Feffetal Lon Alen Jiowa We
“Kopwe witiwiti Jiowa o kopwe chok fetal lon an we al, iwe, epwe seikuketa pwe kopwe fonueni ewe fonufan.”—KÖLFEL 37:34.
1, 2. Met a kapachelong lon an King Tafit feffetal won alen Jiowa we, iwe, met epwe kutta senikich ikenai?
“KOPWE aiti ngeniei ewe al upwe feffetal won pun ua chok asapata nguni ngonuk.” (Kol Fel 143:8) Chon Kraist ikenai ra tipeeu ngeni alon King Tafit kana ren unusen letiper. Ra enletin mochen apwapwai Jiowa me feffetal won an we al. Met epwe wewe ngeni? Ren Tafit, a wewe ngeni an epwe apwonueta an Kot we alluk. A pwal wewe ngeni an epwe lukuluk won Jiowa nge sap an chiechi ngeni ekkewe ekkoch muu. Ewer, a pwal wewe ngeni an epwe angang ngeni Jiowa ren tuppwol, nge sap ekkewe koten chon lukun. Ren Chon Kraist, pwal ekkoch mettoch repwe kapachelong lon ach sipwe feffetal won alen Jiowa we.
2 Iei eu mettoch, ach feffetal won alen Jiowa we ikenai a wewe ngeni ach sipwe eani apilukuluk won an Jises Kraist moon kepich, me sinneni pwe i “ewe al me ewe enlet me ewe manau.” (Jon 3:16; 14:6; Ipru 5:9) A pwal wewe ngeni ach sipwe apwonueta “allukun ewe Kraist,” weween, sipwe pwarata tongfengen lefilach, akkaeuin ngeni pwiin Jises kewe mi kepit. (Kalesia 6:2; Mattu 25:34-40) Ir kewe mi feffetal won alen Jiowa ra tongei an kewe kapasen emmwen me alluk. (Kol Fel 119:97; Än Salomon Fos 4:5, 6) Ra aucheani wiser ar repwe fiffiti an chon Kraist we angangen afalafal. (Kolose 4:17; 2 Timoti 4:5) Iotek, ina eu kinikinin manauer ran me ran. (Rom 12:12) Iwe, ra ‘nengenifichi ar feffetal esap ussun aramas mi tiparoch pwe ussun ekkewe mi tipatchem.’ (Efisus 5:15) Rese fokkun alamotengaua mettochun ngun fan iten ekkewe pisekin fonufan are pwapwaan inisir mi nonnom fansoun mochomoch chok. (Mattu 6:19, 20; 1 Jon 2:15-17) Lap seni ena, ar tuppwol ngeni Jiowa me ar apilukuluk won ra lamot chapur. (2 Korint 1:9; 10:5; Efisus 4:24) Met popun? Pun nonnomun manauach a ussun chok nonnomun manauen ekkewe chon Israel lom.
A Lamot Watte Lukuluk me Tuppwol
3. Met popun tuppwol, luku, me lukuluk epwe alisikich le feffetal won alen Jiowa we?
3 Israel lom, ina eu muu mi kukkun, nge chon orur kewe mi pwellifeilir ra oputer me ra fel ngeni ar kewe ululun eti foffor mi sikepwach. (1 Kronika 16:26) Israel chok a angang ngeni ewe emon chok Kot mi enlet me monomon, Jiowa, iwe, a kutta senir ar repwe manaueni ewe manau mi limelimoch me fich ngeni Kot. (Tuteronomi 6:4) Pwal ussun chok ikenai, fitu chok million aramas ra fel ngeni Jiowa, me ra nonnom lon eu fonufan mi ur ren arapakan wonu billion aramas nge lapalapen ar kewe lamalam me manauer ra fokkun sokkolo. Ika kich sia nonnom lein ekkewe fitu million, epwe lamot ach sipwe mammasa pwe ewe fonufan esap etipetipakich lon eu lapalap mi mwaal. Ifa ussun? Epwe alisikich ika sipwe tuppwol me luku Jiowa Kot, me lukuluk won pwe epwe fokkun apwonueta an kewe pwon. (Ipru 11:6) Ach fori ena epwe eppetikich seni ach sipwe eani apilukuluk won ekkewe mettoch chon fonufan ra apilukuluk won.—Än Salomon Fos 20:22; 1 Timoti 6:17.
4. Met popun ekkewe muu ra nonnom “lon rochopwakin ekiekir”?
4 Ewe aposel Paul a pwarata ifa ussun chon Kraist repwe fokkun sokko seni ewe fonufan lupwen a makkei: “Iei minne, upwe apasa o pwarata ei afalafal lon ewe Samol, pwe ami ousap chuen manaueni manauen ekkewe Jentail lon pungun ar ekiek-mwaal. Ra nonnom lon rochopwak, pokiten ar ekiek, manauer mi sokkoseni manauen Kot pokiten ar tipeforea.” (Efisus 4:17, 18) Jises mi “ewe saram mi enlet.” (Jon 1:9) Ir kewe mi u ngeni are apasa pwe ra luku i nge rese alleasochisi “ewe allukun Kraist”, ra “nonnom lon rochopwakin ekiekir.” Rese feffetal lon alen Jiowa we, nge ra “touau seni ewe manau mi fich ngeni Kot.” Ese lifilifil ika ra ekieki pwe ir mi tipatchem me ren fonufan, nge ra ‘tiparoch’ ren ewe sile mi emmwen ngeni manau, sileien Jiowa Kot me Jises Kraist.—Jon 17:3; 1 Korint 3:19.
5. Inaamwo ika saramen ewe enlet a tittin lon ewe fonufan, nge pwata chommong ra letip-forea?
5 Iwe nge, saramen ewe enlet a tittin lon ewe fonufan! (Kol Fel 43:3; Filipai 2:15) “Tipatchem a osommong le kokko lon ewe al.” (Än Salomon Fos 1:20) Lon ewe ier, Chon Pwarata Jiowa ra aea lap seni eu billion aua lon ar ereni chon orur kewe ussun Jiowa Kot me Jises Kraist. Fitepuku ngerou ra etiwar. Iwe nge, sipwe ita mairu pwe chommong rese etiwar? Aap. Paul a apasa pwe “ra aporoingaualo letiper.” Letipen ekkoch rese etiwa ewe enlet pokiten ar tongei pwisin ir chok are ar tongei moni. Pwal ekkoch ra tupulo ren lamalam chofona are ekiekin chon fonufan mi touau seni Kot mi choufetal ikenai. Weiresin manauer a okullu chommong seni Kot. Pwal ekkoch rese fokkun mochen manaueni ewe manau mi fich ngeni Kot. (Jon 3:20) Iwe nge, epwe tufich an epwe poroingaualo letipen emon mi fen feffetal won alen Jiowa we?
6, 7. Inaamwo ika ir chon fel ngeni Jiowa, nge inet ekkewe chon Israel ra rikilo, iwe, pwata?
6 A fen fis ngeni Israel lom, ussun Paul a pwarata. A makkei: “Iwe, ekkeei mettoch ir mi minen amiritikich, pwe sisap mochenia minne mi ingau ussun chok ir ra mochenia. Ousap fel ngeni ululun, ussun chok ekkoch leir, ussun a fen makketiu: ‘Ekkewe aramas ra mottiu pwe repwe mongo o un, o ra uta pwe repwe pworuk.’ Sisap lisou-mwaal ussun chok ekkoch leir, iwe, ruu kit ulungerou ra turutiu lon eu chok ran.”—1 Korint 10:6-8.
7 Paul a akkom kapas ussun ewe fansoun lupwen Israel a fel ngeni emon kou mi for seni kolt fan ewe Chuukun Sainai. (Ekistos 32:5, 6) Ra fokkun alleasolapa an Kot alluk, ewe ra fen apasa pwe repwe alleasochisi ekkoch wiik me mwan we. (Ekistos 20:4-6; 24:3) Iwe, Paul a pwal kapas ussun ewe fansoun lupwen Israel a eti ekkewe fin Moap le chapetiu ngeni Paal. (Numperis 25:1-9) An aramas fel ngeni ewe kou a nofitfengen me ar kon ssenuk lon ar ‘apwapwai inisir.’a Ar fel ngeni Paal a eti lisou-mwaal me fofforun sikepwach. (Pwarata 2:14) Pwata ekkewe chon Israel ra foffori ekkena tipis? Pun ra mut ngeni letiper ar repwe ‘mocheniaiti minne mi ingau’—ewe fel ngeni ululun are ekkewe fofforun sikepwach mi eti.
8. Met sipwe tongeni kaeo seni minne a fis ngeni Israel?
8 Paul a era pwe sipwe kaeo seni ekkena poraus. Kaeo met sokkun lesen? Eni emon chon Kraist esap fokkun ekiekin chapetiu ngeni emon kou mi for seni kolt are emon koten Moap. Iwe nge, epwe fori lisou-mwaal are kon ssenuk lon an apwapwai pwisin inisin? Ekkena fofor ra choufetal ikenai, iwe, ika sipwe mut ngeni mocheniangauen letipach an epwe mammarita, repwe aimukichelo seni Jiowa. Mwiriloon epwe ussun chok minne epwe fis ika sipwe fel ngeni ululun—sipwe imulo seni Kot. (Alollo ngeni Kolose 3:5; Filipai 3:19.) Iwe, Paul a awesalo an makkei ussun ekkena poraus ren an pesei chienan kewe chon luku: “Su seni fel ngeni ululun.”—1 Korint 10:14.
Alillis lon Ach Feffetal lon Alen Jiowa we
9. (a) Met sokkun alillis sipwe tongeni angei fan iten ach sipwe feffetal won alen Jiowa we? (b) Ifa ussun sia rongorong ‘ewe kapas le sokuruch’?
9 Ika sipwe tipeppos le feffetal lon alen Jiowa we, sap minne esap wor alillis. Aisea a oesini: “Iwe, lupwen oua kul ngeni peliifich ika peliimong, selingemi repwe rongorong me lukun sokurumi, “Iei ewe al oupwe aleni.” (Aisea 30:21) Ifa ussun ‘selingach’ repwe rongorong ewe ‘kapas lukun sokuruch’? Iwe, ikenai, esor a wesewesen rongorong och mongungu are angei eu poraus seni Kot. Ewe “kapas” sipwe rong epwe torikich meinisin. Akkaeuin, epwe feito seni ekkewe wokisin mi mak fan emmwenien ngunun Kot, ewe Paipel, mi masou ren ekiekin Kot kewe me eu rekotun an kewe foffor ngeni aramas. Pokiten ran me ran sipwe rongorong kapasen etipetip seni mettoch mi “imulo seni ewe manau mi fich ngeni Kot,” ika sipwe pochokkul lon pekin ngun, epwe lamot ach sipwe alleani ewe Paipel me ekkekieki ussun minne a mak lon iteitan. Epwe ti senikich ekkewe “mettoch mi lamot mwaal” pwe sipwe “unusen lipwakoch ngeni sokkun foffor-murinno meinisin.” (Fofor 14:14, 15; 2 Timoti 3:16, 17) Epwe apochokkulakich, alukucharakich, me alisikich ‘ach sipwe fori pwe alach epwe sopwoch.’ (Josua 1:7, 8) Ina minne, an Jiowa kapas a peseikich: “Iei ami nei kana, oupwe auselingaei: Oupwe apwonueta minne ua urenikemi, pwe oupwe feioch. Oupwe auselinga ai kewe kapasen ourour pwe oupwe tipatchem, nge ousap aucheangaueer.”—Än Salomon Fos 8:32, 33.
10. Ifa ewe oruuan mettoch mi alisikich ach sipwe rongorong ‘ewe kapas le sokuruch’?
10 Ewe ‘kapas lukun sokuruch’ epwe pwal torikich ren “ewe chon angang mi tuppwol o tipatchem”, ewe mi awora “mongo lon fansoun fich.” (Mattu 24:45-47) Ena mongoon ngun a kawor lon ekkewe puk me chassi mi peres me alongolong won Paipel, iwe, lon ekkewe ier mi kanoto, a fokkun chommong. Awewe chok, ren ewe chassi itan Ewe Leenien Mas, a murinnolo ach weweiti ekkewe oesini. Lon ei chassi, a peseikich pwe sipwe lillikiitu lon ewe angangen afalafal me foralo chon kaeo nge meit ika a wattelo an aramas tilikop, a pwal alisikich ach sipwe su seni ekkewe sser, me a pwal peseikich ach sipwe amarata lapalapochun chon Kraist. Sia fokkun aucheani ena sokkun mongoon ngun lon fansoun mi fich!
11. Awewei ewe aulungatin mettoch mi atufichi ach sipwe rongorong ewe ‘kapas le sokuruch.’
11 Ewe chon angang mi tuppwol me tipatchem a pwal awora mongoon ngun ren ach kewe mwich iteiten wiik. A kapachelong an ekkewe mwichefel kewe mwich, me ekkewe circuit me district mwichelap. Ita menni chon Kraist mi tuppwol esap aucheani ekkena mwich? Ir minen alillis watte lon ach feffetal lon alen Jiowa we. Pokiten chommong repwe nonnom ren ir kewe rese eani ar luku lon ar kewe leenien angang are lon sukul, ar chiechi ngeni chiener kewe chon Kraist iteitan epwe wesewesen selani manauer. Ekkewe mwich ra awora fansoun pwe sipwe tongeni “apochokkula emon me emon lefilach lon tong o foffor murinno.” (Ipru 10:24) Sia tongei pwiich kewe, sia pwal tongei ach chiechi ngenir.—Kol Fel 133:1.
12. Met Chon Pwarata Jiowa ra apwungalo, iwe, ifa ussun ra keran pwarata?
12 Arapakan wonu million aramas ra pochokkuleta ren ena mongoon ngun ikenai, ina minne, ra feffetal lon alen Jiowa we, iwe, pwal ekkoch fitu million ra kaeo Paipel fan iten ar repwe pwal fori ussun chok. Ra ita letipechou are apwangapwang pokiten ir chokisikis seni ekkewe fitu billion aramas won fonufan ikenai? Aapwi! Ra tipeppos pwe repwe rorrongorong ewe ‘kapas lukun sokurer’, me foffori letipen Jiowa ren tuppwol. Ren ar repwe pwarata ngeni aramas ar tipeppos, lon ekkewe mwichelap 1998/99 “An Kot we Alen Manau”, chon fiti ra apasata eu poraus esinesin mi pwarata meefien letiper. Iei masouen ena atipeeu.
Poraus Esinesin Aramas Repwe Uwau Meefier Won (Resolution)
13, 14. Chon Pwarata Jiowa ra eani menni ekiek pwung ussun lapalapen fonufan?
13 “Kich Chon Pwarata Jiowa mi mwichefengen lon ewe ‘An Kot Alen Manau’ Mwichelap, sia tipeeufengen ren unusen letipach pwe an Kot we alen manau, ina ewe alen manau mi murinno seni meinisin. Iwe nge, sia sinneni pwe a sokkolo meefien lap ngeni aramas meinisin. Aramas ra fen sotuni sokkopaten ekiek me lamalam ussun met epwe wewe ngeni ewe alen manau mi murinno seni meinisin. Ach wenechar le atola uruwoon aramas me lapalapen fonufan ikenai epwe annetata enletin ewe poraus seni won mi mak lon puken Jeremiah 10:23, a era: ‘Esap wisen aramas ar repwe pusin nemeni manauer.’
14 “Iteiten ran sia kuna chommong pisekin annet mi alukuluku enletin ekkena fos. Lap ngeni aramas meinisin ra tunalo an Kot we alen manau. Aramas ra chok chechei minne mi pwung me ren pwisin ekiekir. Mwiriloon a fokkun alolilen—taloon manauen ekkewe famili, esor emmwen fan iten ekkewe semirit; an aramas chechei pisek me moni, nge mwirin ra chok poon me letipengau; ekkewe foffor mi akkachofesa me atai alluk mi efeiengaua aramas; ekkewe maun me osukosuk lefilen einang me einang mi efisi ninniloon chommong aramas; ekkewe fofforun lisou-mwaal mi efisi chommong semmwenin sikepwach. Ekkeei ekkoch chok ekkewe osukosuk watte mi eppeti an aramas chechei pwapwa, kinamwe, me lukulukoch.
15, 16. Lon ewe poraus esinesin, Chon Pwarata Jiowa ra tipeppos ussun met ren an Kot we alen manau?
15 “Pokiten lapalapengauen manauen aramas me kanotoon ewe ‘maun lon ewe ranin Kot mi Lapalap’ mi iteni Armaketon (Pwarata 16:14, 16), kich Chon Pwarata Jiowa sia apwungalo pwe:
16 “Aewin: Sia meefi pwe kich noun Jiowa Kot, pun emon me emon leich sia fen fangelo manauach ngeni nge sise amwochu och seni, iwe, a chok lukuchar ach lukuluk won an Jiowa awora ewe moon kepich ren Noun we, Jises Kraist. Sipwe chok feffetal lon alen Jiowa we, sipwe noun kewe Chon Pwarata me anomukich fan nemenien Jises Kraist pwe sipwe apochokkula an Jiowa we pwungun nemenem.
17, 18. Chon Pwarata Jiowa repwe sopweilo le fori met ren ar repwe manaueni ewe manau mi limelimoch me pwal ren ar pwipwifengen lon Kraist?
17 “Oruuan: Sipwe sopweilo le akkamwochu ekkewe alluk me kapasen emmwen mi limelimoch lon ewe Paipel. Sipwe tipeppos pwe sisap feffetal ussun chok ekkewe muu lon rochopwakin ekiekir. (Efisus 4:17-19) Sipwe apwungalo pwe sipwe amwochu ach uoch mwen mesen Jiowa me tuttumunu pwe esap wor ach tikitikipwul ren manauen fonufan.—Jemes 1:27.
18 “Aulungatin: Kich chon Kraist eu mwichen pwipwi won unusen fonufan, iwe, sipwe uppwos le apwonueta wisach kewe me ren ewe Paipel. Sipwe imulo seni mwokutukutun ekkewe muu, nge sisap mut ngenikich ach sipwe fiffiti osukosuk are oput me kaimufesen lefilen muu me muu are einang me einang.
19, 20. (a) Met ekkewe chon Kraist sam me in repwe fori? (b) Ifa ussun chon Kraist mi enlet meinisin repwe sinnelo pwe ir noun Kraist kewe chon kaeo?
19 “Aruanuun: Kich mi fen nounou sipwe emiriti nouch kewe lon alen Jiowa we. Sipwe isetiu eu leenien appiru lon ach manaueni manauen chon Kraist, pachelong ach akkalleani Paipel, kaeofengen Paipel me ach famili, me fiffiti mwokutukutun ewe mwichefel and ewe angangen afalafal ren unusen ngunuch.
20 “Animuan: Kich meinisin sipwe achocho le amarata ekkewe lapalapochun ewe Chon Forikich, iwe, sipwe achocho le akkappiru lapalapan kewe me an kewe al, ussun chok Jises a fori. (Efisus 5:1) Sipwe tipeppos pwe ach kewe foffor meinisin epwe fiti tong, pwe aramas meinisin repwe silei pwe kich chon Kraist, ren ewe tongfengen lefilach.—Jon 13:35.
21-23. Met Chon Pwarata Jiowa repwe sopweilo le foffori, iwe, met ra wesewesen luku?
21 “Awonuen: Sisap ukkutiu le afalafala ewe kapas allim ussun Muun Kot, foralo chon kaeo, me asukuler lon an Kot we alen manau me pwal peser ar repwe fiffiti ekkewe mwich pwe repwe lipwakochulo.—Mattu 24:14; 28:19, 20; Ipru 10:24, 25.
22 “Afisuan: Emon me emon leich pwal unusen ach mwicheich sipwe sopweilo le akkomwa letipen Kot lon manauach. Sipwe tapwelo mwirin an we Kapas, ewe Paipel pwe ach sou emmwen, nge sisap riki ngeni peliefichin are peliemongun, iwe, sipwe apungalo pwe alen Kot we a fokkun murinno lap seni alen chon fonufan. Sipwe tipeppos le chechei alen Kot we, ren uppwos me tuppwol, iei pwal tori feilfeilo chok!
23 “Sia fori ei poraus esinesin pun sia unusen lukuluk won an Jiowa we pwon mi tong pwe i mi fori letipen Kot epwe nonnom tori feilfeilo chok. Sia fori ei poraus esinesin pun sia luku pwe ach sipwe manaueni ewe manau mi alongolong won ekkewe kapasen emmwen, kapasen fon me alluk lon ewe Paipel, ina ewe alen manau mi murinno seni meinisin ikenai me pwal isetiu eu longolong fan iten mwachkkan, pwe sipwe akkamwochu ewe manau mi enlet. (1 Timoti 6:19; 2 Timoti 4:7b, 8) Lap seni meinisin, sia fori ei atipeeu pun sia tongei Jiowa Kot ren unusen letipach, unusen ngunuch, unusen ekiekich me pwal unusen ach pochokkul!
24, 25. Ifa ussun ar polueni ewe poraus esinesin mi katowu lon ewe mwichelap, iwe, met ir kewe mi feffetal won alen Jiowa we repwe tipeppos le fori?
24 “Ir meinisin mi fiffiti ei mwichelap mi tipeeu ngeni ei atipeeu, ouse mochen oupwe apasa ‘EWER!’”
25 Fitepuku leenien mwich mi watte won unusen fonufan ra chechech atun chon fiffiti ekkewe mwichelap ra leuwommong le polueni “EWER!” Esor an Chon Pwarata Jiowa tipemwaramwar pwe repwe sopweilo le feffetal lon alen Jiowa we. Ra unusen lukuluk won Jiowa me luku pwe epwe fokkun apwonueta an kewe pwon. Repwe amwochu ar tuppwol ngeni Jiowa, ese lifilifil minne epwe fisita. Iwe, ra tipeppos pwe repwe chok foffori letipan.
“Kot A Penikich”
26. Met popun ir kewe mi feffetal won alen Jiowa we repwe pwapwa?
26 Chon Pwarata Jiowa ra chechemeni alon ewe sou makkei Kol Fel, a era: “Kopwe apilukuluku Jiowa o alleasochisi an kewe alluk. I epwe atekioketa pwe kopwe fonueni ewe fonufan.” (Kol Fel 37:34) Rese pwal monukalo alon Paul kewe mi apochokkulakicheta: “Are Kot epwe penikich, io epwe u ngenikich? Ese mo lolileniesini pwisin Noun we, nge a afangema i fan asengesin kich meinisin, iwe, ifa ussun, esap pwal fangeto rech mettoch meinisin?” (Rom 8:31, 32) Ewer, ika sipwe feffetal lon alen Jiowa we, epwe chok faffang ngenikich “mettoch meinisin pwe sipwe pwapwa ren.” (1 Timoti 6:17) Ita ia epwe murinno ach sipwe nonnom ia lap seni ach nonnom lon alen Jiowa we, eti pwiich kewe mi achengicheng? Iei Jiowa a penikich, iwe, sipwe apwungalo pwe sipwe chok nonnom ren me likiitu tori ewe sopwolon, unusen apilukuluku pwe lon fansoun mi fich ngeni Kot, sipwe kuna an epwe apwonueta an kewe pwon meinisin.—Taitos 1:2.
[Footnote]
a Emon sou kaeo fos a era pwe ewe kapasen Krik mi affou ngeni “apwapwai inisir” a weneiti ekkewe pworuk chon lukun ra fori lon ar kewe kametip, iwe, a pwal era, “Aramas ra silei pwe chommong ekkena pworuk ra for fan iten ar repwe efisata mochenia-ingau me fofforun sikepwach.”
En Mi Chechemeni?
◻ Met emon chon Kraist epwe fori fan iten an epwe tongeni feffetal lon alen Jiowa we?
◻ Met popun epwe lamot ach sipwe amarata ach lukuluk won Jiowa me pwal ach tuppwol ngeni?
◻ Menni alillis a kawor fan iten ach sipwe feffetal won alen Jiowa we?
◻ Apasata ekkoch menlapen ewe poraus esinesin a katowu lon ekkewe mwichelap, itelapan “An Kot Alen Manau.”
[Ekkewe sasing lón pekin taropwe 26]
Aramas ra apwungalo eu poraus esinesin mi lamot lon ewe “Alen Jiowa we” District and International Conventions