Akkaucheani Ekkewe “Mwan Mi Ussun Liffang”

“Oupwe asamolu ir mi angang weires leimi me . . . epwe sokkolo watteen ami aucheaniir fan tong pokiten ar angang.”—1 TESALONIKA 5:12, 13.

1. Me ren Fofor 20:35, ifa ewe manaman a nom ren ewe ffofforun liffangolo? Awewei mwo.

“PWAPWAAN liffangolo a lap seni pwapwaan angei.” (Fofor 20:35) En mi chechchemeni inet ewe ka kuna pwungun alon Jises na? Eli ka liffang ngeni emon ka wesewesen tongei och mettoch. Ka filiochu om liffang, pun ka mochen pwe emonnewe ka tongei epwe aucheani. A ifa me watteen pwapwaan lon letipom lupwen ka kuna chengelin wonmesen attongom we! Lupwen ach awora liffang a longolong won ekiek pwung, a wewe ngeni eu pisekin pwarataan tong, iwe, ach pwarata tong a tufichin atoto rech pwapwa.

2, 3. (a) Pwata sia tongeni apasa pwe esor emon mi pwapwa lap seni Jiowa, me ifa ussun kaworen ekkewe “mwan mi ussun liffang” epwe tongeni efisata chengel lon letipan? (b) Sisap mochen ach sipwe fetei eu liffang seni Kot?

² Iwe, ita io epwe tufichin meefi pwapwa lap seni Jiowa, ewe Sou Liffangoto “iteiten liffang mi murinno meinisin”? (Jemes 1:17; 1 Timoti 1:11) Iteiten liffang a awora a popu seni tong. (1 Jon 4:8) A enletin ina ussun ewe liffang Kot ren Kraist a fen ngeni ewe mwichefel, weween, ekkewe “mwan mi ussun liffang.” (Efisus 4:8) Alollolun an Kot tong ren noun kkewe aramas a pwalo ren an awora ekkewe elter pwe repwe wisen ffoleni ewe pwin siip. Ekkena mwan ra kefiloch, weween, repwe eani ekkewe tufich mi affatetiu lon Paipel. (1 Timoti 3:1-7; Taitos 1:5-9) Ra silei pwe repwe “pwarata tong ngeni ewe pwin siip,” pun ina ewe popun ekkewe siip repwe meefi kilisou ren ekkena chon masen siip mi tong. (Fofor 20:29; Kol Fel 100:3) Lupwen Jiowa epwe kuna pwe letipen noun kkewe siip a ur ren kilisou, ese mwaal pwisin letipan epwe chengel!​—Än Salomon Fos 27:11.

³ Sisap mochen alamotengaua aucheaan eu liffang seni Kot me sisap pwal mochen puri fan pechech an kkewe liffang. Ina minne, a piita ekkeei ruu kapas eis: Epwe fet ekiekin ekkewe elter ussun wiser lon ewe mwichefel? Ifa ussun lusun ewe pwin siip repwe tongeni pwarata pwe ra kan aucheani ekkewe “mwan mi ussun liffang”?

‘Am Chienemi kkewe Chon Angang’

4, 5. (a) Paul a alollo ngeni met ewe mwichefel, me pwata a fich ena kapas awewe? (b) An Paul kapas awewe a pwarata met ussun ewe sokkun ekiek me ffoffor sipwe eani lefilach?

⁴ Jiowa a fen awisa ngeni ekkewe “mwan mi ussun liffang” och nemenem lon ewe mwichefel. Pwungun pwe ekkewe elter resap mochen aeamwaalli ar nemenem, nge ra silei pwe a mmen mecheres ngeni aramas rese unusoch ar repwe ina ussun. Iwe, epwe fet ar ekiek ussun wiser ngeni lusun ewe pwin siip? Nengeni mwo ewe kapas awewe ewe aposel Paul a eani. Mwirin an awewei ewe popun a kawor ekkewe “mwan mi ussun liffang,” iei makkeien Paul: “Ren tong sipwe maarita lon mettoch meinisin lon atewe, ewe mokur, Kraist. Seni atewe meinisin kifetin ewe inis, ren ar chufengen fan tipeeu me ar ririfengen ren iteiten lekailen chuu mi awora minne a lamot, me ren angangen iteiten kifetin meinisin lon en me wisan, epwe efisata mammaaritaan ewe inis fan iten an epwe pwisin uta lon tong.” (Efisus 4:15, 16) Iwe, Paul a alollofengenni ewe mwichefel, pachelong ekkewe elter me io ekkan mwo, me eu inisin aramas. Pwata a pwung ena kapas awewe?

⁵ Eu inisin aramas a wor chommong sokkun kifetin nge eu chok mokur. Iwe nge, esor och mettoch lon ewe inis mi lamotongau, awewe chok ren ekkewe fouicho, waan meefi, me waan chcha. Iteiten kifetin meinisin a lamot me a awora alillis fan iten pochokkulen me lingen unusen ewe inis. Pwal ussun chok, a wor chommong sokkun aramas lon ewe mwichefel, nge iteiten emon me emon, kukkun are watte, pochokkul are apwangapwang, epwe tufichin awora alillis fan iten pochokkulen me lingen ewe mwichefel lon pekin ngun. (1 Korint 12:14-26) Esor popun emon epwe meefi pwe esor lamotan. Iwe nge, esap wor emon epwe meefi pwe a tekia mwen meinisin, pun oukich meinisin, ekkewe chon mas me ekkewe siip, kich kifetin ewe inis, me a wor eu chok mokur, Kraist. Ina minne, Paul a awewei ewe tong, tumun, me sufol sipwe pwarata lefilach. An ekkewe elter weweiti ena mettoch epwe alisir pwe repwe tipetekison me mirit ussun wiser lon ewe mwichefel.

6. Inaamwo ika Paul a eani nemenemen emon aposel, nge ifa ussun a pwarata pwe a tipetekison?

⁶ Ekkena “mwan mi ussun liffang” rese ekiekin nemeni manauen are lukuen chiener kkewe chon fel. Inaamwo ika Paul emon aposel, nge iei alon ngeni chon Korint: “Sap minne am mastaan won ami luku, nge am chienemi kkewe chon angang fan iten ami chengel, pun oua kan ukkuta pokiten ami luku.” (2 Korint 1:24) Paul ese mochen nemeni lukuen me manauen pwiin kkewe. Ese kuna lamoten an epwe ffori ena mettoch, pun a pwarata an lukuluk pwe ir mwan me fefin mi tuppwol me ra nom lon an Jiowa mwicheich pokiten ar mochen ffori minne mi pwung. Ina minne, lupwen Paul a kapas ussun ir me chienan we chon sai Timoti, a ussun ita apasa pwe ‘Wisem pwe aupwe etikemi le angang ngeni Kot fan chengel.’ (2 Korint 1:1) A ifa me tipetekisonun!

7. Ekkewe elter mi tipetekison ra weweiti met ussun wiser lon ewe mwichefel, me met ra luku ussun chiener kkewe chon angang?

⁷ Ikenai mi wewe chok angangen ekkewe “mwan mi ussun liffang.” Ir ‘chienach chon angang fan iten ach chengel.’ Ekkewe elter mi tipetekison ra weweiti pwe esap wiser ar repwe filata met chiener kkewe repwe tufichin ffori lon ar angang ngeni Kot. Ra silei pwe inaamwo ika repwe apochokkula aramas fan iten ar repwe alapalo are amurinnolo ar angangen afalafal, nge ar angang ngeni Kot epwe popu seni letiper mi tipemecheres. (Alollo ngeni 2 Korint 9:7.) Ra luku pwe ika chiener kkewe chon angang ra chengel, repwe angang ren unusen tufichir. Ina popun, ra mochen alisi pwiir kkewe pwe repwe “angang ngeni Jiowa fan chengel.”​—Kol Fel 100:2.

Akkalisi Meinisin pwe Repwe Angang fan Chengel

8. Ifa ussun ekkewe elter repwe tongeni alisi pwiir kkewe pwe repwe angang ngeni Jiowa fan chengel?

⁸ Ami kkana elter, ifa ussun oupwe tongeni alisi pwiimi kkewe pwe repwe angang fan chengel? Oupwe tongeni apochokkulereta ren ewe leenien appiru oua isetiu. (1 Piter 5:3) Pwarata tinikken me chengel lon ewe angangen afalafal, iwe, eli fitemon repwe pochokkuleta pwe repwe appirukemi. Apunga aramas ren ar angang ren unusen letiper. (Efisus 4:29) Ami apunga aramas seni enletin letipemi epwe ameef ngenir pwe manauer mi auchea me lamot. A kan pesei ekkewe siip pwe repwe mochen angang ngeni Kot ren unusen letiper. Ousap eani apopongau. (Kalesia 6:4) Apopongau a kan aletipechou aramas, nge ese kan amwokutur pwe repwe amurinnolo ar angang. Pwal och, mi sokkofesen emon me emon noun Jiowa kkewe siip, weween, a sokkofesen nonnomur me tufichir. Ussun Paul, pwarata ami lukuluk won pwiimi kkewe. Tong a kan “luku mettoch meinisin,” ina minne, epwe murinno ach sipwe luku pwe pwiich kkewe ra tongei Kot me ra mochen apwapwai i. (1 Korint 13:7) Lupwen oupwe ‘pwarata ami asamolu aramas,’ oupwe uwawu senir minne mi nampa eu. (Rom 12:10) Oupwe eani ewe lukuluk pwe lupwen ekkewe siip repwe pochokkuleta me usefallita, a lap me leir repwe angang ngeni Kot ren unusen tufichir, me repwe kuna chengel lon ar angang.​—Mattu 11:28-30.

9. Menni ekiek ussun chiener kkewe elter epwe alisi emon me emon ekkewe elter pwe repwe angang fan chengel?

⁹ Om eani ewe ekiek mi tekison pwe en emon ‘chiener chon angang’ epwe alisuk le angang fan chengel me aucheani ekkewe liffang mi sokkolo a nom ren chienom kkewe elter. Emon me emon ekkewe elter a wor en me tufichin epwe tongeni aea fan iten feiochun ewe mwichefel. (1 Piter 4:10) Eli emon a angoch lon pekin asukul. Eli pwal emon a angoch le akkota angang. Eli pwal emon a luki letipen aramas pokiten an tong me umoumoch. A enlet pwe esor emon elter mi eani meinisin ekkewe liffang lon ewe ukuukun a nom ren chienan kkewe. Ika emon elter a eani och liffang, awewe chok ren ewe liffangen asukul, a ita weween pwe i mi tekia mwen emon? Aapwi, esap ina! (1 Korint 4:7) Iwe nge, esor popun an emon epwe lolowo ren ewe liffang a nom ren pwal emon are meefi pwe a lipwakingau lupwen aramas repwe apunga pwal emon elter pokiten an eani och sokkun tufich. Chechchemeni pwe pwisin en ka eani ekkoch liffang Jiowa a kuna lon en. Iwe, i epwe tongeni alisuk pwe kopwe amaarata me aea ekkena liffang fan iten feiochun pwiium kkewe.​—Filipai 4:13.

‘Oupwe Alleasochis me Tipemecheres’

10. Pwata a pwung ach sipwe pwarata pwe sia aucheani ekkewe “mwan mi ussun liffang”?

¹⁰ Lupwen sipwe angei eu liffang, a murinno ach sipwe pwarata kilisou. Iei alon Kolose 3:15: “Pwarata ami kilisou.” Iwe, ifa ussun ekkewe “mwan mi ussun liffang,” weween, ewe liffang mi auchea Jiowa a fen liffang ngenikich? Pwungun pwe sia akkaewin kilisou ngeni Jiowa, ewe Sou Awora Liffang. Nge ifa ussun ekkewe “mwan mi ussun liffang”? Ifa ussun sipwe tongeni pwarata pwe sia aucheaniir?

11. (a) Ifa ussun sipwe tongeni pwarata ach aucheani ekkewe “mwan mi ussun liffang”? (b) Ifa lamoten ekkeei kapas “oupwe alleasochis” me “oupwe tipemecheres”?

¹¹ Sipwe tongeni pwarata ach aucheani ekkewe “mwan mi ussun liffang” ren ach muttir apwonueta ekkewe fon me emmwen mi longolong won Paipel repwe ngenikich. Iei an Paipel fon ngenikich: “Oupwe alleasochisi ir mi wisen emmwenikemi me oupwe tipemecheres, pun ir mi mammasa ngunumi pwe ir repwe atittin ren; nge repwe ita ffori ena mettoch ren chengel nge esap ren ngungures, pwe ina eu mettoch oupwe sopwongau ren.” (Ipru 13:17) Nengeni mwo pwe sap minne sipwe chok “alleasochis,” nge sipwe pwal “tipemecheres” ngeni ir mi wisen emmwenikich. Ewe kapasen Kriik ren “tipemecheres” a wesewesen wewe ngeni “oupwe anomukemi fan.” Iei alon ewe sou kaeo Paipel R. C. H. Lenski ussun ewe kapas “alleasochis” me “tipemecheres”: “Emon a kan alleasochis ika a tipeeu ngeni minne emon epwe ereni, me a tipetipelo pokiten an kuna pwungun me feiochun; nge emon a kan tipemecheres . . . lupwen an ekiek ese tipeeu ngeni ekiekin emonnewe.” Lupwen sia weweiti me tipeeu ngeni ewe emmwen seni ir mi wisen emmwenikich, eli a mecheres ach sipwe alleasochis. Nge epwe ifa ussun ika sise weweiti ewe popun ar apwungalo och mettoch?

12. Pwata sipwe tipemecheres are tipetekison, inaamwo ika sise unusen weweiti ewe popun och mettoch a kapwungulo?

¹² Eli ina eu fansoun epwe lamot ach sipwe tipemecheres, are anomukich fan ar emmwen. Met popun? Aewin, a lamot ach sipwe luku pwe ekkewe mwan mi eani ekkewe tufich lon pekin ngun ra kan ekieki akkom met sipwe feioch ren. A enlet nge ir mi sileiochu pwe repwe atittin mwen Jiowa ren ekkewe siip repwe wisen tumunu. (Jemes 3:1) Pwal eu, epwe murinno ach sipwe chechchemeni pwe eli sise silei meinisin ekkewe poraus mi enlet minne ra apwungalo a longolong won.​—Mwiitun 18:13.

13. Met epwe tongeni alisikich pwe sipwe tipemecheres lupwen ekkewe elter repwe eani apwung won chon tipis?

¹³ Nge ifa ussun sipwe tipemecheres lupwen repwe eani och apwung? Pwungun pwe eli esap ina eu mettoch epwe mecheres, akkaewin ika repwe atowu emon attongach, nge eli i emon mararich are emon chienach. Lon pwal ena atun, epwe murinno ach sipwe tipemecheres ngeni minne ekkewe “mwan mi ussun liffang” repwe apwungalo. Repwe eani apwung mi wenechar lap senikich me eli epwe tichchik ekkewe poraus repwe silei lap senikich. Fan chommong ekkena mwan ra mmen osukosuk ren minne repwe apwungalo pun a fokkun chou wiser, wisen ar repwe eani ‘apwung fan iten Jiowa.’ (2 Kronika 19:6) Ra kan achocho ngeni ar repwe umoumoch, pun ra chechchemeni pwe Kot a “muttir omusalo tipis.” (Kol Fel 86:5) Nge a pwal lamot ar repwe tumunu limochun ewe mwichefel, me ewe Paipel a apasa pwe repwe atowu chon tipis ika resap aier. (1 Korint 5:11-13) Fan chommong emonnewe mi tipis epwe pwisin tipeeu ngeni minne repwe apwungalo. Eli ewe apwung epwe wenewenen emiriti letipen emonnewe mi tipis. Ika pwe kich, attongen emonnewe mi tipis, sipwe tipemecheres ngeni minne epwe kapwungulo, eli sipwe tufichin alisi i pwe epwe kuna feioch seni ewe apwung.​—Ipru 12:11.

“Epwe Sokkolo Watteen Ami Aucheaniir”

14, 15. (a) Me ren 1 Tesalonika 5:12, 13, pwata a fichiiti ekkewe elter ach sipwe aucheaniir? (b) Pwata sia tongeni apasa pwe ekkewe elter ra ‘angang weires leich’?

¹⁴ Sipwe pwal tongeni pwarata ach aucheani ekkewe “mwan mi ussun liffang” ren ach pwarata tong ngenir. Iei an Paul pesepes ngeni ewe mwichefel lon Tesalonika: “Oupwe asamolu ir mi angang weires leimi me nemenem woomi lon ewe Samol me fonoukemi; iwe, . . . epwe sokkolo watteen ami aucheaniir pokiten ar angang.” (1 Tesalonika 5:12, 13) “Angang weires”​—esap ina ussun ekkewe elter mi kisaseu le angang fan asengesich? Ekieki mwo ekkewe angang mi chou ekkena brother mi achengicheng ra kan apwonueta.

¹⁵ Fan chommong mi wor ar famili me ra kan angang fan iten tufichin ar famili. (1 Timoti 5:8) Ika emon elter a wor noun, mi lamot ngeni ekkena kukkun an semer we awora fansoun me alillis ngenir. Eli epwe alisir ren lesenin sukul me akkota fansoun kunou. (Eklesiastis 3:1, 4) Lamot seni meinisin, epwe tumunu met a lamot ngeni an famili lon pekin ngun, iwe, epwe wisen emmweni an ewe famili kaeofengen lon Paipel, epwe etir lon ewe angangen afalafal, me uwei ir ngeni an chon Kraist kkewe mwich. (Tuteronomi 6:4-7; Efisus 6:4) Sisap monuki pwe lukun ekkena angang oukich meinisin sipwe apwonueta, a wor pwal fitu wis ekkewe elter repwe apwonueta. Ra kan ammonlata wiser kkewe lon mwich, aamwa ekkewe siip, tuttumunu ewe mwichefel lon pekin ngun, me eani apwung won chon tipis ika pwe mi wor lamotan. Ekkoch ra pwal wisen angang fan iten circuit assembly, district convention, kautaan Kingdom Hall, me Hospital Liaison Committees. A enlet pwe ekkena brother ra “angang weires”!

16. Awewei mwo ifa ussun sipwe tongeni pwarata ach aucheaniir ekkewe elter.

¹⁶ Ifa ussun sipwe tongeni pwarata pwe sia aucheaniir? Iei eu mwiitun lon Paipel: “A ifa me murinnoon och kapas lon fansoun mi fich ngeni!” (Än Salomon Fos 15:23; 25:11) Iwe, och kapasen kilisou me apungapung epwe tongeni pwarata ngenir pwe sise kan tunalo ar angang weires. Sipwe pwal mirit lupwen sipwe kutta alillis senir. A murinno ach sipwe meefi pwe mi sussuuk fansoun meinisin ar alillis ngenikich. Eli epwe wor fansoun lupwen ‘letipach epwe fokkun cheuch’ me epwe lamot ngenikich kapasen apochokkul, emmwen, are fon mi longolong won Paipel seni ir “mi eani ewe tufichin kait” lon ewe Kapasen Kot. (Kol Fel 55:4; 1 Timoti 3:2) Iwe nge, a lamot ach sipwe chechchemeni pwe mi kauk ewe fansoun emon elter epwe tongeni awora fan itach, pun i esap tongeni tunalo met a lamot ngeni pwisin an famili are lusun chon ewe mwichefel. Pokiten sia “weweiti meefien” ekkena brother mi angang weires, sisap kon essenuku minne sipwe kutta senir. (1 Piter 3:8) Nge, sipwe aucheani chok ewe fansoun me alillis repwe tongeni awora ngenikich.​—Filipai 4:5.

17, 18. Ifa ussun puluwen ekkewe elter ra kan pennuku pwisin mochenir, me ifa ussun sipwe tongeni pwarata pwe sia kan aucheani ekkena sister mi tuppwol?

¹⁷ Ifa ussun puluwen ekkewe elter? Ese pwal fichiitiir ach sipwe aucheaniir? A ussun ita ra liffang ngeni ewe mwichefel puluwer kkewe. Fan chommong repwe pennuku pwisin ar mochen. Fan ekkoch ekkewe elter repwe angang won mettochun ewe mwichefel le pwin, nge ita uruurun pwe repwe nonnom ren ar kkewe famili. Lon chommong mwichefel ekkewe fin Kraist mi tuppwol ra kan tipemecheresin pennuku pwisin mochenir pwe puluwer kkewe repwe tongeni angang fan iten noun Jiowa kkewe siip.​—Alollo ngeni 2 Korint 12:15.

¹⁸ Ifa ussun sipwe tongeni pwarata pwe sia kan aucheani ekkena fin Kraist mi tuppwol? Aewin, sisap miritingau le kon achommonga met sipwe kutta seni puluwer kkewe. Nge sisap pwal monuki manamanen och kapasen kilisou. Iei alon Än Salomon Fos 16:24: “Kapas murinno a ussun chonun pulech, pwe a ngar ngeni ngunuch me och minen achikara chuuch.” Ekieki mwo ei poraus. Mwirin ssarin eu mwich, eu pupulu a chuuri emon elter, iwe, ra eisini ika repwe tongeni fos ngeni ussun nour we aluwol. Lupwen ewe elter a fos ngeni ewe eu pupulu, puluwan we a mosonottam le witiwit. Mwirin, ewe in a chuuri puluwen ewe elter, iwe, iei alon ngeni: “Ua mochen eronuk ai kilisou ren ewe fansoun puluwom we a awora fan iten an epwe alisi ai famili.” Ekkena kapasen kilisou mi ngar a wenewenen kku letipen puluwen ena elter.

19. (a) Ekkewe kumiin elter ra kan tuppwol le apwonueta met sokkun kokkot? (b) Oukich meinisin sipwe apposa letipach pwe sipwe fet?

¹⁹ Kaworen ekkewe elter fan iten ar repwe tuttumunu ekkewe siip eu me lein an Jiowa kkewe ‘liffang mi murinno.’ (Jemes 1:17) Ekkena mwan rese unusoch, nge ussun oukich meinisin, ra kan mwaallilo. (1 King 8:46) Iwe nge, ekkewe kumiin elter lon ekkewe mwichefel won unusen fonufan ra kan tuppwol le apwonueta ekkewe angang Jiowa a akkota rer, weween, ra kan awenechara, aufichieta, ririfengenni, me tumunu ewe pwin siip. Amwo emon me emon ekkewe elter epwe apposa letipan pwe epwe sopweilo an tuttumunu noun Jiowa kkewe siip fan tong, nge epwe ina ussun an epwe pwarata pwe i eu liffang, are feioch, ngeni pwiin kkewe. Iwe, amwo oukich meinisin sipwe apposa letipach pwe sipwe pwarata ach aucheani ekkewe “mwan mi ussun liffang” ren ach pwarata alleasochis me tipemecheres ngenir me pwal ren ach pwarata pwe sia aucheani ar angang weires. A ifa me watteen ach kilisou pwe fan tong Jiowa a fen awora ekkewe mwan mi ussun ita apasa ngeni noun kkewe siip: ‘Wisem pwe aupwe alisikemi le angang ngeni Kot fan chengel’!

Ifa Ussun Kopwe Polueni?

◻ Pwata a fich ach sipwe alollofengenni ewe mwichefel me eu inisin aramas?

◻ Ifa ussun ekkewe elter repwe tongeni alisi pwiir kkewe pwe repwe angang ngeni Jiowa fan chengel?

◻ Pwata sisap chok alleasochis nge pwal tipemecheres ngeni ir mi wisen emmwenikich?

◻ Ifa ussun sipwe tongeni pwarata pwe sia kan aucheani ekkewe elter?

[Sasing lón pekin taropwe 14]

Ami kkana elter, oupwe apunga chon ewe mwichefel ren ar angang ren unusen letiper

[Sasing lón pekin taropwe 15]

Ren ar tinikken lon ewe angangen afalafal, ekkewe elter repwe tongeni alisi chon ar famili me pwal fitemon pwe repwe angang fan chengel

[Ekkewe sasing lón pekin taropwe 16]

Sia kan aucheani nouch kkewe elter mi angang weires!