen lapalo me murinnolo lon ekkewe ier ra lo. Ina minne, ekkewe mwichefelin Chon Pwarata Jiowa won unusen fonufan ra kan lukucharetiu lon ewe luku me ra chommongolo ran me ran. A ffat pwe Jiowa a kan efeiochu ewe ngunun pennuku manau a nom ren ekkena mwan mi wewe ngeni liffang. Nge epwe ifa ussun ekkewe elter mi saifetal repwe tongeni apwonuetafichi ar angang? Met repwe kan achocho ngeni? Epwe ifa ussun ar repwe tufichin atoto feioch mi lapalap?
Ifa Ussun Kopwe Polueni?
◻ Ikkefa ekkoch me lein ekkewe angang ekkewe circuit me district overseer ra kan wisen apwonueta?
◻ Pwata a lamot ngeni ekkewe elter mi saifetal ar repwe eani ewe ngunun pennuku manau?
◻ Ifa ussun sipwe tongeni pwarata ach aucheani angangen ekkewe elter mi saifetal me puluwer kewe?
◻ Met ekkewe elter mi saifetal repwe tongeni fori ren ar repwe apochokkula lukuen ekkewe mwichefel?
[Sasing lón pekin taropwe 21]
Ewe ngunun pennuku manau epwe nom rer pokiten ar saifetal
[Sasing lón pekin taropwe 24]
Ka fen pwarata awasolaoch ngeni ekkewe elter mi saifetal me puluwer kewe?