Ewe Áchechchem, Ina Eú Fansoun Pwáraatá Kilisou

1. Ifa ewe mettóch mi aúchea a suuk ngenikich atun ewe Áchechchem?

¹ A suuk ngenikich eú fansoun mi aúchea atun ewe Áchechchem lón April 14 ach sipwe ámááraatá me pwáraatá kilisou ren múrinnéén Jiowa. Ewe pwóróus lón Lukas 17:11-18 a áiti ngenikich usun án Jiowa me Jesus ekiek ren án emén pwáraatá kilisou. Me ren ena pwóróus, emén chék me lein ekkewe engol mwán mi úriir rupun pwétúr a feito me apasa an kilisou. Lón mwachkkan, semmwen me osukosuk meinisin repwe unusen móróló pokiten ewe liffangen méén kepich. Ina minne, a tufich ewe manaw esemuch! Ina minne, lón ena atun sipwe kilisou ngeni Jiowa iteiten rán ren ekkena feiéch. Nge ifa usun sipwe pwáraatá ach kilisou lón ekkan wiik repwe feito?

2. Ifa usun sipwe ámááraatá ach meefi kilisou ren ewe méén kepich?

² Ámááraatá Kilisou: Ach meefi kilisou a feito seni ach ekiek. Ren an epwe álisikich le ámááraatá ach meefi kilisou ren ewe méén kepich, atun Áchechchem a wor eú schedule fán iten ach álleaan Paipel mi kkóló aúchean mi nóm lón fitu sókkun taropwe are puk, áwewe chék lón ewe pwinin maram me ewe puk Etittina Paipel Iteiten Rán are lón ewe appendix B12 lón ewe mineféén New World Translation. Pwata ouse sótun pwóróusfengen wóón ena pwóróus lón ámi famili? Ach féri ena epwe alapaaló ach kilisou ren ewe méén kepich. Iwe mwirin, epwe amwékútúkich le eáni napanap mi múrinné.—2 Kor. 5:14, 15; 1 Joh. 4:11.

3. Ifa usun sipwe tongeni pwáraatá ach kilisou atun ewe Áchechchem?

³ Pwáraatá Kilisou: Ach meefi kilisou epwe leteló ren féffér. (Kol. 3:15) Ewe mwán mi úri rupun pwétúr a achocho le kútta Jesus me apasa an kilisou ngeni. Ese mwáál, ena mwán a mwasangasang le fós ngeni ekkewe ekkóch usun amwararen an chikar. (Luk. 6:45) Ach meefi kilisou ren ewe méén kepich epwe amwékútúkich ach sipwe tinikken le esilefeili pwóróusen ewe Áchechchem? Ren ach fiffiti angangen auxiliary pioneer are akkalapaló ach fansoun afalafal atun Áchechchem ina pwal eú alen ach sipwe pwáraatá ach kilisou. Lón pwinin ewe Áchechchem, ach meefi kilisou epwe amwékútúkich le etiwa ekkewe waséla me awora fansoun le pélúweni ar kewe kapas eis.

4. Met sipwe tongeni féri pwe sisap niamam ren ei Áchechchem?

⁴ Epwele iei sáingoon ach Áchechchem? (1 Kor. 11:26) Sise silei. Iwe nge, sia silei pwe ika a fen fis ena, iwe a pwal péút senikich ewe fansoun mi aúchea le pwáraatá ach kilisou. Itá kopwe alamota ewe fansoun? Amwo ach kapas me ekiekin letipach mi pwáraatá kilisou epwe apwapwaai Jiowa, ewe mi kisáseú le awora ewe méén kepich.—Kölf. 19:14.