En Mi Fen Angei “ngunun Ewe Enlet”?
“Ewe Sam . . . epwe fangelo ngenikemi pwal emon Chon Aururu, pwe epwe nonnom remi feilfeilo chok.”—JON 14:16, 17.
1. Ifa ewe sile mi lamot Jises a ngeni noun kkewe chon kaeo lon ewe amuchuloon fansoun a nonnom rer lon ewe ruum asan?
“SAMOL, kopwele lo ia?” Ina eu me lein ekkewe kapas eis noun Jises kewe chon kuno ra eisini lon ekkewe amuchuloon aua a nonnom rer lon eu weip lon Jerusalem. (Jon 13:36) Atun a sopwosopwolo ewe mwich, Jises a esilei ngenir pwe epwele likitirelo me feilo ren Seman we. (Jon 14:28; 16:28) Esap chuen nonnom rer lon pekin aion, esap pwal chuen asukuler me polueni ar kewe kapas eis. Iwe nge, a alukuluku ngenir ren ekkeei kapas, a era: “Ngang upwe tingor ngeni ewe Sam, o i epwe fangelo ngenikemi pwal emon Chon Aururu, pwe epwe nonnom remi feilfeilo chok.”—Jon 14:16, footnote.
2 Jises a pwarata ion ena chon alillis me awewei ifa ussun epwe alisi noun kewe chon kaeo. A erenir: “Seni le popun, use apasa ekkeei kapas ngenikemi, pun ua chok nonnom remi. Nge iei upwele feilo ngeni ewe mi tinieito . . . A och ngenikemi pwe upwele feilo. Pun are usap feilo, ewe Chon Aururu esap feito remi. Nge are ua feilo, upwe tinalo i ngenikemi . . . . Lupwen ewe Ngunun enlet epwe feito, epwe emmwenikemi ngeni lon sokkun enlet meinisin.”—Jon 16:4, 5, 7, 13.
3 Ena pwon a pwonueta lon Pentekos 33 C.E., ussun ewe aposel Piter a pwarata: “Kot a fen autasefalli atewe Jises, o am meinisin chon pwarata usun. Iei minne atewe a seikita peliefichin Kot, o a pwal angei seni ewe Sam ewe pwon ren Ngun mi Fel; iwe, a niinatiu ei sokkun ami oua kuna o rong.” (Fofor 2:32, 33) Ussun sipwe kuna mwirin, ewe ngun mi fel a ninitiu lon Pentekos a fori chommong mettoch fan iten ekkewe popun chon Kraist. Nge Jises a pwonetiu pwe “ewe ngunun enlet” epwe ‘achema ngenikemi mettoch meinisin minne ua fen apasa ngenikemi.’ (Jon 14:26) Epwe atufichir ar repwe chechemeni an Jises we angangen afalafal me an kewe afalafal, pwal mwo nge alon kkewe, pwe repwe tongeni makketiu. Epwe akkaeuin alisi ewe chinnap aposel Jon le muchuloon ewe aeuin senturi C.E. lupwen a poputa le makketiu noun we puken Kapas Allim. A kapachelong lon ena puk ewe kapasen fon mi auchea Jises a awora lupwen a poputani Achechemenien an we malo.—Jon, sopwun 13-17.
4 Jises a pwal pwonei ngeni ekkena popun chon kaeo pwe ewe ngun epwe ‘aiti ngenir mettoch meinisin’ me ‘emmwenir ngeni minne mi enlet.’ Ewe ngun epwe alisir le weweiti ekkewe porausen Paipel mi alollol me amwochu ar eani ekiek eu, wewefengennir, me tipeeufengen. (1 Korint 2:10; Efisus 4:3) Ewe ngun mi fel a atufichi ekkena popun chon Kraist ar repwe angangfengen ussun chok emon “chon angang mi tuppwol o tipatchem” pwe repwe awora ngeni emon me emon chon Kraist mi kepit “mongoon [ngun] lon fansoun mi fich.”—Mattu 24:45.
Ewe Ngun A Pwarata
5 Lon ewe pwinin Nisan 14, 33 C.E., Jises a affata ngeni noun kkewe chon kaeo pwe mwirin och fansoun, epwe etiwar ar repwe nonnom ren ir me Seman we lon lang. A erenir: “Mi chommong rum lon imwen Semei. Nge are esap iei usun, upwe apasa ngenikemi pwe upwe feilo ammolata leeniemi? Nge are ua feilo ammolata leeniemi, upwe pwal liwinto o pwisin angeikemi, pwe ikewe ua nonnom ie, ami oupwe pwal nom ie.” (Jon 13:36; 14:2, 3) Repwe eti le nemenem lon an we Muu. (Luk 22:28-30) Ren ar repwe angei ena apilukuluk allim lon lang, a lamot ar repwe “uputiu seni ewe ngun” pwe repwe noun Kot kkewe lon pekin ngun me kepit pwe repwe wisen king me samol-fel eti Kraist lon lang.—Jon 3:5-8; 2 Korint 1:21, 22; Taitos 3:5-7; 1 Piter 1:3, 4; Pwarata 20:6.
6 Ena “koko ngeni lang” a poputa lon Pentekos 33 C.E., iwe, a sopwolo lon 1930 som. (Ipru 3:1) Iteiten ekkewe mi mechen ren ngun mi fel pwe repwe choni ewe Israel lon pekin ngun mi 144,000, “mi kamoto seni me lein chon fonufan.” (Pwarata 7:4; 14:1-4) Ir ra papatais lon inisin Kraist lon pekin ngun, lon an we mwichefel, me pwal lon an we malo. (Rom 6:3; 1 Korint 12:12, 13, 27; Efisus 1:22, 23) Mwirin ar ra papatais lon konik me kepit ren ngun mi fel, ra tolong lon eu alen pennukuolo pwisin letiper, eu alen tuppwol tori ar repwe malo.—Rom 6:4, 5.
7 Ussun chon Israel lon pekin ngun, ekkena chon Kraist mi kepit ra nonnom lon ewe minefoon pwon lefilen Jiowa me ewe “Israelin Kot”. (Kalesia 6:16; Jeremaia 31:31-34) Ena pwon mi fo a pwungalo ren chchaan Kraist mi ninitiu. Jises a kapas ussun ena lupwen a poputani Achechemenien an we malo. Luk a makkei: “A angei pret, o a iotekin kilisou, o mwirin, a kinikisietiu o a ngenir, a apasa, ‘Iei inisi mi upwe fangelo fan asengesimi. Oupwe fori iei usun pwe minen achechemeniei.’ Pwal usun chok ewe kap mwirin mongoon lefaf, o a apasa, ‘Iei ewe kapas upwe niinalo fan asengesimi, iei ewe pwon mi fo ren chai.’ ” (Luk 22:19, 20) Mei pwung pwe ewe lusun chon ewe 144,000 mi chuen nonnom won fonufan, ar repwe angei ewe pret me wain, nge ir lios chok, lon ewe Achechemenien maloon Kraist.
8 Ifa ussun ekkewe mi kepit ra silei pwe ra angei ewe koko ngeni lang? Ra angei pwarataan ewe ngun mi fel. Ewe aposel Paul a mak ngeni chokewe: “Ir meinisin mi nouni chon emmwen ewe Ngunun Kot, ikei ir mi noun Kot . . . Ewe Ngun a pwisin eti ngunuch le pwarata pwe kich noun Kot. O are kich noun, iwe, sia pwal chon alemwir, chon alemwirin Kot, chienen Kraist le alemwir, are sia eti i le riaffou, pwe sipwe pwal eti i lon an ling.” (Rom 8:14-17) Pwarataan ewe ngun a fokkun manaman, iwe, ir kkewe mi ekisi chok tipemwaramwar ussun ar koko repwe tongeni weweiti pwe rese angei, iwe, repwe ukutiu seni ar akkangei ewe pret me wain lon ewe Achechem.
Ewe Ngun me ekkewe pwal Ekkoch Siip
9 Lon an ekieki ussun chochoon ekkewe chon Kraist mi aukuk lon ewe Israel lon pekin ngun, Jises a era pwe ir eu “mwich mi kisikis.” Ra tolong lon ewe “tittin siip”, ewe pwon mi fo, mi sokko seni “ekkewe pwal ekkoch siip” esor mi tongeni alleani iteiter, Jises a era pwe epwe pwal ionfengennir. (Luk 12:32; Jon 10:16) Ir me lein ekkewe ekkoch siip mi ioifengen lon ewe fansoun sopwolon repwe choni ewe “mwich mi lapalap” repwe manau mwirin “ewe riaffou mi lapalap”, iwe, repwe eani ewe apilukulukun manau esemuch won eu paratisin fonufan. Ekieki mwo, lon kunaen Jon, minne a angei le muchuloon ewe aeuin senturi C.E., a asokkofesenni ena mwich mi lapalap me ekkewe 144,000 chon ewe Israel lon pekin ngun. (Pwarata 7:4, 9, 14) Nge ekkewe pwal ekkoch siip, repwe pwal angei ewe ngun mi fel, iwe, ika ina, ifa ussun a angang lon manauer?
10 Ewe ngun mi fel a wesewesen angang lon manauen ekkewe pwal ekkoch siip. Ra liosueta ar fangelo manauer ngeni Jiowa ren ar papatais “fan iten ewe Sam me ewe Nau me ewe ngun mi fel.” (Mattu 28:19) Ra esinna pwungun an Jiowa nemenem, anomur fan nemenien Kraist pwe ar King me Chon Amanau, me mut ngeni an Kot we ngun mi fel, are manaman, an epwe emmweni manauer. Ran me ran, ra achocho le amarata “uwan ewe ngun mi fel” lon manauer, weween “tong, pwapwa, kinamwe, mosonoson, kirokiroch, lipwakoch, luku, tipefesir, forfichi.”—Kalesia 5:22, 23.
11 A lamot pwe ekkewe pwal ekkoch siip repwe mut ngeni an Kot we Kapas me an we ngun mi fel an epwe alimochu are epinalo ir. Ekkewe mi kepit ra fen pinipinilo lon eu lapalap mi sokkolo aucheaan, ra fen kuna pung me fel pun ir noun Kraist we fin apupulu. (Jon 17:17; 1 Korint 6:11; Efisus 5:23-27) Ewe soufos Taniel a era pwe ir “chon pin kana noun Ewe mi Fokkun Tekia,” mi angei ewe Muu fan nemenien ewe “noun aramas” Kraist Jises. (Taniel 7:13, 14, 18, 27) Me lom, ren Moses me Aaron, Jiowa a pwarata ngeni ewe muun Israel: “Ngang mi Jiowa, ami we Kot. Iei minne oupwe pusin apinikemi pwe oupwe pin, pun ngang ua pin.”—Lifitikos 11:44.
12 Ewe fos “epinalo” a wewe ngeni “ewe fofforun foralo pwe och mettoch epwe pin, imulo, are kefilita fan iten an angang ngeni Jiowa Kot; epwe fel, pin, are limelimoch.” Seni 1938, The Watchtower a era pwe ekkewe mi nikinikin Jonatap, are ekkewe pwal ekkoch siip, repwe “kaeo pwe a lamot ngeni emon me emon mi mochen choni ewe mwich mi lapalap me manau won fonufan ar repwe fori ar pwonen fangelo manauer me pinilo ren.” Lon kunaen Jon ussun ewe mwich mi lapalap mi mak lon ewe puken Pwarata, a era pwe “ra fen sopuni o apwechepwechalo ufer mi langattam ren chaan ewe Lam” me ra angang ngeni Jiowa “le ran me lepwin lon an we imwen fel.” (Pwarata 7:9, 14, 15) Ren alillisin ewe ngun mi fel, ekkewe pwal ekkoch siip ra achocho ukukun ar tufich pwe repwe apwonueta minne Jiowa a kukkutta senir pwe repwe pin.—2 Korint 7:1.
Foffor Murinno ngeni Pwiin Kraist kkewe
13 Jises a itelapei ewe ririoch lefilen ekkewe pwal ekkoch siip me ewe mwich mi kisikis lon an we kapas monomon ussun ekkewe siip me ekkewe siike, pachelong lon an we oesini ussun “sopwolon ewe ototen mettoch.” Lon ena kapas monomon, Kraist a affata pwe amanauen ekkewe ekkoch siip a riri ngeni ar kkewe foffor ngeni ekkewe mi kepit, ekkewe a eita ngenir “pwii kkewe”. A apasa: “Ewe king epwe ereni ekkewe mi nom peliefichin, ‘Ou feito, ami mi feioch me ren Semei, oupwe muuni ewe muu mi moleta remi seni le poputaan fonufan . . . . ‘Enlet, upwe apasa ngenikemi, minne oua fori ngeni emon lein pwii kewe mi kisifochofoch, iei oua fen fori ngeniei.’ ”—Mattu 24:3; 25:31-34, 40.
14 Ewe poraus “minne oua fori” a weneiti ekkewe fofforun tong mi apochokkulata pwiin Kraist kkewe mi kepit ren ngun mi fel, nge fofforun an Satan we fonufan ngenir a usun ita nge ir chon ekis, pwal mwo nge oturulong ekkoch leir lon kalapus. Ra fen osupwang ren mongo, uf mi fich, me tumunun pochokkulen inisir. (Mattu 25:35, 36, footnote) Lon ei fansoun sopwolon, seni 1914, chommong me lein ewe lusun ra ina ussun. Uruwoon Chon Pwarata Jiowa lon ei fansoun a pwarata pwe ra kuna alillisoch seni chiener kkewe mi tuppwol, ekkewe pwal ekkoch siip, atun ra mwokutukut ren ewe ngun mi fel.
15 Pwiin Kraist kkewe mi kepit won fonufan lon ei fansoun sopwolon ra akkaeuin angei alillisin ekkewe pwal ekkoch siip lon ar apwonueta wiser seni Kot ar repwe ‘afalafalfeili ei kapas allim ussun ewe muu lon unusen fonufan pwe epwe pwar ngeni muu meinisin.’ (Mattu 24:14; Jon 14:12) Atun chochoon ekkewe mi kepit won fonufan a chokisikisilo lon ekkewe ier ra lo, chochoon ekkewe pwal ekkoch siip a chommongolo tori fitu million. Fitu ngerou me leir ra afalafal full-time— ir pioneer me misineri—mi esilefeili kapasen allimen ewe Muu “tori sopwolon fonufan.” (Fofor 1:8) Ekkewe ekkoch ra fori ewe angangen afalafal ukukun ar tufich me ra pwal pwapwa le alisata ei angang mi lamot chapur ren ar awora monien alillis.
16 A ifa me watten kilisoun pwiin Kraist kewe mi kepit ren alillisin chiener kewe pwal ekkoch siip! Ar kkewe memmeef a pwapwalo lon ewe puk itan Worldwide Security Under the “Prince of Peace,” mi kawor ren ewe chon angang mi tuppwol me tipatchem lon 1986. A apasa: “Seni ewe Oruuen Maunen Fonufan, pwonuetaan an Jises we oesini ussun ‘sopwolon ei ototen mettoch’ lap ngeni a fisita ren tinikkenin chon ewe ‘mwich mi lapalap’ ir ekkewe ‘pwal ekkoch siip’ mi manau lon ei fansoun. . . . Ie, kilisou chapur ngeni chon ewe ‘mwich mi lapalap’ seni muu meinisin me kapas meinisin fan iten ar angang weires le apwonueta an Jises we oesini lon Mattu 24:14!”
‘Resap Unusochulo are Sisap Eti Ir’
17 Ewe aposel Paul, emon me lein ekkewe mi kepit, a kapas ussun ekkewe mwan me fefin mi tuppwol mi manau mwen Kraist, ren an makkei: “Inaamwo ika ekkewe aramas ra iteuochulo ren ar luku, nge rese mo angei feiochun ar kkewe pwon, pun Kot a fen ammolata ngenikich [ekkewe mi kepit] och mettoch mi murinno seni, pwe resap unusochulo are sisap eti ir.” (Ipru 11:35, 39, 40) Lon ekkewe Engerou Ier, Kraist me ekkewe 144,000 pwiin kewe mi kepit lon lang, repwe wisen king me samol-fel me aworato feiochun an Kraist we moon kepich won fonufan. Ekkewe pwal ekkoch siip repwe “unusochulo” lon inisir me ekiekir.—Pwarata 22:1, 2.
18 Ekkena poraus meinisin repwe affata ngeni ekiekin ekkewe pwal ekkoch siip ewe popun ekkewe wokisin lon ewe Tesin Krik a fokkun itelapei porausen Kraist me pwiin kewe mi kepit me wiser kkewe mi auchea lon pwonuetaan an Jiowa kkewe kokkot. Ekkewe pwal ekkoch siip repwe meefi pwe ina eu wis mi auchea ar repwe alisata ewe chon angang mi kepit atun ra witiwiti “pwapwaloon noun Kot kewe” lon Armaketon me pwal lon ekkewe Engerou Ier. Repwe nennelo ngeni ewe fansoun ar repwe “ngaseseni fan nemenien limengau, o repwe eti noun Kot kewe lon ewe ngas mi ling.”—Rom 8:19-21.
Eu Chok lon ewe Ngun lon ewe Achechem
19 Lon an we saingoon iotek lon pwinin Nisan 14, 33 C.E., Jises a apasa: “Ua tingor . . . pwe ir meinisin repwe eu chok, usun en, Semei, lon ngang, o pwal ngang lon en, pwe repwe eu chok lon kich, pwe ewe fonufan epwe luku pwe en ka akunoueito.” (Jon 17:20, 21) Seni an tong, Kot a tinato Noun we pwe epwe fangelo manauan pwe epwe amanaua ekkewe mi kepit me pwal chon fonufan mi alleasochis. (1 Jon 2:2) “Ngunun ewe enlet” a fen atipeeufengenni pwiin Kraist kkewe me chiener kkewe, ekkewe pwal ekkoch siip. Lon pwinin March 28, mwirin tuputiuen ewe akkar, ir me ruu mwich repwe mwichefengen fan iten ar repwe chechemeni an Kraist we malo me mettoch meinisin minne Jiowa a fen fori fan asengesir ren asoren noun we mi achengicheng, Kraist Jises. Amwo ar nonnom lon ena fansoun mi fokkun auchea epwe apochokkulata ar tipeeufengen me asefosefalli ar tipeppos le foffori letipen Kot, iwe, epwe ina ussun repwe pwarata ar pwapwaesini ar nonnom lein ir kkewe Jiowa a tongei.
Ren Ach Sipwe Eniwili
• Inet “ngunun ewe enlet” a titilo ngeni ekkewe Chon Kraist lom lom, iwe, ifa ussun ina eu “minen alillis”?
• Ifa ussun ekkewe mi kepit repwe silei pwe ra fen angei ewe apilukulukun manau lon lang?
• Ifa ussun an Kot we ngun a alisi ekkewe ekkoch siip?
• Ifa ussun ekkewe pwal ekkoch siip ra foffor murinno ngeni pwin Kraist kkewe, iwe, pwata “resap unusochulo lukun seni” ekkewe mi kepit?
2. Ifa ewe mettoch Jises a pwon ngeni noun kkewe chon kaeo epwe tinalo ngenir mwirin an feilo seniir?
3. (a) Inet “ngunun ewe enlet” a titilo ngeni ekkewe Chon Kraist lom lom? (b) Ifa ussun ewe ngun, ina eu “minen alillis” fan iter?
4. Ifa ussun “ngunun ewe enlet” a alisi ekkewe Chon Kraist mi kepit lom lom?
5. (a) Ifa ewe apilukuluk mi fo Jises a pwarata ngeni noun kkewe chon kaeo lon ewe pwinin Nisan 14, 33 C.E.? (b) Ifa ussun ewe ngun mi fel a angang fan iten pwonuetaan an Jises we pwon?
6. (a) Inet a poputa ewe koko ngeni lang, me fitemon ra angei? (b) Ir kkewe mi angei ei apilukuluk ra papataiselo lon met?
7. Pwata a chok fich ngeni ekkewe Chon Kraist mi kepit ar repwe mongo me unumi ekkewe minen achechem lon fansoun ewe Achechem?
8. Ifa ussun ekkewe mi kepit repwe silei pwe ra fen angei ewe apilukulukun manau lon lang?
9. Ikkefa ekkewe ruu mwichen aramas ekkewe puken Kapas Allim me ewe puken Pwarata ra kapas ussun?
10. Ifa ussun ekkewe pwal ekkoch siip ra papatais “fan iten ewe Sam, ewe Nau me ewe ngun mi fel”?
11, 12. (a) Ifa ussun ekkewe mi kepit ra pinilo? (b) Ifa ussun ekkewe pwal ekkoch siip ra pinilo me limochucho?
13, 14. (a) Me ren an Jises kapas monomon ussun ekkewe siip me sike, manauen ekkewe siip a alongolong won met? (b) Lon ei fansoun le sopwolon, ifa ussun ekkewe pwal ekkoch siip ra peppeni pwin Kraist kkewe?
15, 16. (a) Ekkewe pwal ekkoch siip ra alisi pwiin Kraist kkewe won fonufan le foffori menni angang? (b) Ifa ussun ekkewe mi kepit ra pwarata ar kilisou ngeni ekkewe pwal ekkoch siip?
17. Ifa ussun ekkewe chon tuppwol lom lom, ir kkewe repwe kuna manausefal won fonufan, “resap unusochulo lukun seni” ekkewe mi kepit?
18. (a) Met ekkewe pisekin pwarata seni Paipel repwe alisi ekkewe pwal ekkoch siip ar repwe weweiti? (b) Ifa ewe apilukuluk ekkewe pwal ekkoch siip ra witiwiti “pwarataan noun Kot kkewe” ren?
19. Met “ngunun ewe enlet” a fori fan iten ekkewe mi kepit me chiener kkewe, iwe, ifa ussun repwe akkaeuin tipeeufengen lon pwinin March 28?
[Picture on page 27]
“Ngunun ewe enlet” a ninatiu won ekkewe chon kaeo lon Pentekos 33 C.E.
[Pictures on page 29]
Ekkewe pwal ekkoch siip ra foffor murinno ngeni pwin Kraist kkewe ren ar peppeniir le apwonueta ewe wis seni Kot pwe repwe afalafal