Om Angang Epwe Pochokkul Ngeni Ewe Ekkei?

“Emon me emon epwe tumunufichi lapalapen an auta won [ewe longolong].”​—1 KORINT 3:10.

1. Ifa ewe apilukulukun Chon Kraist mi tuppwol ussun nour kewe chon kaeo?

EU pupulu Chon Kraist ra nennengeni nour upufo. Emon chon afalafala ewe Muu a kuna mwasangasangen me pwapwaan mesen emon chon kaeo. Emon elter Chon Kraist mi asukula eu mwichefel a kuna emon minefo mi fokkun achocho le kukkutta ekkewe wokisin lon noun we Paipel. Letipen ekkeei chon angangen Jiowa mi tuppwol ra uren apilukuluk. Ra ekieki, ‘Emonna epwe tongei me fel ngeni Jiowa​—me tuppwol ngeni?’ Pwungun pwe, uwaan ena mettoch esap chok pukun fisita. A lamot ach sipwe angang ngeni.

2. Ifa ussun Paul a achema ngeni ekkewe Chon Kraist Chon Ipru ussun lamoten ewe angangen asukula aramas, me ifa ewe atittin ei mettoch epwe amwokutukich le fori?

² Paul, emon sense mi lipwakoch a menlapei lamoten ewe angangen asukula me foralo chon kaeo lupwen a makkei: “Pun inaamo ika a fen tori fansoun ami oupwe chon afalafal.” (Ipru 5:12) Ekkewe Chon Kraist a mak ngeni rese kon feffeita, inaamwo ra fen wiliiti chon luku ren fansoun langattam. Rese silei ifa ussun repwe asukula ekkoch, me a pwal lamot an emon epwe achema ngeniir minne ra fen piin kaeo ussun ewe enlet. Ikenai, epwe och ika sipwe atittina lapalapach ussun sense me pi ifa ussun sipwe tongeni aochuolo ach angang. Manauen aramas a longolong won ei angang. Met sipwe tongeni fori?

3. (a) Ewe aposel Paul a alollofengenni ewe angangen foralo chon kaeo ngeni met? (b) Lon ach angang mi ussun angangen kau imw, ifa ewe wiis mi auchea a nom rech?

³ Lon eu kapas awewe, Paul a alollofengenni ewe angangen fori chon kaeo ngeni ewe angangen kau imw. A poputa ren an apasa: “Am chon angangen Kot mi akangangfengen; ami an Kot leenien atake, o pwal imwen Kot.” (1 Korint 3:9) Ina popun ussun sia fiti eu angangen kau imw nge a weneiti aramas; sia alisata ar repwe wiliiti noun Jises chon kaeo. Sia akkangangfengen ren ewe Emon mi “auta mettoch meinisin.” (Ipru 3:4) A ifa me watteen wiisach! Sipwe pi epwe ifa ussun an Paul kapasen emmwen ngeni ekkewe Chon Korint epwe alisata ach lipwakochulo lon ach angang. Sipwe menlapei “lapalapen ach asukula aramas.”​—2 Timoti 4:2, New World Translation.

Isetiu ewe Longolong Mi Och

4. (a) Ifa wiisen Paul lon an Chon Kraist angang? (b) Pwata sipwe tongeni apasa pwe Jises me ekkewe mwichen aramas mi auseling ngeni ra silei ewe lamoten ekkewe longolong mi pochokkul?

⁴ Ika eu imw epwe lukuchar me nommottam, a lamot ngeni eu longolong mi pochokkul. Ina popun, Paul a makkeei: “Usun ewe wis Kot a fen awisa ngeniei, usun emon soukau im mi sineilap, ua isetiu eu longolong.” (1 Korint 3:10) Jises Kraist a nounou ena esin kapas awewe ussun eu imw ese tongeni ta ren eu taifun pokiten ewe chon aueta ewe imw a filata eu longolong mi pochokkul. (Luk 6:47-49) Jises a fen silei mettoch meinisin ussun ewe lamoten ekkewe longolong. A fen nonnom lupwen Jiowa a forata longolongun ewe fonufan.a (An Salomon Fos 8:29-31) Ekkewe Chon Jus mi auseling ngeni Jises ra pwal weweiti aucheaan ekkewe longolong mi pochokkul. Ekkewe chok imw mei wor longolong mi pochokkul resap tongeni ta lupwen a fis ekkewe noter mi weiweita me ekkewe chechchechin fonu a fis fan ekkoch lon Palestine. Iwe nge, met sokkun longolong Paul a ekieki?

5. Io longolongun ewe mwichefelin Chon Kraist, me ifa ussun ei mettoch a oesini me mwan?

⁵ Paul a makkeei: “Esor emon epwe tongeni isetiu eu longolong mi sokkoseni ewe ua fen isetiu, iei i Jises Kraist.” (1 Korint 3:11) Esap chok iei ewe aewin fansoun Jises a fen alollo ngeni eu longolong. Ren enletin, Aisea 28:16 a oesini: “Iei mine Kot ewe Samol mi Lapalap a apasa, ‘Nengeni, ua anomu lon Sion efou foun longolong mi nukuchar o pos.’” Jiowa a fen akkota seni loom pwe Noun we epwe wiliiti ewe longolongun ewe mwichefelin Chon Kraist.​—Kol Fel 118:22; Efisus 2:19-22; 1 Piter 2:4-6.

6. Ifa ussun Paul a isetiu ewe longolong mi fich ren ekkewe Chon Kraist lon Korint?

⁶ Ifa ewe longolong fan iten emon me emon Chon Kraist? Ussun Paul a apasa, ese pwal wor eu longolong fan iten emon Chon Kraist mi enlet mi sokko seni ewe a fen isetiu lon Kapasen Kot​—Jises Kraist. Paul a fen isetiu ena esin longolong. Lon Korint, ia aramas ra ingeiti ekiekin aramas ie, ese ekiekin ainga aramas ren tipatchemen fonufan. Nge, Paul a afalafala “Kraist mi eitiueta,” eu afalafal ekkewe muu ra eita ngeni mi “umwes.” (1 Korint 1:23, NW) Paul a asukula aramas pwe Jises ewe emon mi lamot seni meinisin lon an Jiowa kokkot.​—2 Korint 1:20; Kolose 2:2, 3.

7. Met sipwe tongeni kaeo seni an Paul awewe ngeni pwisin i “usun emon soukau im mi sineilap”?

⁷ Paul a apasa pwe a asukula aramas “usun emon soukau im mi sineilap.” Ese pwarata lamalam tekia ren an kapas. A chok pwarata an kilisou ngeni ewe liffang mi amwarar Jiowa a fen ngeni​—ina ewe wiisen akkota are emmweni och angang. (1 Korint 12:28) Pwungun pwe, ikenai ese nom rech ewe tufichin fori manaman a fen nom ren ekkewe Chon Kraist loom. Me eli sise ekieki pwe kich sense mi angoch. Nge, ren eu lapalap mi auchea, kich sense mi angangoch. Chechchemeni: Jiowa a ngenikich an ngun mi fel pwe epwe alisikich. (Alollo ngeni Luk 12:11, 12.) Me sia tongei Jiowa me a nom rech ewe sile ussun aitian kewe lon an we Kapas. Ekkeei mettoch ir wesewesen liffang mi amwarar sipwe tongeni aea le asukula ekkoch. Sipwe appossa letipach le aea ekkeei mettoch pwe sipwe isetiu ewe longolong mi murinno.

8. Ifa ussun sipwe isetiu Kraist ussun eu longolong lon nouch kewe chon kaeo?

⁸ Lupwen sia isetiu Kraist ussun eu longolong, sia pwaraalo pwe i esap emon monukol lon eu leenien man, are ussun emon mi lollo ngeni Jiowa lon eu Trinitas. Aapw, ena esin luku esap aitien ewe Paipel a isetiu eu longolong fan iten Chon Kraist chofona. Nge, sia asukula aramas pwe i ewe mwan mi lapalap seni meinisin mi fen manau, pwe a fangelo manauan we mi unusoch fan itach, me a fen nemenem iei ussun emon King lon lang Jiowa a fen seikata. (Rom 5:8; Pwarata 11:15) Sia pwal mochen amwokutu nouch kewe chon kaeo pwe repwe tapwelo lon ipwen Jises me appiru lapalapan kewe. (1 Piter 2:21) Sia mochen pwe repwe lefareni achochoon Jises fan iten ewe angangen afalafal, an tong fan iten ekkewe aramas mi kisikis me riaffou, an umoumoch ngeni chon tipis mi chouchou seni ar fofformwaal, an pwora lupwen a kuna sossot. Pwungun pwe, Jises eu longolong mi lingemwarar. Nge met epwe fis mwirin?

Kauta Ren Ekkewe Pisek Mi Och

9. Inaamwo ika Paul emon chon foratiu longolong, nge met meefian ngeni ekkewe ra etiwa ewe enlet a fen aiti ngeniir?

⁹ Paul a makkeei: “Are emon epwe auta won ewe longolong gold, are silfer, are fau auchea, are ira, are aset, are fetil, angangen emon me emon epwe pwari usun, o ekkei epwe pwal pwarata. Pun ewe ekkei epwe sotuni lapalapen angangen emon me emon.” (1 Korint 3:12, 13) Met weween alon Paul we? Ekieki ussun an Paul angang. An angang we akkom, emon chon foratiu longolong. Lupwen a saifetal ussun emon misineri, a sai ngeni telinimw me telinimw, me afalafal ngeni aramas resaamwo rongorong ussun Kraist. (Rom 15:20) Lupwen aramas ra etiwa ewe enlet a aitiir, a poputa ekkewe mwichefel. Paul a fokkun tongei ekkeei aramas mi tuppwol. (2 Korint 11:28, 29) Iwe, pokiten an angang, epwe lamot ngeni an epwe sopweilo an sai. Iwe, mwirin an foratiu eu longolong lon Korint ukuukun 18 maram, a feilo pwe epwe pwal afalafal lon ekkoch telinimw. Nge, a chuen fokkun mochen silei ifa ussun ekkoch ra sopweilo ewe angang a fen poputani ikkena ie.​—Fofor 18:8-11; 1 Korint 3:6.

10, 11. (a) Ifa ussun Paul a alollofengenni ekkewe sokkopaten pisekin kau imw? (b) Met sokkun imw mi nonnom Korint loom? (c) Met sokkun imw esap muttir kkar, me met sokkun ewe lesen a kawor ngeni ekkewe Chon Kraist mi foralo chon kaeo?

¹⁰ A ussun ita pwe ekkewe ekkoch mi sopweilo le angang won ewe longolong Paul a fen isetiu lon Korint rese angangoch. Pwe epwe pwaralo ewe osukosuk, Paul a assokkafesenni ruu sokkun pisekin kau imw: gold, silifer, me fau mi auchea ngeni ira, aset, me fetin. Eu imw epwe tongeni kau seni ekkewe pisek mi och, pochokkul, karemmang; are epwe tongeni muttir kau seni pisek mi muttir ta, apwangapwang, me karekkai. Ese mwaal eu telinimw mi lap ussun Korint a uren imw mi for seni ekkena ru sokkun pisek. Mei wor imwen fel mi amwarar mi for seni ekkewe fau mi foummong me liwinimmong, eli gold me silifer a pacheta won pwe epwe lingoch.b Neman ekkeei leeni mi pochokkul ra utatiu won ekkewe kukkun imw, imwepwul, me leenien amomo mi for seni ira me fetil mi pwas a nom unukkur.

¹¹ Met epwe fis ngeni ekkeei leeni ika repwe kkar? Poluan a ffat lon ranin Paul we ussun chok iei. Ren enletin, ewe Chon Rom itan General Mummius a akkufu ewe telinimwen Korint lon 146 B.C.E. Chommong leeni mi for seni ira, aset, are fetil ra unusen tatakisilo. Nge ifa ussun ekkewe leeni mi for seni fau, me silifer me gold ra pacheta won? Ese mwaal, ekkeei leeni rese kkar. Eli noun Paul kewe chon kaeo ra kukkuna ekkeei leeni iteiten ran​—leeni mi for seni fau mi amwarar, nge ra pochokkul ngeni ekkewe feiengau a fen ataielo ekkewe rese kon pochokkul. Iwe, a ifa me ffatochun minne Paul a itelapei! Lupwen sipwe asukula aramas, a lamot ach sipwe ekieki pwe kich chon kau imw. Sia mochen aea ekkewe pisek mi murinno me pochokkul seni meinisin. Ina ussun ach angang epwe tongeni nomofoch. Ikkefa ekkewe pisek mi pochokkul, me pwata epwe lamot ach sipwe aea ekkeei pisek?

Om Angang Epwe Pochokkul Ngeni ewe Ekkei?

12. Ifa ussun ekkoch Chon Kraist lon Korint ra angangau lon ar angang?

¹² A ffat pwe Paul a meefi pwe ekkoch Chon Kraist lon Korint ra angangau. Met a mwaal? Ussun ewe poraus a affata, ewe mwichefel a uren tipefesen, aramas ra peni ekkoch inaamwo epwe atailo kinamween ewe mwichefel. Ekkoch ra apasa, “Ngang noun Paul,” nge ekkoch ra apasa, “Ngang noun Apollos.” Ekkoch ra kon ekiek tekia ussun ar tipatchem. Ina minne esap eu minen amairu pwe a uwani eu mwichefel mi eani ekiekin fituk, ese asimau lon pekin ngun, me uren “lolowo me anini.” (1 Korint 1:12; 3:1-4, 18) Ese mwaal pwe ekkeei mettoch a pwal etipetipa ewe asukul a fis lon ewe mwichefel me lon ewe angangen afalafal. Iwe a efisata ar angangau lon ar angangen foralo chon kaeo, ussun chok eu imw mi for seni pisek mi apwangapwang. Esap pochokkul ngeni ewe “ekkei.” Menni ewe ekkei Paul a fos ussun?

13. Ewe ekkei lon an Paul kapas awewe a weneiti met, me met ekkewe Chon Kraist meinisin repwe ita ekieki ussun?

¹³ Mei wor eu ekkei kich meinisin sipwe kuna lon manauach​—sossotun ach luku. (Jon 15:20; Jemes 1:2, 3) A lamot ngeni ekkewe Chon Kraist lon Korint ar repwe silei, ussun a lamot ngenikich ikenai ach sipwe pwal silei, pwe meinisin sipwe asukula ewe enlet repwe kuna sossot. Ika sipwe angangau le asukula aramas, epwe alolilen ewe uwa. Paul a ouroura: “Are angangen emon a auta won ewe longolong epwe nonnom chok, iwe, atewe epwe angei liwinin. Are angangen emon epwe karelo, atewe epwe feingau, nge pwisin i epwe manau, ewer, epwe kar, nge esap chok karelo.”c​—1 Korint 3:14, 15.

14. (a) Ifa ussun ekkewe chon Kraist mi foralo chon kaeo repwe “feiengau,” nge ifa ussun repwe tongeni kuna ar amanau, a ussun ita ren ekkei? (b) Ifa ussun sipwe tongeni ekisikisalo ewe tufichin kuna feiengau?

¹⁴ Ena kapas a efisi ach ekiek! Epwe tongeni eu minen alolilen ngenikich ika sipwe angang weires le alisi emon pwe epwe wiliiti emon chon luku, nge mwirin sipwe kuna an tupu ngeni sossot are riaffou mwaal me lo, lo, lo, rikilo seni ewe alen enlet. Paul a tipeeu ngeni lupwen a apasa pwe sipwe feiengau lupwen a fis ena mettoch. Epwe tongeni fokkun aweiresikich ina popun a fen awewe won ach amanau ussun chok sia fen “kar”​—ussun emon mwan a poutulo meinisin lon eu ekkei me pwisin i a arapakan malo lon. Nge fan itach, epwe ifa ussun sipwe tongeni ekisikisalo ewe feiengau? Aea pisek mi pochokkul! Ika sipwe asukula nouch kewe chon kaeo pwe sipwe liapeni letiper me efisi ar aucheani ekkewe lapalapen Chon Kraist ussun tipatchem, mirit, niuokkusun Jiowa, me luku mi enlet, iwe, weween pwe sia aea pisek mi pochokkul me karemmang. (Kol Fel 19:9, 10; An Salomon Fos 3:13-15; 1 Piter 1:6, 7) Ekkewe ra lapalapeni ekkeei sokkun lapalap repwe sopweilo le fori letipen Kot; epwe nom rer ewe apilukulukoch pwe repwe manau feilfeilo. (1 Jon 2:17) Nge, epwe ifa ussun sipwe tongeni apwonueta alon an Paul kapas awewe? Ekieki ussun ekkeei awewe.

15. Ifa ussun sipwe tongeni tumunu pwe sisap angangau lupwen sia asukula nouch kewe chon kaeo?

¹⁵ Lupwen sipwe asukula nouch kewe chon kaeo, sisap ita afeffeitai aramas lap seni Jiowa. Sise mochen aiti ngeniir pwe tipatchem epwe akkom feito senikich. Sia mochen pwe repwe kutta emmwen seni Jiowa, an we Kapas, me an we mwicheich. Pwe repwe fori ina ussun, sise mochen chok apasawu meefiach lupwen sia polueni ar kapas eis. Nge, sipwe aiti ngeniir ifa ussun repwe kuna poluan ekkewe kapas eis ren ar nounou ewe Paipel me ekkewe puk ewe “chon angang mi tuppwol me tipatchem” a fen awora. (Mattu 24:45-47) Ren och popun mi wewe chok, sipwe tumunu seni ewe ekiek pwe ir nouch kewe chon kaeo. Sisap mangaueiti ekkewe ra mochen chiechi ngeniir, nge sipwe pesei nouch kewe chon kaeo pwe repwe “suukulo” lon ar tong, kapong me chiechi ngeni meinisin lon ewe mwichefel.​—2 Korint 6:12, 13.

16. Ifa ussun ekkewe elter repwe aea pisek mi karemmang lon ar angang?

¹⁶ Ekkewe elter Chon Kraist ra pwal fori angang mi auchea lon ei angangen foralo chon kaeo. Lupwen ra asukula ewe mwichefel, ra mochen aea pisek mi karemmang. Lipwakochun ar asukula aramas, kunaer, me lapalaper ra sokkofesen, nge rese ekiekin aea ekkeei mettoch pwe repwe lukeato an aramas tapwelo mwirir. (Alollo ngeni Fofor 20:29, 30.) Ese ffat ewe popun ekkoch lon Korint ra apasa, “Ngang noun Paul” are “Ngang noun Apollos.” Nge sia fokkun silei pwe ekkeei ruuemon elter mi tuppwol rese afeffeitai ena esin ekiek mi atipefeseni aramas. Ena sokkun ekiek ese apwapwai Paul; a unusen u ngeni. (1 Korint 3:5-7) Ussun we chok ikenai, ekkewe elter repwe chechchemeni pwe repwe mammasa “noun Kot kewe siip.” (1 Piter 5:2) Esap wiisen chok emon mwan. Ina popun ekkewe elter repwe uppos le u ngeni an mwan nemeni ewe mwichen siip are ewe mwichen elter. Ika ekkewe elter ra fori wiiser pokiten ra mochen angang ngeni ewe mwichefel, achungu letiper, me alisi ekkewe siip le fel ngeni Jiowa ren unusen letiper, iwe, ra aea pisek mi karemmang.

17. Ifa ussun ekkewe sam me in repwe tongeni aea pisek mi karemmang lupwen ra apwonueta wiiser?

¹⁷ Ekkewe sam me in Chon Kraist ra pwal lolileniesini ei mettoch. A ifa me watteen ar apilukulukun kuna an nour kewe manau feilfeilo! Ina popun ra achocho le “aiti” ngeniir ekkewe emmwen lon an Kot we Kapas me ffotukeerelong lon letiper. (Tuteronomi 6:6, 7) Ra mochen pwe nour kewe repwe silei ewe enlet, esap chok ussun eu tettelin alluk are chommong poraus mi enlet, nge ussun eu alen manau mi apwapwa me menemenoch. (1 Timoti 1:11) Pwe nour repwe wiliiti noun Jises chon kaeo mi tuppwol, ekkewe sam me in mi tong repwe achocho le aea pisek mi karemmang. Repwe mosonottam le angangfengen me nour kewe, alisiir le poutalo ekkewe lapalap Jiowa a oput me amaaraata ekkewe lapalap a tongei.​—Kalesia 5:22, 23.

Epwe Wiisen Io?

18. Lupwen emon chon kaeo a u ngeni asukul mi murinno, met popun esap wewe ngeni tipisin ekkewe chon asukula me emmweni i?

¹⁸ Ei poraus a efisata eu kapas eis mi lamot. Ika emon sia fen alisi a su seni ewe alen enlet, weween pwe kich mi angangau lon ewe wiis sense​—meni sia aea pisek mi apwangapwang? Esap fansoun meinisin. An Paul kewe kapas a achema ngenikich pwe ewe angangen foralo chon kaeo ina eu wiis mi fokkun lamot. Sia mochen fori ukuukun ach tufich le angangoch. Nge ewe Kapasen Kot ese erenikich ach sipwe unusen wiiseni ewe wiis me mwirin meefi letipechou lupwen ekkewe sia alisi ra su seni ewe alen enlet. Mei pwal wor och mettoch mi kapachelong lon chinon chok pwisin ach angang. Awewe chok, nengeni met Paul a apasa ussun pwal mwo nge ewe sense mi angangau: “Atewe epwe feiengau, nge pwisin i epwe manau.” (1 Korint 3:15) Ika ei sense epwe manau​—nge ekkewe lapalapen Chon Kraist a sotun amaaraata lon noun we chon kaeo ra liosueta ussun pisek mi “karelo” lon eu sossotun ekkei—met sipwe apwungalo? Pwungun pwe, Jiowa epwe apwungu ewe chon kaeo ren filian, ika epwe aleni ewe aal mi tuppwol are aapw.

19. Met sipwe kaeo lon ewe poraus mwirin ei?

¹⁹ An emon pwisin wiiseni wiisan, ina eu mettoch mi watte lamotan. A kku emon me emon leich. Ifa aitien ewe Paipel mi titchik ussun ei mettoch? Ewe poraus mwirin ei epwe aiti ngenikich.

[Footnote]

Ifa Ussun Kopwe Polueni?

◻ Ifa ewe “longolong” lon emon Chon Kraist mi enlet, me ifa ussun a isetiu?

◻ Met sipwe tongeni kaeo seni ekkewe sokkopaten pisekin kau imw?

◻ Ewe “ekkei” a weneiti met, me ifa ussun ekkoch repwe “feiengau” seni?

◻ Ifa ussun ekkewe senseen Paipel, ekkewe elter, me ekkewe sam me in repwe tongeni aea pisek mi karemmang lupwen ra apwonueta ar angang?

[Sasing lón pekin taropwe 22]

Lon chommong telinimw loom, ekkewe leeni mi for seni fau mi karemmang ra nomfengen ren ekkewe imw mi apwangapwang