Akkapwonueta Ach Filata Ach Fangelo MAnauach Ngeni Kot

“Ikewe ngunun Jiowa a nonnom ie, iei ewe leenien ngaselo.”​—2 KORINT 3:17.

1. Ekkewe Chon Pwarata Jiowa ra fangelo manauer ngeni io, me pwata ra kan nounou ekkoch mwicheich mi fiti pwungun allukun muu?

EKKEWE CHON PWARATA JIOWA ra luku pwe ar lamalam epwe nomofochelo. Ina minne ra ekiekin angang ngeni Kot “ren ngun me enlet” tori feilfeilo chok. (Jon 4:23, 24) Ren ar tufichin kefil, ekkeei Chon Kraist ra filata pwe repwe unusen fangelo manauer ngeni Jiowa Kot me akkapwonueta wiser. Ren ar repwe fori ena, ra kutta alillis seni an Kot we Kapas me an we ngun mi fel. Ra akkapwonueta wiser kewe wisen chon Kraist mi fen fangelo manauer, nge ra pwal pwarata sufol ngeni ewe “nemenem mi tekia”, weween, ewe muun fonufan ra nom fan, ra pwal aeaochu an ekkewe alluk me kokkot. (Rom 13:1; Jemes 1:25) Awewe chok, ekkewe Chon Pwarata ra nounou ewe Watch Tower Sociey pwe epwe eu mwicheich mi fiti pwungun alluk​—eu me lein chommong won ekkoch fonu​—pwe epwe atufichir ar repwe foffori ar angangen alisi aramas, akkaeuin lon pekin ngun. Nge ekkewe Chon Pwarata ra fangelo manauer ngeni Kot, nge esap ngeni eu mwicheich mi fiti pwungun allukun ekkewe muu, iwe, ar riri ngeni Jiowa epwe likiitu tori feilfeilo chok.

2. Pwata ekkewe Chon Pwarata Jiowa ra aucheani ewe Watch Tower Society me ekkewe ekkoch mwich ra kan nounou?

² Pokiten ir chon angang mi fangelo manauer ngeni Kot, a lamot ngeni ekkewe Chon Pwarata Jiowa ar repwe apwonueta an Jises kewe kapasen emmwen pwe repwe “feilo foralo chon kaeo seni chon fonu meinisin, repwe papataisir fan iten ewe Sam, me ewe Nau, me ewe Ngun mi Fel, repwe afalafaler.” (Mattu 28:19, 20) Ei angang epwe sopweilo tori muchuloon ewe ototen mettoch, pun Jises a pwal apasa: “Ei kapas allim usun ewe mu epwe esileifeili won unusen fonufan, pwe epwe pwar ngeni einang meinisin, iwe, a ina sopolon.” (Mattu 24:3, 14) Iteiten ier, an ewe Watch Tower Society kewe leenien for puk me pwal ekkoch sokkun leeni mi fiti pungun allukun ekkewe muu ra awora ngeni ekkewe Chon Pwarata Jiowa fitu million Paipel, puk, me chassi fan iten ar repwe nounou lon ar angangen afalafal won unusen fonufan. Ekkena mwicheich ra fokkun lamot ngeni ekkewe chon angang ngeni Kot pwe repwe akkapwonueta ar pwon atun ra fangelo manauer ngeni.

3. Ifa ussun Chon Pwarata Jiowa ra pin nounou ewe fos “ewe Society”?

³ Ekkoch ra apasa pwe lupwen ekkewe Chon Pwarata ra kapas ussun ewe Watch tower Society​—are fan chommong repwe chok apasa “ewe Society”​—a pwarata pwe ra ekieki pwe epwe lapalap seni eu chok mwicheich mi fiti pwungun allukun ewe muu. Rese pwal ekieki pwe epwe pwal wisen isetiu minne epwe emmwenir lon ar fel ngeni Kot? Ewe puk Jehovah’s Witnesses​—Proclaimers of God’s Kingdom a affata ei mettoch ren an awewei: “Lupwen The Watchtower [June 1, 1938] a kapas ussun ‘Ewe Society,’ ese chok wewe ngeni eu mwicheich mi fiti pwungun allukun ewe muu, nge pwal ewe mwichen Chon Kraist mi kepit mi poputaani me nounou fan iten ar angang.”a Ina minne, “Ewe Society” a wewe ngeni “ewe chon angang mi tuppwol me tipatchem.” (Mattu 24:45) A ina ussun ekkewe Chon Pwarata ra kan nounou ekkewe kapas “ewe Society.” Pwungun pwe lupwen sipwe kapas ussur sise tongeni nikasiwili ewe mwicheich mi fiti pwungun allukun ewe muu me ewe itelap, “ewe chon angang mi tuppwol me tipatchem.” Meilapen ewe Watch Tower Society ra angei wiser ren utut, nge ekkewe Chon Pwarata mi choni ewe ‘chon angang mi tuppwol’ ra seikita ren an Jiowa we ngun mi fel.

4. (a) Met chommong Chon Pwarata repwe apasa pwe esap fis wewengau? (b) Pwata sipwe itepok me ruuepek ussun ach nounou me weweiti ekkoch kapas?

⁴ Fan iten an esap fis wewengau, Chon Pwarata Jiowa ra tumunufichi met repwe apasa. Eni resap kon lien era, “ewe Society a apasa,” nge chommong Chon Pwarata ra kan era, “ewe Paipel a apasa,” are, “Ua weweiti pwe ewe Paipel a aiti ngenikich.” A ina ussun repwe apochokkulata pwisin filien emon me emon Chon Pwarata pwe repwe nguuri an ewe Paipel kewe afalafal me pwal tumunur seni ar repwe ameef ngeni aramas pwe ekkewe Chon Pwarata ra chok nom fan allukun lamalam. Pwungun pwe esap ita eu minen anini ekkewe kapas sipwe nounou. Popun, pun epwe lamot ekkewe kapas sipwe nounou fan iten chok an esap fis wewengau. A lamot ekkewe Chon Kraist repwe itepok me ruepek. Ewe Paipel a peseikich ach sisap “anini ussun kapas.” (2 Timoti 2:14, 15) Ewe Paipel a pwal apasa: “Are oupwe kapas ren kapas sokkofesen, o apasata kapas mi sap ffat, pwata emon epwe tongeni silei meeta oua apasa?”​—1 Korint 14:9.

An Kot we Ngun Mi Fel A Akukkunalo Lamoten Chommong Alluk

5. Ifa ussun sipwe weweiti 1 Korint 10:23?

⁵ Ewe aposel Paul a apasa: “Mettoch meinisin mi mut ngenikich, nge sap mettoch meinisin epwe amurinnolokich.” Iwe, a pwal sopweilo: “Mettoch meinisin mi mut ngenikich, nge sap mettoch meinisin epwe aufichikicheta.” (1 Korint 10:23) A ffatoch pwe sap minne alon Paul a era pwe mi mumuta aramas repwe fori minne an Kot we Kapas a apwungu. Ren ach alollo ngeni ekkewe orun 600 alluk Kot a ngeni ekkewe chon Israel lom lom, mei chokisikis ekkewe alluk mi nemeni manauen Chon Kraist. Ina minne, minne emon epwe fori epwe alongolong won miritin letipan. Emon aramas mi fen fangelo manauan ngeni Jiowa epwe pwapwaesini ewe ngasangas mi popu seni emmwenien Kot me ren ewe ngun mi fel. Ena mettoch epwe alisi ewe Chon Kraist mi fangelo manauan ngeni Kot an epwe esinna met epwe “aufichieta” me “amurinnolo” pwisin i me ekkewe ekkoch. A weweiti pwe filian kewe epwe kku pwisin an riri ngeni Kot, emonewe a fen fangelo manauan ngeni.

6. Ifa ussun sipwe tongeni pwarata pwe sia fen pwisin luku ewe enlet lon ach kewe mwich?

⁶ Emon Chon Pwarata epwe pwarata pwe a pwisin nguuri ewe enlet ren an epwe pwapwarata meefian lon an chon Kraist kewe mwich. Eni akkom, epwe chok alleani minne a mak lon ekkewe puk sipwe kaeo. Iwe nge, mwirin och fansoun, epwe feffeita ngeni an epwe apasaou aitien Paipel lon pwisin an fos. Epwe pwarata pwe a amarata pwisin an tufichin ekiek, nge ese chok apasa alon ekkewe ekkoch. An epwe pwisin ekieki met epwe apasa me apasaou ekkewe poraus mi enlet seni letipan epwe atoto ngeni pwapwa me pwarata pwe a wesewesen luku.​—Eklesiastis 12:10; alollo ngeni Rom 14:5b.

7. Ekkewe chon angang ngeni Jiowa ra pwisin filata ar repwe fori met?

⁷ Tong ngeni Kot me aramas a kan amwokutu ekkewe Chon Pwarata Jiowa. (Mattu 22:36-40) Enlet, ewe mwicheichen pwipwi won unusen fonufan ra ririfengen ren ewe tongen Chon Kraist. (Kolose 3:14; 1 Piter 5:9) Iwe nge, pokiten ir meinisin repwe tufichin pwisin filata minne repwe fori, emon me emon leir epwe pwisin filata an epwe afalafala ewe kapas allim ussun an Kot we Muu, an esap angolong lon mwokutukutun ekkewe muun fonufan, an esap angei chcha, an epwe tumunu seni ekkoch sokkun fofforun apwapwa, me an epwe manaueni ewe sokkun manau mi tipeeu ngeni Paipel. Ar kefil esap fis fan osopwisek. Ir pwisin filien ir kewe mi feffetal ngeni ar repwe wiliti emon Chon Pwarata, me mwen ar fangelo manauer ngeni Kot.

Sipwe Pwarata Ussun Ach Angang ngeni ewe Mwichen Sou Pwungupwung?

8. A lamot an epwe ffatoch menni kapas eis?

⁸ Ewe Paipel a affata pwe ekkewe Chon Kraist mi enlet rese angang ngeni Kot fan osenimu. A apasa: “Jiowa i ewe Ngun; o ikewe Ngunun Jiowa a nonnom ie, iei ewe leenien ngaselo.” (2 Korint 3:17) Nge ifa ussun ei mettoch epwe tongeni tipeeu ngeni ewe poraus ussun ewe Mwichen Sou Pwungupwung an ewe “chon angang mi tuppwol me tipatchem?”​—Mattu 24:45-47.

9, 10. (a) Ifa ussun ewe kokkotun mokur a weneiti ewe mwichefelin Chon Kraist? (b) Lon ewe aeuin senturi, met a lamot ngeni chon ewe mwichefel ar repwe fori pwe repwe apwonueta ewe kokkotun mokur lon ewe mwichefelin Chon Kraist?

⁹ Ren an epwe polu ei kapas eis, epwe lamot ach sipwe chechemeni ewe kokkotun tettelin nemenem. (1 Korint 11:3) Lon Efisus 5:21-24, a era pwe Kraist i “mokuren ewe mwichefel,” iwe, ewe mwichefel a “nom fan.” Ekkewe Chon Pwarata Jiowa ra weweiti pwe chochoon ewe chon angang mi tuppwol me tipatchem, ir pwiin Jises kewe lon pekin ngun. (Ipru 2:10-13) Ei mwichen chon angang mi tuppwol epwe wisen awora “mongoon ngun lon fansoun mi fich” ngeni noun Kot kewe aramas. Lon ei fansoun sopwoloon, Kraist a seikata ewe chon angang “won pisekin meinisin.” Ina minne, mei fich ngeni an epwe kuna sufol seni emon me emon mi apasa pwe i Chon Kraist.

¹⁰ Iei ewe popun a kawor ewe kokkotun tettelin nemenem pwe epwe atipeeufengenni me “atetteliochu mettoch meinisin.” (1 Korint 14:40) Ren an epwe fis ei mettoch lon ewe aeuin senturi, fitemon Chon Kraist mi kepit lein ewe mwichen chon angang mi tuppwol me tipatchem ra seikita fan iten ar repwe tupuni unusen ewe mwichen chon kepit. Minne a fis mwirin a annetata pwe Jiowa a tipeeu ngeni me a efeiochu ewe angangen emmwen seni ewe mwichen sou pwungupwung lon ewe aeuin senturi. Ekkewe Chon Kraist lon ewe aeuin senturi ra nguuri ewe kokkot ren pwapwa. Ewer, ra etiwa me kilisou ngeni minne a fis seni.​—Fofor 15:1-32.

11. Ifa ewe ekiek sipwe eani ussun ewe Mwichen Sou Pwungupwung ikenai?

¹¹ A chuen pochokkul lamoten ena kokkot. Lon ei fansoun, engol Chon Kraist mi kepit, ir chochoon an Chon Pwarata Jiowa we Mwichen Sou Pwungupwung, nge ir meinisin ra manaueni manauen Chon Kraist langattam fansoun. Ra awora emmwen lon pekin ngun ngeni ekkewe Chon Pwarata Jiowa, ussun chok ewe mwichen sou pwungupwung lon ewe aeuin senturi. (Foffor 16:4) Ussun chok ekkewe Chon Kraist lom lom, ekkewe Chon Pwarata ra kutta seni pwiir kewe mi asimau chon ewe Mwichen Sou Pwungupwung ekkewe fon seni Paipel me emmwen ussun lapalapen ar fel. Inaamwo ika chon ewe Mwichen Sou Pwungupwung, ir chon angang ngeni Jiowa me Kraist ussun chok chiener kewe Chon Kraist, nge ewe Paipel a alluku ngenikich: “Oupwe alleasochisi ekkewe chon emmwenikemi, o nonnom fan nemenier; pun ra mamasa ngunumi ussun chok ir ekkewe repwe pwarata ussun ar angang. Iwe, repwe fori ar angang ren pwapwa, sap ren letipechou, pun are ra letipechou ren ar angang, ami ousap feioch ren.”​—Ipru 13:17.

12. Emon me emon Chon Kraist epwe wisen pwarata an angang ngeni io?

¹² Ewe wisen emmwen Paipel a awisa ngeni ewe Mwichen Sou Pwungupwung epwe ita wewe ngeni pwe iteiten Chon Pwarata meinisin repwe wisen repot ngeni ena mwichen aramas an kewe fofforun fel? Esap ina ussun me ren alon Paul ngeni ekkewe Chon Kraist lon Rom: “Pwata kopwe apwungu pwiom? Are pwal en, pwata kopwe turunufasei pwiom? Pun kich meinisin sipwe uta lon an Kot we leenien apwung . . . Kich meinisin sipwe pwarata en me manauan ngeni Kot.”​—Rom 14:10-12.

13. Pwata ekkewe Chon Pwarata Jiowa repwe repotei ar angangen afalafal?

¹³ Iwe nge, ese pwal enlet pwe iteiten Chon Pwarata meinisin repwe wisen repotei minne ra foffori lon ar angangen afalafal? Ewer, nge a ffatoch popun an a fis ei mettoch lon eu puk mi awewei angangen Chon Pwarata, a apasa: “Noun Jises kewe chon appiru lom lom ra mochen silei repotun afeffeitaan ewe angangen afalafal.” (Mark 6:30) Atun a feffeita ewe angang, ra foffori ekkewe repot me pwal ekkoch poraus mi fokkun apochokkul ussun ekkewe chon afalafala ewe kapas allim. . . . (Foffor 2:5-11, 41, 47; 6:7; 1:15; 4:4) . . . Met ren ekkena poraus apochokkulata ekkena Chon Kraist chon angang mi tuppwol lupwen ra rongorong ekkewe repot ussun minne a fis! . . . Ussun chok ena, an Jiowa we mwicheich ikenai a achocho le eani ekkewe repot ussun pwonuetaan ewe angang me ren Mattu 24:14.”

14, 15. (a) Ifa ussun 2 Korint 1:24 a weneiti ewe Mwichen Sou Pwungupung? (b) Filien Chon Kraist epwe longolong won met, nge met repwe esinna?

¹⁴ Ewe Mwichen Sou Pwungupwung, ina eu minen alillis mi tong me eu leenien appiru ussun luku sipwe tongeni appiru. (Filipai 3:17; Ipru 13:7) Ren ar akkappiru Kraist, repwe tongeni aloni alon Paul: “Esap pwe am aupwe nemeni ami luku, nge sia chok etikemi le angang pwe oupwe pwapwa, pun oua fan uta nukuchar lon ami luku.” (2 Korint 1:24) Ren ar atittina mwokutukutun aramas, ewe Mwichen Sou Pwungupwung repwe tongeni esilei ngenikich feiochun ach sipwe alleasochisi an ewe Paipel kapasen fon, awora alillis ussun pwonuetaan allukun Paipel, eani kapasen ourour ussun ekkewe feiengau mi monomon, me awora kapasen pesepes ngeni “chienan kewe chon angang.” A ina ussun epwe pwonueta wiser kewe, alisir ar repwe akkamwochu ar pwapwa, me apochokkulereta lon ar luku pwe repwe uppwos.​—1 Korint 4:1, 2; Taitos 1:7-9.

¹⁵ Ika emon Chon Pwarata a filata minne epwe fori me ren an ewe Paipel kewe fon me ren ewe Mwichen Sou Pwungupwung, epwe popu seni an kaeo Paipel me minne a kaeo a alukuluku i pwe ina ewe alen pwung. Emon me emon Chon Pwarata epwe mwokutukut ren an Kot Kapas pwe epwe apwonueta ekkewe kapasen fon seni Paipel mi kawor seni ewe Mwichen Sou Pwungupwung, nge epwe esinna pwe filian kewe epwe kku pwisin an riri ngeni Kot, emonewe a fangelo manauan ngeni.​—1 Tesalonika 2:13.

Chon Kaeo me Sounfiu

16. Inaamwo ika fofforun emon me emon epwe pwisin filian, nge pwata ewe mwichefel epwe atowu ekkoch?

¹⁶ Nge ika fofforun emon epwe chok pwisin filian, pwata ekkoch Chon Pwarata Jiowa repwe katowu? Sap minne emon epwe meefata pwe eu fofforun tipis epwe wewe ngeni pwe emonewe epwe tou. Iwe nge, me ren ewe Paipel, ewe fofforun atou emon seni ewe mwichefel epwe fis fansoun chok emon chon ewe mwichefel epwe tipis watte nge esap aier, awewe chok, ewe sokkun fofforun tipis mi mak lon Aeuin Korint sopwun nimu. Ina minne, inaamwo ika emon Chon Kraist epwe katowu pokiten an foffori ewe tipisin lisou-mwaal, nge epwe chok fis ika emonewe esap mochen nguuri ewe alillis lon pekin ngun seni ekkewe elter. Sap ewe mwicheichin Chon Pwarata Jiowa chok ra foffori ena fofforun Chon Kraist. Ewe Encyclopedia of Religion a apasa: “Iteiten mwichen aramas meinisin ra anganga ar pwung le tumunur seni chon ewe mwicheich mi rikilo pun a tongeni efeiengaua ekkewe ekkoch. Fan chommong, lon pekin lamalam, ra kon lien anganga ena pwung pokiten ar luku pwe ar atowu ir kewe mi rikilo epwe kku ar uoch fan mesen Kot.”

17, 18. Ifa ussun sipwe awewei pwungun an eu mwichefel atowu emon?

¹⁷ Ekkewe Chon Pwarata Jiowa, ir chon kaeo ewe Paipel. (Josua 1:8; Kol Fel 1:2; Foffor 17:11) Sipwe tongeni alollofengenni ewe programin kaeo mi kawor ren ewe Mwichen Sou Pwungupwung me eu kokkotun kaeo lon sukul mi popu seni eu mwichen sou emmwen. Inaamwo ika minne ekkewe chon sukul repwe kaeo esap popu seni ena mwichen aramas, nge epwe foratiu kokkotun minne repwe kaeo, epwe filata lapalapen ewe angangen asukul, me fori ekkoch allukun. Ika emon ese mochen apwonueta minne ewe sukul epwe kutta senir, me a kan afitikokoi chienan kewe chon sukul, are aitengaua ewe sukul, epwe tongeni katowu. Mei wor pwungun meilapen ewe sukul an epwe fori minne epwe murinno ngeni meinisin chon sukul.

¹⁸ Lukun ar repwe chon kaeo Paipel, ekkewe Chon Pwarata Jiowa, ir mi pwal sounfiuen Jises Kraist, iwe, repwe “fiti ewe maun mi murinno, ewe maunen luku.” (1 Timoti 6:12; 2 Timoti 2:3) Pwungun, an emon foffori minne ese fich ngeni emon sounfiuen Chon Kraist epwe kuna ewe songen Kot. Pokiten epwe filian chok minne epwe fori, emon sounfiun Chon Kraist epwe tongeni filata minne letipan, nge epwe kuna liwinin an kewe foffor. Paul a apasa: “Esor emon epwe fiti maun, nge epwe pwal fiti angangen pwisin manauan, pwe epwe mochen apwapwai ewe chon awisa ngeni i ewe wisen sounfiu. Emon chon urumot lon kitir esap angei mwaran, are ese apwonueta ekkewe allukun urumot.” (2 Timoti 2:4, 5) Ekkewe Chon Kraist mi asimau, pachelong chon ewe Mwichen Sou Pwungupwung, ra nonnom fan nour we Sou Emmwen, Jises Kraist, iwe, ra akkalleasochisi “ekkewe alluk” pwe repwe winneni ewe feiochun manau esemuch.​—Jon 17:3; Pwarata 2:10.

19. Pokiten sia fen nengenifichi porausen an Chon Kraist fangelo manauer ngeni Kot, met sipwe tongeni wesewesen lukuluk won?

¹⁹ Ese ffatoch pwe ekkewe Chon Pwarata Jiowa, ir chon angang ngeni Kot, nge sap chon angang ngeni aramas? Pokiten ir ekkewe Chon Kraist mi fen fangelo manauer ngeni Kot me pwapwaesini ewe ngasangas mi popu seni Kraist, ra mut ngeni an Kot we ngun me an we Kapas an epwe nemeni manauer atun ra angangfengen me pwiir kewe lon ewe mwichefelin Kot. (Kol Fel 133:1) Ekkewe pisekin pwarata ussun ei mettoch epwe amoielo ekkewe tipemwaramwar ussun longolongun ar pochokkul. Sipwe tongeni fiti ewe sou kol le kol: “Jiowa i mi ai pochokkul o ai tittin maun. Letipei mi chok luku i; iei ussun ua fen kuna an alisiei, o letipei a fokkun pwapwa; iwe, upwe kilisou ngeni lon ai kol.”​—Kol Fel 28:7.

[Footnote]

Ifa Ussun Kopwe Polueni?

◻ Ifa ussun ewe Watch Tower Society me ekkewe ekkoch mwich mi fiti pwungun allukun muu ra alisi ekkewe Chon Pwarata Jiowa?

◻ Ifa ussun ekkewe Chon Kraist ra kuna alillis seni angangen ewe Mwichen Sou Pwungupwung an Chon Pwarata Jiowa?

◻ Pwata noun Jiowa kewe aramas ra repotei ar angangen afalafal?

◻ Fan met sokkun lapalap epwe fich ngeni ewe mwichefel an epwe atou emon Chon Kraist?

[Sasing lón pekin taropwe 16]

Ewe mwichen wou pwungupwung lon ewe aeuin senturi a akkamwochu ar tipeeufengen ussun minne ra luku

[Sasing lón pekin taropwe 20]

Won unusen fonufan, ekkewe Chon Pwarata Jiowa ra pwapwaesini ewe ngasangas mi popu seni fofforun Kraist