Oupwe Pwisin Foriata Manauemi!

“Achengicheng rei, . . . oupwe pwisin foriata manauemi ren niuokus me chechech.”​—FILIPI 2:12.

1, 2. Met sokkun ekiek mi choufetal a efisi an aramas meefi pwe rese tongeni nemeni met epwe fis ngeni manauer?

“KA fen ina ussun seni uputiuom?” Kanoto chok, ena kapas eis a mak lukunpoon eu chassi chommong ra alleani. Fan ena itelap a mak ekkeei poraus: “Lapalap, meefi, pwal mwo nge minne emon a filata lon manauan. Minefoon atittin a pwaralo pwe aramas ra alemwiri ekkeei mettoch.” Ena sokkun poraus epwe tongeni ammeef ngeni ekkoch pwe epwe kisikis chok ar tongeni nemeni pwisin manauer.

² Ekkoch ra niuokkus pokiten angangauen semer me iner le tumunur are angangauen nour kewe sense, manauer epwe unusen sopwongau. Eli repwe meefi pwe repwe chok appiru mwaallin semer kewe me iner, mwokutukut me ren mochenin letiper, tipis ngeni Jiowa, weween pwe, filingau won mettoch meinisin. Ina aitien ewe Paipel? Pwungun pwe ekkoch chon ekkewe lamalam repwe apasa pwe mei wor aitien ewe Paipel mi iei ussun, ewe luku itan predestination. Me ren ei luku, Kot a fen akkota kokkotun manauom meinisin.

3. Ifa ewe poraus mi apochokkul seni ewe Paipel ussun ach tufichin nemeni met epwe fis ngenikich lon mwach kkan?

³ Ekkena luku meinisin eu chok porauser: Esor filiom, a kisikis chok om tufichin nemeni met epwe fis lon manauom. Ena poraus a aletipengauakich, ika met, me letipengau a alapalo ewe osukosuk. An Salomon Fos 24:10 a apasa: “Are ka apilukingau lon fansoun riafou, om pochokkul a kisikis.” Iwe nge, sia pwapwa le kaeo pwe me ren ewe Paipel, sipwe tongeni ‘pwisin foriata manauach.’ (Filipai 2:12) Ifa ussun sipwe tongeni apochokkulata ach lukuluk won ei asukul mi murinno seni Paipel?

Ach Pwisin Aukicheta

4. Inaamwo ika 1 Korint 3:10-15 a fos ussun ach aea pisek mi karemmang, ei mettoch esap wewe ngeni met?

⁴ Ekieki mwo ussun an ewe aposel Paul kapas awewe a mak lon 1 Korint 3:10-15. Me ikena ie, a apasa pwe angangen Chon Kraist a ussun ewe angangen kau imw, nge an kapas awewe a tongeni weneiti ewe angangen afalafal lon me lukun ewe mwichefel. A ita weween pwe filien emon chon kaeo le angang me tuppwol ngeni Jiowa a longolong chok won ekkewe mi asukula me alisi i? Aapw. Paul a itelapei ewe lamoten an ewe sense ochchun fori an angang ren ukuukun an tufich. Nge, ussun sia fen kaeo seni ewe poraus mwen ei, Paul ese apasa pwe esor wiisen ewe chon kaeo won ei mettoch. Pwungun pwe an we kapas awewe a menlapei ewe angang sia fori fan iten ekkoch, esap lon pwisin kich. Ei mettoch a pwalo lupwen Paul a apasa pwe ewe angang mi ngau epwe talo nge ewe chon angang epwe manau. Iwe nge, fan ekkoch lon ewe Paipel, a pwal nounou ena kapas pwe epwe weneiti ewe angang sia fori lon pwisin kich.

5. Menni Wokisin a aneta pwe Chon Kraist repwe “aufichieta”?

⁵ Awewe chok, ekieki mwo met Juta 20, 21 a apasa: “Ami mi achengicheng, oupwe pwisin aukemieta won ami luku mi fakkun fel chapur, oupwe iotek lon ewe Ngun mi Fel; oupwe iseis pwisin ami lon ewe tongen Kot.” Me ikei, Juta a nounou ewe kapasen Kriik mi wewe chok ngeni “aueta” Paul a nounou lon 1 Korint sopwun 3, nge Juta a ita menlapei ach pwisin aukicheta won longolongun ach luku. Lupwen Luk a makkeei porausen an Jises kapas awewe ussun ewe mwan a isetiu longolongun imwan we won achau, a pwal nounou ewe kapasen Kriik fan iten “longolong” Paul a nounou lon an kapas awewe ussun an Chon Kraist angangen kau imw. (Luk 6:48, 49) Pwal och, Paul a eani kapas awewe ussun ach isetiu won eu “longolong” lupwen a pese ngeni chienan kewe Chon Kraist le feffeita lon pekin ngun. Ewer, Kapasen Kot a aitingenikich pwe sipwe aukicheta.​—Efisus 3:15-19; Kolose 1:23; 2:7.

6. (a) Awewei ifa ussun esap angangen emon chok lupwen emon a wiliiti emon Chon Kraist chon kaeo. (b) Ifa wiisen emon me emon chon kaeo?

⁶ Ewe angangen foralo emon Chon Kraist wiisen emon chok? Iwe, anchangei mwo ika pwe kopwe aueta eu imw. Kopwe chuuri emon sou kau imw pwe epwe fori liosun ewe imw. Inaamwo ka ekiekin pwisin fori lape ngeni ekkewe angang meinisin, ka moni pwal emon chon taiku pwe epwe alisuk me aiti ngonuk ekkewe kokkot mi murinno seni meinisin. Ika a isetiu eu longolong mi pochokkul, awewe ngonuk liosun ewe imw, aiti ngonuk menni pisek mi murinno seni meinisin kopwe moni, me pwal mwo nge aiti ngonuk sokkopaten angangen taiku, kopwe tongeni apasa pwe a fen angangoch. Nge, met ika ka tunalo an emmwen, kamo pisek mi chok mo kukkun are apwangapwang, me pwal mwo nge tumunungaua om appiru liosun ewe imw ewe sou kau imw a fen fori? Pwungun pwe kese tongeni tipi ngeni ewe chon taiku are ewe sou kau imw ika ewe imw a ta! Pwal ussun we chok, esap angangen emon chok ewe foraloon emon me emon chon kaeo Chon Kraist. Jiowa ewe sou kau imw mi lap. A alisata ekkewe Chon Kraist mi tuppwol, ussun emon lein chon angangen “Kot mi akangangfengen,” a asukula me apochokkulata ewe chon kaeo. (1 Korint 3:9) Nge, ewe chon kaeo a pwal kapachelong lon. Le sopwoloon, i epwe pwisin atittin fan iten pwisin manauan. (Rom 14:12) Ika a mochen lapalapeni ekkewe lapalapen Chon Kraist mi murinno, epwe achocho le lapalapeniir, pwe epwe amaarata lon manauan.​—2 Piter 1:5-8.

7.  Met sokkun osukosuk epwe tori ekkoch Chon Kraist, me met epwe tongeni aururur?

⁷ Iwe, a ita wewe ngeni pwe esor lamoten minne sia alemwiri, nonnomun manauach, me lapalapen nouch kewe sense? Esap ina. Ewe Kapasen Kot a esinna pwe eu me eu lein ekkeei mettoch mi lamot me a etipetipakich. Chommong mochenin letipach mi mwaal me tipis a fen nonnom rech seni le uputiuach me epwe weires ach sipwe siwili. (Kol Fel 51:5; Rom 5:12; 7:21-23) Ewe angangen emirit seni ekkewe sam me in me lapalapen manauer lon imwer epwe tongeni etipetipa ekkewe kukkun​—ngeni minne mi och are ngeni minne mi ngau. (An Salomon Fos 22:6; Kolose 3:21) Jises a apwungu ekkewe nouwisin lamalamen Chon Jus pokiten uwangauen ar asukul a pwalo lon ekkoch aramas. (Mattu 23:13, 15) Ikenai, ekkena mettoch a pwal etipetipakich. Awewe chok, ekkoch noun Kot aramas ra osukosuk pokiten ewe riaffou a toriir lupwen ra chuen kukkun. A lamot ach sipwe pwarata umoumoch me ach meefi ar weires. Me repwe angei aurur seni porausen ewe Paipel pwe esap ururun pwe repwe appiru tipisin semer me iner ika pwe resap tuppwol. Nengeni ifa ussun ekkoch ekkewe kingen Juta loom ra pwarata pwungun ei poraus.

Ekkewe Kingen Juta—Ra Pwisin Filata Met Repwe Fori

8. Ifa ewe leenien appiru mi ngau seman Jotam a isetiu ngeni, nge met a filata le fori?

⁸ Ussia a wiiseni ewe wiis kingen Juta lupwen a chok 16 ierin me a nemenem ukuukun 52 ier. Lon arapakan unusen ena fansoun, a “fori mine a pwung me fan mesan ewe Samol mi Lapalap, usun chok Amasia saman we.” (2 King 15:3) Fan chommong Jiowa a efeiochu ren an akkufu chon koputan lon maun. Iwe nge, iei eu minen alolilen ngeni pwe an sopwoch a efisata an epwe lamalam tekia. A sikasini me u ngeni Jiowa ren an keni insens won rongen ewe imwen fel, ewe wiis mi fichiti chok ekkewe samol fel. Ussia a kuna kapwung iwe, a chok fokkun song. Mwirin a sau pokiten ewe rupun pwotur a pwukuwu me won chamwan me a nonnom touwau seni aramas lon unusen manauan meinisin. (2 Kronika 26:16-23) Met meefien noun we, itan Jotam lupwen a kuna ekkeei mettoch? Seman we epwe tongeni mecheresin etipetipa ena sarafo pwal oputa an Jiowa kapwung. Eli ekkewe aramas repwe pwal etipetipengaua i pokiten ar lamalam chofona. (2 King 15:4) Nge Jotam a pwisin filata. “A fori mine a pwung me fan mesan ewe Samol mi Lapalap.”​—2 Kronika 27:2.

9. Ikkefa ekkewe etipetip mi och ngeni Ahas, nge met a fis ngeni manauan?

⁹ Jotam a nemenem ukuukun 16 ier, me a tuppwol ngeni Jiowa lon unusen manauan. Weween pwe a isetiu eu leenien appiru mi murinno ussun emon sam mi tuppwol ngeni noun we, Ahas. Nge mei pwal wor ekkoch etipetip mi murinno ngeni Ahas. A feioch le manau atun ekkewe soufos mi tuppwol ussun choan Aisea, Osea, me Mika ra chuen fori ar angangen oesini lon ewe fonu. Nge, a filingau. “Ahas esap fori mine a pwung me fan mesan ewe Samol mi Lapalap usun Tafit an we lewo.” A fori ekkewe uluulun ewe anu Paal me a fel ngeniir me a pwal mwo nge keni ekkoch pwisin noun kewe at pwe ussun eu asor ngeni ekkewe anu. Inaamwo a wor ren etipetip mi murinno, nge a unusen angangau ngeni wiisan we wiisen king me ussun emon chon angang ngeni Jiowa.​—2 Kronika 28:1-4.

10. Met sokkun sam, Ahas, nge noun we Hesekaia a filata le fori met?

¹⁰ Lupwen sipwe ekieki ussun fel mi limelimoch, ese pwal wor emon sam mi ngau lukun Ahas. Iwe nge, noun we Hesekaia ese ita tongeni filata pwisin seman! Ese mwaal pwe ekkewe nau Ahas a nnielo fan iten an asor ngeni Paal ir pwiin Hesekaia. Nge pokiten ekkeei mettoch mi ngau a fis lon manauan, weween pwe Hesekaia epwe chok u ngeni Jiowa? Ese fis ena nge, Hesekaia a wiliiti emon lein noun Juta kewe king mi murinno​—emon mi tuppwol, tipatchem, me emon mwan mi achengicheng. “Iei mine ewe Samol mi Lapalap a eti Hiskia.” (2 King 18:3-7) Ren enletin, mei wor pisekin annet pwe Hesekaia a makkeei Kol Fel 119 le aluwonun. Ika a ina ussun, ese weires ach sipwe weweiti ewe popun a makkei: “Ua fokun kechu ren ai letipeta.” (Kol Fel 119:28) Inaamwo ika a fokkun chou an kewe osukosuk, Hesekaia a kutta emmwen seni Kapasen Jiowa pwe epwe emmweni manauan. Kol Fel 119:105 a apasa: “Om kapas eu lamp a aiti ngeniei ia upwe ipwela ie o asarama alei.” Ewer, Hesekaia a filioch.

11. (a) Inaamwo seman we a etipetipa i ngeni mettoch mi murinno, ifa ukuukun ngauan an Manasa u ngeni Jiowa? (b) Menni filian Manasa lupwen a chinnapelo, me met sipwe tongeni kaeo seni?

¹¹ Nge, seni emon kingen Juta mi murinno a touwu emon lein ekkewe mi fokkun ngau. Noun Hesekaia itan Manasa a afeffeitai fel ngeni uluulun, angangen roong, me fofforun akkachofesa mi lap ese mwo fis tori ena atun. Ewe Paipel a apasa pwe “ewe Samol mi Lapalap a kapas ngeni Manasa me noun aramas,” neman ren ekkewe soufos. (2 Kronika 33:10) Me ren eorenien Chon Jus, Manasa a polueni ewe poraus ren an ngereifesenni Aisea. (Alollo ngeni Ipru 11:37.) Ika mei pwung ena poraus are ese pwung, nge Manasa ese auseling ngeni ekkewe kapasen ourour seni Kot. Ren enletin, a eani asor lon ekkei noun kewe lupwen ra chuen manau ussun minen asor, ussun chok Ahas, seman we chinnap a fori. Nge, lupwen a chinnapelo, ei mwan mi ngau a aiersefal me a siwili lapalapan lupwen a kuna watte riaffou. (2 Kronika 33:1-6, 11-20) Porausan a aitingenikich pwe sap minne emon mi filingau fan ekkoch esap tongeni siwili lapalapan. A tongeni siwili.

12. Met sokkun kefil mi mwaalfesen Amon me noun we Josaia ra fori ussun ar angang ngeni Jiowa?

¹² Noun Manasa iten Amon epwe ita kaeo chommong mettoch seni an seman we aiersefal. Nge a filingau fan chommong. Amon a chok “alapalo an tipis” tori emon a nnielo i. Noun we Josaia ese apppiru seman we. Josaia a filata an esap tapwelo mwirin seman we chinnap. A wiliiti king lupwen a chok wanu ierin. Lupwen a tori 16 ierin, a poputa an kukkutta Jiowa me a wiliiti emon king mi murinno me tuppwol. (2 Kronika 33:20–​34:5) A filioch.

13. (a) Met sipwe tongeni kaeo seni fofforun ekkewe kingen Juta sia fen poraus won? (b) Ifa lamoten emirit seni ekkewe sam me in?

¹³ Ei atittin mi mwochomwoch ussun fumon kingen Juta a aiti ngenikich eu lesen mi amwarar. Fan ekkoch fansoun, ekkewe king mi ngau ra nounatiu at mi murinno nge, ekkewe king mi murinno ra nounatiu at mi fokkun ngau. (Alollo ngeni An Salomon Afalafal 2:18-21.) Ei mettoch ese ekisikisalo ewe lamoten an ekkewe sam me in angangen emirit. Ekkewe sam me in mi emiriti nour kewe me ren an Jiowa kokkot a wesewesen awora ngeni nour kewe ewe tufichin wiliiti chon angangen Jiowa mi tuppwol. (Tuteronomi 6:6, 7) Nge, ekkoch semirit ra chuen filingau, inaamwo semer me iner mi tuppwol ra achocho ukuukun ar tufich ar repwe emmweniochur. Ekkoch semirit ra filata ar repwe tongei me fel ngeni Jiowa inaamwo semer me iner rese apwonueta wiiser ngeniir. Ren an feioch, ra sopwoch lon manauer. Fan ekkoch, ka anchangei met kopwe pwisin filata? Iwe, ekieki mwo ussun ekkoch kapasen alukuluk seni Jiowa mi anneta pwe kopwe tongeni filioch!

Jiowa a Lukuluk Wom!

14. Ifa ussun sipwe tongeni silei pwe Jiowa a weweiti ach kewe apwangapwang?

¹⁴ Jiowa a kuna mettoch meinisin. An Salomon Fos 15:3 a apasa: “Ewe Samol mi Lapalap a kuna mine a fis ekis meinisin, a ouwasacha ekewe chon foforingau me chon pwung.” King Tafit a apasa ussun Jiowa: “En ka fen kunaei, lupwen esamwo wor uluuli. Iteiten ranin manauei meinisin, ka awora fan itei, ra fen mak lon noum puk mwen ar resamwo fis.” (Kol Fel 139:16) Ina popun Jiowa a silei ekkewe mettoch ese och a nom reom, ekkewe ka fiffiu ngeni​—ese lifilifil ika ka alemwiri are lapalapeni seni ekkewe minen etipetip kese tongeni nemeni. A unusen weweiti ifa ussun ekkeei mettoch ra fen kku manauom. A weweiti om kewe apwangapwang lap seni om pwisin weweitiir. Me a umoumoch. Ese kutta senikich lap seni met sipwe tongeni fori.​—Kol Fel 103:13, 14.

15. (a) Ifa ewe eu chok minen aurur ngeni ekkewe ra kinas pokiten fofforun ekkoch? (b) Jiowa a awiisa ngenikich menni wiis?

¹⁵ Nge, Jiowa ese eani ekiek pwe sia unusen nonnom fan nemenemen ekkewe mettoch a fen fis lon manauach me sise chuen tongeni pwisin filata met sipwe fori. Ika mettoch mi ngau a fen eriaffou kich lon manauach loom, ach silei pwe Jiowa a oput ena esin fofforun akinasa aramas epwe aururu letipach. (Kol Fel 11:5; Rom 12:19) Nge, esap apwungukich ika sipwe filata pwe sipwe foforingau? Aapwi. An We Kapas a apasa: “Pun kich emon me emon sipwe fakkun pwisin en me uwei osan.” (Kalesia 6:5) Jiowa a awisa ngeni forian kewe mi tipatchem wiiser le fori minne mi pwung me angang ngeni. A ussun chok minne Moses a ereni ewe muun Israel: “Iwe, ua kokkori lang me fanufan pwe repwe chon pwarata usumi ikenai, pwe ua anomu mwemi manau me mala, feioch me anumamau. Iei mine oupwe filata manau, pwe ami me mwirimwirimi kana oupwe manau.” (Tuteronomi 30:19) Iwe, Jiowa a pwal lukuluk pwe sipwe pwal filioch. Ifa ussun sipwe silei ena mettoch?

16. Ifa ussun sipwe sopwoch le ‘pwisin foriata manauch’?

¹⁶ Nengeni minne ewe aposel Paul a makkeei: “Iei minne, ami kena mi achengicheng rei, . . . oupwe pwisin foriata manauemi ren niuokus me chechech; pun Kot i ewe a angang lon ami, pwe ami oupwe pwal mochen o fori minne epwe pwapwa ren.” (Filipai 2:12, 13) Ewe kapasen Kriik ‘foriata’ ikei ie a wewe ngeni awesalo och mettoch. Ina minne, ese fen filita pwe emon leich epwe sopwongau are epwe chok fangeta. Sap minne Jiowa Kot epwe fen makkei ena wokisin ika ese lukuluk pwe sipwe tongeni awesalo ewe angang a fen ngenikich​—ewe angang mi emmwen ngeni ach amanau. Nge epwe ifa ussun sipwe tongeni sopwoch? Esap ren pwisin chok ach pochokkul. Ika a fen naf ewe pochokkul a nom rech, iwe, ese fen lamot ach sipwe “niuokus me chechech.” Nge, Jiowa a ‘angang lon kich,’ an we ngun mi fel a amwokutu ekiekich me letipach, me a alisikich le “fori minne epwe pwapwa ren.” Ren ena alillis mi fiti tong, mei wor och popun sisap ita filioch me apwonueta met sia filata le fori? Aapwi!​—Luk 11:13.

17. Met sokkun siwil sipwe tongeni fori lon manauach, me ifa ussun Jiowa epwe alisikich le fori?

¹⁷ Epwe nom rech chommong eppet sipwe sotun awesi. Awewe chok, lapalapach kewe mi ngau sia fen eoreni me ekkewe minen etipetip mi efeiengau mi tongeni aingaualo ach ekiek. Nge, ren alillisin ngunun Jiowa, sipwe tongeni awesi ekkeei mettoch! Ussun minne Paul a makketiu ngeni ekkewe Chon Kraist lon Korint, ewe Kapasen Kot mi pochokkul epwe tongeni atailo “ekkewe leeni mi pochokkul.” (2 Korint 10:4) Ren enletin, Jiowa epwe tongeni alisikich le unusen siwili lapalapach. An we Kapas a peseikich le “pwilitau lapalapach me lom” me ach sipwe “pwilitalong lapalapach mi fo, ewe mi forieta usun lapalapen Kot lon ewe pung mi enlet pwal ewe tuppwel mi enlet.” (Efisus 4:22-24) Ita ngunun Jiowa epwe tongeni alisikich le fori ekkeei mettoch? Epwe tongeni! Ngunun Kot a uwani uwa lon kich​—ekkewe lapalap mi auchea me murinno kich meinisin sia mochen amaarata. Ewe aewin me lein ekkeei mettoch, tong.​—Kalesia 5:22, 23.

18. Menni kefil emon me emon mi tipatchem epwe tongeni fori, me ei mettoch epwe alisata ach tinikken le fori met?

¹⁸ Iei eu kapas mi enlet mi tongeni angasakichelo. An Jiowa pwarata tong ese aukuk me kich mi ffor lon lapalapan. (Keneses 1:26; 1 Jon 4:8) Ina popun, sipwe tongeni filata le tongei Jiowa. Me ena tong, ina ewe ki ngeni manauach lon mwach kkan​—esap lapalapen manauach me mwen sia wiliiti emon Chon Kraist, esap ekkewe apwangapwang sia eoreni, me esap mochenin letipach mi ngau sia alemwiri. Tongen Jiowa Kot, ina ewe mettoch a lamot ngeni Atam me If ika repwe tuppwol lon Ichen. Ina ewe sokkun tong a lamot ngeni emon me emon leich ika sipwe manau lon Armaketon me likiitu fan ewe sossot le muchuloon an Kraist Nemenemen Engerou Ier. (Pwarata 7:14; 20:5, 7-10) Emon me emon leich epwe tongeni amaaraata ena esin tong, ese lifilifil nonnomun manauach. (Mattu 22:37; 1 Korint 13:13) Sipwe tinikken le tongei Jiowa me apochokkula ena tong tori feilfeilo.

Ifa Om Ekiek?

◻ Ifa ewe ekiek a choufetal mi u ngeni aitien ewe Paipel mi murinno ussun wiisen emon me emon?

◻ Ifa ewe angang emon me emon Chon Kraist epwe apwonueta?

◻ Ifa ussun fofforun ekkewe kingen Juta a pwarata pwe emon me emon a pwisin filata met epwe fori lon manauan?

◻ Ifa ussun Jiowa a alukulukukich pwe sipwe tongeni filioch lon manauach, inaamwo ekkewe minen etipetip mi ngau a pwellifeilikich?

[Sasing lón pekin taropwe 28]

Manauom lon mwach kkan a longolong won minne ka alemwiri?

[Sasing lón pekin taropwe 30]

Inaamwo seman we a isetiu eu leenien appiru mi ngau ngeni, King Josaia a filata an epwe angang ngeni Kot