Fansoun Apwapwa Mi Sokkolo Aucheaar Lon Uruwoon Israel

“Fan ulungat lon eu ier iteiten noum mwan epwe uta mwen Jiowa om Kot lon ewe leeni i epwe filata . . . , me esap wor emon leir epwe uta mwen Jiowa fan aponupou.”​—TUTERONOMI 16:16.

1. Met sipwe tongeni apasa ussun ekkewe fansoun apwapwa mi mak lon Paipel?

MET a kan ieto le mokurom lupwen ka ekieki fansoun apwapwa? Lon ekkoch fansoun apwapwa lom lom, aramas ra mongommong me sikefengen. A pwal ina ussun ekkoch fansoun apwapwa ikenai. Nge a sokkolo ekkewe fansoun apwapwa mi mak lon an Kot alluk ngeni Israel. Inaamwo ika ekkena fansoun ra kan apwapwa, nge sipwe pwal tongeni apasa pwe ir “fansoun mwichfengen mi fel.”​—Lifitikos 23:2.

2. (a) Mi alluk ngeni ekkewe re Israel ar repwe fet fan ulungat iteiten ier? (b) Ussun a mak lon Tuteronomi 16:16, ifa weween eu “fansoun apwapwa”?

² Re Israel mi tuppwol, nge fan chommong ar kkewe famili ra fitiir, ra kuna pwapwa seni ar sai ngeni Jerusalem, nge iei ‘ewe leeni Jiowa a filata,’ me ra uwei ar liffang mi chommong fan iten ulungat fansoun apwapwa mi lapalap. (Tuteronomi 16:16) Ewe puk Old Testament Word Studies a apasa pwe ewe kapasen Ipru mi affou ngeni “fansoun apwapwa” lon Tuteronomi 16:16 a wewe ngeni eu “fansoun chengel mi lapalap . . . mi fis fan iten apwapwaan pwaloon an Kot chen mi sokkolo aucheaar, me a fiti asor me mongo chommong.”a

Aucheaan Ekkewe Fansoun Apwapwa mi Lapalap

3. Met sokkun feioch ekkewe ulungat fansoun apwapwa mi fis iteiten ier ra achema ngenikich ussun?

³ Pokiten ir chon atake, chon Israel ra eani apilukuluk won an Kot feioch fan iten pungun ran. Ekkewe ulungat fansoun apwapwa lon ewe Allukun Moses ra weneiti ewe rasin parli fan March me April, ewe rasin wit fan April me May, me lusun ewe ras fan October. Ikkena ekkewe fansoun repwe pwarata chengel mi lapalap me kilisou ngeni ewe Chon Akkota pungun ran me ewe Chon Fforata ewe fonu mi ukkuwa. Nge a wor pwal fitu mettoch mi kapachelong lon ekkena fansoun apwapwa.​—Tuteronomi 11:11-14.

4. Ewe aewin fansoun apwapwa a weneiti menni poraus mi lamot lon uruwo?

⁴ Ewe aewin fansoun apwapwa a fis lon ewe aewin maram lon ewe pwinin maram mi longolong won Paipel, seni Nisan 15 tori 21, iwe, a wewe ngeni le sopwoloon March are le poputaan April lon nouch pwinin maram. A iteni Fansoun Apwapwaan Pilawa ese Lefen, iwe, pokiten a fis mwirin ewe Pasofer lon Nisan 14, a pwal iteni “ewe fansoun apwapwaan ewe pasofer.” (Luk 2:41; Lifitikos 23:5, 6) Ena fansoun apwapwa a achema ngeni Israel ussun ar ngaselo seni riaffou lon Isip, iwe, ewe pilawa ese lefen a iteni “ewe pilawaan riaffou.” (Tuteronomi 16:3) A achema ngeniir pwe ar su seni Isip a kon muttir, ina minne, esor fansoun ar repwe walong lefen lon ewe pilawa me witiwit tori an epwe pwota. (Ekistos 12:34) Atun ena fansoun apwapwa, esap wor pilawa mi lefen lon imwen chon Israel. Ika emon chon fiti ena fansoun apwapwa, pachelong chon ekis, epwe mongo pilawa mi lefen, iwe, epwe nninniilo.​—Ekistos 12:19.

5. Neman ewe oruuen fansoun apwapwa a achemasefallieto menni wis mi auchea, me io kkan repwe kapachelong lon ena fansoun chengel?

⁵ Ewe oruuen fansoun apwapwa a fis fisu wiik (49 ran) mwirin Nisan 16 me a weneiti ewe awonuen ran lon ewe aulungatin maram, Sivan, iwe, a wewe ngeni le sopwoloon May lon nouch pwinin maram. (Lifitikos 23:15, 16) A iteni ewe Fansoun Apwapwaan Wiik (lon fansoun Jises, a pwal iteni Pentecos, weween, “Alimeen” lon fosun Kriik), iwe, a fis lon ewe fansoun mi weneiti ewe fansoun Israel a kapachelong lon ewe Alluk fan iten eu pwon ren ewe Chuukun Sainai. (Ekistos 19:1, 2) Atun ena fansoun apwapwa, eli chon Israel mi tuppwol ra ekieki ussun wiser mi auchea, wisen ar kaimulo pwe repwe wiliiti an Kot muu mi fel. Ar wiliiti noun Kot aramas mi sokkolo aucheaar a wewe ngeni ar repwe alleasochisi an Kot Alluk, awewe chok ren ewe allukun ar repwe pwarata tong ngeni chon osupwang pwe chokkeei repwe pwal tongeni meefi chengel lon ewe fansoun apwapwa.​—Lifitikos 23:22; Tuteronomi 16:10-12.

6. Ewe aulungatin fansoun apwapwa a achema ngeni noun Kot kkewe aramas ussun menni poraus?

⁶ Ewe saingoon me lein ekkewe ulungat fansoun apwapwa mi lapalap a iteni ewe Fansoun Apwapwaan Ionien Uwa, are Fansoun Apwapwaan Imwen Ppalen Ira. A fis lon ewe afisuen maram, Tishri, are Ethanim, poputa seni ewe engol me alimuen ran tori ewe ruwe me aewin ran, iwe, a wewe ngeni le poputaan October lon nouch pwinin maram. (Lifitikos 23:34) Lon ena fansoun, noun Kot kkewe aramas ra nonnom lukun imwer are won osun imwer lon ekkan imw mi ffor seni ppalen are choon ira. A achema ngeniir ussun ar sai 40 ier seni Isip tori ewe Fonu mi Pwonetiu, lupwen ena muu a kaeo lamoten ar repwe eani apilukuluk won Kot ren tufichin manauer.​—Lifitikos 23:42, 43; Tuteronomi 8:15, 16.

7. Ifa ussun sia kan feioch seni ach nengeni ekkewe fansoun apwapwa lon Israel lom lom?

⁷ Sipwe nengeni ekkoch fansoun apwapwa mi sokkolo aucheaar lon uruwoon noun Kot kkewe aramas lom lom. Ena mettoch epwe apochokkulakich ikenai, pun a wor kokkotun ach sipwe mwichfengen iteiten wiik me fan ulungat iteiten ier lon ach kkewe mwichelap. ​—Ipru 10:24, 25.

Lon Fansoun Ekkewe King lon Tettelin Tafit

8. (a) Menni fansoun apwapwa mi sokkolo aucheaan a fis lon fansoun King Solomon? (b) Sipwe tongeni aneanei ach sipwe kuna pwonutaan menni mettoch mi amwarar fan iten ewe Apwapwaan Imwen Ppalen Ira lon kapas awewe?

⁸ Eu minen apwapwa mi lamot watte atun ewe Fansoun Apwapwaan Imwen Ppalen Ira a fis le atun nemenien noun Tafit we, King Solomon. “Eu pwin aramas mi fokkun watte” ra mwicheto seni le sopwochikin ekkewe leeni lon ewe Fonu mi Pwonetiu fan iten ewe Fansoun Apwapwaan Imwen Ppalen Ira me afinunen ewe imwen fel. (2 Kronika 7:8) Lupwen a wes, King Solomon a tinalo ekkewe chon fiti, iwe, ra “poputa le efeiochu ewe king me ra liwiniti imwer, iwe, ra chengel me ra meefi pwapwa lon letiper ren meinisin ekkewe mettoch murinno Jiowa a fen ffori fan iten noun chon angang Tafit me pwal fan iten noun kkewe aramas Israel.” (1 King 8:66) Ina wesewesen eu fansoun apwapwa mi sokkolo aucheaan. Ikenai, noun Kot kkewe chon angang ra aneanei an epwe war ewe fansoun mi lingemwarar, nge iei muchuloon ewe Fansoun Apwapwaan Imwen Ppalen Ira lon kapas awewe an epwe fis le sopwoloon ewe Engerou Ierin Nemenemen ewe Solomon mi Lapalap, Jises Kraist. (Pwarata 20:3, 7-10, 14, 15) Lon ena fansoun, aramas meinisin mi manau ekis meinisin won fonufan, pachelong chon manausefal me ir mi manau mwirin Armaketon, repwe tipeeufengen fan chengel lon ar fel ngeni Jiowa Kot.​—Sekaraia 14:16.

9-11. (a) Met a efisata eu fansoun apwapwa mi sokkolo aucheaan lon fansoun King Hesekaia? (b) Ifa ewe leenien appiru chommong seni ewe muun ennefen ra isetiu, me a achema ngenikich ussun met ikenai?

⁹ Ewe fansoun apwapwa mi sokkolo aucheaan mi tapwoto mwirin lon Paipel a fis mwirin nemenien King Ahas, emon king mi ngau, pwe ei king a asipalo ewe imwen fel me a emmweni ewe muun Juta pwe epwe rikilo seni aalen Kot. King Hesekaia, emon king mi murinno, a siwili Ahas. Lon ewe aewin ierin an nemenem, lupwen a ier 25, Hesekaia a popueta eu kokkotun auetasefalli me fforsefalli ewe fel mi enlet. A muttir suuki ewe imwen fel me a akkota an epwe fforsefal. Iwe, ewe king a tinalo taropwe ngeni chon Israel mi nom lon ewe muun Israel mi wor engol einang lon. Ei muu a nom ennefen me a wor koum lefiler me muun Hesekaia. Hesekaia a etiwer pwe repwe feito ffori apwapwaan ewe Pasofer me ewe Apwapwaan Pilawa ese Lefen. Chommong ra feito, inaamwo ika chon fonuer ra esiiter.​—2 Kronika 30:1, 10, 11, 18.

¹⁰ Ewe fansoun apwapwa a fisoch? Iei alon Paipel: “Iwe, noun Israel kkewe mi nom lon Jerusalem ra ffori apwapwaan pilawa ese lefen fisu ran fan chengel mi lapalap; me chon Lifai me ekkewe samol fel ra mwareiti Jiowa ran me ran ren ekkewe minen nikattik mi ttikimmong.” (2 Kronika 30:21) A ifa ochchun ewe leenien appiru ekkena chon Israel ra fforatiu ren noun Kot kkewe aramas ikenai, pwe chommong leir ra likiitu fan esiit me ra kan sai towau ren ar repwe fiti ekkewe mwichelap.

¹¹ Ren chok awewe, ekieki mwo ulungat “Tuppwol ngeni Kot” District Convention mi fis lon Poland lon 1989. Lein ekkewe 166,518 chon fiti, a wor pwin aramas mi chocho ra feito seni ewe fonu mi fen piin iteni Soviet Union me lom me pwal seni fitu fonu lon Eastern Europe, nge mi pinepin angangen Chon Pwarata Jiowa ie lon ena atun. Iei alon ewe puk Jehovah’s Witnesses​—Proclaimers of God’s Kingdomb: “Ren ekkoch mi fiti ekkena mwichelap, a ina keran aewin ar fiti eu watteen mwichen noun Jiowa kkewe aramas a wor lap seni 15 are 20 chon fiti. Letiper a ur ren kilisou lupwen ra nengeni ekkewe fitu kit ngerou mi mwichfengen, me ra fitiir le iotek, me leuwer ra chufengen lupwen ra eani kolun mwareiti Jiowa.”​—Pekin 279.

12. Met a efisata ewe fansoun apwapwa mi sokkolo aucheaan atun nemenien King Josaia?

¹² Mwirin maloon Hesekaia, chon Jutia ra pwal rikiti lamalam chofona fan King Manasseh me Amon. Iwe mwirin, pwal emon king mi murinno a nemenem, ewe aluwol Josaia, iwe, a pwora le auetasefalli fel mi enlet. Lupwen a ier 25, Josaia a alluku pwe ewe imwen fel epwe fforsefal. (2 Kronika 34:8) Atun an fforsefal, a pwa ewe Alluk Moses a makketiu. A mmen chung letipen King Josaia ren minne a alleani lon an Kot Alluk, iwe, a akkota pwe aramas meinisin repwe rong allean. (2 Kronika 34:14, 30) Iwe, me ren minne a mak, a akkota eu apwapwaan ewe Pasofer. Ewe king a pwal isetiu eu minen appiru mi murinno ren an uwawu an liffang watte fan iten ena fansoun apwapwa. Ina minne, iei alon Paipel ussun ena fansoun: “Esor eu pasofer mi ussun ena lon Israel seni ranin Samuel ewe soufos.”​—2 Kronika 35:7, 17, 18.

13. Ekkewe fansoun apwapwa lon fansoun Hesekaia me Josaia ra achema ngenikich ussun met ikenai?

¹³ Angangen Hesekaia me Josaia a ussun chok ewe angang mi amwarar, nge iei ewe angangen auetasefalli fel mi enlet lein chon Kraist mi enlet poputa seni 1914 lupwen Jises Kraist a angei an nemenem. Ussun an Josaia angang, ena angangen auetasefalli fel mi enlet lon ei fansoun a longolong won met a mak lon ewe Kapasen Kot. Iwe, ussun chok fansoun Hesekaia me Josaia, ewe angangen auetasefalli fel mi enlet lon ei fansoun a efisata ekkewe mwichelap, iwe, a katowu ekkewe poraus mi ammeseik mi awewei an Paipel kkewe oesini me ekkewe emmwen seni Paipel lon fansoun mi fich. A lapalo chengelin ekkena fansoun kait ren chommongun chon papatais. Ussun chok chon Israel mi aier lon fansoun Hesekaia me Josaia, ekkewe minefoon chon papatais ra fen kul seni ekkewe ffoffor mi ngau lon Christendom me lon lusun an Setan fonufan. Lon 1997 lap seni 375,000 ra papatais fan iten esissinnen ar fangolo manauer ngeni ewe Kot mi pin, Jiowa, nge a ussun ita lap seni 1,000 ra papatais iteiten ran.

Mwirin ewe Fansoun Choisa

14. Met a efisata ewe fansoun apwapwa mi sokkolo aucheaan lon 537 B.C.E.?

¹⁴ Mwirin maloon Josaia, ewe muu a pwal liwiniti fel mi chofona. Lo, lo, lon 607 B.C.E., Jiowa a apwungu noun kkewe aramas ren an amwokutu ekkewe sounfiun Papilon pwe repwe maunei Jerusalem. Ena telinimw me an we imwen fel a kataalo, me ewe fonu a poonulo. Mwirin, chon Jus ra fotek lon Papilon ukuukun 70 ier. Iwe, Kot a autaai ekkoch chon Jus mi aier, me ra liwiniti ewe Fonu mi Pwonetiu pwe repwe auetasefalli fel mi enlet. Ra wareiti ewe telinimw mi tatakkis Jerusalem lon ewe afisuen maram lon ewe ier 537 B.C.E. Ra akkom fforata eu roong fan iten ar repwe ffori asor iteiten ran ussun ewe Alluk fan iten eu pwon a affata. Lon chok ena atun, a tori ewe fansoun fan iten pwal eu apwapwa mi sokkolo lamotan. “Iwe, ra ffori apwapwaan imwen ppalen ira me ren minne a makketiu.”​—Esra 3:1-4.

15. Menni angang a nom mwen ekkewe lusun mi liwiniti fonuer lon 537 B.C.E., me ifa ussun eu mettoch mi ussun ena a fis lon 1919?

¹⁵ Eu angang mi lapalap a nom mwen ekkena choisa mi liwin, weween, repwe fforsefalli an Kot imwen fel me Jerusalem fitifengen me tittin kkewe. Chon orur kkewe mi lolowo a fen pwal u ngeniir. Lupwen ra akkaueta ewe imwen fel, ina eu “ranin mettoch mi kisikis.” (Sekaraia 4:10) A chok pwal ina ussun lapalapen ekkewe chon Kraist mi kepit lon 1919. Lon ena ier mi auchea, ra ngaselo seni ar fotek lon pekin ngun ngeni Papilon mi Lapalap, nge iei mwicheichen ekkewe lamalam mi chofona won unusen fonufan. Ukuukun chochoor a chok fitu ngerou me fonufan a oput ir. Chon appolua Kot repwe ita tufichin aukatiu afeffeitaan ewe fel mi enlet? Poluen ena kapas eis a achemasefallieto ekkewe ruu saingoon fansoun apwapwa mi mak porauser lon ewe Tesin Ipru.

16. Pwata a sokkolo aucheean eu fansoun apwapwa lon 515 B.C.E.?

¹⁶ A wes kausefallin ewe imwen fel fan ewe maram Adar lon 515 B.C.E., atun an epwe fis ewe fansoun apwapwa fan Nisan atun meseres. Iei alon Paipel ussun: “Ra ffori apwapwaan pilawa ese lefen fisu ran fan chengel; pun Jiowa a efisata ar chengel, me a okullu letipen ewe kingen Asiria pwe epwe apochokkula pour kkewe fan iten angangen imwen ewe Kot mi enlet, ewe Koten Israel.”​—Esra 6:22.

17, 18. (a) Menni fansoun mi apwapwa a fis lon 455 B.C.E.? (b) Pwata a ina ussuch ikenai?

¹⁷ Wone ier mwirin, lon 455 B.C.E., a tori pwal eu fansoun mi sokkolo lamotan. Ewe Fansoun Apwapwaan Imwen Ppalen Ira lon ena ier a esissinnata wesin ewe angangen fforsefalli tittin Jerusalem. Iei alon Paipel ussun: “Meinisin chon ewe mwich mi liwin seni ar fotek ra ffori imwer seni ppalen ira me ra imweimw imwer kkana; pun noun Israel kkewe rese ffori ena mettoch seni fansoun Josua noun Nun tori ena ran, iwe, a wor chengel mi lapalap ren.”​—Nehemia 8:17.

¹⁸ A ifa watteen lamoten ena fansoun an a utasefal ewe fel mi enlet ngeni Kot, inaamwo ika aramas ra mmen oput ena! A pwal ina ussun minne a fiffis ikenai. Inaamwo ika fan chommong aramas ra u ngeni me sotun eppeti ewe angang, nge ewe angangen afalafala porausen allimen an Kot Muu a tori le sopwochikin fonufan, me an Kot kkewe apwung a fen esilefeil ekis meinisin. (Mattu 24:14) Ewe saingoon ffofforun mecheni lusun ekkewe 144,000 a arapoto. Lap seni limu million chiener kkewe “pwal fitemon siip” ra fen ionfengen seni muu meinisin pwe repwe wiliiti “eu pwin siip” fitifengen me ekkewe lusun chon kepit. (Jon 10:16; Pwarata 7:3, 9, 10) A ifa murinnoon pwonutaan minne ewe Apwapwaan Imwen Ppalen Ira a oesini ussun! Iwe, ena angang mi lapalap, angangen ionfengenni aramas, epwe sopwosopwolo tori ewe fonufan sefo lupwen fite billion chon manausefal repwe kokko pwe repwe fiti ewe Apwapwaan Imwen Ppalen Ira lon kapas awewe.​—Sekaraia 14:16-19.

Lon ewe Aewin Senturi C.E.

19. Pwata ewe Apwapwaan Imwen Ppalen Ira lon 32 C.E. a sokkolo aucheaan?

¹⁹ Esor tipemwaramwar pwe ekkewe fansoun apwapwa Noun Kot we, Jises Kraist, a fiti, a nom lein ekkewe mi sokkolo aucheaar mi mak lon Paipel. Ren chok awewe, ekieki mwo an Jises fiti ewe Apwapwaan Imwen Ppalen Ira (are, Tabernacles) lon ewe ier 32 C.E. A aea ena fansoun pwe epwe aiti ngeni aramas poraus enlet mi lamot me a anneta an afalafal ren an nounou wokisin seni ewe Tesin Ipru. (Jon 7:2, 14, 37-39) Lon ena fansoun apwapwa, aramas ra kan keni fofoch leenien kantel mi watte lon eu kiannin ewe imwen fel me kukkulong. Ena mettoch a alapalo ewe chengel seni ffofforun ewe apwapwa mi sopwosopwolo tori lepwin. Neman Jises a eani awewe won ekkena minen saram mi watte lon alon ei: “Ngang saramen fonufan. Ewe mi tapweiei esap fokkun feffetal lon rochopwak, nge epwe eani ewe saramen manau.”​—Jon 8:12.

20. Pwata a sokkolo aucheaan ewe Pasofer lon 33 C.E.?

²⁰ Iwe mwirin, a fis ewe Pasofer me ewe Apwapwaan Pilawa ese Lefen lon ewe ier mi fokkun lamot, 33 C.E. Lon ena Ranin Pasofer, chon oputa Jises ra nnielo i, iwe, a wiliiti ewe Lamen Pasofer lon kapas awewe, ewe mi nninniilo pwe epwe uweialo “tipisin fonufan.” (Jon 1:29; 1 Korint 5:7) Ulungat ran mwirin, lon Nisan 16, Kot a amanauata Jises ren an awora ngeni eu inisin ngun mi manaufoch. Ena mettoch a ussun ewe asorun mwenuwaan ewe rasin parli ussun ewe Alluk a affata. A ina ussun ewe Samol Jises Kraist mi manausefal a wiliiti “mwenuwaan ir mi fen onnutulo lon malo.”​—1 Korint 15:20.

21. Met a fis lon Pentecost 33 C.E.?

²¹ Eu fansoun apwapwa mi enletin auchea, iei ewe ranin Pentecos lon 33 C.E. Lon ei ran chommong chon Jus me chon wiliilo ra mumufengen lon Jerusalem, pachelong ina epwe 120 noun Jises chon kaeo. Atun ewe fansoun apwapwa, ewe Samol Jises Kraist mi fen manaueta a tinatiu an Kot ngun mi fel won ekkewe 120. (Fofor 1:15; 2:1-4, 33) A ina ussun ar kepit me ra wiliiti an Kot minefoon muu mi filita ren ewe atipeeu sefo, nge Jises Kraist ewe chon affor lon. Lon ena fansoun apwapwa ewe samol fel lapalap a mwei ngeni Kot ruuefoch pilawa mi lefen mi ffor seni mwenuwaan ewe rasin wit. (Lifitikos 23:15-17) Ekkeei ruuefoch pilawa mi lefen ra liosueta ekkewe 144,000 aramas rese unusoch, nge Jises a ‘moniir fan iten Kot’ pwe repwe wiliiti “eu muu me samol fel . . . pwe repwe nemenem ussun king won fonufan.” (Pwarata 5:9, 10; 14:1, 3) Eli ekkewe ruuefoch pilawa ra pwal liosueta ekkewe ruu sokkun aramas ekkena chon nemenem lon lang ra feito seni, weween, Jus me Jentail.

22. (a) Pwata chon Kraist rese ffoffori ekkewe fansoun apwapwa mi affatetiu lon ewe Alluk fan iten eu atipeeu? (b) Met sipwe kaeo lon ena lesen mwirin ei?

²² Lupwen a poputa angangen ewe atipeeu sefo lon Pentecos 33 C.E., a wewe ngeni pwe ese chuen auchea mwen mesen Kot ewe atipeeu minen lom mi longolong won ewe Alluk. (2 Korint 3:14; Ipru 9:15; 10:16) Esap weween pwe chon Kraist mi kepit rese nom fan alluk. Ir mi nom fan ewe alluk mi fel seni Jises Kraist me a mak won letiper. (Kalesia 6:2) Ina minne, chon Kraist rese ffori ekkewe ulungat fansoun apwapwa mi fis iteiten ier pun ir minen ewe atipeeu minen lom mi longolong won ewe Alluk. (Kolose 2:16, 17) Iwe nge, sipwe tongeni kaeo chommong mettoch seni meefien noun Kot kkewe chon angang mi manau mwen Kraist ussun ar kkewe fansoun apwapwa me mwich fan iten ar feffel. Lon ena lesen mwirin ei, sipwe nengeni ekkoch poraus an epwe amwokutu oukich meinisin ach sipwe aucheani lamoten ach sipwe fiffiti an chon Kraist kkewe mwich.

[Footnote]

Kapas Eis fan iten Enniwili Poraus

◻ Met lamoten ekkewe ulungat fansoun apwapwa mi lapalap lon Israel?

◻ Mei fet ekkewe fansoun apwapwa lon fansoun Hesekaia me Josaia?

◻ Lon 455 B.C.E., eu fansoun apwapwa a fis fan iten menni mettoch mi sokkolo aucheaan, me pwata ena poraus a apochokkulakich?

◻ Ifa lamoten ewe Pasofer me Pentecos lon 33 C.E.?

[Pwóór lón pekin taropwe 12]

Eu Lesen Ngenikich Seni eu Fansoun Apwapwa

Manauen meinisin mi ekiekin kuna feioch esemuch seni an Jises asor fan iten omusomusen tipis epwe tipeeu ngeni minne ewe Apwapwaan Pilawa ese Lefen a liosueta. A liosueta chengelin ekkewe chon Kraist mi kepit ren ar ngaselo seni ei fonufan mi ngau me ar ngaselo seni ewe apwungun tipis pokiten an Jises asor fan iten ewe moon kepich. (Kalesia 1:4: Kolose 1:13, 14) Ewe fansoun apwapwa lom a ukuukun fisu ran, nge lon Paipel ena nampa a liosueta mettoch mi unusoch lon pekin ngun. Ewe fansoun apwapwa lon kapas awewe epwe sopwosopwolo ukuukun ewe fansoun ewe mwichefelin chon Kraist mi kepit epwe nonnom won fonufan me chon fiti ena apwapwa repwe fiti fan “letip mi wenechar me enlet.” Weween pwe fansoun meinisin repwe tuttumunur seni lefen lon kapas awewe. Lon Paipel lefen a liosueta afalafal mi chofona, likotuputup, me ffofforingau. Chon fel ngeni Jiowa mi enlet repwe pwarata pwe ra oput ena lefen, iwe, resap mutata an epwe alimengaua manauer me limochun ewe mwichefelin Kraist.​—1 Korint 5:6-8; Mattu 16:6, 12.

[Sasing lón pekin taropwe 9]

Epinukun uwaan ewe minefoon rasin parli a asor iteiten ier lon Nisan 16, nge ina ranin an Jises manausefallita

[Sasing lón pekin taropwe 10]

Eli Jises a eani awewe won ekkewe minen saram lupwen a apasa pwe i “ewe saramen fonufan”