Sipwe Tongeni Feiöch Ren Ach Likiitü Fän Riäfföü
“Ir ekkewe mi likiitu ra feioch.”—JEMES 5:11.
ESE wor emön mi mirit a mochen küna riäfföü; Jiowa Kot, ewe Chon Förikich, ese pwal mochen aramas repwe riäfföü. Sia küna pwüngün ena mettoch lupwen sia etittina an we Kapas me nengeni ewe pworaus mwirin än Kot föratä mwän me fefin. Akkom, Jiowa a föri ewe mwan. “Kot ewe Samol mi Lapalap a föri eman aramas seni pwülün fanü o wussalong lon pwötün enienin ngasangasen manau. Iei usun manau a tori ewe aramas.” (Keneses 2:7) Mi unusöch inisin me ekiekin Atam, me ururun, esap uri semwen are mälo.
2 A ifa ussun napanapen nonnomun Atam? “Kot a föri eu tanipi lon fanüan ötiu itan Ichen. Ikenan a alenia ewe aramas a föri. Iwe, seni lon ewe pwül Kot ewe Samol mi Lapalap a amärätä sokun irä meinisin mi apwapwai aramas le katol o mürina le mongö.” (Keneses 2:8, 9) Ewer, a mmen fokkun ling leenien Atam we. Ese wor riäfföü lon ena leeni, Ichen.
3 Keneses 2:18 a erä: “Kot ewe Samol mi Lapalap a pwal apasa, ‘Esap öch pwe ewe aramas epwe chök eman. Üpwe föri eman alisian mi wewe ngeni.’” Jiowa a föratä puluwen Atam we mi ünüsöch pwe repwe tufichin küna pwapwa lon ar famili. (Keneses 2:21-23) Ewe Paipel a pwal erä: “Kot a afeiöchüür o üreniir, ‘Oupwe nöünöü me achomongakemi pwe fonüfan epwe masou remi o nom fän nemeniemi.’” (Keneses 1:28) A mmen mürinnö wisen ewe äkkäeüin pean aramas pwe repwe achöüfetälei ewe Paratisin Ichen tori fansoun unusen fönüfan epwe wiliti eü paratis. Repwe nöünatiu nöür kewe mi pwapwa, nge resap küna riäfföü. A ifa me watteen amwararen lepoputään manauen aramas!—Keneses 1:31.
A Poputä Riäfföü
4 Nge, ika sipwe nengeni uruwon aramas seni loom tori ikenäi, a ffat pwe och mettoch mi mwäälilo. Chommong mettoch mi ngaü ra fis, me aramas ra küna riäfföü watte. Ren fitepükü ier, mwirimwirin Atam me If kewe meinisin ra semmwenilo, chinnapelo, me mälo. Ach ei fönüfan esap eü paratis mi ur ren aramas mi pwapwa. Rom 8:22 a aweweöchü nonnomun aramas woon fönüfan lupwen a erä: “Masouen lang me fonufan meinisin ra chok ngungufengen tori ei fansoun.”
5 Esap tipisin Jiowa pwe a fis ekkeei riäfföü lapalap fansoun langattam. (2 Samuel 22:31) Nge aramas ra kapachelong lon fisitään ekkeei osukosuk. “Ir ra fokun ngau, ra föri sokun föför mi anioput.” (Kölfel 14:1) Nonnomun popuch kewe me lepoputään a mmen fokkun öch. Jiowa a chök kütta seniir ar repwe älleäsochisi I, nge Atam me If ra filatä ar repwe imulo seni Jiowa. Pokiten ra tunalo Jiowa, rese chuen unusöch. Ra apwangapwangelo tori ar repwe mälo. Iwe, a ina ussun a fis pwe aramas meinisin rese unusöch.—Keneses 3:17-19; Rom 5:12.
6 Emön ngün itan Setan ewe Tefil a pwal kapachelong le poputääni riäfföü meinisin. A fen wor an tufichin pwisin filatä. Iwe nge, a äeämwäälli ena tufichin filatä pun a mochen aramas repwe fel ngeni i. Nge, mi fich ngenikich ach sipwe fel ngeni Jiowa chök, nge sap förian kewe. Setan a etipetipa Atam me If ar repwe imulo seni Jiowa, ussun itä nge repwe tongeni “wewe ngeni Kot o silei mine a öch pwal mine a ngau.”—Keneses 3:5.
Jiowa Chök Mei Wor an Pwüngün Nemenem
7 Pwününgaüen ar ü ngeni Kot a pwäratä pwe Jiowa Kot chök, ewe Epinkepiisom, a wor an pwüngün nemenem me an nemenem a pwüngüöch. Ekkewe fite ngeröü ier ra lo ra pwäralo pwe Setan, ewe a wiliti “samolun ei fonufan,” a föratä eü nemenem mi ngaü, mwänesol, me mi unusen tufichingaü. (Jon 12:31) Fän emmwenien Setan, än aramas nemenem fansoun langattam a pwal annetatä pwe rese tufichin nemenem fän pwüng. (Jeremaia 10:23) Uruwon aramas a unusen affata pwe sokkopaten nemenem meinisin mi imulo seni an Jiowa we nemenem epwe chök sopwongaü.
8 Jiowa a fen mutatä fite ngeröü ier fän iten aramas ar repwe sotuni sokkopaten mwu mi imulo seni i. Nge iei, a fen wor an pwüng le amoielo meinisin ekkena nemenem me siwili ngeni pwisin an nemenem. Eü oesini a kapas ussun ei mettoch, a erä: “Iwe, lon fansoun mwün ekewe king, ewe Koten läng epwe aüetä eu mwü esap tongeni tala, . . . epwe ataela o arosala ekewe lusun mwü, nge epwe püsin nom tori feilfeilochök.” (Taniel 2:44) Ekkewe nemenem ren ekkewe timon me aramas resap chuen nom me Mwuun Kot chök lon läng epwe nemeni fönüfan. Jises epwe wisen King me epwe wor chienen kewe sou-nemenem, ekkewe 144,000 aramas mi feito seni fönüfan.—Pwarata 14:1.
Küna Feiöch Seni Riäfföü
9 A mmen öch ach sipwe nengeni tufichin ir kewe repwe nemenem lon ewe Mwu lon läng. Akkom, Kraist Jises a pwäratä pwe a tufich ngeni wisan we ussun emön King. A nonnom ren Jiowa lon fite fansoun ese ffat me föfföri letipan we, me a ussun nöün “eman sousile angang.” (Än Salomon Fos 8:22-31) Lupwen Jiowa a akkota pwe i epwe feitiu fönüfan, Jises a tipemecheresin fiti ena kkot. Woon fönüfan a achocho le esile ngeni aramas ussun an Jiowa nemenem me an we Mwu. Jises a pwal isetiu eü leenien äppirü fän itach ren ach sipwe unusen anomukich fan än Kot nemenem.—Mattu 4:17; 6:9.
10 Jises a küna riäfföü mwääl, iwe le sopwoloon a ninnilo. Atun an angangen afalafal a küna watteen attongen nonnomun aramas. A wor lamoten an a küna me pwisin meefi riäfföü? Ewer. Ipru 5:8 a erä: “Inaamo ika i Noun Kot, nge a kaeo alleasochis ren an kewe riaffou.” Met a fis ngeni Jises me woon fönüfan a alapalo an weweiti aramas me an umöümöch. A pwisin küna wesewesen nonnomun aramas. A tongeni meefi weiresin chokkewe ra riäfföü me weweöchüiti lamoten an epwe angaserelo. Nengeni ifa ussun Paul a menlapei ei mettoch lon puken Ipru: “Iei minne, a fakkun lollofengen me pwin kewe lon mettoch meinisin, pwe epwe pwisin wiliti Samol-Fel Lapalap, mi umoumoch o tuppwel lon angangen Kot, pwe epwe wouni tipisin aramas. Pun usun pwisin i a fen kuna riaffou o sosot, iei minne a tongeni alisi ir ekkewe mi pwal kuna sosot.” “Pun esor rech emon samol-fel lapalap mi ese tongeni meefi ach kewe apwangapwang, pwe emon mi a fen kuna sosot ren mettoch meinisin usun chok kich, nge esor an tipis. Iwe, sipwe chok pworacho le arap ngeni an we leenien motun chen, pwe sipwe angei umoumoch o pwal kuna chenin alisi lon fansoun ach osupwang.”—Ipru 2:17, 18; 4:14-16; Mattu 9:36; 11:28-30.
11 Met a fis ngeni Jises a pwal weneiti ekkewe 144,000, ir kewe mi ‘amomoto’ seni fönüfan pwe chienen Kraist Jises le nemenem lon ewe Mwuun läng. (Pwarata 14:4) Ir meinisin ra uputiu me määritä lon ei fönüfan mi ur ren riäfföü me ir pwisin ra pwal küna riäfföü. Chommong leir ra küna riäfföü mwääl, nge ekkoch ra pwal mwo nge ninnilo pokiten ar tuppwöl ngeni Jiowa me ar tipemecheres le tapwelo lon ipwen Jises kewe. Nge resap “sau ren ar pwarata usun ar Samol, nge ra riaffou fan asengesin ewe kapas allim ren manamanen Kot.” (2 Timoti 1:8) Künaen manauer woon fönüfan a atufichiir ar repwe apwüngü aramas woon fönüfan seni läng. Ra käeö ifa ussun repwe awattei ar tong, kirekiröch, me mwotores le älisi aramas.—Pwarata 5:10; 14:2-5; 20:6.
Pwapwaan Ir kewe mi Äpilükülükün Manau Woon Fönüfan
12 Ekkewe riäfföü aramas ra küna iei repwe tongeni efeiöchü ir kewe ra äpilükülükün küna manau esemuch lon paratis, ikewe ie esap chüen wor samau, letipeta, me mälo ie? Pwüngün pwe ese wor emön a efich metek me ngüngüres mi popu seni riäfföü. Nge lupwen sia likiitü fan ekkena riäfföü, a amürinnölo napanapach me a atoto rech pwapwa.
13 Nengeni met ewe Kapasen Kot a erä ussun ei mettoch: “Nge are oupwe fakkun kuna riaffou pokiten pung, oupwe pwal kuna feiochumi.” “Oupwe chok kuna feiochumi, are ra lalengau ngenikemi fan asengesin iten Kraist.” (1 Piter 3:14; 4:14) “Ami oupwe feioch, lupwen repwe laleitikemi are eriaffoukemi are chofanata sokkun mi ingau meinisin usun ami pokitei. Ami oupwe chengel o pwapwa chapur, pun liwinimi epwe lapalap lon lang.” (Mattu 5:11, 12) “Mi feioch ir ekkewe mi likiitu lon sosot, pun mwirin ar pworacho repwe angei ewe mwarin manau.”—Jemes 1:12.
14 Sap minne ekkewe riäfföü sia küna mi apwapwaikich. Nge ewe pwapwa a popu seni ach silei pwe sia riäfföü pokiten ach föfföri letipen Jiowa me ach tapwelo mwirin Jises. Ren chök awewe, lon fansoun ekkewe aposel, ekkoch me leir ra kalapus, mwirin, ra kapwüng lon an chon Jus kewe imwen kapwüng mi lap, me kuna esiit pokiten ar afalafal ussun Jises Kraist. Ra küna kawet me mwirin ra musolo. Ifa ar ekiek ussun ekkeei mettoch? Ewe Paipel a apasa pwe “ra tou seni mwen mesen ewe mwichen sou nemenem. Ra chok pwapwa, pun a pwalo pwe a fich ngenir ar repwe kuna itengau ren ewe it.” (Fofor 5:17-41) Ra pwapwa esap ren ewe kawet me metek ra küna, nge seni ar weweiti pwe a fis pokiten ar tuppwöl ngeni Jiowa me ar tapwelo mwirin Jises.—Fofor 16:25; 2 Korint 12:10; 1 Piter 4:13.
15 Ach ekieköch lupwen sia likiitü fän riäfföü-mwääl epwe tongeni alikiitükich. Epwe atufichikich ach sipwe likiitü fan ekkewe sossot epwe torikich lon mwachkkan. Sia älleäni: “Ami pwii kena, oupwe ekieki pwe minen pwapwa enlet fansoun ekkewe sosot mesemesekkis epwe torikemi, pun oua sinei pwe sosotun ami luku epwe efisata ami likiitu.” (Jemes 1:2, 3) Pwal ina chök ussun met Rom 5:3-5 a erenikich: “Sia pwal pwapwa ren ach riaffou, o sia meefi pwe riaffou epwe efisata likiitu, o likiitu epwe efisata manauoch, o manauoch epwe efisata apilukuluk allim. Iwe, ewe apilukuluk allim esap alichipungukich.” Ükükün watteen ach likiitü fän riäfföü pokiten kich Chon Kraist, epwe pwal ina ükükün watteen ach likiitü fan ekkewe riäfföü epwe torikich.
Jiowa Epwe Liwini Ngenikich
16 Inaamwo ika epwe pöüt senikich pisekich seni an aramas ü ngenikich are riäfföü-mwääl pokiten sia amwöchü ach tuppwöl, sipwe menemenöch le silei pwe Jiowa epwe efeiöchükich. Awewe chök, ren ir kewe ra äpilükülükün feitä läng, ewe aposel Paul a makkei: “Oua . . . pwapwa lupwen ra uwei senikemi pisekemi, pun oua fen silei pwe mi wor remi sokkun pisek mi murino seni,” weween, repwe wiliti sou nemenem lon än Kot we Mwu. (Ipru 10:34) A ifa me watteen ar pwapwa lupwen repwe wisen efeiöchü aramas lon ewe fönüfan sefö fän emmwenien Jiowa me Kraist. Mi enlet met aposel Paul a mak ngeni ekkewe chon Kraist mi tuppwöl: “Ua meefi pwe sisap tongeni alolofengenni ach keei riaffou lon ei fansoun me ewe ling epwe pwato mwirin.”—Rom 8:18.
17 Pwal ussun chök ren ir kewe mi eäni äpilükülükün manau woon fönüfan. Inaamwo ika epwe pöüt seniir pisekiir are ra pwisin fangelo och mettoch fän iten än Jiowa angang nge Jiowa epwe fokkun efeiöchüür lon mwach kan. Epwe liffang ngeniir manau esemuch me manau mi unusöch lon ewe paratis woon fönüfan. Lon ewe fönüfan sefö, Jiowa “epwe tolu seni meser chonun meser meinisin, o esap chuen wor malo, esap pwal chuen wor kechiu, are akurang, are metek, pun ekkewe mettochun lom ra fen morelo.” (Pwarata 21:4) Mwa met ren amwararen ena pwon! Ese wor och mettoch sipwe fangelo lon ei otot fän iten Jiowa epwe tongeni löllö ngeni ewe manau mi amwarar Jiowa epwe liffang ngeni nöün kewe chon angang mi tuppwöl me likiitü fän riäfföü.
18 Meinisin sokkun riäfföü epwe torikich resap tongeni atai ach pwapwaesini ewe manau esemuch lon än Kot we fönüfan sefö. Amwararen napanapen ewe fönüfan sefö epwe unusen amoielo ekkena riäfföü. Aisea 65:17, 18 a erenikich: “Esap chüen wor eman epwe chechemeni ekewe mettochun lom o ekieki usun. Nge oupwe chök pwapwa o mwänek fochofoch ren mine üpwe föri.” Mi pwal fich met pwiin Jises a erä: “Nengeni, sia apasa pwe ir ekkewe mi likiitu ra feioch.” (Jemes 5:11) Ewer, ika sia amwöchü ach tuppwöl me likiitü fan ekkewe riäfföü, sipwe küna feiöch iei me pwal lon mwach kan.
Ifa Ussun Kopwe Pölüeni?
• Ifa ussun aramas ra poputä le küna riäfföü?
• Ifa ussun riäfföü epwe alisi ekkewe repwe sou nemenemen ewe fonufan sefo me ekkewe repwe fönüeni fönüfan?
• Inaamwo ika sia küna riäfföü, nge pwata sipwe tongeni pwapwa iei?
[Study Questions]
1, 2. Met a pwäratä pwe esap än Jiowa kokkot pwe aramas repwe küna riäfföü?
3. Ifa än ewe äkkäeüin pean aramas äpilükülcük?
4. Lon uruwon fönüfan, met a pwälo ussun aramas?
5. Ifa ussun popuch kewe ra emmweni aramas meinisin ngeni riäfföü?
6. Ifa wisen Setan lon fisitään riäfföü?
7. Met sopwongaüen ewe föfförün ü ngeni Jiowa a pwäratä?
8. Ifa än Jiowa kokkot ngeni sokkun nemenem meinisin aramas ra föratä me ifa ussun epwe apwönüetä an na kokkot?
9, 10. Ifa ussun Jises a küna feiöch ren an kewe riäfföü?
11. Ifa ussun ar küna riäfföü woon fönüfan epwe älisi ekkewe repwe wisen king me samol fel?
12, 13. Ifa ussun ir kewe mi äpilükülükün manau woon fönüfan repwe feiöch seni ar küna riäfföü?
14. Pwata chon fel ngeni Jiowa ra küna pwapwa lon ar kewe riäfföü?
15. Ifa ussun ach likiitü fän riäfföü iei epwe efeiöchükich lon mwach kan?
16. Ifa ussun Jiowa epwe efeiöchü ekkewe repwe wisen king me samol fel pokiten ar riäfföü?
17. Met Jiowa epwe föri fän iten ekkewe mi äpilükülükün manau woon fönüfan, ir kewe mi tuppwöl ngeni iei?
18. Ifa än Jiowa we pwon mi apwapwa lon an we Kapas?
[Picture on page 27]
Popuch kewe ra eäni äpilükülük allim mi amwarar
[Picture on page 29]
Än Jises küna riäfföü a alisi i le molnetä ngeni an epwe emön King me Samol Fel Lapalap mi mürinnö
[Picture on page 31]
Ekkewe aposel ra “pwapwa pun a pwalo pwe a fich ngenir ar repwe kuna itengau” fän iten ar lükü