“Jiowa Esap Likitalo Noun Kewe Aramas”
“Chommong sokkun riaffou repwe tori emon mi pwung; nge Jiowa epwe chok angasalo i senir meinisin.”—KÖLFEL 34:19.
1, 2. (a) Ifa ussun Jiowa a ekefeiochu noun kewe aramas ikenai? (b) Met a tottori chommong chon Kraist, me ikkefa ekkewe kapas eis mi piita?
REN PWONUTAAN oesinien Paipel, chon fel ngeni Jiowa ra nonnom lon eu paratisin ngun. (2 Korint 12:1-4) Chon Pwarata Jiowa, ir chon eu mwicheichen pwipwi won unusen fonufan mi eani tong me tipeeu. (Jon 13:35) Ra pwapwaesini ar wewefichiti me sileifichi ekkewe poraus enlet lon Paipel. (Aisea 54:13) A ifa watten ar kilisou ngeni Jiowa ren an mut ngenir pwe repwe wasola lon an tento lon pekin ngun!—Kol Fel 15:1.
2 Ikaamwo meinisin lon an Jiowa mwicheich ra kan pwapwaesini wour lon pekin ngun, nge a ussun ita pwe ekkoch ra eani manau mi kinamwe me mosonoson, nge fitemon ra kuna chommong sokkun riaffou. Chommong chon Kraist ra riaffou fansoun langattam me rese kuna ewe alen ngaselo. Ra kan letipechou fan ar riaffou. (Proferpis 13:12) Riaffou a kan fis pokiten an Kot song? Jiowa a ita tuttumunu ekkoch chon Kraist nge a likitalo ekkewe fitemon?
3. (a) Jiowa a ekefisata ekkewe fitikoko mi tori noun kewe aramas? (b) Pwata chon fel ngeni Jiowa mi tuppwol ra pwal kuna riaffou?
3 Paipel a polueni: “Emon esap apasa fansoun sossot, ‘Ai sossot a feito me ren Kot’; pun Kot esap sossot ren mettoch mi ngau, nge i esap pwal sotuni emon.” (Jemes 1:13) Jiowa ewe Sou Tumunu me Sou Alikiitu noun kewe aramas. (Kol Fel 91:2-6) “Jiowa esap likitalo noun kewe aramas.” (Kol Fel 94:14) Esap weween pwe chon fel mi tuppwol resap kuna riaffou. Ototen ei fonufan a nom fan nemenien aramas rese unusoch. Chommong ra ppwor me ekkoch ra wesewesen ngau. Esor emon leir mi kutta tipatchem seni Jiowa. Ena mettoch a kan efisata chommong riaffou. Paipel a affata pwe noun Jiowa kewe aramas resap tongeni ti senir pwunungauen an aramas apwangapwang me lapalaper mi ngau.—Foffor 14:22.
Chon Kraist mi Tuppwol ra Ekiekin Kuna Riaffou
4. Chon Kraist meinisin repwe ekiekin kuna met atun ar repwe nonnom lon ei otot mi ngau, me met popun?
4 Ikaamwo esap ir chon pacheri fonufan, nge noun Jises chon kaeo ra manau lon ei otot minen lom. (Jon 17:15, 16) Paipel a affata pwe Setan a nemeni ei fonufan. (1 Jon 5:19) Ina minne, meinisin chon Kraist repwe ekiekin kuna fitikoko watte. Ina ewe popun ewe aposel Piter a apasa: “Oupwe ononoto, oupwe mammasa. Ewe chon oput ami, ewe Tefil, a feffeilfetal ussun chok emon laion mi orior, o a kukutta emon pwe epwe oromalo. Iwe, oupwe u ngeni i, o oupwe lukuchar lon ami luku, pun oua silei pwe ekkewe chok sokkun riaffou a pwal tori pwiimi soulang lon unusen fonufan.” (1 Piter 5:8, 9) Ewer, unusen ewe mwicheichen chon Kraist epwe ekiekin kuna riaffou.
5. Ifa ussun Jises a affata pwe chon Kraist mi tuppwol repwe kuna mettoch mi aletipechou?
5 Ikaamwo sia wesewesen tongei Jiowa me sia tuppwol ngeni an kewe minen emmwen, nge sipwe kuna letipechou. Jises a affata ena lon an kapas awewe mi mak lon Mattu 7:24-27, iwe, a alollofeseni ir mi alleasochisi alon me ir kewe rese alleasochisi. A apasa pwe chon kaeo mi alleasochis ra ussun emon mwan mi mirit, nge a aueta eu imw won achau. A apasa pwe chokewe rese alleasochis ra ussun emon mwan mi tiparoch mi aueta imwan won ppi. Mwirin eu molumol watte, ewe chok imw mi kau won achau a chuen uta. Nengeni pwe ren imwen ewe mwan mi mirit, “a pung utemmong, a autaut konik, a enien asapwal, o molumoliiti ewe imw, nge ese ttur.” Jises ese pwonei pwe ewe mwan mi mirit epwe kuna kinamwe fansoun meinisin. Nge miritin ena mwan epwe ammolnata i pwe epwe likiitu fan ewe molumol. A pwal ina ussun ewe kapas awewe ussun ewe chon amora pwikil. Lon ena poraus, Jises a awewei pwe chon fel mi alleasochis mi eani “letip mi enlet o murinno” repwe “ukkuwa lon ar likiitu.”—Luk 8:4-15.
6. Lon an Paul kapas awewe ussun ekkewe mettoch mi karemmang, io kewe repwe kuna sossot watte?
6 Lupwen ewe aposel Paul a mak ngeni chon Korint, a nounou kapas awewe pwe epwe affata lamoten ekkewe lapalap mi lukuchar, nge ir mi tongeni alisikich lon fansoun sossot. Mettoch mi karemmang, awewe chok ren kolt, silifer, me fau auchea, ra ussun ekkewe lapalap Kot a pwapwaiti. (Alollo ngeni Proferpis 3:13-15; 1 Piter 1:6, 7.) Iwe nge, lapalap mi ngau ra ussun mettoch mi muttir kar. Iwe, Paul a pwal apasa pwe “Angangen emon me emon epwe pwapwalo; pun ewe ran epwe pwari ussun, o ekkei epwe pwal pwarata. Pun ewe ekkei epwe sotuni lapalapen angangen emon me emon. Are angangen emon a aueta won ewe longolong epwe nonnom chok, iwe, atewe epwe angei liwinin.” (1 Korint 3:10-14) Iwe, Paipel a pwal awewei pwe oukich meinisin sipwe kuna och sossot mi ussun ekkei.
7. Me ren Rom 15:4, ifa ussun Paipel epwe tongeni alisikich le likiitu fan sossot?
7 A wor chommong poraus lon Paipel ussun chon angangen Kot mi tuppwol mi likiitu fan riaffou, nge fan ekkoch a ttam ar riaffou. Iwe nge, Jiowa ese likitirelo. Neman ewe aposel Paul a ekieki ekkena poraus lupwen a apasa pwe “Minne mi makketiu lom, a makketiu pwe sipwe kaeo, pwe epwe wor rech apilukuluk allim ren likiitu o aururu me ren ekkewe puk.” (Rom 15:4) Nengeni mwo porausen ulungat mwan mi ririoch ngeni Kot, nge ra kuna chommong riaffou.
Met Sia Kaeo Seni Poraus lon Paipel
8. Met Jiowa a mutata ren porausen Josef, me ifa ttaman?
8 Noun Jekop mwan itan Josef a kuna chen seni Jiowa seni le kukkunun. Iwe nge, ikaamwo esap tipisin, nge a kuna fitikoko. Pwiin kewe ra turufi me kirikiringau ngeni. A kamolo pwe epwe emon chon kichiniwel lon eu fonuen ekis, iwe, a wor tipimwaal ngeni me a koturulong lon “imwen fotek.” (Keneses 40:15) Me ikewe ie, “pechen kewe ra talo ren ekkewe sal mecha, ra pwal ri ngeni uan selimecha.” (Kol Fel 105:17, 18) Atun an chon kichiniwel me an fotek, ese mwaan Josef a tingorei Jiowa fan chommong pwe epwe ngaselo. Iwe nge, ren 13 ier, ikaamwo Jiowa a apochokkula i lon lapalap mi sokkopat, nge iteiten lesossor an nelo, i mi chuen emon chon kichiniwel are chon fotek.—Keneses 37:2; 41:46.
9. Met Tafit a likiitu fan ren fite ier?
9 A pwal ina ussun Tafit. Lupwen Jiowa a ekiekin filata emon mwan mi tufichin nemeni Israel, iei alon: “Ua kuna emon mwan mi apwapwai letipei, Tafit noun Jessi.” (Fofor 13:22) Ikaamwo a kuna chen seni Jiowa, nge Tafit a kuna riaffou lapalap. Ren fite ier a op lon fonu poon, lon pwangen achau me lon fonuen ekis pun emon a mochen nnielo. A letipechou me niuokkus pun a ussun emon man aramas ra chei. Iwe nge, a likiitu ren pochokkulen Jiowa. A pwung alon Tafit ei pokiten pwisin kunaan: “Chommong sokkun riaffou repwe tori emon mi pwung; nge Jiowa epwe chon angasalo i senir meinisin.”—Kol Fel 34:19.
10. Ifa ewe riaffou lapalap a tori Napot me an famili?
10 Lon fansoun ewe soufos Ilaija, a wor 7,000 chok lon Israel rese fotopukutiu ngeni ewe kot chofona Paal. (1 King 19:18; Rom 11:4) Neman Napot emon leir, nge a kuna watte pwungungau. A watte asauan pwe aramas ra tipimwaal ngeni pwe a anumamaua Kot. A kapwungulo pwe i mi tipis me ewe king a apwungalo pwe epwe malo ren an aramas monei ngeni fau, iwe, konak ra chonnekanei chaan. Pwal mwo nge noun kewe mwan ra nninniilo! Iwe nge, esor tipisin. Ekkewe chon pwarata mi tipimwaal ngeni ra chofona. Ina eu rau Kiwin Sesepel a ekiekieta fan iten ewe king epwe angei an Napot we atakeen krep.—1 King 21:1-19; 2 King 9:26.
11. Met ewe aposel Paul a erenikich ussun mwan me fefin mi tuppwol lon uruwoon Paipel?
11 Josef, Tafit, me Napot ulumon chok me lein ekkewe mwan me fefin mi tuppwol lon Paipel mi kuna riaffou. Ewe aposel Paul a makkei uruwoon noun Jiowa kewe chon angang seni lom lom. A kapas ussun ir mi “kuna riaffou ren esiit are wichi, ewer, pwal selimecha are eolo lon imwen fotek. Ra fen achei, ra ngerefesen, ra malo ren ketilas, ra feilfetal o ufouf kilin siip are siike, ra osupwangolo, ra kuna riaffou o kirikiringau—ese mwo fich ngeni aramasen fonufan pwe ekkeei aramas repwe nonnom rer—ra torongaufetal lon ekkewe fonu poon, o won ekkewe chuuk, o ra nonnom fan achau, o lon pwangen ppwul.” (Ipru 11:36-38) Nge Jiowa ese likitiirelo.
Jiowa a kan Tongei Ir mi Riaffou
12. Ikkefa ekkoch me lein ekkewe riaffou mi tori Chon Pwarata Jiowa ikenai?
12 Ifa ussun noun Jiowa kewe aramas ikenai? Kot epwe tumunu me amanaua an mwicheich lon ekkeei sopwolon ran me atun ewe riaffou mi lapalap. (Aisea 54:17; Pwarata 7:9-17) Iwe nge, ren emon me emon leich, sia weweiti pwe “fansoun me kefisitaan mettoch sise ekiekin kuna” a tori aramas meinisin. (Eklesiastis 9:11) Ikenai a wor chommong chon Kraist mi kuna riaffou. Ekkoch ra mmen mwelele. Paipel a kapas ussun chon Kraist mi riaffou, nge ir “semirit mi masen, o pwal ekkewe fefin mi malo puluwer.” (Jemes 1:27) Pwal ekkoch mi riaffou pokiten mettoch mi efeiengau mi pukun fis, maun, ipweri alluk, nemenemengau, samau, me malo.
13. Met sokkun mettoch mi weires a fen fis kanoto chok?
13 Ren chok awewe, ekkewe kisin ofesin ewe Watch Tower ra makkei repot lon 1996 ngeni ewe Mwichen Sou Pwungupwung ren Chon Pwarata Jiowa ussun ekkoch pwiich mi kalapus lon leeni mi annou pokiten ar tuppwol ngeni allukun Paipel. Ulungat mwichefel lon eu fonu lon South America ra toropaselo lupwen sounfiu ra eriani fitepuku Chon Pwarata pwe repwe su seni ewe leeni. Lon eu fonu lon West Africa, ekkoch Chon Pwarata ra malo lupwen a serenir och maun. Lon eu fonu me Central America, a lapalo osupwangen ekkoch pwiich lupwen a fis taifun. Ika esor osupwangen mongo are met kewe lon ekkoch leeni, eli ekkoch resap pwapwa pokiten ekkewe lapalap mi aletipechou. Pwal ekkoch ra choutiu ren osukosuken nonnomur ran me ran. Eli pwal fitemon repwe piitelo lupwen repwe afalafala ewe poraus allimen ewe Muu pun aramas resap mochen auseling.
14. (a) Met sia kaeo seni porausen Hiop? (b) Lap seni ach eani ekiek mi aletipechou, met sipwe fori lupwen sipwe kuna riaffou?
14 Sap minne ekkena poraus ra pwarata pwe Kot ese pwapwaitir. Chechemeni Hiop me ekkewe chommong mettoch a riaffou ren. I “emon mwan mi pwung me wenechar.” (Hiop 1:8) Ese mwaal Hiop a mmen letipechou lupwen Elifas a era pwe i mi tipis! (Hiop, sopwun 4, 5, 22) Sisap mochen muttir ekieki pwe sia kuna riaffou pokiten sise apwapwai Jiowa lon och lapalap are pokiten an Jiowa aukatiu an feioch. Lon fansoun riaffou ach luku epwe tongeni apwangapwangolo ren ekiek ese pwung. (1 Tesalonika 3:1-3, 5) Ika sipwe kuna riaffou, epwe och ach sipwe ekieki pwe Jiowa me Jises ra peppeni ir mi pwung, ese lifilifil met epwe fis.
15. Ifa ussun sia silei pwe Jiowa a ekiekifichi ekkewe riaffou mi tori noun kewe aramas?
15 Ewe aposel Paul a aufichi letipach ren alon ei: “Io epwe aimukichelo seni ewe tongen Kraist? Riaffou, are weires, are nninni, are lengita, are selelo, are feiengau, are ketilas? . . . Ua fokkun meefi pwe sap malo are manau, sap chonlang are muu, sap mettoch mi nonnom iei, are mettoch mi epwe feito, are manaman, sap mettoch mi tekia, are mettoch mi tekison, are pwal och lon masouen lang me fonufan, epwe tongeni aimukichelo seni ewe tongen Kot mi nonnom lon Kraist Jises ach Samol.” (Rom 8:35, 38, 39) A mmen watte an Jiowa ekieki ussuch me a weweiti ach riaffou. Iei makkeien Tafit atun an su seni ir mi kutta manauan: “Mesen Jiowa ra nengeni ekkewe aramas mi pwung, o selingan kewe ra rong ar puchor. Jiowa a chok arap ngeni chon letipeta.” (Kol Fel 34:15, 18; Mattu 18:6, 14) Semach lon lang a tongeikich me a meefi riaffoun aramas. (1 Piter 5:6, 7) Epwe awora met sipwe tufichin likiitu ren fan iten sokkun riaffou meinisin sipwe kuna.
An Jiowa kewe Liffang ra kan Alikiitukich
16. Ifa ewe mettoch Jiowa a awora mi alisikich pwe sipwe likiitu, me ifa ussun?
16 Ikaamwo sisap unusen ngaselo seni fitikoko lon ei otot minen lom, nge sisap “tamepichilo.” (2 Korint 4:8, 9) Jises a pwonei ngeni noun chon kaeo pwe epwe tinatiu an alillis. Iei alon: “Upwe tingor ngeni ewe Sam, o i epwe fangolo ngenikemi pwal emon chon aururu, pwe epwe nonnnom remi feilfeilo chok, ewe ngunun enlet.” (Jon 14:16, 17) Lon Pentecos 33 C.E., ewe aposel Piter a ereni chon auseling pwe repwe angei “ewe liffang, ewe ngun mi fel.” (Fofor 2:38) Ewe ngun mi fel a kan akalisikich ikenai? Ewer! An Jiowa manaman a kan ngenikich uwaa mi murinno: “Tong, pwapwa, kinamwe, mosonottam, kirokiroch, letip mi limoch, luku, mosonoson, me nemenem won memmeef.” (Kalesia 5:22, 23) Ekkena lapalap meinisin ra auchea, me ra alisikich pwe sipwe likiitu.
17. Ikkefa ekkoch poraus mi enlet seni Paipel mi apochokkula ach luku me appwosa letipach pwe sipwe eani apilukuluk won Jiowa fan mosonottam?
17 Ewe ngun mi fel a pwal alisikich pwe sipwe weweiti nge ekkewe riaffou iei ra “nonnom fansoun mochomoch chok me pwas” lupwen sia ekieki ewe feiochun manau esemuch. (2 Korint 4:16-18) Sia achifoua pwe Kot esap monuki ach angang me ewe tong sia pwarata ngeni. (Ipru 6:9-12) Lupwen sia alleani ekkewe kapas mi fel lon Paipel, a oururukich ren porausen ekkewe chon angang mi tuppwol lom lom mi likiitu fan chommong riaffou nge ir mi pwapwa. Iei makkeien Jemes: “Pwii ami, oupwe angei ekkewe soufos ussun ami leenien appiru lon ar kewe riaffou o mosonoson, ir mi kapas fan iten Jiowa. Nengeni, sia apasa pwe ir ekkewe mi likiitu ra pwapwa.” (Jemes 5:10, 11) Paipel a pwonei pwe “manaman mi somolo” epwe alisikich le likiitu fan sossot. Jiowa a pwal efeiochukich ren ewe apilukulukun manausefal. (2 Korint 1:8-10; 4:7) Ren ach akallea me ekekiekifichi ekkena pwon, sipwe apochokkula ach luku me appwosa letipach pwe sipwe witi Kot fan mosonottam.—Kol Fel 42:5.
18. (a) Oruuen Korint 1:3, 4 a peseikich pwe sipwe fet? (b) Ifa ussun ekkewe elterin Kraist repwe tongeni oururu me apochokkula aramas?
18 Pwal och, Jiowa a fen ngenikich ewe paratis lon pekin ngun, iwe, sia tufichin pwapwaesini ewe tong mi enlet lefilach me pwiich kewe chon Kraist. Oukich meinisin sipwe wisen oururufengennikich. (2 Korint 1:3, 4) Akkaewin, ekkewe elterin Kraist repwe kan oururu me apochokkulakich. (Aisea 32:2) Pokiten ir “mwan mi wewe ngeni liffang,” wiser ar repwe apochokkula ir mi riaffou, “oururu ir mi letipeta,” me “alisi ir mi apwangapwang.” (Efisus 4:8, 11, 12; 1 Tesalonika 5:14) Mi lamot an ekkewe elter nounouochu ewe Leenien Mas me Awake! chassi, pwal ekkewe puk mi kawor me ren “ewe chon angang mi tuppwol me tipatchem.” (Mattu 24:45-47) Ra masou ren chommong fon seni Paipel, nge ra tongeni alisikich le pwakini me pinei ekkoch ekkewe osukosuk sipwe tongeni aurek ren. Amwo sipwe appiru Jiowa ren ach oururufengennikich me ach apochokkulafengennikich lon fansoun weires!
19. (a) Met a alisikich le ti senikich fitikoko? (b) Fansoun meinisin sipwe eani apilukuluk won io, me met epwe atufichikich ach sipwe likiitu fan sossot?
19 Lupwen sipwe arap ngeni muchuloon ekkeei sopwolon ran me epwe ngauolo lapalapen ei otot minen lom, chon Kraist repwe achocho le ti senir fitikoko. (Proferpis 22:3) Weweoch, miritoch, me ach silei an Paipel emmwen epwe alisikich pwe sipwe kefiloch. (Proferpis 3:21, 22) Ren ach sisap mwaallilo, sipwe akauseling ngeni Kapasen Jiowa me akalleasochisi. (Kol Fel 38:4) Iwe nge, sia weweiti pwe ikaamwo sipwe achocho ngeni, nge sisap tufichin unusen amoielo riaffou seni manauach. Lon ei otot minen lom, chommong chon pwung ra kuna fitikoko watte. Nge, sipwe tongeni likiitu fan sossotuch kewe ren ach unusen luku pwe “Jiowa esap likitalo noun kewe aramas.” (Kol Fel 94:14) Sia pwal silei pwe ei otot minen lom me an kewe fitikoko repwele morolo. Ina popun, amwo sipwe appwosa letipach pwe sisap “tilikop le fori minne mi murinno, pun lon an we fansoun sipwe kini, are sise achanu.”—Kalesia 6:9.
Met Sia fen Kaeo?
◻ Met sokkun sossot mi tottori unusen ewe mwicheichen chon Kraist?
◻ Ikkefa ekkewe poraus lon Paipel mi alisikich le weweiti pwe sap minne riaffou esissinnen an Jiowa mangaueitikich?
◻ Ifa meefien Jiowa ussun ekkewe riaffou mi tottori noun kewe aramas?
◻ Ikkefa ekkoch liffang seni Jiowa mi alisikich le likiitu fansossot?
[Ekkewe sasing lón pekin taropwe 22]
Tafit, Napot, me Josef ulumon lein ir mi kuna riaffou