“Ekkeei Mettoch Epwe Fakkun Fisita”

“Jises a poluenir: ‘. . . Ekkeei mettoch epwe fakkun fisita, nge esap tori mo ewe sopolon.’”​—MATEUS 24:4-6.

1. Ifa ewe poraus sipwe ita ekieki ussun?

ESE mwaal kopwe mochen silei ussun met epwe fis lon manauom lon mwach kkan. Iwe, kopwe ita mochen silei ussun eu poraus C. T. Russel a pwal mochen silei ussun lon ewe ier 1877. Russel, ewe a popueta ewe Watch Tower Society, a makkei The Object and Manner of Our Lord’s Return. Mei wor 64 pekin taropwe lon ei puk me a awewe won an Jises liwinsefal are an feffeito lon mwach kkan. (Jon 14:3) Fan eu, lupwen ra nom won ewe Chukun Olif, ekkewe aposel ra eis ussun an liwinsefal: “Ineet ekkeei mettoch repwe fis me epwe ifa esissinnen om nonnom [are “feffeito,” King James Version] me sopwoloon ei otot?”​—Mattu 24:3.

2. Met popun a tepetep ekkewe awewe mi tipefesen ussun minne Jises a oesini?

² En mi silei me weweiti minne Jises a polueni? Mi mak lon ulungat lein ekkewe puken kapas allim. Sense D. A. Carson a apasa: “Chokkis lein ekkewe sopwun lon Paipel ra fen efisi tipefesen lein ekkewe chon awewei Paipel ussun Mattu 24 me ekkewe sopwun mi wewefengen lon Mark 13 me Luk 21.” Mwirin a awewei pwisin an ekiek​—pwal eu poraus me lein an aramas kewe ekiek mi tipefesen. Lon ekkewe ipuku ier a lo, chommong lein ekkeei poraus ra pwarata nafangauen luku. Ekkewe mi pwarawu ekkena poraus ra fen apasa pwe minne a mak lon ekkewe puken Kapas Allim esap kapasen Jises, pwe emon a fen siwili minne Jises a apasa, are pwe ese fisita minne a oesini​—ekkewe ekiek mi pop seni sou apwungu Paipel. Emon sou awewei Paipel a pwal mwo nge awewe won an Mark Kapas Allim ‘me ren ekiekin Mahayana-Buddhist’!

3. Ifa ekiekin Chon Pwarata Jiowa ussun an Jises oesini?

³ Lukuen Chon Pwarata Jiowa a mwaalfesen me ena esin ekiek pun ra luku pwe mi enlet me lukulukoch minne a mak lon ewe Paipel, kapachelong minne Jises a ereni ekkewe fomon aposel mi nom ren won ewe Chukun Olif ulungat ran mwen an malo. Seni ranin C. T. Russell, ekis me ekis a ffatelo ekiekin noun Kot kewe aramas ussun an Jises oesini. Lon ekkoch chok ier a keran lo, Ewe Leenien Mas a fen alisata ach weweochuti ei oesini. En mi fen weweiti ena poraus me ka fen kuna ifa ussun a kku manauom?a Sipwe enniwili.

Pwonutaan Oesini Mi Letipengau Epwe Feito

4. Met popun ekkewe aposel ra mochen eisini Jises ussun mwach kkan?

⁴ Ekkewe aposel ra fen silei pwe Jises ewe Messaia. Iwe, lupwen ra rong porausen an we malo, manausefal, me an liwinto, eli repwe ekieki, ‘Ika Jises epwe malo me feilo senikich, ifa ussun epwe tongeni fisita mettoch meinisin mi amwarar ewe Messaia epwe fori?’ Pwal och, Jises a fos ussun taloon Jerusalem me ewe imwen fel. Neman ekkewe aposel ra ekieki, ‘Ineet me ifa ussun epwe tongeni fis ena?’ Ren ar mochen weweiti ekkena mettoch, ekkewe aposel ra eis: “Ineet epwe fis ekkeei mettoch, pwal meeta esisinen fansoun ekkeei mettoch meinisin epwe pwonueta?”​—Mark 13:4; Mattu 16:21, 27, 28; 23:37–​24:2.

5. Ifa ussun minne Jises a apasa a pwonuta lon ewe aewin senturi?

⁵ Jises a oesini pwe epwe wor maun, lengita, malapalap, me afalafalen ewe kapas allim ussun ewe Muu won unusen fonufan. Iwe, mwirin epwe war ewe sopwoloon. (Mattu 24:4-14; Mark 13:5-13; Luk 21:8-19) Jises a apasa ekkeei mettoch le poputaan ewe ier 33 C.E. Atun ekkewe ier tori 70 C.E., ekkewe aposel repwe tongeni esinna pwe minne Jises a oesini a wesewesen fisita. Ewer, porausen uruwo a anneta pwe ewe esissin a pwonuta lon ena fansoun, me a emmwen ngeni wesiloon an Chon Jus otot lupwen Chon Rom ra mauneer lefilen 66 me 70 C.E. A ifa ussun an a fisita?

6. Met a fisita lefilen Chon Rom me Chon Jus lon 66 C.E.?

⁶ Atun an Jutia fansoun summer mi pwichikkar lon 66 C.E., ekkewe sounfiu Chon Jus iter Zealot ra maunei an Chon Rom leenien sounfiu unukkun ewe imwen fel, me ena foffor a fen efisi sokkun fofforun mwanesol won unusen ewe fonu. Lon History of the Jews, Sense Heinrich Graetz a apasa: “Cestius Gallus, Kepinan Siria mi wiisen tumunuochu uochun pochokkulen an Rom sounfiu, . . . ese chuen tongeni atola minne a fiffis nge esap fori och le awesalo an Chon Jus u ngeni Rom. A korato ekkewe mwichen sounfiu, me ekkewe ekkoch samol ra pwal tiinalo ar kewe sounfiu.” Mei wor 30,000 sounfiu mi pwelli Jerusalem. Mwirin ar ekis maunfengen, Chon Jus ra sulong lon ekkewe ttit unukkun ewe imwen fel. “Lon ekkewe limu ran Chon Rom ra sotun le toki ewe ttit, rese tongeni pworacho ngeni pokiten ekkewe asefich me fau Chon Jutia ra monei ngeniir. Lon chok ewe awonuen ran ra tufichin ekis fori pwang fan ewe ttit mi nom ennefenin ewe imwen fel fan iten an epwe ita turutiu.”

7. Met popun ekiekin noun Jises chon kaeo epwe sokkolo me ekiekin Chon Jus?

⁷ Ekieki mwo watteen ewe osukosuk lon ekiekin Chon Jus mi luku pwe Kot epwe tumunur me ar we imwen fel! Nge, noun Jises chon kaeo ra fen rong ewe kapasen ourour ussun taloon Jerusalem. Jises a oesini: “Pun ekkewe ran repwe feito ngonuk, o ekkewe chon oputok repwe tu o achukuchukuta pwul [fori ttit ren ira mi kken, New World Translation] pwellifeiluk. Repwe etiepach ngonuk le pekum meinisin, o repwe poutatiu en won pwul, o pwal noum kewe semirit mi nom lon en; o resap likiti efou fau won efou lon en, pun kese sinei ewe ran mi Kot epwe amwaok.” (Luk 19:43, 44) Nge ena epwe wewe ngeni maloon ekkewe Chon Kraist lon Jerusalem lon 66 C.E.?

8. Ifa ewe riaffou Jises a oesini, me io “ekkewe mi filita,” ewe riaffou epwe mwochomwochelo ren?

⁸ Lupwen a polueni an ekkewe aposel kapas eis won ewe Chukun Olif, Jises a oesini: “Pun lon ekkewe ran riaffou lapalap epwe fis, usun chok esaamwo fis, seni le popun forutan minne Kot a forieta, tori ikenai, o esap pwal usun chok mwirin. Iwe, are ewe Samol esap amochomochalo ekkewe ran, esor emon epwe manau. Nge pokiten ekkewe chon filita a fen fili, epwe amochomochalo ekkewe ran.” (Mark 13:19, 20; Mattu 24:21, 22) Iwe, ekkewe ran repwe mwochomwochelo fan iten ekkewe “aramas mi filita”? Io kewe? Esap wewe ngeni ekkewe Chon Jus mi u ngeni Rom me era pwe ra fel ngeni Jiowa nge ra fen tunalo noun we. (Jon 19:1-7; Fofor 2:22, 23, 36) Ekkewe aramas mi filita lon ena fansoun ir ekkewe Chon Jus me Chon Ekis mi eani luku pwe Jises ewe Messaia me ewe Chon Amanau. Kot a fen filiireta, me lon Pentekos 33 C.E., a fen foriireta eu minefoon muu lon pekin ngun, “ewe Israelin Kot.”​—Kalesia 6:16; Luk 18:7; Fofor 10:34-45; 1 Piter 2:9.

9, 10. Ifa ussun ekkewe ranin an Rom maun ra “mwochomwochelo,” me met mwiriloon?

⁹ Ekkewe ran mi wesewesen ‘mwochomwochelo’ me ekkewe aramas mi kepit lon Jerusalem mi fen kuna manauer? Sense Graetz a apasawu an ekiek: “[Cestius Gallus] ese ekieki pwe epwe och an epwe likiitu lon ewe maun ngeni ei mwichen aramas mi pwora ika epwe wewe ngeni eu maun mi ttam lon ena fansoun atun epwe poputasefal pungun ran . . . me epwe aweiresi an kutta mongo fan iten ekkewe sounfiu. Ina popun a ekieki pwe epwe och ika epwe nimaramarsefal.” Ese lifilifil met Cestius Gallus a ekieki, an Rom kewe sounfiu ra nimaramarsefal seni ewe telinimw, nge ra feiengau watte seni ekkewe Chon Jus mi cheer.

¹⁰ Mi amairu an Rom nimaramarsefal nge a mut ngeni aramas ​—noun Jises kewe chon kaeo mi tongeni feiengau lon Jerusalem​—ar repwe kuna manauer. Ewe porausen uruwo mi makketiu a pwarata pwe lupwen a suuk ei alen ngaselo, ekkewe Chon Kraist ra su seni ewe leeni. A ifa me watteen an Kot tufichin silei met epwe fis lon mwach me an selaani ekkewe mi fel ngeni! Nge, met epwe tori ekkewe Chon Jus mi lukulukummang mi chuen nonnom lon Jerusalem me Jutia?

Piloon Kewe Repwe Kuna

11. Met Jises a apasa ussun “ei tappin aramas”?

¹¹ Chommong Chon Jus ra luku pwe lapalapen ar we fel, mi longuni ewe imwen fel, epwe chok sopwosopwolo. Nge Jises a apasa: “Iwe, oupwe kaeo seni ewe ira fik​—lupwen palan a potete o chon a puk, oupwe sinei pwe a arap ngeni ras. Iei usun pwal ami, lupwen oupwe kuna ekkeei mettoch meinisin, oupwe meefi pwe a arapoto, orun chok asam. Enlet, upwe apasa ngenikemi, pwe ei tappin aramas esap morelo mwen an ekkeei mettoch meinisin epwe fisita. Lang me fonufan repwe morelo, nge ai kewe kapas resap morelo.”​—Mattu 24:32-35.

12, 13. Ifa ussun ekkewe chon kaeo repwe fen weweiti an Jises fos ussun “ewe tappin aramas”?

¹² Lon ekkewe ier akkom mwen 66 C.E., ekkewe Chon Kraist repwe fen kuna chommong lein kinikinin ewe esissin​—maun, lengita, pwal mwo nge ewe angangen esilefeili ewe kapas allim ussun ewe Muu. (Fofor 11:28; Kolose 1:23) Iwe nge, ineet epwe fis ewe sopwoloon? Ifa weween alon Jises lupwen a apasa: ‘Ei tappin aramas [Kriik, ge·ne·aʹ] esap morelo’? Fan chommong Jises a eita ngeni piloon kewe Chon Jus mi u ngeni, kapachelong ekkewe nouwisin lamalam, ‘eu tappin aramas mi ingau me mocheisou.’ (Mattu 11:16; 12:39, 45; 16:4; 17:17; 23:36) Ina popun, atun a nom won ewe Chukun Olif, lupwen a fossefal ussun “ei tappin aramas,” esap awewe won unusen ekkewe Chon Jus meinisin mi fen manau are noun kewe chon kaeo, inaamwo ika ir eu “einang mi filita.” (1 Piter 2:9) Jises ese fos ussun “ei tappin aramas” ren an epwe awewe won ukuukun ttamen eu  fansoun.

¹³ Iwe nge, Jises a ekieki ussun ewe mwichen Chon Jus mi u ngeni, chokkewe repwe kuna pwonutaan an we esissin. Ussun porausen “ei tappin aramas” lon Luk 21:32, Sense Joel B. Green a apasa: “Lon ewe aulungatin puken Kapas Allim, ‘ei tappin aramas’ (pwal ekkewe kapas mi ekis ussun chok) a kan weneiti eu sokkun aramas mi u ngeni letipen Kot. . . . [A weneiti] aramas mi tipeforea me ra kul seni an Kot kokkot.”b

14. Met “ewe tappin aramas” a kuna, nge ifa ussun a sokkolo met a tori ekkewe Chon Kraist?

¹⁴ Ekkewe Chon Jus mi u ngeni Jises, kinikinin ewe tappin aramas mi ngau, repwe tongeni kuna pwonutaan ewe esissin me repwe pwal kuna ewe sopwoloon. (Mattu 24:6, 13, 14) Me ra fokkun kuna! Lon 70 C.E., sounfiuen Rom ra liwin fan nemenemen Taitos, noun Emperor Vespasian. Aramas rese tongeni luku ukuukun an Chon Jus riaffou lon ewe telinimw.c Emon a piin kuna met a fis, itan Flavius Josephus, a apasa pwe atun Rom a ataielo ewe telinimw, a fen malo arapakan 1,100,000 Chon Jus, me 100,000 som ra eolo lape ngeniir repwap malo fan riaffou seni echik are lon an Chon Rom leenien kunou. Pwungun pwe, ewe riaffou a fis lefilen 66-70 C.E. a fen lap seni ese lifilifil ekkewe riaffou a fen tori are epwe tori Jerusalem me an Jus we otot. A ifa me sokkoloon manauen ekkewe Chon Kraist mi auselinga ewe oesini mi ouroureer me ra su seni ewe telinimw mwirin ekkewe sounfiun Rom ra lo lon 66 C.E.! Ekkewe Chon Kraist mi kepit mi “filita” ra “manau,” are ra kuna tumun, lon 70 C.E.​—Mattu 24:16, 22.

Epwe Wor Pwal Eu Pwonutaan

15. Ifa ussun sipwe tongeni lukuluk pwe an Jises oesini epwe pwal wor pwonutaan mwirin 70 C.E.?

¹⁵ Iwe nge, esap ina muchuloon ewe osukosuk. Me mwan, Jises a fen apasa pwe mwirin ewe telinimw a tatakkiselo, epwe feito lon iten Jiowa. (Mattu 23:38, 39; 24:2) A fen ffatelo ei poraus lon an we oesini won ewe Chukun Olif. Mwirin an fos ussun ewe “riaffou lapalap,” a apasa pwe epwe pwalo Kraist chofona, me ekkewe muu repwe puratiu Jerusalem fan pecher ren och fansoun mi langattam. (Mattu 24:21, 23-28; Luk 21:24) Epwe tongeni wewe ngeni warotoon pwal eu pwonutaan ei oesini, mi lap seni ewe akkom? Ekkewe pisekin annet ra polueni ewer. Lupwen sipwe alollofengenni Pwarata 6:2-8 (mi mak mwirin ewe riaffou a tori Jerusalem lon 70 C.E.) ren Mattu 24:6-8 me Luk 21:10, 11, sia kuna pwe maun, lengita, me malapalap lap seni me loom epwe chuen war. Pwonutaan an Jises oesini, mi lap seni minne a pwonuta won Jerusalem, a fiffis seni le poputaan ewe Aewin Maunen Fonufan lon 1914.

16-18. Met sia ekieki epwe chuen fisita?

¹⁶ Ren chommong ier, Chon Pwarata Jiowa ra fen aiti ngeni aramas pwe pwapwaloon ewe esissin iei a anneta pwe ewe “riaffou mi lapalap” esaamwo poputa. Ei “tappin aramas” mi ngau epwe kuna ena riaffou. A ussun ita pwe epwe wor och mettoch epwe fis akkom (eu maun ngeni lamalam chofona meinisin), ussun chok an Gallus maunei Jerusalem lon 66 C.E. a poputa ewe riaffou won Jerusalem.d Ewer, mwirin och fansoun ese ffat ttaman, epwe war ewe sopwoloon​—taloon mettoch won unusen fonufan, ussun chok ewe talo watte lon 70 C.E.

¹⁷ Jises a awewe won ewe riaffou lon mwach kkan lupwen a apasa: “Nge mwirin riaffoun ekkewe ran [taloon lamalam chofona], akkar epwe muttir rochelo, maram esap chuen tin, pwal ekkewe fu repwe turutiu seni lang, o ekkewe manamanen lang repwe mokutukut. Iwe, esisinen ewe Noun-Aramas epwe pwa lon lang, nge einangen fonufan meinisin repwele chok lolilen. O repwe kuna an ewe Noun-Aramas fefeito lon kuchuun lang ren manaman, pwal ren ling mi lapalap.”​—Mattu 24:29, 30.

¹⁸ Iwe, Jises a pwisin apasa pwe “mwirin ewe riaffou lon ekkewe ran,” epwe fis ekkoch esissin lon lang. (Alollo ngeni Sowel 2:28-32; 3:15.) Epwe kon watte rukoon aramas mi alleasolap pwe repwe “awatta pwisin ir pokiten watteen ar lolilen.” Chommong repwe “meserochelo ren ar niuokus, o pwal ren ar lolileniesini ekkewe mettoch repwe feito ngeni fonufan.” Nge esap ina ussun ren ekkewe Chon Kraist mi enlet! Repwe ‘neta o sacheta pun ar amanau a fen arapoto.’​—Luk 21:25, 26, 28.

Epwe Wor Kapwung!

19. Ifa ussun sipwe tongeni miritiiti ineet atun epwe pwonuta ewe oesini ussun ekkewe siip me siike?

¹⁹ Chechchemeni alon ewe oesini lon Mattu 24:29-31 pwe (1) ewe Noun-Aramas epwe feito, (2) an feito epwe fis ren ling mi lapalap, (3) ekkewe chon lang repwe eti i, me (4) einangen fonufan meinisin repwe kuna. Jises a enniwili ekkeei poraus lon an kapas awewe ussun ekkewe siip me siike. (Mattu 25:31-46) Ina pwata, sipwe tongeni eani ekiek pwe ei kapas awewe a weneiti ewe fansoun, mwirin poputaan ewe riaffou, lupwen Jises epwe feito ren noun kewe chon lang me mottiu won ewe leenien mottun king ren an epwe eani kapwung. (Jon 5:22; Fofor 17:31; alollo ngeni 1 King 7:7; Taniel 7:10, 13, 14, 22, 26; Mattu 19:28.) Io kewe repwe kuna kapwung, me met mwiriloon? Alon ewe kapas awewe, Jises epwe atittina ekkewe muu meinisin, a ussun ita ra fen nonnom mwen an leenien mottun king lon lang.

20, 21. (a) Met epwe tori ekkewe siip lon an Jises kapas awewe? (b) Met ekkewe siike repwe kuna lon mwach kkan?

²⁰ Jises epwe anomu ekkewe mwan me fefin mi nikinikin siip peliefichin, ewe pekin feioch. Pwata? Pokiten ra fen alamota ar tufichin fofforoch ngeni pwiin Jises kewe​—ekkewe Chon Kraist mi kepit, chokkewe repwe fiti Jises lon Muun we lon lang. (Taniel 7:27; Ipru 2:9–​3:1) Fite milion Chon Kraist mi nikinikin siip ra fen fori alon ei kapas awewe ren ar esinna pwiin Jises kewe me ren ar angang mi alisiir. Pokiten ei angang, a nom ren ewe “mwich mi lapalap” eu apilukulukun manau seni “ewe riaffou mi lapalap” me mwirin, manau tori feilfeilo chok lon ewe Paratis, ewe kinikinin an Kot we Muu won fonufan.​—Pwarata 7:9, 14; 21:3, 4; Jon 10:16.

²¹ Mi sokkolo manauen ekkewe siike! Alon Mattu 24:30 ‘repwe chok lolilen’ lupwen Jises a war. Mei wor popun ar lolilen. A pwalo seni ar kewe foffor pwe ra fen tunalo ewe kapas allim ussun ewe Muu, u ngeni noun Jises kewe chon kaeo, me efich ewe fonufan mi mommorelo. (Mattu 10:16-18; 1 Jon 2:15-17) Jises​—esap emon lein noun kewe chon kaeo won fonufan​—epwe filata io kewe a ussun siike. Jises a apasa ussun ekkewe siike: “Repwe chok feilo lon ninni esemuch.”​—Mattu 25:46.

22. A fich ngeni ach ekkekieki ussun menni kinikinin an Jises oesini?

²² A fen amwarar feffeitaan ach weweiti Mattu sopwun 24 me 25. Iwe nge, a fich ngeni ach ekieki ussun pwal eu kinikinin an Jises oesini​—‘ewe mettoch mi aniuoput mi efisata kiteter mi ukkuta lon eu leeni mi pin.’ Jises a pesei noun kewe chon kaeo pwe repwe miritiiti weween ei poraus me ammonlata le angang. (Mattu 24:15, 16, NW) Ifa weween ei “mettoch mi aniuoput”? Ineet atun epwe ukkuta lon eu leeni mi pin? Me ifa ussun ewe poraus epwe kku manauach iei me lon mwach kkan? Ekkewe lesen mwirin repwe awewe won.

[Footnote]

En Mi Chechchemeni?

◻ Ifa ussun a pwonuta Mattu 24:4-14 lon ewe aewin senturi?

◻ Lon ranin ekkewe aposel, ifa ussun ranin ewe riaffou a mwochomwochelo pwe epwe chuen wor mi manau, ussun a fen oeisini lon Mattu 24:21, 22?

◻ Ifa lapalapen “ewe tappin aramas” lon Mattu 24:34?

◻ Ifa ussun sia silei pwe ewe oesini won ewe Chukun Olif epwe chuen wor pwonutaan nge epwe lap seni ewe akkom?

◻ Ineet me ifa ussun ewe kapas awewe ussun ekkewe siip me siike epwe pwonuta?