Akkaucheani An Chon Kraist Kkewe Mwich
“Sipwe ekieki emon me emon leich ren ach sipwe alapalo ach tong me ffofformurinno, nge sisap tunalo ach mwimwmwichefengen.”—IPRU 10:24, 25.
1, 2. (a) Pwata a eu feioch watte ach sipwe fiti eu mwich chon Kraist mi enlet ra eani? (b) Ifa weween an Jises nonnom lein noun kkewe chon kaeo lupwen repwe mwichfengen?
AIFA watteen feiochun ach fiti eu mwichen chon Kraist, ese lifilifil ika chon fiti ra kis seni engol are a wor fite ngerou chon fel ngeni Jiowa ra fiti pwe iei alon Jises: “Ikewe ruuemon are ulumon ra chufengen ie fan itei, ngang ua nonnom leir”! (Mattu 18:20) A enlet pwe lupwen Jises a eani ena pwon, a kapas ussun mettoch lon pekin apwung mmen lamot ngeni ir mi wisen emmweni ewe mwichefel ar repwe angang won fan pwungoch. (Mattu 18:15-19) Nge alon Jises epwe tongeni weneiti meinisin an chon Kraist kkewe mwich mi kan poputa me sopwolo ren iotek fan itan we? Ewer. Chechchemeni mwo an Jises pwon lupwen a awisa ngeni noun kkewe chon kaeo ewe angangen kukkutta chon kaeo: “Nengeni! Upwe nonnom remi ran meinisin tori sopwoloon ewe otot minen lom.”—Mattu 28:20.
2 Esor tipemwaramwar pwe Mokuren ewe mwichefelin Kraist, ewe Samol Jises Kraist, a mmen ekilapei meinisin ekkewe mwich noun kkewe chon kaeo mi tuppwol repwe ffori. Pwal och, esor tipemwaramwar pwe a nonnom leir ren an Kot ngun mi fel. (Fofor 2:33; Pwarata 5:6) Jiowa Kot a pwal ekilapei ach mwichfengen. Ekkena mwich a akkaewin fis fan iten an epwe wor kapasen mwareiti Kot “lein ekkewe pwin aramas chommong mi mwichfengen.” (Kol Fel 26:12) Ach fiffiti ach kkewe mwich eu pisekin pwarata pwe sia kan tongei i.
3. Ikkefa ekkewe popun mi lamot sia kan aucheani an chon Kraist kkewe mwich?
3 A wor pwal fitu popun sia aucheani an chon Kraist kkewe mwich. Mwen an lo seni fonufan, Jises Kraist a seikata noun kkewe chon kaeo mi kepit pwe repwe wisen angang ussun emon “chon angang mi tuppwol me tipatchem,” iwe, repwe akkawora mongoon ngun lon fansoun mi fich ngeni ewe familien chon luku. (Mattu 24:45) Ach kkewe mwich, iei eu mettoch mi lamot fan iten kaworen ena mongoon ngun, me a pwal kapachelong ekkewe mwichelap. Ewe Samol Jises Kraist a ekkemmweni ena chon angang mi tuppwol pwe epwe awora poraus mi fokkun lamot lon ekkena mwich fan iten meinisin mi mochen kuna manau lupwen ei otot mi ngau epwe sopwolo me ra mochen manau lon an Kot fonufan sefo mi pwung.
4. Ifa ewe “eoreni” mi efeiengau Paipel a kapas ussun, me met epwe alisikich pwe sisap fiti?
4 Ina minne, mi fokkun ngau an chon Kraist an epwe poputa le fiti ewe eoreni mi efeiengau ewe aposel Paul a mak ussun: “Sipwe ekieki emon me emon leich ren ach sipwe alapalo tong me ffofformurinno, nge sisap tunalo ach mwichfengen, ussun ekkoch ra fen eorenalo, nge sipwe apochokkulafengennikich, iwe, epwe lapalo ena lupwen oupwe kuna pwe ewe ran a arapoto.” (Ipru 10:24, 25) Ach ekkekieki aucheaan me feiochun an chon Kraist kkewe mwich epwe alisikich pwe sipwe fiffiti ekkena mwich fan tuppwol me pwal ren unusen letipach.
Ekkewe Mwich mi Akkapochokkulakich
5. (a) Ach kapas epwe ita efisata met lon ach kkewe mwich? (b) Pwata sisap mmang le etiwa ngeni ach mwich ir mi mochen silei ussun Paipel?
5 Pokiten chon Kraist ra kan iotek pwe an Jiowa ngun mi fel epwe nonnom won an chon Kraist kkewe mwich, emon me emon chon fiti epwe achocho ukuukun an tufich pwe epwe tipeeu ngeni ena ngun, iwe nge, “esap aletipechou an Kot ngun mi fel.” (Efisus 4:30) Lupwen ewe aposel Paul a makkei ekkena kapas mi popu seni ngunun Kot, a awewei ewe sokkun kapas mi pwung. Fansoun meinisin, minne sipwe apasa epwe ita “apochokkula aramas ren minne mi fichiitiir, pwe epwe awora met a murinno ngeni chon rong. A akkaewin lamot ena lon an chon Kraist kkewe mwich. Lon noun we taropwe ngeni chon Korint, Paul a menlapei pwe mi lamot ekkena mwich repwe apochokkula me asukulaochu aramas. (1 Korint 14:5, 12, 19, 26, 31) Meinisin chon fiti repwe kuna feioch seni ekkena mwich, pachelong minefoon chon fiti, iwe, eli repwe apasa pwe “Kot a wesewesen nonnom leimi.” (1 Korint 14:25) Ina minne, sipwe muttir etiwa minefoon chon kaeo ar repwe fitikich le mwichfengen, pun repwe muttir maarita lon pekin ngun ika repwe ikkina ussun.
6. Ikkefa ekkoch mettoch mi apochokkula aramas lon ach kkewe mwich?
6 Meinisin mi wisen afalafal, awewei poraus are eani pwomw lon an chon Kraist kkewe mwich repwe pi pwe ar kapas epwe apochokkula chon rong me epwe tipeeu ngeni an Kot Kapas mi mak, ewe Paipel. Sap minne sipwe chok eani kapas mi enlet, nge sipwe pwal pwarata ewe sokkun memmmeef mi tipeeu ngeni lapalapen Kot me Kraist, lapalapen tong. Ika meinisin mi wor wiser lon eu mwich repwe ekiekin appiru ‘uwaan an Kot ngun mi fel,’ awewe chok ren pwapwa, mosonottam, me luku, iwe, meinisin chon fiti repwe enletin meefi pwe ra fen pochokkuleta.—Kalesia 5:22, 23.
7. Ifa ussun meinisin chon fiti mwich repwe tongeni awora ar alillis pwe epwe pochokkuleta meinisin?
7 Inaamwo ika ekkoch chok epwe wor wiser lon ekkewe mwich, nge meinisin repwe tongeni ffori met chon fiti mwich repwe pochokkuleta ren. Fan chommong a wor fansoun polueni kapas eis. Ikkena ekkewe fansoun sipwe tufichin pwarata ngeni aramas pwe a wor ach luku. (Rom 10:9) Nge sisap apochokkula pwisin ach kkewe ekiek, sikasini pwisin ffofforuch, are akkapii emon chienach chon luku. Esap pwe ikkena ekkewe mettoch epwe aletipechou an Kot ngun mi fel? Ika a wor tipefesen lefilach me chienach kkewe chon luku, epwe murinno ach sipwe chuuriir me pwakini ewe osukosuk fan ewe ngunun tong. Iei alon Paipel: “Oupwe kirokirochfengen lefilemi, me pwarata umoumoch, iwe, oupwe omusomusfengen lefilemi ussun chok Kot a omusakemilo ren Kraist.” (Efisus 4:32) An chon Kraist kkewe mwich ra kan suuki ngenikich ewe aalen ach sipwe apwonueta ena fon mi murinno! Ina minne, chommong ra kan warekai fan iten ekkewe mwich me rese sukai mwirin ssarin mwich. Ina eu mettoch mi alisi minefoon chon fiti mwich pun a lamot ngeniir ar repwe meefi pwe ir wasola mi auchea ngenikich. Ina popun, a wor wisen meinisin chon Kraist mi papatais, wisen ar repwe apochokkula chon fiti mwich ren ar ‘ekieki emon me emon leich ren ach sipwe alapalo tong me ffofformurinno.’
Akkammonloch
8. (a) Ifa ussun ekkoch ra kan achocho fan iten ar repwe fiti mwich? (b) Ifa ewe leenien appiru Jiowa a isetiu lon wisan we, wisen chon masen siip?
8 Inaamwo ika epwe mecheres ngeni ekkoch ar repwe fiti an chon Kraist kkewe mwich, nge ren fitemon a mmen weires. Awewe chok, emon finen Kraist mi angang fan iten an epwe awora tufichin an famili a kan molu lupwen epwe war me angang. Eli epwe ammonlata mongo me alisi noun kkewe pwe repwe mmonleta fan iten ewe mwich. Eli pwal ekkoch chon Kraist repwe sai towau pwe repwe tori ekkewe mwich, are eli repwe ppet ren ar samau are ar chinnapelo. A enlet pwe Jiowa Kot a kan weweiti nonnomun meinisin mi tuppwol le fiti mwich, ussun chok emon chon masen siip mi ur ren tong a kan weweiti met a lamot ngeni noun kkewe siip meinisin. Paipel a apasa pwe “Ussun chok emon chon masen siip, i [Jiowa] epwe mammasa noun pwin man. Epwe ionfengenni ekkewe appanen siip ren poun; iwe, epwe ekiir me fan mwarin. Epwe tuttumunuochu ir mi okoup.”—Aisea 40:11.
9, 10. Ifa ussun sipwe tongeni alapalo feiochuch seni ach kkewe mwich?
9 Ren chokkewe mmen weires ngeniir ar repwe fiffiti mwich, eli eli esap lien wor ar fansoun le akkammonlata ekkewe lesen. Ar fiffiti ewe tettelin allean Paipel epwe alapalo feiochur lupwen repwe fiti ewe Theocratic Ministry School. Pwal ussun chok, ar akkammon fan iten ekkewe pwal fitu mwich, awewe chok ren ewe Kaeo lon ewe Leenien Mas me ewe Congregation Book Study, epwe alapalo feiochur. Ren ar akkammonlata ekkewe lesen me ar akkalleani ekkewe wokisin seni Paipel, ir mi akkaea watte fansoun fan iten nonnomun ar famili repwe tufichin awora alillis ren an epwe fisoch ekkena mwich mi lamot fan iten kaeon Paipel.
10 Ekkewe fitemon rese ppet pokiten nonnomur repwe tongeni alapalo ar fansoun mmonleta fan iten mwich. Awewe chok, repwe tongeni pi porausen ekkewe wokisin seni Paipel mi affatetiu, nge ese wesewesen mak alor. Epwe ina ussun meinisin repwe tongeni mmonleta pwe repwe kuna watte feioch seni ekkewe mwich me repwe tufichin apochokkula ewe mwichefel ren ar kkewe afalafal me ar uwawu meefier. Ren ar ammonloch, ekkewe elter me ministerial servant repwe isetiu eu leenien appiru mi murinno ren ar uwawu meefier ren kapas mi mwoch me ffatoch. Pokiten ar sufoliiti met Jiowa a akkawora, chon fiti mwich resap ffori mettoch mi orukoruk atun mwich.—1 Piter 5:3.
11. Pwata a lamot nemenem won ekiek me memmeef fan iten ach sipwe mmonleta ngeni ach kkewe mwich?
11 Eli ach fansoun epwe solap ren ekkewe ffoffor me minen apwapwa ese wesewesen lamot ngeni pochokkulach lon pekin ngun. Ika ina, mi lamot sipwe chosanikich me “sisap chuen miritingau” ussun aean ach fansoun. (Efisus 5:17) Sipwe ita ekiekin ‘kamo ewe fansoun’ seni mettoch mi lamot kisikis ren ach sipwe alapalo ach fansoun le pwisin kaeo Paipel me akkammon fan iten mwich, me pwal fan iten angangen ewe Muu. (Efisus 5:16) Sia weweiti pwe esap mecheres ena, me epwe lamot sipwe nemeni meefiach me ekiekich. Ekkewe sarafo mi akkachocho ngeni ena mettoch ra kan isetiu eu longolong murinno ren ar feffeita lon fansoun mwer. Iei makkeien Paul ngeni chienan we Timoti, emon sarafo: “Ekkekieki ekkeei mettoch [an Paul fon ngeni Timoti]; kopwe lechuuniir, pwe om feffeita epwe pwapwaalo ngeni aramas meinisin.”—1 Timoti 4:15.
Leenien Appiru Seni ewe Kapasen Kot
12. Ifa ewe leenien appiru mi sokkolo ochchun an Samuel we famili a isetiu?
12 Ekieki mwo ewe leenien appiru mi murinno an Samuel we famili a isetiu pwe ir mi kan fiffiti chiener kkewe chon fel le mwichfengen lupwen an Kot imwen fel mangaku a nom lon Sailo. Fan ewe alluk, wisen chok ekkewe mwan me at ar repwe sai ngeni ekkewe fansoun apwapwa iteiten ier. Nge semen Samuel we, Elkana, a uwei unusen an famili lupwen a “pwereta seni telinimwan iteiten ier pwe epwe chapetiu me eani asor ngeni Jiowa sapaot lon Sailo.” (1 Samuel 1:3-5) Eli sopwun Samuel we, Ramataim-sofim, a kkan ngeni leset lon ewe leeni itan Rentis ikenai, iwe, a ppaneta ewe fonu ie lon “chuukuchuukutaan Efraim.” (1 Samuel 1:1) Ina minne, ar sai ngeni Sailo epwe ukuukun 20 mwail, nge ina eu sai repwe fokkun molulu ren lon ena fansoun. Ina ewe mettoch an Elkana we famili a ffori “iteiten ier, lupwen repwe pwereta ren imwen Jiowa we.”—1 Samuel 1:7.
13. Ifa ewe leenien appiru ekkewe chon Jus mi tuppwol ra isetiu atun an Jises nonnom won fonufan?
13 Jises chon pwal eu watteen famili. Iteiten ier ena famili a kan sai seni Nasaret ina epwe 60 mwail le oor pwe repwe fiti ewe apwapwaan Pasofer lon Jerusalem. A wor ruu aal repwe tongeni sai won. Ewe aal mi wenecharelo a kan feitiu lon ewe Lemolun Chuukun Mekito, iwe, a kan feita orun 2,000 fiit lon fonuen Sameria, iwe, a feiliti Jerusalem. A wor pwal efoch aal, nge iei ewe aal Jises a fetal won lon an saingoon sai ngeni Jerusalem lon 33 C.E. A fetaletiu lon ewe Lemolun Chuukun Jortan, iwe, a tori “kiannin Jutia . . . pekiloon ewe Jortan.” (Mark 10:1) Seni ena leeni, “ewe aal mi aaleta ngeni Jerusalem” a 20 mwail towauan, iwe, a aaleta lap seni 3,700 fiit. (Mark 10:32) Ekkewe pwin aramas mi tuppwol le fiti ewe apwapwa ra kan eani ena sai mi weires seni Kalili tori Jerusalem. (Luk 2:44) A ifa ochchun ena leenien appiru ren noun Jiowa kkewe chon angang lon ekkewe fonu mi kan pisekisek aramas ie, pun a mecheres ngeni chommong leir ar repwe fiti an chon Kraist kkewe mwich pokiten a wor chommong sokkun waa repwe tongeni fiti!
14, 15. (a) Ifa ewe leenien appiru Anna a isetiu? (b) Met sipwe tongeni kaeo seni ewe ekiek mi murinno ekkoch minefoon chon fiti mwich ra kan eani?
14 Anna, emon fefin 84 ierin, nge a ma puluwan, pwal eu leenien appiru. Paipel a apasa pwe “esap fan eu an ese nom lon ewe imwen fel.” (Luk 2:37) Anna a pwal pwarata pwe a tongei aramas. Met neminnewe a ffori lupwen a kuna ewe monukol Jises me a weweiti pwe i ewe Messaia mi pwonetiu? A pwarata an kilisou ngeni Kot, iwe, a poputa le “kapas ussun ewe monukol ngeni meinisin mi witiwiti amanauen Jerusalem.” (Luk 2:38) A fet ochchun an ekiek me ewe leenien appiru a isetiu ren chon Kraist ikenai!
15 Ewer, epwe ita watte ach pwapwa seni ach fiti mwich me ach awora alillis lon pwe sipwe ussun Anna, weween, sisap mochen an epwe tiuelo eu leir. A ina ussun meefien chommong minefoon chon fiti mwich. Pokiten ar towu seni rochopwak me ar tolong lon an Kot saram mi amwarar, ra mochen akkalapalo ar kaeo, me chommong leir ra mmen tinikken fan iten an chon Kraist kkewe mwich. Iwe nge, ir mi ierettam lon ewe enlet repwe tuttumunur pwe rete ‘likitalo ewe tong ra eani le poputaan.’ (Pwarata 2:4) Eli samau watte are pwal ekkoch mettoch esor ar nemenem won epwe eppeti ekkoch seni ar fiti mwich. Nge sisap mut ngeni tongen pisek, minen apwapwa, are tinikop ar repwe awilikich pwe sipwe fiti mwich fan ekkoch chok, are sipwe liseangas lupwen sipwe fiti, are sisap mmonleta rer.—Luk 8:14.
Ewe Nampa Eu Leenien Appiru
16, 17. (a) Ifa ekiekin Jises ussun ekkewe mwich fan iten mettochun ngun? (b) Ifa ewe eoreni mi murinno meinisin chon Kraist repwe ita appiru?
16 Jises a isetiu eu leenien appiru mi sokkolo ochchun ren an aucheani ekkewe mwich fan iten mettochun ngun. Lupwen a 12 ierin, a pwarata an tongei imwen Kot we lon Jerusalem. A tiuelo seni seman me inan, nge mwirin ra kuna i an a porausfengen me ekkewe sense ussun ewe Kapasen Kot lon ewe imwen fel. Fan sufol Jises a eani ei kapas eis ngeni seman me inan pokiten ar aureki i: “Ouse silei pwe wisei ai upwe nonnom lon imwen Semei?” (Luk 2:49) Fan alleasochis, ewe at Jises a fiti seman me inan le liwiniti Nasaret. Me ikewe ie a pwarata an tong ren ekkewe mwich lon ewe sinakok ren an fiffitiir. Ina minne, lupwen a popueta an angangen afalafal, Paipel a apasa pwe “A tori Nasaret, ikewe a maarita ie; iwe, me ren eorenian lon ewe ranin sapat, a tolong lon ewe sinakok, iwe, a uta pwe epwe allea.” Mwirin an Jises alleani me awewei Aisea 61:1, 2, ir mi auseling ra “mairu ren ekkewe kapas murinno mi towu seni auan.”—Luk 4:16, 22.
17 A iei ussun lapalapen an chon Kraist kkewe mwich ikenai. A kan poputa mwich ren eu kolun mwareiti Kot me iotek, iwe, a wor allean me aweween wokisin seni Paipel (are wokisin mi mak lon puken kaeo Paipel). Wisen chon Kraist mi enlet ar repwe appiru an Jises Kraist we eoreni mi murinno. Ra kan pwapwaiti ar repwe fiffiti an chon Kraist kkewe mwich ukuukun ar tufich.
Leenien Appiru Ikenai
18, 19. Ifa ewe leenien appiru mi murinno pwiich kkewe ra fen isetiu fan iten ekkewe mwich me mwichelap lon ekkewe fonu ese lien pisekisek aramas ie?
18 Lon ekkewe fonu ese lien pisekisek aramas ie, chommong pwiich kkewe ra kan isetiu leenien appiru mi murinno ren ar aucheani an chon Kraist kkewe mwich. Lon Mozambique, emon district overseer itan Orlando, me puluwan we itan Amélia ra fetal 55 mwail lon 45 awa won eu chuuk tekia pwe repwe apwonueta wiser fan iten eu mwichelap. Mwirin, a pwal chok ina ussun ar fetal lupwen ra sai ngeni ewe pwal eu mwichelap mwirin. Fan tipetekison Orlando a apasa pwe “Am aua meefi pwe ese sokkolo minne am aua ffori lupwen aua chuuri pwiich kkewe seni ewe Mwichefelin Bawa. Ren ar repwe fiti ewe mwichelap me liwiniti imwer, ra fetal ukuukun 250 mwail lon wonu ran, iwe, emon brother 60 ierin a fitiir.”
19 Ifa ussun an aramas aucheani ekkewe mwich mi fiffis iteiten wiik? Kashwashwa Njamba emon sister 70 ierin me a mmen kichuchu. A nonnom lon Kaisososi, eu kukkun sopw ina epwe ulungat mwail towauan seni ewe Kingdom Hall lon Rundu, Namibia. Ren an epwe fiti ekkewe mwich, a kan fetal wonu mwail le woluwol. Fitemon ra fen kawet won ena aal, nge Kashwashwa a chuen chok wakar. A lap me lein ekkena mwich ra fiffis lon ekkewe fos neminnewe ese weweiti. Iwe, ifa ussun a kuna feioch seni an fiffitiir? Kashwashwa a apasa pwe “Ren ai sussuuk ngeni ekkewe wokisin seni Paipel, ua kan sotuni le ekieki weween ewe afalafal.” Nge neminnewe ese sile allea, iwe, ifa ussun a weweiti ekkewe wokisin? A apasa pwe “Ua kan pi ekkewe wokisin ua amwochulukun.” Iwe, mwirin fitu ier, a chommong ekkewe wokisin a chechchemeni. Ren an epwe angochulo le nounou Paipel, neminnewe a fiffiti eu sukulen allea ewe mwichefel a akkota. A apasa pwe “Ua saani ai upwe fiffiti mwich. Fansoun meinisin a wor mettoch minefo upwe kaeo. Ua saani ai upwe nom lein pwiich kkewe. Inaamwo ika use tongeni fos ngeni chommong leir, nge fansoun meinisin ra kan kapong ngeniei. Iwe, lamot seni meinisin, ua silei pwe ren ai fiffiti mwich, ua kan apwapwai letipen Jiowa.”
20. Pwata sisap tunalo an chon Kraist kkewe mwich?
20 Ussun Kashwashwa, fite million chon fel ngeni Jiowa won unusen fonufan ra kan pwarata ar aucheani an chon Kraist kkewe mwich. Iei an Setan fonufan a feffeil ngeni an epwe kataalo, iwe, esap och ach sipwe tunalo ach mwimwmwichfengen. Nge, sipwe nennelo lon pekin ngun me pwarata pwe sia mmen aucheani ach kkewe mwich me mwichelap. Sap minne ena mettoch epwe chok apwapwai letipen Jiowa, nge sipwe pwal kuna feioch lapalap fansoun ach sipwe fiffiti ewe kokkotun asukul mi fel, ewe mi emmwen ngeni manau esemuch.—Än Salomon Fos 27:11; Aisea 48:17, 18; Mark 13:35-37.
Kapas Eis fan iten Enniwili Poraus
◻ Pwata a eu feioch watte ach fiffiti an chon Kraist kkewe mwich?
◻ Ifa ussun meinisin chon fiti mwich repwe tongeni ffori met meinisin repwe pochokkuleta ren?
◻ Ifa ewe leenien appiru mi sokkolo ochchun Jises Kraist a isetiu?
◻ Ifa ewe lesen sipwe tongeni kaeo seni pwiich kkewe mi nonnom lon ekkewe fonu ese lien pisekisek aramas ie?
[Sasing lón pekin taropwe 18]
Ekkewe Chon Pwarata, awewe chok ren chokkeei lon Romania, ra kan isetiu leenien appiru mi murinno ren ar aucheani an Chon Kraist kkewe mwich