Sipwe Pwäratä Pwe Sia Kan Süföliti Ach Kewe Mwich Mi Fel
“Üpwe emwenireto ren chuki mi pin o apwapwaar lon imwei imwen iotek.”—AISEA 56:7.
JIOWA a fen ionifengenni nöün kewe aramas, weween, chon Kraist mi kepit me chiener kewe, pwe repwe fel ngeni i ren ‘chuukun we mi fel.’ A kan apwapwaar lon ‘imwan we, imwen iotek,’ are imwan we, imwen fel lon pekin ngün, nge iei eü “imwen iotek fän iten aramasen fanüfan meinisin.” (Aisea 56:7; Mark 11:17) Ekkena mettoch ra affata pwe ewe kokkotun fel ngeni Jiowa a fel, a unusen limöch, me a nom asetään mettoch meinisin. Ren ach pwäratä süföl ren ach kewe mwich mi kawor fän iten ach sipwe käeö ussun me fel ngeni Jiowa, sia kan änneta pwe sia eäni ekiekin Jiowa ussun mettoch mi fel.
2 Lon Israel loom loom, a fel ewe leeni Jiowa a filatä fän iten än aramas fel ngeni i. Ewe imwen fel mangaku, masouan kewe, me pisekin kewe ra kepit me pinilo “pwe repwe unusen pin.” (Ekistos 30:26-29) Ekkewe ruu kinikin lon ewe ruumw mi fel ra iteni “ewe Leni mi Pin” me ewe mi “Unusen Pin.” (Ipru 9:2, 3) Mwirin, ewe imwen fel lon Jerusalem a siwili ewe imwen fel mangaku. Jerusalem a iteni “ewe telinimw mi fel” pun ina leenien än aramas fel ngeni Jiowa. (Nehemia 11:1; Mattu 27:53) Le atun an angangen afalafal woon fönüfan, Jises a affata pwe a süföliti ena imwen fel. A song ngeni aramas pokiten ar rese süföliti ena imwen fel pwe iwe ra eäni ar leenien amömö me ar leenien fetäl och kinikin lon.—Mark 11:15, 16.
3 Chon Israel ra mwichfengen iteitan pwe repwe fel ngeni Jiowa me aüseling ngeni älleään an we Allük. Ekkoch rän lon ar kewe fansoun fetellap ra eita ngeniir mwichelap mi fel, iwe, a affata pwe mi fel ekkena mwich. (Lifitikos 23:2, 3, 36, 37) Lon eü mwichelap lon fansoun Esra me Nehemia, chon Lifai ra ‘aweweei ngeni ekkewe aramas ewe allük.’ Pokiten ekkewe aramas meinisin ra kechiu lupwen “ra rongorong kapasen ewe allük,” ekkewe chon Lifai ra “ereni ekkewe aramas meinisin pwe repwe fanafanelo ren ar apasa: ‘Ou mosonosonolo! Pun ei rän a fel.’” Iwe mwirin, chon Israel ra föri apwapwaan ewe Fetellapen Nikachoch ükükün fisu rän fän “watten pwapwa.” Pwal och, “a wor älleään puken allükün ewe Kot mi enlet rän me rän, seni ewe äkkäeüin rän tori ewe amuchun rän; iwe, ra föri ewe fetellap ükükün fisu rän, iwe, lon ewe awanüen rän a fis eü mwichelap mi ammafel, ussun a mak lon ewe allük.” (Nehemia 8:7-11, 17, 18) Ekkena fansoun ra wenewenen fel, iwe, wisen chokkewe mi fitiir ar repwe ätenekifichiir fän süföl.
Mi Fel Ach kewe Mwich
4 A enlet pwe lon ei fansoun, esor eü telinimw mi fel me ren Jiowa woon fönüfan me eü imwen fel fän iten än aramas repwe fel ngeni i lon. Iwe nge, sisap mönüki pwe mi fel ekkan mwich fän iten än aramas fel ngeni Jiowa. Fän ülüngät iteiten wiik sia kan mwichfengen ren ach sipwe älleäni me käeö Paipel. A wor chon ‘aweweei’ än Jiowa Kapas, ussun chök lon fansoun Nehemia. (Nehemia 8:8) Meinisin ach kewe mwich ra kan poputä me muchulo ren iotek, iwe, lon lape ngeni ekkena mwich sia kan eäni kölün mwareiti Jiowa. (Kölfel 26:12) Ach kewe mwich ra enletin pacheri ach feffel ngeni Jiowa, iwe, mi lamot an epwe watte ach aücheaniir me süfölitiir.
5 Jiowa a kan efeiöchü nöün kewe aramas lupwen repwe mwichfengen pwe repwe fel ngeni i, käeö an Kapas, me pwapwaiti än chon Kraist chiechiöchfengen. Ika epwe tori fansoun mwich, sipwe tongeni wesewesen lükü pwe ina ewe leeni ikewe Jiowa a “allukatiu ewe feioch” an epwe nonnom ie. (Kölfel 133:1, 3) Sipwe pwal küna ena feiöch ika sipwe fiti ach kewe mwich me aüselingaöchü ewe prokram fän iten kaworen möngöön ngün. Pwal och, iei alon Jises: “Pun ia ruoman ika ülüman ra chufengen ie fän itei, ngang üpwe nonom lefiler.” Ena kapas a äkkäeüin weneiti än ekkan elter mwichfengen pwe repwe angang woon osukosuk watte lefilen aramas, nge ren pwal och weween, a pwal weneiti ach kewe mwich. (Mattu 18:20) Ika Kraist a kan nonnom ren chon Kraist ren ewe ngün mi fel fansoun ar mwichfengen fän itan, sisap itä eäni ewe ekiek pwe mi fel ekkena mwich?
6 A enlet pwe Jiowa ese nonnom lon ekkan imwen fel förien aramas. Iwe nge, ach kewe Kingdom Hall, ir leenien fel mi enlet. (Fofor 7:48; 17:24) Ina ewe leeni sia kan mwichfengen lon pwe sipwe käeö än Jiowa Kapas, iotek ngeni i, me eäni kölün mwareiti i. Mi pwal enlet ena ren ach kewe Leenien Mwich. Ekkewe leeni watte sia kan äeä ren ach kewe mwichelap, awewe chök ren auditorium, exhibition hall, are sports stadium, ra kan wiliti ach leenien fel ngeni Kot fän iten ach kewe mwich mi fel. Mi fichiiti ekkena fansoun fän iten ach fel ngeni Kot ach sipwe süfölitiir, ese lifilifil ika ra watte are kükkün, iwe, ach süföl epwe pwälo lon ekiekich me föfförüch.
Ifa Ussun Sipwe Tongeni Pwäratä Süföl ren Ach kewe Mwich
7 A wor fitu mettoch sipwe tongeni föri ren ach sipwe pwäratä pwe sia kan süföliti ach kewe mwich. Akkom, sipwe nom lon ach leenien mwich fän iten ach kewe köl. Chommong leir ra ussun chök iotek, ina minne, sipwe köl fän süföl watte. Iei makkeien Paul ussun Jises, nge a aloni Kölfel 22: “Upwe esile ngeni pwii kewe itom; upwe mwareituk ren köl lukalapen ewe mwichen aramas.” (Ipru 2:12) Ina popun, sipwe ekiekin mot lon leeniach mwen poputään ewe kölün suukun mwich, iwe, sipwe ekiekifichi weween kapasan le atun ach köl. Amwo ach köl epwe tipeeü ngeni meefien ewe soumakkei kölüpin, pwe iei makkeian: “Ousipwe mwareiti ewe Samol mi Lapalap. Üpwe kilisou ngeni ewe Samol mi Lapalap ren unusen lelukei lon ewe mwichen chon wenechar, pwal lein ewe mwichen aramas.” (Kölfel 111:1) Ewer, ach eäni kölün mwareiti Jiowa, iei eü popun ach sipwe warekäi fän iten ach kewe mwich me nonnom tori le sopwoloon.
8 Pwal eü mettoch mi alapalo aüchean ach kewe mwich lon pekin ngün, ikkeei ekkewe iotek fän iten chon fiti mwich meinisin. Lon eü fansoun, ekkewe popun chon Kraist lon Jerusalem ra mwichfengen, iwe, “ra chok chiepokuta ngeni Kot” lon iotek. Ina popun, ra sopwelo ar “asilefeili än Kot kapas fän pwora.” (Fofor 4:24-31) Sia itä ekieki pwe emön leir a anchang le atun ena iotek? Aapw, pwe ra “chiepokuta” lon ar iotek. Ekkewe iotek lon ach kewe mwich ra kan pwärawu meefien meinisin chon fitiir. Mi fichitiir ach sipwe ätenekifichiir fän süföl.
9 Pwal och, sipwe tongeni pwäratä ükükün alolloolun ach süföliti pinin ach kewe mwich ren üfach. Napanapen üfach me mökürach epwe tongeni alapalo süfölün ach kewe mwich. Iei än ewe aposel Paul fön: “Üa mochen pwe lon ekewe lenien fel meinisin mwän repwe iotek, ir mwän mi pin fän iten Kot, repwe aitietä pöür lon ar iotek, nge resap song ika anini. Üa pwal mochen pwe ekewe fefin repwe üföüföch, repwe öüköchü üfer o üföüf sokun üf mi fich ngeni souläng. Resap firesi mökürer ren sokopaten fifires, ika mwärämwär kolt ika fau aüchea ika üföüf üf mi mömong. nge repwe foute ngeniir föför mürina usun a fich ngeni fefin kana mi souläng.” (1 Timoti 2:8-10) Ika sipwe fiti ekkewe mwichelap watte lon ekkan leeni esor osur, üfach epwe tongeni fichiiti fansoun afföü are pwichikkar, nge epwe chüen tongeni wor süfölün. Pwal och, ach süföliti fansoun mwich epwe emmwenikich pwe sisap möngö are nunu appach lon mwich. Üfach me föfförüch mi fichiiti ach kewe mwich epwe affata pwe sia kan asamolu Jiowa Kot, ach fel ngeni i, me chienach kewe chon fiti mwich.
Föfför Mi Fichiiti Chon le Imwen Kot
10 Lon 1 Korint, sopwun 14, sia küna ewe fön mi mirit seni ewe aposel Paul ren menni lapalap ach kewe mwich repwe pwönütä lon. Iei makkeian: “Nge mettoch meinisin epwe fis fän pwüng me kokotöch.” (1 Korint 14:40) Ach kewe mwich eü kinikin mi lamot lon angangen ewe mwichefelin Kraist, iwe, föfförün chon fitiir epwe tipeeü ngeni minne mi fichiiti chon le imwen Jiowa.
11 A lamot ach sipwe äkkäeüin äiti ngeni nöüch kewe ar repwe föfföröch lon ach kewe mwich. Kich sam me in sipwe aweweei ngeni nöüch kewe pwe esap leenien urumot ewe Kingdom Hall me ikewe sia kan chuto ren ewe Congregation Book Study ie. Ekkena leeni leenien ach fel ngeni Jiowa me ach käeö an Kapas. Iei makkeien King Solomon, emön mi mirit: “Kopwe afäluk, lupwen ka feila lon imwenfelin Kot. A öch om kopwe feito o aüseling.” (Än Salomon Afalafal 5:1) Moses a äiti ngeni chon Israel pwe repwe ämwichafengenni ekkewe mi watte me ‘kükkün.’ Iei alon: “Iwe, oupwe emwichafengeni ekewe aramas . . . pwe meinisin repwe rongorong o kaiö usun ar repwe meniniti ewe Samol mi Lapalap ämi we Kot o tümwünüöchü le apwönüetä kapasen ei allük meinisin. Iwe, nöür resamwo silei ei allük repwe rong o kaiö usun ar repwe meniniti ewe Samol mi Lapalap ämi we Kot.”—Tuteronomi 31:12, 13.
12 Iwe, pwal ussun chök lon ei fansoun, nöüch kewe kükkün ra kan fitikich sam me in pwe repwe äkkäeüin akkaüseling me käkkäeö. Lupwen ra tufichin pwisin käeö me weweiti ekkewe afalafalen le popun lon Paipel, iwe, nöüch kewe repwe pwal tongeni ‘pwäratä ren auer’ ussun ar lükülük ren ar ekis uwawu meefier. (Rom 10:10) Eli emön kükkün epwe tongeni poputä ren an pölüeni eü kapas eis a weweiti ren kapas mi mwoch. Eli epwe akkom älleäni pölüan, nge mwirin, epwap sotuni le pwisin aweweei pölüan. Ina eü mettoch ena kükkün epwe küna feiöch me pwapwa seni, me an pwisin pwäratä an lükülük epwe apwapwai letipen ekkewe watte. Pwüngün pwe kich sam me in sipwe föratiu leenien äppirü ren ach pwisin uwawu meefiach. Ika pwe mi tufich, epwe mürinnö ika nöüch kewe repwe kamwöch pwisin en me nöün Paipel, puken köl, me ewe puk sia käeö lon. Repwe käeö ifa ussun repwe pwäratä ar süföliti ekkena puk. Ekkena mettoch meinisin repwe menlapei lon ekiekin nöüch kewe pwe mi fel ach kewe mwich.
13 Pwüngün pwe sisap mochen pwe ach kewe mwich repwe ussun chök felin Kristentom. Aramas rese kon lien möngüü an kewe fel me a ussun minen elingepin are ussun chök akürangen ekkewe band. Sia mochen pwe ach kewe mwich lon ewe Kingdom Hall repwe kkü me apwapwai letipen aramas, nge sap minne repwe ussun chök minen kunou. Sia kan mwichfengen ren ach sipwe fel ngeni Jiowa, ina minne, ach kewe mwich epwe wor süfölür fansoun meinisin. Sia tipeni pwe epwe iei ussun meefien ir mi kerän äeüin fiti ach mwich mwirin ar aüseling ngeni ewe prokram me ar katol föfförüch me föfförün nöüch kewe: “Enlet Kot mi nonnom remi.”—1 Korint 14:25.
Eü Mettoch Esap Tongeni Tiwelo Seni Ach Fel Ngeni Kot
14 Ussun mi fen mak me mwan, Jiowa a kan äkkämwichafengenni me akkapwapwai nöün kewe aramas lon ‘imwan we, imwen iotek,’ weween, imwan we imwen fel lon pekin ngün. (Aisea 56:7) Ewe mwän mi tuppwöl itan Nehemia a ächema ngeni chienan kewe chon Jus pwe repwe süföliti ewe imwen fel ren ar tüttümünüfichi. Iei alon: “Äm aisap tümwününgau ngeni angangen imwen äm we Kot.” (Nehemia 10:39) Pwal och, sisap tunalo än Jiowa kökö, kököön ach sipwe fel ngeni i lon ‘imwan we, imwen iotek.’
15 Iei än Aisea we oesini mi affata lamoten ach sipwe fiffiti mwich ren ach sipwe fel ngeni Kot: “‘Iwe, iteiten popun maram me iteiten ränin sapat aramasen fanüfan meinisin repwe feito fän mesei o fel ngeniei lon Jerusalem,’ iei alon ewe Samol mi Lapalap.” (Aisea 66:23) Ena oesini a pwöpwönütä iei. Iteiten wiik fän iteiten maram meinisin, chon Kraist mi tuppwöl ra kan chufengen pwe repwe fel ngeni Jiowa. Ra föfföri ena ren ar fiffiti mwich me ewe angangen afalafal. En emön lein chokkewe mi ‘feito me chapetiu mwen mesen Jiowa’ iteiten wiik meinisin?
16 Aisea 66:23 epwe unusen pwönütä lon ewe fönüfan sefö Jiowa a fen pwonei. Lon ena fansoun, ‘aramas meinisin’ repwe wesewesen ‘feito pwe repwe chapetiu ngeni,’ are fel ngeni Jiowa fansoun meinisin tori feilfeilo chök. Pokiten esap ükütiu ach mwichfengen fän iten ach sipwe fel ngeni Jiowa lon ewe otot sefö, iwe, sisap itä fiffiti ach kewe mwich mi fel iteiten fansoun meinisin iei?
17 Atun an a arapoto sopwoloon ei otot minen loom, epwe lapolo ach ekiekin fiti ach kewe mwich fän iten ach sipwe fel ngeni Kot. Pokiten ach süföliti felin ach kewe mwich, sisap mut ngeni ach angangen lükün, lesenin lon sukul, are sukul kulokun lekuniol ar repwe eppeti ach fiti chienach kewe chon lükü le mwichfengen. A fokkun lamot ach sipwe pöchökkületä ren ach chiechifengen. Ach kewe mwich ra akkawora fansoun fän iten ach sipwe sissilefengennikich, akkapöchökkülafengennikich, me peppesefengennikich pwe epwe lapolo “tong me angang mürinnö. A lamot an epwe lapolo ach föfföri ena “pun sia silei pwe Ränin ach Samol a arapoto.” (Ipru 10:24, 25) Ina popun, amwo sipwe pwäratä süföl fansoun meinisin ren ach kewe mwich mi fel ren ach fiffitiir iteitan, ren ach üföüföch, me ach kewe föfför mi mürinnö. Ika sipwe ikkina ussun, sipwe kan pwäratä pwe sia eäni ekiekin Jiowa ussun mettoch mi fel.
Enniwili Pworaus
• Met a affata pwe epwe pin ekkan mwich nöün Jiowa kewe aramas ra fiffiti?
• Ikkefa ekkewe lapalap ren ach kewe mwich mi änneta pwe ir mi fel?
• Ifa ussun ekkan kükkün repwe tongeni pwäratä pwe ra süföliti felin ach kewe mwich?
• Pwata sisap ükütiu seni ach fiffiti mwich iteiten wiik meinisin?
[Ekkewe kapas eis fan iten ewe lesen]
1. Ikkefa ekkewe popun mi longolong woon Paipel ach sipwe süföliti ach kewe mwich?
2. Met a affata pwe mi fel me ren Jiowa ewe leeni a filatä fän iten än aramas fel ngeni i, me ifa ussun Jises a affata pwe a pwal ina ussun an ekiek?
3. Met a affata pwe mi fel än chon Israel kewe mwichelap?
4, 5. Met sokkun mettoch lon ach kewe mwich ra änneta pwe ir mi fel?
6. Met sia tongeni apasa ussun ach kewe leenien mwich meinisin?
7. Ifa ussun sipwe tongeni pwäratä pwe sia kan süföliti ach kewe mwich?
8. Menni pworaus lon Paipel a affata pwe mi fichiiti ekkewe iotek lon ach kewe mwich ach sipwe ätenekifichiir fän süföl watte?
9. Ifa ussun sipwe tongeni pwäratä pwe sia kan süföliti ach kewe mwich mi fel ren üfach me föfförüch?
10. Ifa ussun ewe aposel Paul a affata pwe epwe fokkun mürinnö föfförüch lon ach kewe mwich?
11, 12. (a) Met sia mochen menlapei ngeni nöüch kewe mi fiffiti ach kewe mwich? (b) Ifa ussun nöüch kewe repwe tongeni pwäratä ar lükülük lon ach kewe mwich?
13. Met sia kan äneänei ren ir mi kerän äeüin fiti ach mwich?
14, 15. (a) Met sipwe föri pwe site ‘tümününgaü ngeni imwen ach we Kot’? (b) Ifa ussun Aisea 66:23 a kan pwöpwönütä iei?
16. Pwata sipwe fiffiti mwich fansoun meinisin lon ei atun?
17. Pwata a lamot ngenikich ach kewe mwich pokiten ach “silei pwe Ränin ach Samol a arapoto”?
[Lios lon pekin taropwe 10]
Mi fel ach kewe mwich meinisin fän iten ach fel ngeni Jiowa, ese lifilifil ia ra kan fiffis ia
[Lios lon pekin taropwe 13]
Nöüch kewe kükkün ra fiffiti mwich pwe repwe akkaüseling me käkkäeö