Kukutta Kinamwe Mi Enlet Me Tapwelo Mwirin!
“Emon mi tongei manauan o mi mochen kuna ran mi murinno, . . . epwe kul seni mi ingau, o forata minne mi murinno; epwe kukutta kinamwe, o tapwelo mwirin.”—1 PITER 3:10, 11.
1. Menni kapas mi foulo seni Aisea epwe wesewesen pwonuta?
“REPWE usi nour ketilas me awiliirelo ngeni minen ttu ppwul me wokur siles ngeni fichin ira. Muu esap eitieta ketilas ngeni muu, resap pwal chuen kaeo maun.” (Aisea 2:4) Inaamwo ika ena wokisin mi foulo a pacheta arap ngeni ofesilapen ewe UN lon New York City, nge ena mwicheich ese akarapen apwonueta ena mettoch. Iwe nge, pokiten ina och poraus seni kapasen Jiowa, ewe mi pwonuta fansoun meinisin, iwe, epwe wesewesen fis.—Aisea 55:10, 11.
2. Me ren Aisea 2:2, 3, met epwe “fis lon ekkewe sopwolon ran?”
2 Alon Aisea 2:4 eu kinikinin eu oesini mi amwarar, weween, eu oesini ussun kinamwe mi enlet, me a kan pwopwonuta lon ach ei fansoun. Me mwen an esileilo ewe apilukulukun an esap chuen wor maun me pisekin maun, ewe oesini a apasa pwe “Epwe fis le sopwolon ekkewe ran pwe chuukun imwen Jiowa epwe lukucharetiu asen tolen ekkewe chuuk, me epwe kekita asetaan ekkewe ppan, iwe, ekkewe muu meinisin repwe feffeil ngeni. Iwe, chommong aramas repwe feffeil me apasa: ‘Ou feito, ami kana aramas, iwe, sipwe feita ngeni chuukun Jiowa, ngeni imwen ewe Koten Jekop; iwe, epwe asukulakich ussun an kewe al, me sipwe feffetal lon alan kewe.’ Pun seni Saion alluk epwe towu, me kapasen Jiowa epwe towu seni Jerusalem.”—Aisea 2:2, 3.
Aramas Repwe Tongeni Wiliiti Aramas Kinamwe
3. Ifa ussun emon epwe tongeni siwili lapalapan pwe epwe emon aramas kinamwe ika ese ina ussun me lom?
3 Nengeni pwe mwen aramas repwe tongeni tapwelo mwirin eu alen kinamwe, repwe akkom kaeo ussun alen Jiowa kewe. An emon alleasochisi alon Jiowa epwe tongeni siwili an ekiek me foffor, iwe, epwe wiliiti emon mi kinamwe ika ese ina ussun me lom. Ifa ussun ena siwil epwe tongeni fis? Iei alon Rom 12:2: “Ousap appiru pwomwen fonufan, nge oupwe wiliilo ren asefosefallin letipemi, pwe oupwe pwarata minne letipen Kot, minne mi murinno o fich o unusoch.” Sia kan siwili ekiekich, are amwokutu an epwe weneiti pwal och mettoch, ren ach amasoua ren ekkewe alluk me emmwen seni ewe Kapasen Kot. Ach kakkaeo Paipel epwe alisikich le siwili ekiekich me epwe atufichikich ach sipwe anneta ika ifa letipen Jiowa ngenikich, iwe, epwe ffat ewe al sipwe aleni.—Kol Fel 119:105.
4. Ifa ussun emon epwe tufichin pwilitalong ewe minefon lapalap mi kinamwe?
4 Ewe enlet seni Paipel esap chok siwili ekiekich, pwe pwal fofforuch me lapalapach. A alisikich pwe sipwe fori met ewe aposel Paul a pesei ngenikich: “Iwe, oupwe chok pwilitawu lapalapemi me lom, ewe ren ami manau me lom, ewe mi limengau pokiten mochenien otupu, o oupwe amurinnosefalli ngunun letipemi. Oupwe pwal pwilitalong lapalapemi mi fo, ewe mi forieta ussun lapalapen Kot lon ewe pwung mi enlet pwal ewe tuppwol mi enlet.” (Efisus 4:22-24) Ewe manaman mi amwokutu ewe ekiek a nom lon kich. Epwe siwil me pochokkuleta lupwen epwe maarita ach tong ngeni Jiowa me an kewe alluk, me epwe awiliikich pwe sipwe aramas kinamwe me akkomwa ekkewe mettochun ngun.
5. Ifa ussun ewe “alluk sefo” Jises a ngeni noun kewe chon kaeo a kan alapalo ewe kinamwe leir?
5 Lamoten ena siwil a pwalo ren minne Jises a aiti ngeni noun kewe chon kaeo atun ekkewe saingoon awa an a nom rer: “Iwe, upwe ngenikemi eu alluk mi fo, pwe oupwe tongfengen lefilemi, ussun chok ua tongeikemi, pwe ami oupwe tongfengen lefilemi. Epwe iei ussun pwe aramas meinisin repwe silei pwe ami nei chon kaeo, are mi wor ewe tong lefilemi.” (Jon 13:34, 35) Ei tong a ussun Kraist me ese kutta pwisin letipan, iwe, a kan ririfengenni ekkewe chon kaeo pwe repwe unusen tipeeufengen. (Kolose 3:14) Ekkewe chok mi nguuri me alleasochisi ei “alluk sefo” repwe pwapwaesini ewe kinamwe Kot a pwonei. Mei wor aramas mi foffori ena mettoch ikenai?
6. Pwata Chon Pwarata Jiowa ra kan pwapwaesini kinamwe, nge ese ina ussun chon fonufan?
6 Chon Pwarata Jiowa ra kan achocho le pwarata tong lon ar mwicheichen pwipwi won unusen fonufan. Inaamwo ika ir chon ekkewe muu meinisin, nge rese kan kapachelong lon ekkewe fitikoko won fonufan, lon pwal mwo nge ekkewe fansoun repwe kuna sossot seni ekkewe muu me lamalam. Pokiten ir mi tipeeufengen, ra kan kait seni Jiowa, me ra pwapwaesini kinamwe. (Aisea 54:13) Ra kan unusen imulo seni ekkewe fitikoko lefilen muu, me rese kan fiti maun. Ekkoch mi fen pin sou fiu me lom ra fen likitalo ena sokkun manau. Ra fen wiliiti chon Kraist mi tongei kinamwe, me ra appiru fofforun Kraist Jises. Iwe, ren unusen letiper ra kan appiru an Piter ei fon: “Emon mi tongei manauan, o mi mochen kuna ran mi murinno, epwe amwochu chonmongon seni mi ingau, o tinauan seni kapas likotupotup; epwe kul seni mi ingau, o forata minne mi murinno; epwe kukutta kinamwe, o tapwelo mwirin.”—1 Piter 3:10, 11; Efisus 4:3.
Ekkewe mi Tapwelo Mwirin Kinamwe
7, 8. Awewei mwo ekkoch poraus ussun aramas mi likitalo maun, iwe mwirin, ra wiliiti chon kutta kinamwe mi enlet. (Awewei pwal ekkoch poraus eli en mi silei ussun.)
7 Ren chok awewe, a wor emon itan Rami Oved, nge i emon meilap lon eu kumiin chon fiu ngeni mwichen furio. A kaeo pwe epwe nnielo chon koputan. A wesewesen luku ewe muun Israel, nge eu ran ekkewe senseen lamalam rese tipeeu ngeni an epwe puluweni ewe fefin a tongei pokiten chok i emon chon Eisia, weween, emon Jentail. Atewe a poputa le kutta ewe enlet lon Paipel. Iwe, a chuuri Chon Pwarata Jiowa. A fiti ekkewe Chon Pwarata le kaeo Paipel, iwe, a weweiti pwe esap chuen tongeni aea unusen manauan fan iten ewe muu. An chon Kraist tong a wewe ngeni an epwe likitalo maun me pisekin nninni, iwe, epwe kaeo ifa ussun epwe tongei chon ekkewe einang meinisin. A fokkun mairu lupwen a nouni echo taropwe, nge a mak ei kapong le poputaan, “Pwii na Rami”! Pwata a sokkolo ena kapong? Ewe chon makkoto emon Chon Pwarata seni Palestine. Rami a apasa pwe “Me rei nge ina eu mettoch mi fokkun amairu pun ekkewe chon Palestine, ir chon koputei, nge iei emon leir a ko ngeniei ‘Pwii na.’” Iei Rami me puluwan we ra tapwelo mwirin kinamwe mi enlet lon alen Kot.
8 Iei pwal eu poraus awewe, porausen emon mwan itan Georg Reuter, nge i emon lein ekkewe sounfiun Tois mi toki Russia atun ewe Oruuen Maunen Fonufan. Ekiselo mwirin a lichipungulo ren ekimmongun Hitler fan iten an epwe nemeni unusen fonufan. Lupwen a liwin seni ewe maun, a poputa le kaeo Paipel ren alillisin Chon Pwarata Jiowa. Iei makkeian: “Iwe, a keran aewin an a ffatolo ngeniei weween chommong mettoch. Ua weweiti pwe sap minne tipisin Kot nninniiloon aramas . . . Ua kaeo nge an kokkot pwe epwe foratiu eu paratis won unusen fonufan fitifengen me feioch esemuch fan iten aramas mi alleasochis . . . Hitler a sikasini an ‘Engerou Ierin Nemenem’ nge a nemenem 12 chok ier, nge nengeni watten pwunungauan! Kraist, nge esap Hitler . . . epwe tongeni foratiu eu engerou ierin nemenem won unusen fonufan, iwe, epwe wesewesen fori ena.” Ren ina epwe 50 ier, Georg a fen angang lon ewe wis, wisen chon esilefeili porausen kinamwe mi enlet lon ewe angangen afalafal full-time.
9. Ifa ussun minne a fis ngeni Chon Pwarata Jiowa lon Tois fan nemenien ewe muun Nazi a anneta pwe ir mi pwora nge pwal aramas kinamwe?
9 Pokiten Chon Pwarata Jiowa lon Tois ra tuppwol me ra imulo seni an aramas kewe nemenem meinisin atun ewe nemenem itan Nazi, iwe, tori ikenai, ina eu pisekin pwarata ussun ar tong fan iten Kot me kinamwe, nge iei a fen lu seni 50 ier. Iei alon eu puk mi for me ren ewe United States Holocaust Memorial Museum lon Washington, D.C.: “Chon Pwarata Jiowa ra kuna riaffou watte fan ewe nemenem itan Nazi. . . . A kon lap me leir ra tuppwol [rese amam ar luku], fan kawet, kirikiringau lon ekkewe leenien fotek, me fan ekkoch ra nninniilo, ina popun, chommong ra sufolitir.” Iwe, a pwal apasa pwe “Atun ekkewe chon fotek ra ngaselo, Chon Pwarata Jiowa ra sopweilo ar angang, pwe iwe ra akafalafala ekkewe mi chuen manau.”
Eu Siwil mi Lapalap
10. (a) A lamot an epwe wor met sokkun siwil watte fan iten an epwe toto kinamwe mi enlet? (b)Ifa ussun ena poraus a pwalo lon ewe puken Taniel?
10 A ita weween pwe Chon Pwarata Jiowa ra kan luku pwe repwe tongeni efisata kinamwe won unusen fonufan ren ar siwili letipen aramas meinisin pwe repwe ukutiu seni maun? Aapwi! Ren an epwe toto kinamwe ngeni fonufan, epwe wor eu siwil mi lap seni ena. Met sokkun siwil? An aramas kewe nemenem mi atipefeseni, chouni, me eriaffou arams repwe morolo, iwe, an Kot Muu epwe siwilir, nge ina ewe muu Jises a aiti ngeni noun kewe chon kaeo ar repwe ioteki. (Mattu 6:9, 10) Nge ifa ussun ena mettoch epwe fis? Lon eu ttan lang a tinatiu, ewe soufos Taniel a kuna pwe lon ekkewe sopwolon ran, an Kot Muu, ewe mi ussun efou fau mi foummong, nge ‘ese falafal ren poun aramas,’ epwe amokku eu lios watte mi lisoueta an aramas kewe nemenem won fonufan. Iwe, a apasa: “Iwe, lon fansoun muun ekkewe king, ewe Koten lang epwe aueta eu muu esap tongeni talo, esap pwal wor eu muu epwe tongeni akkufu. Iwe, ei muu epwe ataielo o arosalo ekkewe lusun muu, nge epwe pwisin nom tori feilfeilo chok.”—Taniel 2:31-44.
11. Ifa ussun Jiowa epwe efisata ewe siwil fan iten an epwe wor kinamwe?
11 Nge pwata epwe fis ena siwil watte won fonufan? Pun Jiowa a fen pwonei pwe epwe amoielo meinisin mi alimengaua me atai fonufan. (Pwarata 11:18) Ei siwil epwe fis lupwen Jiowa epwe maun ngeni Setan me an ei fonufan mi ngau. Iei alon Pwarata 16:14, 16: “Ir [weween, poraus mi limengau] mi ngunun ekkewe timon ra fori esissin; o ra feilo ngeni ekkewe king [ekkewe sou nemenem] won unusen fonufan pwe repwe amwichafengenni ir ngeni maun lon ewe ran mi lap, ranin Kot mi Lapalap. Iwe, ra amwichafengenni ir lon ewe leeni itan Armaketon lon kapasen Ipru.”
12. Epwe fet Armaketon?
12 Epwe fet Armaketon? Esap eu maun won kensi pakutang are eu mettoch mi efeiengau aramas repwe efisata. Nge ina an Kot maun fan iten an epwe atoto kinamwe mi enlet ren ir kewe mi tongei kinamwe. Ewer, Armaketon epwe war ussun Jiowa a fen akkota. Esap mangoto. Iei makkeien noun we soufos Apakuk: “Pun minne upwe pwari ngonuk epwap pwonuta lon eu fansoun mi kefilita. Nge fansoun an epwe pwonuta epwe fokkun muttir, nge esap chofona. Are epwe mmang le pwonuta, kopwe chok witiwit. Epwe fokkun pwonuta, nge esap mmang.” (Apakuk 2:3) Pokiten meefiach, eli epwe ussun ita mmangoto, nge a kkotoch Jiowa. Armaketon epwe war lon ewe kulok Jiowa a fen filata.
13. Met Kot epwe fori ngeni ewe chon afitikoko, Setan ewe Tefil?
13 Ena maun epwe suuki ewe al ngeni kinamwe mi enlet! Nge ren an epwe ffotoch kinamwe mi enlet, pwal eu mettoch epwe fis, weween, esap chuen nom ewe emon mi efisata kinikinfesen, oput, me fitikoko. Iwe, ina ewe mettoch epwe fis me ren ekkewe oesini lon Paipel, weween, Setan, ewe mi efisata maun me ewe semen kapas chofona, epwe fotek. Ina kunaen ewe aposel Jon lon eu oesini, ussun an a mak lon Pwarata 20:1-3: “Iwe, ua kuna emon chonlang mi feffeitiu seni lang, a amwochu le poun ewe kien Apis, o pwal efoch selimecha mi lap. O a turufi ewe traikon, ewe serpentin lom, i mi ewe Tefil o Setan, o a foti i ukukun engerou ier. Iwe, a oturalong i lon Apis, o a apungalo. A pwal mecheni won Apis pwe Setan esap chuen otupu ekkewe muu, mwen wesiloon ekkewe engerou ier.”
14. Ifa ussun sipwe tongeni awewei an Jiowa pworaiti Setan?
14 Esap ina eu ttan, nge ina an Kot pwon me iei alon Paipel: “Kot esap tongeni kapas chofona.” (Ipru 6:18) Ina popun Jiowa a tongeni uwawu ei kapas ren an nounou ewe soufos Jeremaia: “‘Ngang Jiowa, ewe mi eani tong mi enlet, pwung me wenechar won fonufan; pun ikkeei ekkeei foffor ua pwapwa ren,’ iei alon Jiowa.” (Jeremaia 9:24) Fofforun Jiowa a pwung me wenechar, me a pwapwaiti ewe kinamwe epwe atoto ngeni fonufan.
Nemenemen ewe Samolun Kinamwe
15, 16. (a) Jiowa a filata io pwe epwe wisen King? (b) Mei fet ena nemenem, me io kewe repwe kapachelong?
15 Ren an epwe alukulukatiu pwe kinamwe mi enlet epwe toto ren meinisin mi nom fan ewe kokkot fan iten Muun we, Jiowa a fen awisa ngeni ewe enletin Samolun Kinamwe, Jises Kraist, ewe nemenem usun Aisea 9:6, 7 a oesini: “Pun emon monukol a uputiu rech. Kot a liffang ngenikich emon at, i epwe ach sou nemenem. Iwe, epwe iteni Sou Ekiek mi Amwarar, Kot mi manaman, Semach mi nom tori feilfeilo chok, pwal Samolun Kinamwe. Iwe, nemeneman epwe chok wattelo, nge muun epwe chok kinamwe fansoun meinisin. Iwe, tinikennin Jiowa Sapaot epwe fori ena mettoch.” Ewe sou mak kol fel a pwal oesini usun ewe nemenem mi kinamwe ewe Messaia epwe eani: “Lon ranin kewe ewe emon mi pwung epwe pwukuta, me kinamwe epwe somolo tori an esap chuen nom ewe maram.”—Kol Fel 72:7.
16 Pwal och, 144,000 pwiin Kraist mi kepit ren ewe ngun mi fel repwe eti i le nemenem lon lang. Ikkena ir chienen Kraist chon alemwir, me iei makkeien Paul ussur: “Iwe, ewe Koten kinamwe epwe muttir kiterialo Setan fan pechemi. Chenin ach Samol Jises epwe nonnom remi.” (Rom 16:20) Ewer, seni lang chokana repwe eti an Kraist pworaiti ewe chon efisata maun, Setan ewe Tefil!
17. Met sipwe fori ren ach sipwe tufichin kuna kinamwe mi enlet?
17 Iwe, a wor ei kapas eis: Met kopwe fori ren an epwe toruk kinamwe mi enlet? Kinamwe mi enlet epwe tongeni toto lon chok alen Kot, me kopwe mokut ren om kopwe angei. Kopwe luku ewe Samolun Kinamwe me kulliti i. Weween, kopwe luku Kraist lon wisan we, wisen Chon Amanaua me Chon Monisefalli chon fonufan mi tipis. Jises a eani ei kapas mi foulo: “Pwe a chok iei ussun an Kot tongei fonufan, pwe a fangolo Noun we Alaemon pwe iteiten aramas meinisin mi luku i esap poutmwaalilo, nge epwe kuna manau esemuch.” (Jon 3:16) Kopwe tongeni luku pwe Kraist Jises, i noun Kot Chon Kuno, iwe, epwe wisen atoto kinamwe mi enlet me amanau? Esor pwal eu it fan lang epwe tongeni foratiu me alukulukatiu kinamwe. (Filipai 2:8-11) Met popun? Pun Jises noun Kot Chon Filita. I a lap seni meinisin chon esilefeili kinamwe won fonufan. Kopwe auseling ngeni Jises me tapwelo mwirin?
18. Met sipwe ita fori pokiten minne Jises a apasa lon Jon 17:3?
18 Jises a apasa, “Iei ewe manau esemuch, pwe repwe silei en, ewe emon chok Kot mi enlet, pwal Jises Kraist ewe kan akunooto. (Jon 17:3) Iei ewe fansoun om kopwe kakkaeo ewe sile mi enlet ren om fiffiti ekkewe mwich Chon Pwarata Jiowa ra akeani lon ewe Kingdom Hall. Ekkena mwich fan iten asukul repwe amwokutuk om kopwe awewei ngeni aramas met ra kaeo me eani apilukuluk ngeni. En mi pwal tongeni wiliiti emon chon esilefeili an Kot kinamwe. Kopwe tongeni pwapwaesini kinamwe iei ren om eani lukuluk won Jiowa Kot, ussun minne Aisea a apasa lon Aisea 26:3 me ren ewe New International Version: “Kopwe chechemeni fan kinamwe mi unusoch emonewe mi ppwosolo ekiekin, pun a lukuk.” Kopwe ita luku io? “Oupwe luku Jiowa fansoun meinisin, pun Jah Jiowa ewe Achau tori feilfeilo chok.”—Aisea 26:4.
19, 20. Ekkewe mi kukkutta me tapwelo mwirin kinamwe ikenai repwe kuna met lon mwach kkan?
19 Kopwe uppwos iei fan iten manau esemuch lon an Kot fonufan sefo mi kinamwe. A wor ei kapasen alukuluk lon Pwarata 21:3, 4: “Nengeni, ewe imwen Kot a nom ren aramas. Pwisin i epwe nonnom rer, o ir repwe noun aramas, o Kot epwe pwisin nonnom rer. I epwe tolu seni meser chonun meser meinisin, o esap chuen wor malo, esap pwal chuen wor kechiu, are akurang, are metek, pun ekkewe mettochun lom ra fen morolo.” Esap ina ewe sokkun kinamwe ka tipeni fan iten mwach kkan?
20 Iwe, chechemeni minne Kot a fen pwonei. “Nge ir ekkewe mi mosonoson repwele fonufan ewe fonufan, o repwe mmeseik ren somolon kinamwe. Kopwe pippi ewe emon mi pwung me nengeni ewe emon mi wenechar, pun ena mwan epwe kuna kinamwe lon fansoun mwan.” (Kol Fel 37:11, 37) Lupwen ena ran mi apwapwa epwe war, amwo sipwe apasa ren kilisou, “Iei a fen toto kinamwe mi enlet! Kilisou ngeni Jiowa Kot, ewe emon mi atoto kinamwe mi enlet!
En mi Tongeni Awewei?
◻ Met epwe tongeni alisikich pwe sipwe siwili ekiekich me fofforuch?
◻ Ifa ussun Chon Pwarata Jiowa ra kan pwarata pwe ra tongei kinamwe mi enlet?
◻ Met Jiowa epwe fori ngeni meinisin mi alapalo oput me maun?
◻ Nemenemen ewe Samolun Kinamwe epwe apwonueta met fan iten chon fonufan?
[Ekkewe sasing lón pekin taropwe 12]
Ekkeei ruuemon mwan ra siwili manauer pwe repwe tapwelo mwirin kinamwe
Rami Oved
Georg Reuter
[Sasing lón pekin taropwe 13]
Kinamwe mi enlet epwe choufetal fan nemenien ewe Samolun Kinamwe