Ifa Ussun Jises Epwe Tongeni Siwili Manauom?

JISES KRAIST emon Sense mi Lapalap a fen nonnom lon Palestine arapakan 2,000 ier me loom. Ese watte ach silei porausan atun i emon semirit. Nge a watte ewe poraus mi weneiti ewe poputaan an “pwarata usun ewe enlet” lupwen a tori 30 ierin. (Jon 18:37; Luk 3:21-23) Ekkewe fomon chon kaeo mi makketiu porausen manauan ra menlapei ekkewe ulungat esopw ierin an afalafal.

Atun an angangen afalafal, Jises Kraist a affata ngeni noun kewe chon kaeo eu alluk mi tongeni wewe ngeni eu safei fan iten chommong lein ekkewe osukosuk won fonufan. Met ena safei? Jises a apasa: “Iwe, upwe ngenikemi eu alluk mi fo, pwe oupwe tongfengen lefilemi, usun chok ua tongeikemi, pwe ami oupwe tongfengen lefilemi.” (Jon 13:34) Ewer, tong epwe tongeni pwakini chommong lein an aramas kewe osukosuk. Lupwen emon a eisini Jises ika menni lein ekkewe alluk a kon lap, Jises a polueni: “Kopwe tongei om Samol Kot ren unusen letipom, o ren unusen ngunum, o ren unusen ekiekum. Iei ewe popun alluk mi lapalap. Nge mi wor pwal eu aruuan mi lollo chok, Kopwe tongei chon orum usun chok pwisin en.”​—Mattu 22:37-40.

Jises a pwaralo ifa ussun sipwe tongei Kot me aramas ren an kewe kapas me foffor. Sipwe atittina ekkoch ekkeei kapas me foffor ren ach sipwe kaeo seniir.

An Afalafal

Lon eu me lein ekkewe afalafal mi itefoulo seni meinisin, Jises Kraist a ereni noun kewe chon kaeo: “Esor emon mi tongeni angang ngeni ruemon samol. Pun epwe oput emon o tongei ewe emon, are epwe acheni emon o turunufasei ewe emon. Ouse tongeni angang ngeni Kot me mammon.” (Mattu 6:24) An Jises afalafal ussun ach akkomwa Kot lon manauach epwe chuen wor aucheaan iei, lupwen aramas chommong ra luku pwe moni a pwakini meinisin ach kewe osukosuk? Pwungun pwe mei wor lamoten moni. (Än Salomon Afalafal 7:12) Iwe nge, ika “mammon” a wiliiti ach we samol, ‘tongen moni’ epwe nemenikich, me eriani unusen manauach. (1 Timoti 6:9, 10) Chommong ra fen turulong lon ena ssar me a fen pout seniir ar famili, pochokkulen inisir, pwal mwo nge manauer.

Iwe, ach etiwa Kot ussun ach we samol epwe ameef ngenikich pwe manauach mei wor aucheaan. Ussun ewe Chon Forata, i ewe Puachen manau, me, i chok a fich ngeni ach fel. (Kol Fel 36:9; Pwarata 4:11) Chokkewe mi tongei i pokiten ar kaeo ussun lapalapan kewe, ra meefi ewe lamoten ar repwe alleasochisi an kewe alluk. (An Salomon Fos 12:13; 1 Jon 5:3) Ren ach fori ina ussun, sia pwisin efeiochukich.​—Aisea 48:17.

Lon ewe Afalafal won ewe Chuuk, Jises a pwal aiti ngeni noun kewe chon kaeo ifa ussun repwe tongei aramas. A apasa: “Iei minne, mettoch meinisin minne oua mochen pwe aramas repwe fori ngenikemi, epwe chok iei usun ami oupwe fori ngenir.” (Mattu 7:12) Ewe kapas “aramas” Jises a nounou, a pwal kapachelong chon oputa emon. A pwal apasa lon ena afalafal: “Oupwe tongei chon oput ami, o iotekini ir mi eriaffoukemi.” (Mattu 5:43, 44) Ena esin tong epwe tongeni pwakini chommong lein ach kewe osukosuk iei? Ewe sou emmwen mi fiti ewe lamalam Hindu itan Mohandas Gandhi a luku. A apasa: “Lupwen sia apwonueta alon an Kraist kewe afalafal lon ewe Afalafal won ewe Chuuk, sipwe fen pwakini osukosuken . . . fonufan meinisin.” Ika aramas repwe apwonueta alon an Jises afalafal ussun tong, epwe fen pwak chommong lein an aramas kewe osukosuk.

An Kewe Foffor

Jises ese chok afalafala ekkewe poraus mi enlet me alollon nge a pwal fori alon an afalafal. Ren chok awewe, a akkomwa minne a lamot ngeni aramas mwen minne a lamot ngeni i. Eu ran a kon watte an Jises me noun kewe chon kaeo angang le alisi aramas pwe rese tawe ngeni ar repwe mongo. Jises a weweiti ewe lamoten an noun kewe chon kaeo ekis asoso, iwe, a emmweniir ngeni eu leeni ikewe esor aramas ie. Nge lupwen ra tori ewe leeni, ra kuna eu pwiin aramas mi wikitiwitiir. Epwe met kopwe fen fori ika ena pwiin aramas a mochen pwe kopwe angang nge en ka meefi ewe lamoten om kopwe asoso? Iwe, Jises “a fakkun tongei ir,” me “a popueta afalafaler chommong mettoch.” (Mark 6:34) Pokiten an tongei aramas, Jises a akkalisiir.

Jises ese chok asukula aramas. A pwal awora alillis. Ren chok awewe, fan eu a fen amongooni 5,000 aramas mi fen auselinga i tori lekuniol. Ekis mwirin ena, a pwal amongooni pwal eu pwiin aramas watte​—lap seni 4,000 lon ei fansoun​—mi auselinga an afalafal ulungat ran me ese chuen wor aner mongo. Lon ewe aewin fansoun a wor rer limefou pilawa me ruuemon iik kukkun, me mwirin, fufou pilawa me ekkoch kukkun iik. (Mattu 14:14-22; 15:32-38) Manaman? Ewer, i emon mi fori manaman.

Jises a pwal apochokkula ekkewe mi semmwen. A fen apochokkula aramas mi chun, rupun pwotur, me ekkewe mi selingepung. A pwal mwo nge amanauata ekkewe mi malo! (Luk 7:22; Jon 11:30-45) Fan eu emon mi rupun pwotur a tingor: “Are ka mochen, ka tongeni alimochuei.” Met Jises a fori? “O ren an umoumoch, a eitielo poun, o a attapa atewe. A pwal apasa ngeni i, ‘Ua mochen, kopwe limoch.’” (Mark 1:40, 41) Ren ekkeei manaman, Jises a pwarata an tongei ekkewe mi riaffou.

A weires ngonuk om kopwe luku pwe a fokkun fis ekkewe manaman? Chechchemeni mwo pwe Jises a fen fori ekkewe manaman mwen mesen aramas. Pwal mwo nge chokkewe mi oputa Jises me ra kutta ifa ussun repwe tipi ngeni fansoun meinisin, rese tongeni apasa pwe ese fis ekkewe manaman. (Jon 9:1-34) Pwal och, mei wor popun an a fori ekkewe manaman. Ra fen alisi aramas le esinna Jises ussun ewe Emon Kot a tinato​—Jon 6:14.

Jises ese mochen alingalo pwisin i ren ekkewe manaman. Iwe, a mochen alingalo Kot, ewe Popun an manaman. Fan eu lon Capernaum a nom lon eu imw mei wor aramas chommong lon. Emon mi pechema a mochen pwe Jises epwe apochokkula i nge ese tongeni tolong. Iwe, chienan kewe ra auratiu an we kieki seni eu pwang me won ewe os. Lupwen Jises a kuna ar luku, a apochokkula ewe mwan mi pechema. Seni ena foffor, ekkewe aramas ra “mwareiti Kot” me ra apasa: “Sise mo kuna och iei usun.” (Mark 2:1-4, 11, 12) An Jises kewe manaman ra efisi an aramas mwareiti Jiowa, an we Kot, me a fen alisi ir mi osupwang.

Apochokkuleloon chon semmwen ren ekkewe manaman esap ina ewe populapen an Jises we angangen afalafal. Emon mwan mi fen makkei porausen manauen Jises a awewei: “Nge a fen makketiu ekkeei, pwe ami oupwe luku pwe Jises ewe Kraist, Noun Kot; o ren ami luku epwe wor manau remi fan itan.” (Jon 20:31) Ewer, Jises a feitiu fonufan pwe aramas mi luku repwe tongeni kuna manau.

An we Asor

‘Jises a feitiu fonufan?’ eli kopwe eis. ‘Ia a feito me ie?’ Jises a pwisin apasa: “Pun ua fen feitiu seni lang, nge esap ren ai upwe fori pwisin letipei, pwe letipen ewe emon mi tinieito.” (Jon 6:38) A fen manau mwen an feito fonufan ussun Noun Kot alaemon. Ifa letipen ewe Emon mi tinatiu Jises ngeni fonufan? “Pwe a chok iei usun an Kot tongei fonufan, pwe a fangelo Noun we Alaemon pwe iteiten aramas meinisin mi luku i esap poutmwalilo, nge epwe kuna manau esemuch.” (Jon 3:16) Ifa ussun epwe tufich?

Ewe Paipel a affata ifa ussun malo a tori aramas. Ewe aewin pean aramas ra fen angei manauer seni Kot me ra tufichin manau tori feilfeilo chok. Iwe nge, ra filata le u ngeni ewe Chon Forata. (Keneses 3:1-19) Pokiten ar foffor, ewe aewin tipisin aramas, mwirimwirin Atam me If ra alemwiri malo seniir. (Rom 5:12) Ika aramas repwe wesewesen manau, epwe fen wes seniir tipis me malo.

Esor emon scientist epwe tufichin amoielo malo ren an angang won ekkewe kukkun kifetin inisich. Nge, ewe Chon Foruta aramas a tufichin atoto ngeni aramas mi alleasochis ar unusoch pwe repwe tufichin kuna manau esemuch. Lon ewe Paipel minne Kot epwe awora a iteni ewe moon kepichilo. A ussun ita pwe ewe aewin pean aramas ra amomolo pwisin ir me nour kewe. Ra wiliiti slave fan nemenien tipis me malo. Ra fen siwili manauer ussun aramas mi unusoch mi alleasochisi Kot ren manauer mi imulo seni Kot, me ar pwisin apwungu minne mi pwung are mwaal. Ren an epwe moonisefalli manauen aramas mi unusoch, emon epwe isetiu eu liwin mi wewe chok me ewe manau mi unusoch semach me inach kewe akkom ra poutalo. Pokiten ar alemwiri manauer ese unusoch, aramas rese tufichin isetiu liwinin.​—Kol Fel 49:7.

Iwe, Jiowa Kot a angolong lon ei osukosuk ren an epwe awora alillis. A amweta manauen noun we alaemon mi unusoch ngeni ewe leenien monukol an emon fopwul, ewe a nounatiu Jises. Eli me loom, a weires om kopwe luku pwe emon fefin ese mwo tori mwan epwe tongeni nounou. Iwe nge ikenai, scientist ra fen efisi uputiuen man ren ar angei efou gene seni emon me minalong lon pwal emon man. Iwe, epwe wor emon a pwungun tipemwaramwareiti an ewe Chon Forata tufichin efisi uputiuen emon nge ese fisita och foffor lefilen mwan me fefin?

Pokiten emon aramas mi unusoch a nonnom, a fen kawor liwinin an aramas ngasaseni tipis me malo. Iwe nge, ewe monukol mi uputiu won fonufan, Jises, a wiisen maarita pwe epwe wiliiti emon “tokter” mi tufichin awora ewe “safei” fan iten an aramas kewe osukosuk. A fen fori ena ren an manaueni manauan ussun emon mi unusoch, esor an tipis. Jises a kuna an aramas riaffou fan nemenien tipis me a pwal meefi ifa ussun mi aukuk minne aramas ra tufichin fori. Ina popun epwe tongeni wiliiti emon tokter mi tongei aramas. (Ipru 4:15) Ekkewe manaman Jises a fori atun an nonnom won fonufan a anneta pwe a nom ren Jises ewe mochen me ewe manaman le apochokkula chon semmwen.​—Mattu 4:23.

Mwirin an afalafal ulungat esopw ier won fonufan, ekkewe chon oput ra nnielo Jises. A fen pwarata pwe emon mwan mi unusoch mi tongeni alleasochisi ewe Chon Forata pwal mwo nge fan sossot watte. (1 Piter 2:22) Ewe manau mi unusoch Jises a fen fangelo a wiliiti ewe moon kepichilo a tufichin moonisefalli aramas seni tipis me malo. Jises Kraist a apasa: “Esor an emon och tong epwe lap seni ei tong, pwe epwe fangelo manauan fan iten chienan.” (Jon 15:13) Lon ewe aulungatin ran mwirin an malo, Kot a amanauata Jises ngeni manau lon pekin ngun, me mwirin ekkoch wiik a feita lang ren an epwe isetiu ewe moon kepichilo mwen Jiowa Kot. (1 Korint 15:3, 4; Ipru 9:11-14) Iei ussun, Jises a tufichin awora ngeni noun kewe aucheaan an we moon kepichilo.

En mi mochen kuna feioch seni ei kkotun apochokkula aramas lon pekin ngun, letip, me aion? Ika epwe fis, epwe lamot om luku Jises Kraist. Pwata kesap chuuri ewe Tokter? Kopwe tongeni fori ina ussun ren om kaeo ussun Jises Kraist me wiisan we lon ewe angangen amanaua aramas. Chon Pwarata Jiowa repwe pwapwa le alisuk.

[Sasing lón pekin taropwe 5]

A nom ren Jises Kraist ewe mochen me ewe manaman le apochokkula chon semmwen