Pwata Sipwe Meefi Kilisou?
LUPWEN a reirei chulapen Harley, a siwili an angangen ffori pisek seni mecha, iwe, a wiliiti chon angang lon ofes. Lupwen emon a eisini i ussun an siwili an angang, iei alon Harley: “Ua positi ai we angangen ffori pisek. Nge enlet ua pwapwa ren ai angang iei lap seni ai angang me lom.”
Harley a awewei ewe popun an meefi pwapwa: “A popu seni lapalapen chienei kkewe chon angang. Rese ussun chienei kkewe lon ai we leenien angang me lom, pun nei pos iei me chienei kkewe chon angang ra kan aucheani minne ua ffori, me ra kan apunga ai angang murinno. Ina popun a mmen sokkolo seni lom meefiei iei.” Pokiten an meefi pwe mi auchea me lamot an angang, iei Harley emon chon angang mi pwapwa.
Kapas mi pwarata ach apunga emon are ach kilisou ngeni ika pwe mi fichiiti i epwe enletin apwapwai letipan. Iwe nge, ika aramas rese kan pwarata ar kilisou, a ussun asapwal mi fokkun ffoou, nge ina kunaen Shakespeare: “Enien, enien, en asapwal lon fansoun affoou, ewe riaffou ka atoto ese arap ngeni riaffoun an aramas rese pwarata kilisou.” A eu minen aletipechou pwe chommong ra fen kuna nafangauen kilisou.
Tumunukich pwe Site Pwarata Nafangauen Kilisou
Ikenai a kan morolo an aramas pwarata kilisou seni letiper. Awewe chok, emon soumak a eani ei kapas eis: “Ika ewe fin apupulu a tongeni makkei iten me leenien 200 aramas won ekkewe futo fan iten an epwe etiwer ngeni ewe apupulu, pwata neminnewe ese tongeni makkei taropwe fan iten an epwe pwarata an kilisou ren ekkewe 163 liffang a angei?” Fan chommong, aramas rese tongeni apasa “kilisou.” Kilisou a kan morolo, nge a lapalo an aramas eani ewe ekiek pwe pwisin mochenir epwe akkom. Ina eu esissinnen ekkewe ranin le sopwoloon. Iei an ewe aposel Paul ourour: “Kopwe weweiti pwe lon ekkewe ranin le sopwoloon fansoun meinisin epwe wor minen efeiengau. Aramas repwe ekieki chok akkom pwisin ir . . . Epwe unusen rosolo ar meefi kilisou.”—2 Timoti 3:1, 2, Phillips.
Lon pwal ekkoch fansoun, meseniau a kan siwili kilisou. Pwarataan kilisou a kan popu seni ewe letip, nge ese fiti ewe ekiekin angei och mettoch. Iwe nge, eli meseniau epwe popu seni an emon ekiekin apwonueta pwisin letipan are an mochen kuna pwisin feiochun. (Juta 16) Sap minne epwe chok otupu emonnewe a meseniau ngeni, nge kapasen emichimich a kan popu seni lamalam tekia. Iwe, ita io a mochen ttupulo ren meseniauen emon? Nge kilisou mi enlet a kan apwapwai letipach.
Emon mi pwarata kilisou epwe kuna feioch seni ena ffoffor. Ewe memmeef mi fisita seni an meefi kilisou seni letipan epwe alapalo an pwapwa me kinamwe. (Alollo ngeni Än Salomon Fos 15:13, 15.) Iwe, pokiten pwarataan kilisou, iei eu lapalap mi murinno, epwe tumunu i seni ekkewe memmeef mi ngau, awewe chok ren song, lolowo, me koum.
“Pwarata Ami Kilisou”
Ewe Paipel a peseikich pwe sipwe amaaraata ewe ngunun kilisou. Iei makkeien Paul: “Oupwe pwarata kilisou ren mettoch meinisin. Pwe ina letipen Kot lon Kraist Jises fan itemi.” (1 Tesalonika 5:18) Me iei an Paul fon ngeni chon Kolose: “Mut ngeni kinamween ewe Kraist an epwe nemenem lon letipemi . . . Me pwarata ami kilisou.” (Kolose 3:15) A wor pwarataan kilisou lon chommong kol fel, iwe, a aiti ngenikich pwe kilisou seni ewe letip eu lapalap mi fichiiti chon luku Kot. (Kol Fel 27:4; 75:1) A ffat pwe Jiowa Kot a pwapwa lupwen sipwe pwarata kilisou ren ekkewe mettoch mi fiffis iteiten ran lon manauach.
Nge met sokkun mettoch lon ei fonufan esor kilisou a kan aweiresi ach sipwe amaaraata ewe ngunun kilisou? Ifa ussun sipwe tongeni pwarata kilisou lon manauach iteiten ran? Epwe polu ekkena kapas eis lon ena eu lesen mwirin ei.