Lesen 3

Io Ena Jises Kraist?

Pwata Jises a iteni Noun Kot we “mwanichi”? (1)

Pwata a iteni “ewe Kapas”? (1)

Pwata Jises a feitiu fonufan ussun emon mwan? (2-4)

Pwata a fori ekkewe manaman? (5)

Ekiselo chok met Jises epwe fori? (6)

1. Jises, i emon ngun mi manau lon lang mwen an a feitiu fonufan. Kot a forata i akkom, ina minne a iteni Noun Kot we “mwanichi.” (Kolose 1:15; Pwarata 3:14) Kot a pwisin forata Jises chok me lein noun kewe. Mwen an Jises wiliiti emon aramas, Jiowa a nounou i noun we “sou angang” lon an forata ekkewe ekkoch mettoch meinisin lon lang me won fonufan. (An Salomon Fos 8:22-31; Kolose 1:16, 17) Kot a pwal nounou i pwe epwe ewe chon aueni auan. Ina ewe popun a iteni “ewe Kapas.”​—Jon 1:1-3; Pwarata 19:13.

2. Kot a tiinatiu Noun we ngeni fonufan ren an walong manauan lon luken Meri. Ina minne semen Jises esap emon aramas. Ina pwata ese alemwiri och tipis are apwangapwangen inis. A wor ulungat popun Kot a tiinatiu Jises ngeni fonufan: (1) Fan iten an epwe asukulakich ussun Kot (Jon 18:37), (2) an epwe lillikiitu pwe epwe awora eu leenien appiru pwe sipwe tapwelo mwirin (1 Piter 2:21), me (3) an epwe asoresini manauan pwe epwe angasakichelo seni tipis me malo. Pwata a lamot ei mettoch?​—Mattu 20:28.

3. Ren an alleasolapa an Kot we alluk, ewe aemonun mwan, Atam, a forata minne ewe Paipel a eita ngeni “tipis.” Iwe, Kot a liwini ngeni malo. (Keneses 3:17-19) Me ren ekiekin Kot, Atam ese chuen unusen murinno, ina popun ese chuen unusoch. Ekis me ekis a chinnapelo me malo. Atam a ngeni noun kewe meinisin tipis. Ina minne, kich sipwe pwal chinnapelo, sessemwenilo, me malo. Ifa ussun aramas repwe tongeni ngaselo seni?​—Rom 3:23; 5:12.

4. Jises, i emon mi unusoch ussun chok Atam. Iwe nge, ese ussun chok Atam ren an unusen alleasochis ngeni Kot fan pwal mwo nge ewe sossot mi lapalap. Ina minne a tongeni asoresini manauan mi unusoch pwe epwe watiu liwinin tipisin Atam we. Ina ewe “moon kepich” ewe Paipel a kapas ussun. Ina minne noun Atam kewe repwe tongeni ngaselo seni malo. Meinisin mi eani lukuluk won Jises repwe tongeni kuna omusamusen ar kewe tipis me kuna manau esemuch.​—1 Timoti 2:5, 6; Jon 3:16; Rom 5:18, 19.

5. Atun Jises a nonnom won fonufan a apochokkulata ekkewe mi semmwen, amongooni ir kewe mi echik, me a akinamwei ekkewe molumol. A pwal mwo nge amanauasefalli ekkewe mi malo. Pwata a fori ekkewe manaman? (1) A tongei ekkewe aramas mi riaffou me a mochen alisir. (2) An kewe manaman ra annetata pwe i Noun Kot we. (3) Ra pwarata met epwe fori fan iten ekkewe aramas mi alleasochis lupwen epwe wisen King me nemeni fonufan.​—Mattu 14:14; Mark 2:10-12; Jon 5:28, 29.

6. Jises a malo nge Kot a amanauasefalli pwe epwe emon ngun, iwe, a liwinsefalliiti lang. (1 Piter 3:18) Seni ena fansoun, Kot a awisa ngeni pwe epwe King. Arapakan chok, Jises epwe limetau minne mi ngau meinisin me riaffou seni fonufan.​—Kol Fel 37:9-11; An Salomon Fos 2:21, 22.

[Ekkewe sasing lón pekin taropwe 7]

An Jises we angangen afalafal a wewe ngeni an asukula aramas, an fori ekkewe manaman, me pwal mwo nge an asoresini manauan fan itach