An Jiowa Feioch Won “Fonuach”

“Iei usun epwe wor manau ia ewe chanpupu a pula ie.”​—ISIKIEL 47:9.

1, 2. (a) Ifa ukuukun lamoten konik? (b) Ewe konik lon an Isikiel we langepwi a liosueta met?

KONIK och nono mi amwarar. Manauen monumanau meinisin a longolong won. Esor emon leich epwe tongeni manauattam ika esor konik. A pwal lamot ngenikich fan iten alimelim, pun konik a tongeni atelalo me limetawu limengau. Ina popun sia atutu inisich, sopuni ufach, pwal mwo nge limeti anach ren konik. Ach fori ei mettoch epwe tongeni tumunu manauach.

² Ewe kapas konik lon ewe Paipel a liosueta an Jiowa kokkot lon pekin ngun fan iten manau. (Jeremaia 2:13; Jon 4:7-15) A kapachelong lon ekkeei minen amanau alimelimen noun kewe aramas me ren an Kraist asorun moon kepich me ewe sile ussun Kot mi mak lon an we Kapas. (Efisus 5:25-27) Lon an Isikiel langepwi ussun ewe imwen fel, ewe chanpupu mi manaman mi pupuwu seni ewe imwen fel a liosueta ekkena esin feioch mi amanaua aramas. Nge ineet a pupuwu ena chanpupu, me ifa weween ngenikich ikenai?

Eu Chanpupu a Pupuwu lon ewe Fonu mi Forsefal

3. Ifa kunaen Isikiel, ussun a mak lon Isikiel 47:2-12?

³ Pokiten ir mi eolo lon Papilon, aramasen Isikiel a fokkun osupwangen an Jiowa alillis. Ina popun, a mmen apwapwa lupwen Isikiel a kuna ekis konik a puwu seni ewe leeni mi pin me a pupuwu seni ewe imwen fel lon ewe langepwi! Ewe chonlang a auku ewe kukkun chanpupu iteiten 1,000 cubit. Alollolun a lapelo tori asan epinipinin pechen emon ngeni pwosukun emon ngeni lukulapen emon tori a kon alollol pwe emon epwe aea lon. Ewe chanpupu a efisata manau me uwaoch. (Isikiel 47:2-11) A affat ngeni Isikiel: “Lepekin ewe chanpupu me ruepek epwe marita chomong sokun iran mongo.” (Isikiel 47:12a) Lupwen ewe chanpupu a tolong lon ewe Setin Malo, manau a muttir poputa lon! Ekkewe iik ra chommongolo. Eu angangen atau a sopwoch.

4, 5. Ifa ussun an Sowel oesini ussun eu chanpupu mi wewefengen me an Isikiel, me pwata mi lamot ena mettoch?

⁴ Eli ei oesini mi ling a achema ngeni ekkewe Chon Jus mi eolo pwal eu oesini mi mak lap seni ruupuku ier me mwan: “Eu puachen koluk epwe puwu seni imwen ewe Samol mi Lapalap, pwe epwe achochonu ewe lemolun Akasia.”a (Sowel 3:18) An Sowel oesini, ussun an Isikiel, a oesini pwe eu chanpupu epwe puwu seni imwen Kot, ewe imwen fel, me amanaua ewe leeni mi pwas.

⁵ Ren fite ier Ewe Leenien Mas a fen awewei pwe an Sowel oesini a pwoppwonueta lon ach fansoun.b Ina minne, epwe pwal ina ussun ren an Isikiel langepwi mi arapakan wewe chok. An Jiowa feioch a tori ewe fonuen noun Kot aramas ikenai mi forsefal, ussun chok lon Israel loom.

Feioch Mi Chommong

6. Asupuun chcha won ewe roong lon ewe langepwi epwe ita achema ngeni ekkewe Chon Jus ussun met?

⁶ Ekkewe feioch won noun Kot kewe aramas mi forsefal ra feito me ia? Iwe, nengeni mwo pwe ewe konik a puwu seni an Kot we imwen fel. A pwal ina ussun ikenai, ekkewe feioch a feito seni Jiowa ren ewe imwen fel mi lap lon pekin ngun​—an Kot we kokkot fan iten fel mi limelimoch. An Isikiel we langepwi a apachalong eu mettoch mi lamot. Lon ewe leeni mwen ewe imwen fel, eu kukkun chanpupu a puwu pelioorun ewe roong. (Isikiel 47:1) Ewe roong a nonnom lukanapen ewe imwen fel lon ewe langepwi. Jiowa a titchik le awewe won ngeni Isikiel me a alluku ngeni pwe epwe asupu ngeni chchaan eu monun asor won. (Isikiel 43:13-18, 20) Ena roong mei wor weween mi lap ngeni ekkewe Chon Israel meinisin. Ar pwon ngeni Jiowa a pochokkuleta loom loom lupwen Moses a asupu chcha won ewe roong fansonun ewe Chuuk Sainai. (Ekistos 24:4-8) Asupu chcha won ewe roong lon ewe langepwi epwe ita achema ngeniir pwe lupwen ra liwiniti fonuer mi forsefal, an Jiowa kewe feioch epwe toriir ika ra apwonueta ar pwon ngeni.​—Tuteronomi 28:1-14.

7. Ifa weween ewe roong ngeni Chon Kraist ikenai?

⁷ Pwal ussun we chok, noun Kot kewe aramas ra feioch seni eu pwon​—eu pwon mi murinno seni ewe minen loom, ewe pwon sefo. (Jeremaia 31:31-34) Ei pwon a pwal pochokkuleta ren chcha loom loom, chchaan Jises Kraist. (Ipru 9:15-20) Ikenai, ese lifilifil ika kich emon lein ekkewe mi kepit, mi kapachelong lon ena pwon, are emon lein “ekkewe ekkoch siip,” mi feioch seni, ena roong lon kapas awewe mei wor weween mi lapalap ngenikich. A wewe ngeni letipen Kot mi riri ngeni asorun Kraist. (Jon 10:16; Ipru 10:10) Ussun chok ewe roong lon kapas awewe a nom lukalapen ewe imwen fel lon pekin ngun, an Kraist asorun moon kepich a pwal lamot seni meinisin lon fel mi limelimoch. Ina ewe longolong fan iten omusomusen ach kewe tipis, iwe, fan iten ach apilukuluk meinisin lon mwach kkan. (1 Jon 2:2) Ina popun, sia achocho le manaueni manauach me ren ekkewe alluk mi pachelong ren ewe pwon sefo, “allukun Kraist.” (Kalesia 6:2) Ika sia fori ena mettoch, sipwe feioch seni an Jiowa kokkotun amanaua aramas.

8. (a) Met ese nom lon ewe leeni mwen ewe imwen fel lon ewe langepwi? (b) Epwe ifa ussun ekkewe samol fel lon imwenfelin ewe langepwi repwe tongeni tolu pour me pecher?

⁸ Eu feioch ina ach uoch mwen Jiowa. Lon ewe imwen fel lon ewe langepwi, mei wor och mettoch ese nom lon ewe leeni mwen ewe imwen fel nge mi nonnom lon ewe leeni mwen ewe imwen fel mangaku me lon an Solomon imwen fel​—eu sepi mi watte, mwirin ra iteni eu saat, fan iten ekkewe samol fel pwe repwe tolu pour me pecher lon. (Ekistos 30:18-21; 2 Kronika 4:2-6) Met sokkun minen alimelim ekkewe samol fel lon an Isikiel langepwi ussun ewe imwen fel, repwe tongeni aea? Iwe repwe aea ena kukkun chanpupu mi puwu lon ewe leeni mwen ewe imwen fel! Ewer, Jiowa epwe atufichi ar repwe limoch me pin mwen mesan.

9. Ifa ussun ekkewe mi kepit me chon ewe mwich mi lapalap repwe tongeni uoch?

⁹ Ussun we chok ikenai, ekkewe mi kepit ra fen feioch ren ar uoch mwen mesen Jiowa. Me ren Jiowa, ir mi pin, me a apasa pwe ir mi pwung. (Rom 5:1, 2) Nge ifa ussun ewe “mwich mi lapalap,” mi liosueta ren ekkewe einang rese kapachelong lukun ewe mwichen samol fel? Ra fel lon kiannin ewe imwen fel me kukkulong, me ewe kukkun chanpupu a pwal puwu ngeni ena kinikinin ewe imwen fel lon ewe langepwi. Ina minne, mi fich ngeni minne ewe aposel Jon a kuna, ewe mwich mi lapalap mi ufouf ufer mi pwechepwech lupwen ra fel lon ewe leeni mwen ewe imwen fel lon pekin ngun! (Pwarata 7:9-14) Ese lifilifil met sokkun riaffou a toriir seni ei fonufan mi limengau, ika ra lukuluk won an Kraist we asorun moon kepich, Jiowa epwe eiten ngeniir limoch me pin. Nge ifa ussun repwe anganga ar luku? Ren ar tapwelo lon ipwen Jises, me unusen luku won ewe asorun moon kepich.​—1 Piter 2:21.

10, 11. Ifa eu mettoch mi auchea ussun ewe konik, me ifa ussun a weneiti lapeloon ewe chanpupu?

¹⁰ Ussun a fen affat, mei wor pwal eu mettoch mi lamot lon ei konik lon kapas awewe​—sile. Lon Israel mi forsefal, Jiowa a efeiochu noun kewe aramas ren emmwen seni Paipel me ren ewe mwichen samol fel. (Isikiel 44:23) Ussun we chok, Jiowa a efeiochu noun kewe aramas ikenai ren emmwen mi chommong seni an we Kapas mi enlet, me ren ewe “mwichen samol-fel mi tekia.” (1 Piter 2:9) Sile ussun Jiowa Kot, ussun an kewe kokkot fan iten aramas, me lap seni meinisin, ussun Jises Kraist me ewe Muun Messaia a fen lapelo lon ei ranin sopwoloon. A ifa me amwararen lapeloon ewe asoso lon pekin ngun a totorikich!​—Taniel 12:4.

¹¹ Ussun ewe chanpupu ewe chonlang a auku a alolloletiu ekis me ekis, pupuwuun ekkewe feiochun amanau seni Jiowa a pwal lapelo me ren chommongeloon ekkewe aramas mi tolong lon fonuach mi feioch lon pekin ngun. Pwal eu oesini ussun forsefal a apasa: “Ewe mi tekison leimi epwe wiliti eu cho, nge ewe mi kis epwe wiliti eu mwu mi pochokkul. Ngang ewe Samol mi Lapalap, upwe muttir apwonueta ai pwon lon fansoun ua filata.” (Aisea 60:22) Ekkeei kapas a fen pwonuta​—fite milion ra fen fitikich lon ach fel mi limelimoch! Jiowa a fen awora chommong “konik” ngeni meinisin mi kutta i. (Pwarata 22:17) A tumunu pwe an we mwicheich won fonufan a ainetifetallei ekkewe Paipel me puk mi awewei ewe Paipel won unusen fonufan, lon fitepuku fos. Pwal ussun chok, ekkewe mwichen Chon Kraist me mwichelap ra fen kokkotoch won unusen fonufan pwe epwe tori meinisin ewe konikin enlet mi fatafatoch. Met meefien aramas ussun ekkeei alillis?

Ewe Konik a Wato Manau!

12. (a) Pwata ekkewe ira lon an Isikiel langepwi repwe tongeni uwaoch? (b) Ekkewe ira mi uwaoch ra wewe ngeni met lon ekkeei ranin sopwoloon?

¹² Ewe chanpupu lon an Isikiel langepwi a wato manau me pochokkulen inis. Lupwen Isikiel a silei ussun ekkewe ira epwe maar lepekin ewe chanpupu me ruu epek, a affata ngeni: “Chor resap pwaselo, uar resap itela. . . . Iwe, aramas repwe mongo uar, repwe pwal pochokkul seni ar samau ren chor.” Pwata ekkeei ira ra uwaoch iei ussun? “Pun ewe koluk ra manau ren a puwu seni ewe leni mi pin.” (Isikiel 47:12b) Ekkeei ira a liosueta kaworen Kot meinisin fan iten an aramas unusochsefal won longolongun an Jises we asorun moon kepich. Won fonufan lon ei atun, ewe lusun mi kepit a emmweni ewe angangen awora mongo me minen apochokkul lon pekin ngun. Lupwen ekkewe 144,000 meinisin ra fen angei liwinir lon lang, ekkewe feioch mi feito seni ar angangen samol fel lupwen repwe nemenem ren Kraist epwe likiitu tori mwach kkan, iwe epwe unusen arosalo ewe malo sia alemwiri seni Atam.​—Pwarata 5:9, 10; 21:2-4.

13. Met sokkun apochokkul a fen fis lon ach ei fansoun?

¹³ Ewe chanpupu lon ewe langepwi a puwu ngeni ewe Setin Malo esor manau lon me a apochokkulata meinisin a tori. Ei saat a liosueta eu leeni mi unusen malo lon pekin ngun. Nge epwe wor manau “ia ewe chanpupu a pula ie.” (Isikiel 47:9) Pwal ussun chok, lon ranin sopwoloon, aramas ra fen manausefallita lon pekin ngun ese lifilifil ia ewe konikin manau a pulo ie. Ekkewe lusun mi kepit ra akkom pochokkulelo lon 1919. Ra manausefallita seni ar malo lon pekin ngun. (Isikiel 37:1-14; Pwarata 11:3, 7-12) Ena konik mi auchea a fen tori ekkewe ekkoch mi malo lon pekin ngun, me ra fen manausefal me ra fen wiliiti eu mwich mi lapalap, ekkewe ekkoch siip mi tongei me angang ngeni Jiowa. Ekiselo chok, ei alillis epwe tori ekkewe chommong repwe manausefal.

14. Ewe angangen atau mi sopwoch a fis orosetin ewe Setin Malo a wewe ngeni met ikenai?

¹⁴ Pochokkul lon pekin ngun a uwani angangoch. Ei mettoch a ffatelo ren ewe angangen atau mi sopwoch orosetin ewe saat mi malo me mwan. Jises a ereni noun kewe chon kaeo: “Upwe fori ami chon attauato aramas.” (Mattu 4:19) Lon ewe ranin sopwoloon, ewe angangen atau a poputa ren ionfengennin ekkewe lusun mi kepit, nge esap ina chok. Ewe konikin manau seni an Jiowa imwen fel lon pekin ngun, pachelong ewe feiochun sile mi enlet, a kku aramas seni fonu meinisin. Ese lifilifil ia ewe konik a puwu ie, a uwani manau lon pekin ngun.

15. Met a pwarata pwe esap meinisin repwe etiwa kaworen Kot fan iten manau, me met epwe fis ngeniir lon mwach kkan?

¹⁵ Pwungun pwe, esap aramas meinisin iei are meinisin lein ekkewe mi manausefal fan an Kraist Engerou Ierin Nemenem repwe etiwa ewe porausen manau. (Aisea 65:20; Pwarata 21:8) Ewe chonlang a apasa pwe ekkoch kinikinin ewe saat resaamwo pochokkulelo. Esor manau lon ekkeei warawar mi pwokak, pwe ‘salt chok epwe nom lon.’ (Isikiel 47:11) Esap aramas meinisin lon ach fansoun repwe etiwa an Jiowa konikin amanau. (Aisea 6:10) Lon Armaketon, meinisin mi filata pwe repwe lapalapeni lapalapen aramas mi malo me semmwen lon pekin ngun epwe wor soon lor, weween pwe repwe mafochofoch. (Pwarata 19:11-21) Iwe nge, chokewe mi fen tuppwol le unumi ei konik repwe tongeni eani apilukulukun manau me kuna pwonuetaan ei oesini.

Ewe Chanpupu a Puwu lon Paratis

16. Ineet me ifa ussun an Isikiel langepwi ussun ewe imwen fel epwe unusen pwonuta?

¹⁶ Ussun ekkewe ekkoch oesini ussun forsefal, an Isikiel langepwi ussun ewe imwen fel epwe unusen pwonuta lon ewe Engerou Ier. Iwe, ewe mwichen samol fel resap chuen nonnom won fonufan. “Repwe wiliti noun Kot samol-fel o pwal noun Kraist; o repwe eti i [lon lang] le nemeni ukukun engerou ier.” (Pwarata 20:6) Ekkeei samol fel lon lang repwe fiti Kraist le anganga ekkewe feioch seni an Kraist asorun moon kepich. Iwe, aramas mi pwung repwe manau, me repwe unusochulosefal!​—Jon 3:17.

17, 18. (a) Ifa ussun Pwarata 22:1, 2, a awewei ussun eu chanpupu mi wato manau, me ineet a fis pwonutaan mi lamot seni meinisin? (b) Lon Paratis, pwata epwe pupuwummong ewe chanpupuun konikin manau?

¹⁷ Iwe, lon ena fansoun ewe chanpupu Isikiel a kuna epwe puwu ren konikin manau mi fokkun pochokkul. Iei pwonutaan mi lamot seni meinisin an ewe oesini mi mak lon Pwarata 22:1, 2: “A aiti ngeniei ewe chanpupun konikin manau, mi maruaru usun chok kristal, mi pupu seni an Kot me ewe Lam leenien motun king, o a pupulo lukalapen alen ewe telinim. O le pekin ewe chanpupu me ruuepek a manau mi uwani engol-me-ruu sokkun uwa; o choon ewe ira mi lamot ren apochokkulata ekkewe mu.”

¹⁸ Lon ewe Engerou Ier, semmwen meinisin​—lon pekin aion, ekiek, me memmeef​—epwe morelo. A liosutiu ren “pochokkuleloon ekkewe mu” seni ekkewe ira. Pokiten ekkewe alillis Kraist me ekkewe 144,000 repwe awora, “esap wor eman chon ewe fanu epwe apasa pwe a samau.” (Aisea 33:24) Me ewe chanpupu epwe chuen cholapelo lon ei atun. Epwe lapelo me alollolulo pwe epwe nafoch ngeni ekkewe fite milion, eli bilion aramas repwe manausefal me unumi ewe konikin manau mi limelimoch lon. Ewe chanpupu lon ewe langepwi a apochokkula ewe Setin Malo, me a wato manau ngeni ekkewe leeni ewe konik a pulo ie. Lon Paratis, mwan me fefin repwe wesewesen manau ren ar pochokkulelo seni ewe malo ra alemwiri seni Atam, ika ra eani lukuluk won ekkewe feioch mi suuk ngeniir seni ewe moon kepich. Pwarata 20:12 a oesini pwe “ekkewe puk” repwe suuk lon ekkena ran, me repwe awora weweoch pwe ekkewe mi manausefal mi tongeni feioch ren. Mi chok alolilen pwe ekkoch resap mochen pochokkulelo, pwal mwo nge lon Paratis. ‘Salt epwe nom lon’ ekkeei chon u ngeni, weween pwe repwe mafoch.​—Pwarata 20:15.

19. (a) Ifa ussun epwe pwonuta ainetiin ewe fonu lon Paratis? (b) Ewe telinimw a liosueta met lon Paratis? (c) Ifa weween an ewe telinimw nonnom ekis towau seni ewe imwen fel?

¹⁹ Lon ena atun, ainetiin ewe fonu lon an Isikiel langepwi epwe unusen pwonuta. Isikiel a kuna pwe ainetiin ewe fonu a fisioch; iwe, ussun we chok, emon me emon Chon Kraist mi tuppwol epwe lukuluk pwe epwe wor pwisin leenian, eu alemwir, lon Paratis. Ese mwaal, an aramas tipeni pwisin imwan an epwe nonnom lon me tumunu, epwe kkotochun pwonueta. (Aisea 65:21; 1 Korint 14:33) Ewe telinimw Isikiel a kuna a liosueta an Jiowa kokkotun nemenem fan iten ewe fonufan sefo. Ewe mwichen samol fel mi kepit esap chuen nom lein aramas. Ewe langepwi a affata ena mettoch ren an anomu ewe telinimw won “fonuen aramas,” mi ekis towau seni ewe imwen fel. (Isikiel 48:15) Sap minne pwe esor epwe tupuni ewe King won fonufan lupwen ekkewe 144,000 ra nemenem ren Kraist lon lang. Noun kewe won fonufan repwe feioch watte seni ewe emmwen mi tong an ewe mwichen samol. Iwe nge, iolapen ewe muu epwe wesewesen nom lon lang, esap won fonufan. Meinisin won fonufan, pachelong ewe mwichen samol, repwe nom fan nemenien Muun Messaia.​—Taniel 2:44; 7:14, 18, 22.

20, 21. (a) Pwata iten ewe telinimw mi fich ngeni? (b) Weweochun an Isikiel we langepwi epwe efisi ach pwisin eisinikich menni kapas eis?

²⁰ Nengeni ekkewe saingoon kapas lon an Isikiel oesini: “Seni ei otun ewe telinimw epwe iteni: Ewe Samol mi Lapalap a nom ikenan.” (Isikiel 48:35) Nonnomun ei telinimw esap fan iten kaworen manaman me pochokkul ngeni aramas; esap pwal fan iten epwe pwonuetaan letipen aramas. Ina an Jiowa telinimw mi pwarata an kewe ekiek me lapalapan mi tong me murinno. (Jemes 3:17) Ei mettoch a alukuluku letipach pwe Jiowa epwe efeiochu an we kokkot fan iten ewe mwichen aramas lon ewe “fonufan sefo” tori feilfeilo.​—2 Piter 3:13.

²¹ Sise pwapwa ren ach apilukuluk ren mwach kkan? Iwe, epwe och pwe emon me emon leich epwe eis: ‘Met meefiei ussun ekkewe feioch mi amwarar a pwalo lon an Isikiel oesini? Ua tuppwol lon ai alisata angangen ekkewe overseer mi tong, pachelong ekkewe lusun mi kepit me ekkewe repwe choni ewe mwichen samol? Ua fen akkomwa fel mi limelimoch lon manauei? Ua alamota ewe konikin manau mi pupuwummong ikenai?’ Amwo emon me emon leich epwe sopweilo le fori ena mettoch me pwapwaesini an Jiowa kewe alillis tori feilfeilo!

[Footnote]

Ifa Ussun Kopwe Polueni?

◻ Ekkewe konik mi pupuwu seni ewe imwen fel a liosueta met?

◻ Met sokkun apochokkul Jiowa a fen fori me ren ewe chanpupu lon kapas awewe, me met popun a lapelo pupuwummongen ewe chanpupu?

◻ Ekkewe ira lepekin ewe chanpupu me ruu epek ra liosueta met?

◻ Ewe telinimw epwe liosueta met lon ewe Engerou Ierin Nemenem, me met popun iten ewe telinimw mi fich ngeni?

[Ekkewe sasing lón pekin taropwe 21]

Ewe chanpupuun manau a liosueta kaworen Kot fan iten amanau