Witiwit Fan “Mwasangasang”

“Forien Kot a mwasangasangen ekieki atun ar witiwiti pwappwaaloon noun Kot kewe.”​—ROM 8:19, New World Translation.

1. Ifa ussun a chok wewe nonnomun Chon Kraist ikenai me Chon Kraist loom?

NONNOMUN Chon Kraist mi enlet ikenai a ussun nonnomun ekkewe Chon Kraist loom. Eu oesini a fen alisi noun Jiowa kewe chon angang le esinna ewe atun epwe pwaalo ewe Messaia. (Taniel 9:24-26) Ena oesini a pwal awewei pwe Jerusalem epwe taalo nge, esor poraus lon mi atufichi an ekkewe Chon Kraist silei me mwan ineet epwe fis. (Taniel 9:26b, 27) Ussun we chok, lon ewe engol me tiuen senturi, eu oesini a efisi an ekkoch chon kaeo Paipel ekieki ussun mwach kkan. Ren ar eririfengenni ekkewe “fisu ier” lon Taniel 4:25 me “ekkewe fansoun muun re Jentail,” ra ekieki me mwan ussun an Jises angei Muun we lon 1914. (Luk 21:24, King James Version; Isikiel 21:25-27) Mei wor chommong oesini lon ewe puken Taniel nge, esor eu me leiir a atufichi ekkewe chon kaeo Paipel iei ar repwe alleaani ewe fansoun an Setan we otot mi ngau epwe kataalo. (Taniel 2:31-44; 8:23-25; 11:36, 44, 45) Iwe nge, ei mettoch epwe muttir fisita, pun sia nonnom lon ewe “fansoun sopolan fanufan.”​—Taniel 12:4.a

Mammasa Atun an Kraist Nonnom

2, 3. (a) Ifa ewe pisekin annet mi lap pwe sia manau iei atun an Kraist nonnom ussun emon King? (b) Met a affata pwe Chon Kraist ra wiisen mammasa atun an Jises Kraist nonnom?

² Pwungun pwe eu oesini a efisi an Chon Kraist witiwit fan mwasangasang mwen Jises a angei Muun we lon 1914. Nge ewe “esisinen” an nonnom me sopwoloon ewe otot won fonufan Jises a awewei, a menlapei ekkewe mettoch epwe fiffis. Me lape ngeniir repwe pwaalo mwirin poputaan an nonnom, me ekkewe mettoch mi fiffis​—maun, lengita, chechchechin fonu, malapalap, lapeloon atai alluk, an aramas eriaffou Chon Kraist, me ewe angangen afalafala ewe kapas allim won unusen fonufan​—ra anneta pwe sia manau iei lon ewe fansoun an Jises nonnom lon manamanen emon king.​—Mattu 24:3-14; Luk 21:10, 11.

³ Nge, weween an Jises fon ngeni noun kewe chon kaeo mwen an feilo seniir a iei ussun: “Oupwe nennengeni, nennelo, . . . mammasa.” (Mark 13:33, 37; Luk 21:36, NW) Ach alleaanifichi ekkewe wokisin unukkun ekkeei kapasen pesepes ngeni ach sipwe mammasaochu, a affata pwe Kraist ese akkom fos ussun an emon mammasaochu ren an epwe kuna poputaan esissinnen an nonnom nge, a alluk ngeni noun kewe chon kaeo mi enlet pwe repwe mammasaochu atun an nonnom. Ifa ewe popun ekkewe Chon Kraist mi enlet repwe mammasaochu?

4. Ifa ewe alillis epwe kawor ren ewe esissin Jises a awora?

⁴ Jises a uwaawu an we oesini mi lapalap ren an epwe polueni ewe kapas eis: “Kopwe pwar ngenikem ineet epwe fis ekkeei mettoch [ekkewe mettoch repwe fiffis mwen taaloon an Chon Jus otot], o meeta esisinen om liwinsefal pwal sopolon ei fansoun?” (Mattu 24:3) Ewe esissin Jises a oesini esap chok affata ineet Jises epwe nonnom nge pwal ekkewe mettoch repwe fiffis mwen ei otot mi ngau epwe muchulo.

5. Ifa ussun Jises a affata pwe atun an nonnom lon pekin ngun, nge epwe chuen “feffeito”?

⁵ Jises a affata pwe atun an “nonnom” (Kriik, pa·rou·siʹa) epwe feito ren manaman me ling. Ussun ei “feffeito” (mi affou seni ekkoch kapas mi weneiti ewe kapas lon Kriik erʹkho·mai), a apasa: “Iwe, esisinen ewe Noun-Aramas epwe pwa lon lang, nge einangen fonufan meinisin repwele chok loliilen. O repwe kuna an ewe Noun-Aramas fefeito lon kuchuun lang ren manaman, pwal ren ling mi lapalap. . . . Iwe, oupwe kaeo seni ewe ira fik​—lupwen palan a potete o chon a puk, oupwe sinei pwe a arap ngeni ras. Iei usun pwal ami, lupwen oupwe kuna ekkeei mettoch meinisin, oupwe meefi pwe a arapato, orun chok asam. . . . Iei minne oupwe chok mamasa, pun ouse sinei ranin an noumi Samol epwe feito. . . . Iei popun ami oupwe pwal ammolata, pun ouse sinei menni fansoun ewe Noun-Aramas epwe feito.”​—Mattu 24:30, 32, 33, 42, 44.

Ifa ewe Popun Jises Epwe Feito?

6. Ifa ussun epwe fisita taaloon “Papiloon mi Lapalap”?

⁶ Inaamwo ika a fen nonnom ussun emon King seni 1914 nge, Jises Kraist epwe chuen apwungu ekkewe otot me aramas mwen chokkewe mi ngau me ren Jises repwe kuna liiwinin ar kapwung. (Alollo ngeni 2 Korint 5:10) Jiowa epwe muttir minaalong lon ekiekin ekkewe sou nemenem ewe ekiekin ataielo “Papilon mi Lapalap,” ewe nemenemen lamalam chofona won unusen fonufan. (Pwarata 17:4, 5, 16, 17) Ewe aposel Paul a titchikin apasa pwe Jises Kraist epwe ataielo ewe “Aramas mi Tipis”​—ekkewe nouwisen lamalam mi rikilo lon Kirisentom, eu kinikin mi lap lon “Papilon mi Lapalap.” Paul a makkei: “Iwe, lon ewe fansoun ewe chon fofor-ingau epwe pwapwalo, o ach Samol Jises epwe nielo i ren enienin auan, o epwe kiterei i ren an pwato o waroto.”​—2 Tesalonika 2:3, 8.

7. Lupwen ewe Noun Aramas a waroto lon lingan, epwe fis met sokkun kapwung?

⁷ Lon mwach kkan mi kanoto chok, Jises epwe apwungu chon ekkewe muu pokiten ar kewe foffor ngeni pwiin kewe mi chuen nonnom won fonufan. Sia alleaani: “Iwe, lupwen ewe Noun-Aramas epwe waroto lon lingan, eti chonlang meinisin, epwe mottiu won an leenien motun king mi ling. Iwe, epwe ionfengenni einang meinisin mwen mesan, o epwe aimufeseni ir usun chok emon chon mas a aimufeseni siip me siike; o epwe pwal aleenier siip peliefichin, siike peliemongun. . . . Ewe King epwe poluen ngenir [ekkewe siip], ‘Enlet, upwe apasa ngenikemi, minne oua fori ngeni emon lein pwii kewe mi kisifochofoch, iei oua fen fori ngeniei.’ . . . Iwe, repwe [ekkewe siike] chok feilo lon ninni esemuch; nge ekkewe chon pung lon manau esemuch.”​—Mattu 25:31-46.

8. Ifa ussun Paul a awewei lapalapen an Jises feito le apwungu aramas mi ngau?

⁸ Ussun an a pwaalo lon ewe kapas monomon ussun ekkewe siip me siike, Jises epwe apwungu meinisin ir rese luku Kot. Paul a alukuluku chienan kewe chon luku ussun ewe “asoso fansoun ewe Samol Jises epwe pwato seni lang, eti noun kewe chonlang mi manaman lon pulopulen ekkei pwe epwe liwini ngeni ir ekkewe rese sinei Kot, pwal ir ekkewe rese alleasochisi ewe kapas allim usun ach Samol Jises. Iwe, repwe kuna poutmwalilo esemuch seni fan mesen ewe Samol, pwal seni an we manaman mi ling, fansoun epwe feito lon ewe ran pwe noun kewe aramas mi fel repwe alinga i.” (2 Tesalonika 1:7-10) Ren fisitaan ekkeei mettoch mi amwarar lon mwach kkan, sisap ita anganga ach luku me mammasaochu fan mwasangasang ren an Kraist feffeito?

Witiwiti fan Mwasangasang ren Pwaaloon Kraist

9, 10. Pwata ekkewe chon kepit mi chuen nonnom won fonufan ra witiwiti fan mwasangasang pwappwaaloon Jises Kraist?

⁹ “Pwaaloon ewe Samol Jises seni lang” esap chok wewe ngeni taaloon ekkewe mi ngau nge pwal feiochun ekkewe mi pwung. Eli ekkewe lusun leiin pwiin Kraist mi kepit repwe chuen riaffou mwen pwaaloon Kraist, nge ra pwapwaiti ar apilukuluk lon lang. Ngeni ekkeei Chon Kraist mi kepit Piter a makkei: “Nge ukukun oua eti Kraist lon an kewe riaffou, oupwe chok pwapwa, pwe oupwe pwal pwapwa o chengel lupwen an we ling epwe pwapwalo.”​—1 Piter 4:13.

¹⁰ Ekkewe Chon Kraist mi kepit ra apposa letiper ngeni kamwochunnukun ar tuppwol tori Kraist a ‘ionfengennir ngeni pwisin i’ pwe ar luku mi “letelo ren sossot epwe pwaraata ngeni mwareiti me ling me iteuoch, lupwen a pwaalo Jises Kraist.” (2 Tesalonika 2:1; 1 Piter 1:7, NW) Epwe tongeni ffatelo ussun ekkeei Chon Kraist mi kepit ren ngun mi fel: “Usun chok a auta eu pwarata usun Kraist leimi pwe ousap osupwang ren och liffangen ngun fansoun oua witiwiti pwatoon ach Samol Jises.”​—1 Korint 1:6, 7.

11. Atun ar witiwiti pwaaloon Jises Kraist, menni ewe angang ekkewe Chon Kraist mi kepit ra achocho ngeni?

¹¹ Ewe lusun chon kepit ra eani ewe sokkun memmeef Paul a mak ussun: “Ua meefi pwe sisap tongeni alolofengenni ach keei riaffou lon ei fansoun me ewe ling epwe pwato mwirin.” (Rom 8:18) Ar luku esap alongolong won ar kutta ifa ussun repwe alleaani ekkewe ier. Ra osukosuk ren ar angang ngeni Jiowa, me ra awora eu leenien appiru mi murinno ngeni chiener kewe, “ekkewe ekkoch siip.” (Jon 10:16) Ekkeei aramas mi kepit mi silei pwe ewe sopwoloon a arapoto, me ra auseling ngeni an Piter kapasen pesepes: “Iei minne, oupwe rifengenni lukanapen letipemi, oupwe ononoto, oupwe fakkun apilukuluku ewe chen mi epwe feito remi lupwen Jises Kraist epwe pwato.”​—1 Piter 1:13.

“An Forien Kot Ekieki fan Mwasangasang”

12, 13. Ifa ussun chon fonufan ra nom fan “lamotongau,” me ifa ewe mettoch ekkewe ekkoch siip ra witiwiti?

¹² Mei wor minne ekkewe ekkoch siip repwe ekkekieki fan mwasangasang? Ewer. Mwirin an fos ussun ewe apilukuluk mi amwarar a nom ren ekkewe aramas Jiowa a fen muuti ren angangen ngunun we fan asengesin ar wiliiti “noun kewe” me “chon alemwir ren Kraist” lon ewe Muu lon lang, Paul a apasa: “Pun masouen lang me fonufan ra chok witiwiti pwapwalon noun Kot kewe, pun ra fakkun mochen kuner. Pun a likitalo masouen lang me fonufan meinisin pwe repwe lamotengauelo; sap ren pwisin letiper, nge ren letipen ewe emon a likitalo ir iei usun lon apilukuluk allim. Pun masouen lang me fonufan repwe fakkun ngaseseni fan nemenien limengau, o repwe eti noun Kot kewe lon ewe ngas mi ling.”​—Rom 8:14-21; 2 Timoti 2:10-12.

¹³ Pokiten an Atam tipis, mwirimwirin kewe ra nom fan “lamotengau,” fan nemenemen tipis me maalo seni ar uputiu. Rese tongeni pwisin angaseerelo seni ei nemenem. (Kol Fel 49:7; Rom 5:12, 21) A ifa me watteen an ekkewe ekkoch siip mochen le “ngaseseni fan nemenien limengau”! Nge, mwen epwe fisita, epwe pwal fisita ekkoch mettoch me ren an Jiowa fansoun me atun.

14. Met epwe kapachelong lon “pwappwaaloon noun Kot kewe,” me ifa ussun ei mettoch epwe efisi an aramas “ngaseseni fan nemenien limengau”?

¹⁴ Epwe loom fisita “pwappwaalon noun Kot kewe.” Ifa weween ena? Lon an Kot we fansoun, epwe ffatelo ngeni ekkewe ekkoch siip pwe ekkewe mi kepit ra fen “mechen” me lingelo ren ar repwe nemenem ren Kraist. (Pwarata 7:2-4) “Noun Kot kewe” mi manausefal repwe pwal ‘pwappwaalo’ lupwen repwe eti Jises le ataielo an Setan otot mi ngau. (Pwarata 2:26, 27; 19:14, 15) Iwe, atun an Kraist Nemenem ren Engerou Ier, repwe pwal ‘pwappwaalo’ lon ar angangen samol fel ussun ita ir eu minen katouwun ekkewe feioch seni an Jises moon kepich ngeni aramas. Mwiriloon ei angang ar “fakkun ngaseseni fan nemenien limengau” me mwirin repwe “eti noun Kot kewe lon ewe ngas mi ling.” (Rom 8:21; Pwarata 20:5; 22:1, 2) Ren ekkeei sokkun apilukuluk allim, sisap mairu ren an ekkewe ekkoch siip “mwasangasangen ekieki atun ar witiwiti pwappwaaloon noun Kot kewe.”​—Rom 8:19, NW.

An Jiowa Mosonottam a Wewe ngeni Ach Amanau

15. Met sisap monukaalo ussun filien Jiowa ren kulokun an epwe fis mettoch?

¹⁵ Jiowa ewe Sou Silei Kulok mi Lap. An filaata ewe fansoun epwe fisita sokkopaten mettoch epwe unusochun letelo. Eli esap nikinikin fiffis mettoch me ren pwisin ach ekiek. Iwe nge, sipwe tongeni unusen luku pwe meinisin an Kot kewe pwon repwe pwonuta. (Josua 23:14) Eli ttamen ewe fansoun Kot a mut ngeni sopwosopwoloon ekkewe mettoch mi ngau a lap seni met chommong ra fen ekieki. Nge, sipwe sotun weweiti an kewe aal me ingemwareiti an tipatchem. Paul a makkei: “Olololun pisekisekin Kot, me an we tipatchem, o pwal an we sineilap! Sise tongeni wewe ren an kewe apung, are sineifichi usun an kewe al! ‘Pun io mi sinei letipen ewe Samol, are io a fen atipatchema i?’”​—Rom 11:33, 34.

16. Io epwe tongeni feioch seni an Jiowa mosonottam?

¹⁶ Piter a makkei: “Ami mi achengicheng, are oua witiwiti ekkeei mettoch [taaloon ewe “lang” me “fonufan” loom me minne epwe siwiliir ewe “lang sefo” me “fonufan sefo” Kot a pwonetiu] oupwe achocho ngeni pwe oupwe nonnom fan kinamwe, o esap wor remi och sor are tikitikipwul. O oupwe ekieki usun mosonottamen ach Samol, pwe iei amanauen ngunumi.” Pokiten an Jiowa mosonottam, pwal fite milion mi tongeni manau seni “ranin Jiowa,” ewe ran epwe feito “ussun emon [chon] sola.” (2 Piter 3:9-15) An we mosonottam a pwal suuki ngenikich ewe tufichin ach ‘pwisin foriaata ach amanau ren niuokkus me chechchech.’ (Filipai 2:12, NW) Alon Jises sipwe ‘pwisin tumunukich’ me “mammasa” ika sia mochen ach sipwe fich me sopwoch lon ach “uta mwen mesen ewe Noun-Aramas” lon ewe fansoun an feito ren ewe kapwung.​—Luk 21:34-36; Mattu 25:31-33.

Wikkitiwit ren Likiitu

17. Menni leiin an ewe aposel Paul kewe kapas sipwe lefareni?

¹⁷ Paul a pesei pwiin kewe lon pekin ngun ar repwe “ekieki usun ekkewe mettoch aramas rese tongeni nengeni, esap ekkewe mettoch aramas mi tongeni nengeni.” (2 Korint 4:16-18) Ese mochen pwe ar ekiek ussun ewe feioch lon lang epwe toputopolo ren och mettoch. Ika kich Chon Kraist mi kepit are leiin ekkewe ekkoch siip, sipwe ekkekiekifichi ewe apilukuluk mi amwarar mi nom rech me sisap fangeta. Sipwe ‘likiitu le witiwit,’ me anneta pwe esap kich ekkewe “mi liwinsefal o poutmwalilo, pwe kich chiechien ir ekkewe mi luku o amanaua ngunur.”​—Rom 8:25; Ipru 10:39.

18. Pwata sipwe tongeni lukulukochun likiti lon poun Jiowa ekkewe fansoun me atun?

¹⁸ Sipwe tongeni lukulukochun likiti lon poun Jiowa ekkewe fansoun me atun. Pwonutaan an kewe pwon “esap mang” me ren an kokkotun fansoun. (Apakuk 2:3) Iei, a lapelo ewe lamoten an Paul kapasen pesepes ngeni Timoti: “Fan mesen Kot, o Kraist Jises, atewe mi epwe apungu ir mi manau o pwal ir mi malo, upwe fonouk, ren an waroto o pwal ren muun we: Kopwe esineifeili ewe kapas; kopwe achocho ngeni, lon fansoun mi fich o pwal lon fansoun ese fich . . . fori angangen sounpetakin ewe kapas allim, o kopwe apwonueta wisom.”​—2 Timoti 4:1-5.

19. Iei ewe fansoun noun Jiowa kewe aramas repwe fori met, me met popun?

¹⁹ Manauen aramas mi longolong won ei angang​—manauach me manauen chon oruch. Paul a makkei: “Kopwe tumunufichi pwisin en, o om kena afalafal; kopwe likiitu lon ei sokkun fofor, pun are om fofor epwe iei usun, iwe kopwe amanaua pwisin en o pwal ir ekkewe mi auselinga en.” (1 Timoti 4:16) A fokkun mwochomwoch ewe lusun fansoun fan iten ei otot mi ngau. Atun ach witiwiti fan mwasangasang ekkewe mettoch mi amwarar epwe fis lon mwach kkan, amwo sipwe chechchemeni pwe sia chuen nonnom lon an Jiowa we fansoun me atun ren an noun kewe aramas afalafala ewe kapas allim ussun ewe Muu. Jiowa epwe meefi an menemenemoch ren lapalapen an a pwonuta ei angang. “Iwe,” ussun alon Jises, “a ina sopolon.”​—Mattu 24:14.

[Footnote]

Sipwe Enniwili

◻ Ren alleaan ewe fansoun epwe fiffis sokkun mettoch, ifa ussun nonnomuch a ussun we chok me nonnomun ekkewe Chon Kraist loom?

◻ Met popun ekkewe Chon Kraist repwe “mammasa,” pwal mwo nge atun an Kraist nonnom?

◻ Met popun chon fonufan ra mwasangasangen ekieki “pwapwalon noun Kot kewe”?

◻ Pwata sipwe tongeni lukulukochun likiti lon poun Jiowa ekkewe fansoun me atun?

[Sasing lón pekin taropwe 14]

Chon Kraist repwe nennelo me ekkekieki ussun warotoon Kraist

[Sasing lón pekin taropwe 16]

Ekkewe Chon Kraist mi kepit repwe achocho lon an Jiowa we angang, nge ar luku esap longolong won och alleaan ukuukun ekkewe ier epwe lo mwen epwe fis och mettoch