Eü Minen Apöchökkülafengenikich

1. Menni fansoun mi lamot a kawor seni an ewe elter mi säifetäl chuurikich?

¹ Ewe aposel Paul a mak ngeni ewe mwichefel lon Rom: “Pun ua fakkun mochen kunakemi, pwe upwe apochokulakemi ren och liffangen ngun, usun chok sipwe aururufengenni letipach ren ewe chok luku lefilach, ami luku o pwal ai luku.” (Rom. 1:11, 12) Lon ach ei fansoun atun ekkewe elter mi säifetäl ra chuurikich a awora fansoun ach sipwe apöchökkülafengenikich.

2. Pwata an ewe circuit overseer chuurikich a kan apio fitu maram me mwan?

² Ewe Mwichefel: An ewe circuit overseer fansoun chuurikich epwe apio ngeni ewe mwichefel ülüngät maram me mwan. Ena kokkot epwe atufichikich le akkota ach schedule me unusen angei feiöch seni. (Ef. 5:15, 16) Ika en emön chon angang, neman kopwe tongeni tingor om kopwe asösö pwe kopwe fiti ewe angangen afalafal lon ena wiik. Ekkoch ra akkota ar repwe auxiliary pioneer lon ena maramen visit. Ika ka fen akkota om kopwe lo ekis, ka tongeni siwili ena kokkot pwe kopwe nonnom lon ena wiik?

3. Met emön me emön leich epwe föri atun ewe visit pwe sipwe angei ach pöchökkül seni?

³ Ewe äkkäeüin popun an ewe circuit overseer chuurikich pwe epwe apöchökküla me alipwaköchü emön me emön leich lon ewe angangen afalafal. Pwata kose eisini ika oupwe tongeni angangfengen are fen pwülüwan we ika pwe mi pwüpwülü? Ewe circuit overseer a pwapwaiti an epwe fiti meinisin chon afalafal pachelong ekkewe minefö ika ekkewe rese mwo lipwäköch lon ewe angangen afalafal. Kich meinisin sia tongeni käeö seni minne a eäni afalafal ngeni aramas me apwönüetä an kewe kapasen pesepes ngenikich. (1 Kor. 4:16, 17) Etiwa pwe oupwe möngöfengen pun ina ewe fansoun oupwe apöchökkülafengenikemi. (Ipru 13:2) An kewe afalafal ra wesewesen weneiti osupwangen ewe mwichefel, ina popun sipwe fokkun aüselingöch.

4. Ifa ussun sipwe apöchökküla nöüch we circuit overseer?

⁴ Ewe Circuit Overseer: Ewe aposel Paul a pwal ussun chök pwiin kewe lon ekkewe mwichefel a kan chuuri, pun a pwal küna ekkena sossot me meefi aurek me i a aücheani an pwiin kewe apöchökküla i. (2 Kor. 11:26-28) Lupwen ewe mwichefel lon Rom a silei pwe Paul epwele feilo ikena nge i emön mi kalapus, ekkoch ra feilo ngeni ewe leenien amömö lon Appius pwe repwe tongeni chuuri i nge towauen 46 mail! “Lupwen Paul a kuner, a kilisou ngeni Kot, o a pwal apilukuluk allim.” (Fof. 28:15) Ka pwal tongeni apöchökküla ewe circuit overseer. Pwär ngeni om “asamolu” ren om mwasangasang le älisatä ewe visit. (1 Tim. 5:17) Kopwe pwäratä om kilisou ren an angang weires fän itom. I me pwülüwan we repwe pwapwa le küna om lükü, tong, me likiitü.​—2 Tes. 1:3, 4.

5. Pwata mi lamot ngeni kich meinisin ach sipwe angei minen apöchökkül ikenäi?

⁵ Lon ekkei “fansoun weires ,” iö me leich pwe esap osupwangen minen apöchökkül? (2 Tim. 3:1) Filatä om kopwe unusen älisatä ewe angang ren ewe circuit overseer epwe fis lon ena wiik mi aüchea. Kich meinisin —ekkewe overseer mi säifetäl me chon afalafal sia apöchökkülafengennikichetä. Ren ach föri ena sia pwal ‘amiritifengennikich o akautafengennikich, emon me emon.’​—1 Tes. 5:11.