Ewe Apilukulukun Manausefal Mei Wor Manaman

“Ua chok lus ren mettoch meinisin . . . pwe upwe sinei [Jises Kraist], o manamanen an we manaueta.”​—FILIPAI 3:8-​10.

1, 2. (a) Me loom, ifa ussun emon nouwisin lamalam a awewei ewe manausefal? (b) Ifa ussun ewe manausefal epwe fisita?

MWIRIN 1890, a katowu eu poraus mi amwarar lon eu simpung ussun eu afalafal seni emon nouwisin lamalam lon Brooklyn, New York, U.S.A. Ewe nouwis a apasa pwe ewe manausefal a wewe ngeni ionfengennin me amanauasefallin ekkewe chu me futuk meinisin lon inisin aramas, ese lifilifil ika ewe inis a fen tatakkisilo ren ekkei are accident, man a fen ani are a fen wiliiti koyashi. Ewe nouwis a apasa pwe lon eu ran ukuukun 24-awa, ewe asapwal epwe chonolo pokiten ekkewe poun, pechen, autun poun, chuun, waan, me unuchen ekkewe fite bilion soma. Kinikinin ewe inis kewe repwe kuttafengennir. Iwe, mwirin ekkewe ngun repwe feitiu seni lang me lon ell pwe repwe nonnom lon ekkeei inis mi manausefal.

² Ese pwung ewe awewe pwe manausefal ina ewe kokkotsefallin ekkewe atom mei nonnom lon inisin aramas akkom. Me ese nom ren aramas eu ngun ese tongeni malo. (An Salomon Afalafal 9:5, 10; Isikiel 18:4) Ese pwal lamot an Jiowa, ewe Koten manausefal, epwe achufengennisefalli ekkewe atom mei nonnom akkom lon inisin aramas. Epwe tongeni fori minefoon inis fan iten ekkewe repwe manausefal. A ngeni Noun we, Jises Kraist, ewe manaman le amanauata ekkewe mi malo, ren ewe tufichin ar repwe manau esemuch. (Jon 5:26) Ina popun Jises a apasa: “Ngang ewe manausefal, pwal ewe manau. Are emon mi lukuei, inaamo ika a malo, nge epwe manau.” (Jon 11:25, 26) A ifa me murinnoon ena pwon! A apochokkulakich le likiitu fan sossot me pwal mwo nge malo ussun Chon Pwarata Jiowa mi tuppwol.

3. Met popun a lamot pwe Paul epwe afalafal ussun ewe manausefal?

³ Ewe manausefal ese tipeeu ngeni ewe luku pwe mei wor ngunun aramas ese tongeni malo​—eu luku ewe souak itan Plato seni Kriis a eani. Iwe, met a fis lupwen ewe aposel Paul a afalafal ngeni ekkewe foumongen Chon Kriis lon ewe Ariapakus lon Atens, pwe Kot a fen amanauasefalli Jises? Ewe Paipel a apasa: “Lupwen ra rong usun ewe manausefal seni malo, ekkoch leir ra chok amangaua i.” (Fofor 17:29-​34) Chommong lein chokkewe mi fen kuna Jises Kraist mwirin an manausefal ra chuen manau me, inaamwo ika ra kuna esiit, ra pwarata ussun an manausefal seni malo. Nge ekkewe sense mi chofona lon ewe mwichefelin Korint ra amam ewe manausefal. Ina popun Paul a pochokkul le afalafal ussun pwungun ei luku seni Kraist lon 1 Korint sopwun 15. Ach kaeofichi ussun met Paul a apasa a wenewenen annetata pwungun me manamanen ewe apilukulukun manausefal.

Pisekin Annet Pwe Jises A Fen Manaueta

4. Menni pisekin annet Paul a awora ren an Jises manausefal?

⁴ Kopwe nengeni ifa ussun Paul a poputani an afalafal. (1 Korint 15:1-​11) Ika epwe wor lamoten an ekkewe Chon Korint wiliiti chon luku, repwe amwochuluku ewe kapas allimen amanau. Kraist a malo fan iten ach kewe tipis, a peiaselo, iwe, mwirin a manaueta. Ren enletin, Jises a pwalo ngeni Sifas (Piter), iwe mwirin “ngeni ekkewe engol-me-ruemon.” (Jon 20:19-​23) Orun 500 ra kuna i, neman atun a alluku ngeniir: ‘Oupwe feilo asoulangalo chon fonu meinisin.’ (Mattu 28:19, 20) Jemes a kuna i, pwal noun kewe aposel mi tuppwol meinisin. (Fofor 1:6-​11) Lon eu leeni mi kkan ngeni Tamaskos, Jises a pwa ngeni Saul “ussun ita ngeni emon a uputiu mwen an fansoun”​—ussun ita Saul a fen manausefal lon pekin ngun. (Fofor 9:1-9) Ekkewe Chon Korint ra wiliiti chon luku pokiten Paul a fen afalafal ngeniir, me ra etiwa ewe kapas allim.

5. Ifa ussun Paul a anneta ena poraus lon 1 Korint 15:12-​19?

⁵ Nengeni lapalapen ekiekin Paul. (1 Korint 15:12-​19) Pokiten aramas mi kuna an Jises manausefal ra arongafetalei porausan, pwata ekkoch ra apasa pwe esor manausefal? Ika Jises ese fen manausefallita seni malo, ewe poraus sia arongafetalei me ach luku a chok lamot mwaal, me a pwa pwe sia chon pwarata mi chofona ussun Kot pun sia pwarata pwe Kot a amanauasefallieta Kraist. Ika ir mi malo resap manausefal, ‘sia chuen chok nonnom lon ach tipis,’ me ir mi mourulo lon Kraist, ir mi chok poutmwalilo. Pwal och, “are mi wor ach apilukuluk allim lon Kraist ren chok ei manau, iwe, kich mi woungau lap seni aramas meinisin.”

6. (a) Met Paul a apasa ren an epwe anneta an Jises manausefal? (b) Ifa ewe “chon oput,” me ifa ussun epwe morolo?

⁶ Paul a alukuluku an Jises manausefal. (1 Korint 15:20-​28) Pun Kraist “i mi chon akkom” me lein ir mi mourulo lon malo, mwirin epwe pwal wor aramas repwe manausefal. An ewe mwan Atam alleasolap a uwani malo, nge manausefal epwe feito seni ewe mwan​—Jises. Noun kewe repwe manaueta atun an nonnom. Kraist epwe “atailo sokkun mu meinisin, me sokkun nemenem, pwal sokkun manaman meinisin” mi u ngeni an Kot nemenem me epwe nemenem ussun King tori Jiowa epwe isetiu ekkewe chon oput i meinisin fan pechen. Pwal mwo nge “ewe chon oput”​—malo sia alemwiri seni Atam​—epwe morolo pokiten auchean an Jises we asor. Mwirin epwe likiti ngeni Kot Seman we ewe Muu, me epwe pwal anomu pwisin i fan “Kot, ewe a fen isetiu mettoch meinisin fan nemenian we, pwe epwe pwapwalo pwe Kot chok i mi mettoch meinisin ngeni aramas meinisin.”

Papatais Fan Iten Ir Mi Malo?

7. Io kewe ra “papatais ren ar repwe malo,” me ifa weween ngeniir?

⁷ Ei kapas eis fan iten ekkewe ra u ngeni manausefal: “Meet weween foforun ekkewe aramas mi papataiselo fan iten ir mi malo [ren ar repwe malo, New World Translation]?” (1 Korint 15:29) Alon Paul ese wewe ngeni pwe aramas mi manau repwe papatais fan iten ir mi malo, pokiten emon me emon noun Jises chon kaeo repwe pwisin kaeo, luku, me papataiselo. (Mattu 28:19, 20; Fofor 2:41) Chon Kraist mi kepit ra “papataiselo fan iten ir mi malo” ren ar manaueni ewe sokkun manau mi alelo ngeni malo me manausefal. Ei sokkun papatais a poputa lupwen an Kot we ngun a efisata ar repwe eani ewe apilukulukun manau lon lang me a muchulo lupwen ra manausefal seni malo ngeni manau esemuch ussun emon ngun lon lang.​—Rom 6:3-5; 8:16, 17; 1 Korint 6:14.

8. Ifa ewe mettoch Chon Kraist repwe lukuluk won inaamwo ika Setan me noun kewe chon angang repwe nniirelo?

⁸ Ussun alon Paul a pwarata, ewe apilukulukun manausefal a atufichi ekkewe Chon Kraist ar repwe pwora fan feiengau me malo iteitan pokiten ar angangen afalafala ewe Muu. (1 Korint 15:30, 31) Ra silei pwe Jiowa a tongeni amanauasefalliireta ika a mumu ngeni Setan me noun kewe chon angang ar repwe nniirelo. Jiowa chok a tongeni ataielo ngunuur, are manauer, lon Keena, ewe leeni a liosueta talo fochofoch.​—Luk 12:5.

A Lamot Ach Mammasa

9. Ika ewe apilukulukun manausefal epwe alikiitukich, met sipwe oputalo?

⁹ Ewe apilukulukun manausefal a apochokkulata Paul. Lupwen a nonnom lon Efisus, neman chokkewe mi oputa i ra afiufengenni Paul me ekkewe man mwocho. (1 Korint 15:32) Ika a fen fis ena, iwe a ngaselo, ussun minne a fis ngeni Taniel lupwen a ngaselo seni ekkewe laion. (Taniel 6:16-​22; Ipru 11:32, 33) Pokiten Paul a apilukuluk won ewe manausefal, ese eani ekiekin ekkewe chon rikilo lon ranin Aisea we. Ra apasa: “Ousipwe momongo o ukun, pun lesor sipwe mala.” (Aisea 22:13, Septuagint) Ika sia mochen pwe ewe apilukulukun manausefal epwe awora ewe minen apochokkul lon manauach ussun a fori lon manauan Paul, epwe lamot ach sipwe ti senikich ena esin ekiek mi mwaal. “Ami oute mwalilo,” Paul a ourourakich. “Chienach mi ingau repwe alimengaualo ach kewe fofor murinno.” (1 Korint 15:33) Pwungun pwe, ei kapasen emmwen a weneiti sokkopaten kinikinin manauach.

10. Ifa ussun sipwe apochokkula ach apilukuluk lon ewe manausefal?

¹⁰ Ngeni chokkewe mi tipemwaramwareiti manausefal, Paul a apasa: “Oupwe miritilo, o ousap chuen fori tipis. Pun ekkoch rese sinei Kot. Ua apasata ekkeei mettoch pwe ami oupwe sau ren.” (1 Korint 15:34) Lon ei “fansoun sopolan,” a lamot pwe ach foffor epwe tipeeu ren ewe sile mi enlet ussun Kot me Kraist. (Taniel 12:4; Jon 17:3) Ach fori ena mettoch epwe apochokkulata ach apilukuluku ewe manausefal.

Manausefal Ren Met Sokkun Inis?

11. Ifa ussun Paul a awewei manausefallin ekkewe Chon Kraist mi kepit?

¹¹ Mwirin Paul a polueni pwal ekkoch kapas eis. (1 Korint 15:35-​41) Neman emon epwe eani ei kapas eis pwe epwe etipemwaramwara an emon luku ewe manausefal: “Ifa usun an ekkewe mi malo manausefal, ren menni sokkun inis repwe pwato?” Ussun chok Paul a fen pwarata, lupwen sia fotuki efou foun ira lon ewe ppwul, ewe foun a ussun ita malo atun a pukuta. Pwal ussun we chok, emon aramas mi kepit ren ngun epwe malo. Ussun chok ewe ira a maarita epwe sokko seni ewe foun, iwe, inisin ewe Chon Kraist mi kepit mi manaueta epwe pwal sokko seni inisin aramas. Inaamwo ika lapalapen manauan epwe ussun chok lapalapan mwen an we malo, nge epwe manaueta ussun eu minefoon manau ren inisin ngun mi tongeni manau lon lang. Pwungun pwe, chokkewe repwe manausefal won fonufan repwe manaueta ren inisin aramas.

12. Ifa weween “inisin lang” me “inisin fonufan”?

¹² Ussun Paul a fen apasa, inisin aramas mi sokkolo seni inisin ekkewe man. Pwal mwo nge ren inisin man, eu sokkun a sokkofesen me pwal eu. (Keneses 1:20-​25) Ewe “inisin lang” ekkewe ngun ra eani ese wewefengen lon linger ren “inisin fonufan”. Ese pwal wewefengen lingen ewe akkar, maram, me ekkewe fuu. Nge a lap lingen ekkewe mi kepit mi manausefal.

13. Me ren 1 Korint 15:42-​44, met a fotukatiu me amanauasefallieta?

¹³ Mwirin an apasawu sokkofesennin ekkeei mettoch, Paul a pwal apasa: “Epwe iei usun ewe manausefal ren ir ekkewe mi malo.” (1 Korint 15:42-​44) Paul a apasa: “Minne mi fotukatiu a tongeni morelo, nge minne epwe manausefallita esap tongeni morelo.” Eli alon Paul we ikeei ie a weneiti ewe mwich mi kepit. Minne mi fotukatiu a tongeni morolo atun malo, nge minne epwe manausefallita esap tongeni morolo, epwe limelimoch seni tipis. Inaamwo ika a itengau ren ewe fonufan, epwe manausefallita ngeni manau lon lang me eti Kraist le pwapwalo lon lingan. (Fofor 5:41; Kolose 3:4) Atun malo a fotukatiu “eu inis mi fich ngeni fituk” nge a manausefallita “eu inis mi fich ngeni ngun.” Pokiten ei mettoch mi tufich ngeni ekkewe Chon Kraist mi kepit, sipwe tongeni wenewenen luku pwe ekkoch aramas repwe pwal manaueta won fonufan.

14. Ifa ussun an Paul asokkofesenni Kraist me Atam?

¹⁴ Mwirin, Paul a asokkofesenni Kraist seni Atam. (1 Korint 15:45-​49) Atam, ewe akkaemonun mwan, “a wiliti emon aramas mi manau.” (Keneses 2:7) “Ewe Atam le sopolon”​—Jises​—“a wiliti emon ngun mi tongeni amanaua.” A fangelo manauan ussun asorun penmanau, akkom fan asengesin noun kewe mi kepit. (Mark 10:45) Lupwen ir aramas, ra ‘lapalapeni lapalapen ewe emon mi ffor seni pwul,’ nge lupwen ra manausefal repwe ussun ewe Atam le sopwolon. Pwungun pwe asorun Jises epwe efeiochu aramas meinisin mi alleasochis, kapachelong chokkewe repwe manausefal won ewe fonufan.​—1 Jon 2:1, 2.

15. Met popun ekkewe Chon Kraist mi kepit resap manaueta ren inisir inisin fituk, me ifa ussun ra manaueta atun Jises a nonnom?

¹⁵ Lupwen ekkewe Chon Kraist mi kepit ra malo, resap manaueta lon inisin aramas. (1 Korint 15:50-​53) Eu inis mi morolo a ffor seni fituk me chcha esap tongeni alemwiri minne mi tongeni ngauolo me ewe Muun lang. Ekkoch ekkewe mi kepit resap onnutelo lon malo ren fansoun langattam. Lupwen ra malo fan tuppwol atun an Jises nonnom, repwe “wililo; lon ekis chok fansoun, lon eu chok amarup.” Repwe manaueta lon eu chok seken ngeni manau lon lang ren linger me rese chuen tongeni ngauolo. Lo, lo, lo, chochoon “puluan” epwe tori 144,000.​—Pwarata 14:1; 19:7-9; 21:9; 1 Tesalonika 4:15-​17.

Pworacho Ngeni Malo!

16. Me ren Paul me ekkewe soufos loom, met epwe fis ngeni ewe malo sia fen alemwiri seni semach we mi tipis, Atam?

¹⁶ Paul a pwapwa le apasa pwe manau epwe oromalo malo tori feilfeilo chok. (1 Korint 15:54-​57) Lupwen ewe mi tongeni ngauolo me malo a siwil ren ewe ese tongeni ngauolo me malo, ekkeei kapas repwe pwonueta: “Malo, ifai om pworacho? Malo, ifai om macheu?” (Aisea 25:8; Osea 13:14) Ewe macheu mi efisata malo, tipis, me pochokkulen tipis a nom lon ewe Alluk mi apwungu aramas ngeni malo. Nge pokiten an Jises we asor me manausefal, ewe malo sia alemwiri seni Atam esap chuen pworacho.​—Rom 5:12; 6:23.

17. Ifa weween ekkewe kapas lon 1 Korint 15:58 ikenai?

¹⁷ Paul a apasa: “Iei minne, pwii achengicheng ami, oupwe likiitu, ousap mokutukut, fansoun meinisin oupwe alapalo ami fori angangen ach we Samol, pun oua fen sinei pwe ami angang weires lon ach we Samol esap lamot-mwal.” (1 Korint 15:58) Ekkena kapas ra weneiti lusun ekkewe mi kepit me noun Jises “ekkewe ekkoch siip” inaamwo ika repwe malo lon ekkeei ran le sopwoloon. (Jon 10:16) Mi lamot angangen esilefeili porausen ewe Muu, pun repwe manausefal ika ra malo. Ina popun kich noun Jiowa kewe chon angang, sipwe angang weires lon angangen ewe Samol atun sia wikitiwiti ewe ranin pwapwa wachemuk lupwen sipwe tongeni apasa: “Malo, ifai om pworacho?”

Pwonutaan Ewe Apilukulukun Manausefal!

18. Ifa pochokkulen an Paul apilukuluk lon ewe manausefal?

¹⁸ An Paul kewe kapas lon 1 Korint sopwun 15 ra affata manamanen ewe apilukulukun manausefal lon manauen Paul. A unusen luku pwe Jises a fen manaueta seni malo, me ekkewe ekkoch repwe pichilo seni lon an aramas kewe peias. A nom reom ena esin luku mi pochokkul? Paul a eani ewe ekiek pwe an kewe tufich mi alisi pwisin i chok, ra ussun “piipi chok” me epwe “lus ren mettoch meinisin” pwe epwe tongeni “sinei i [Kraist] o manamanen an manaueta.” Ewe aposel epwe tipeeu ngeni an epwe malo ussun chok Kraist pokiten ewe apilukulukun an “utasefal seni malo.” Ei sokkun manausefal a pwal eita ngeni “ewe aeuin manausefal” me ina ewe sokkun manausefal chienen Jises kewe mi kepit iteiter 144,000 repwe kuna. Ewer, ra manausefal ngeni manau lon lang, nge “ekkewe ekkoch nusun mi malo” repwe manausefal won fonufan.​—Filipai 3:8-​11; Pwarata 7:4; 20:5, 6.

19, 20. (a) Io kewe lon ewe Paipel repwe manaueta ngeni manau won fonufan? (b) Io lein chokkewe mi manausefal en ka mochen fos ngeni?

¹⁹ Ewe apilukulukun manausefal a fen pwonueta fan iten ekkewe aramas mi kepit nge ra fen malo fan tuppwol. (Rom 8:18; 1 Tesalonika 4:15-​18; Pwarata 2:10) Chokkewe mi manau seni “ewe riaffou mi lapalap” repwe kuna pwonutaan ar apilukulukun manausefal won fonufan lupwen ewe “matau a fangeta ekkewe mi malo ra nonnom lon ir, o Malo me Eitis ra fangeta ekkewe mi malo ra nonnom lon ir.” (Pwarata 7:9, 13, 14; 20:13) Emon me lein chokkewe mi manaueta ngeni manau won fonufan, Jop, ewe a fen pout seni lon malo fumon noun kewe at me ulumon noun kewe nengngin. Anchangei mwo ukuukun an pwapwa lupwen epwe souniir​—pwal pwapwaan noun Jop kewe mi malo lupwen repwe silei pwe a pwal wor fumon at me ulumon nengngin mi lioch ra uputiu mwirin ar malo!​—Hiop 1:1, 2, 18, 19; 42:12-​15.

²⁰ A ifa me watteen ewe feioch lupwen Eperiam me Sera, Aisek me Rebeka​—me pwal chommong, kapachelong “ekkewe soufos meinisin”​—ra manaueta ngeni manau won fonufan! (Luk 13:28) Emon lein ekkewe soufos, Taniel. Taniel a fen angei eu pwon pwe epwe manausefal fan nemenemen Messaia. Ren 2,500 som ier, Taniel a fen asoso lon peias, nge ren manamanen ewe manausefal, epwele ‘angei wisan lesopolan fansoun,’ ussun emon lein ekkewe “samol won fonufan meinisin.” (Taniel 12:13; Kol Fel 45:16) A ifa me watteen ewe pwapwa le etiwa sefalli ekkena aramas loom mi tuppwol me pwal pwisin inom, semom, noum at are nengngin, are pwal ekkewe ekkoch mi achengicheng ngonuk ra fen pout sonuk pokiten ewe chon oput, malo!

21. Met popun sisap ammanga ach fofforoch ngeni aramas?

²¹ Neman ekkoch lein chiechiach mi achengicheng ra fen angang ngeni Kot ren fite ier me iei ra chinnap. Chinnap a aweiresi manauer. A ifa me ochchun ach alisiir me ren ach tufich iei! Ina ussun sisap niamam pokiten ese naf ach alisiir ika repwe malo. (An Salomon Afalafal 9:11; 12:1-7; 1 Timoti 5:3, 8) Sia silei pwe Jiowa esap monukalo ekkewe mettoch mi murinno sia fori fan iten aramas, ese lifilifil ierir are nonnomur. Paul a makkei: “Iei minne, lupwen epwe wor ach fansoun, sipwe fofor-murinno ngeni aramas meinisin, nge lapaloon ngeni chon ewe einangen luku.”​—Kalesia 6:10; Ipru 6:10.

22. Tori pwonutaan ewe apilukulukun manausefal, sipwe apposa letipach le fori met?

²² Jiowa ewe “Semen umoumoch, o Koten sokkun aururu meinisin.” (2 Korint 1:3, 4) An we Kapas a aururukich me alisikich le aururu ekkewe ekkoch ren ewe apilukulukun manausefal. Tori ewe fansoun sia kuna pwonuetaan ena apilukuluk ren manauetaan ekkewe mi malo ngeni manau won fonufan, amwo sipwe ussun chok Paul, emon a eani lukuluk lon ewe manausefal. Akkaewin, amwo sipwe appiru Jises, emon a fen kuna pwonutaan an apilukulukoch lon manamanen Kot ren pwisin an manausefal. Ekiselo chok, chokkewe lon peias repwe rong an Kraist we kokko me repwe towu. Amwo ena epwe wato ngenikich auruur me chengel. Nge lap seni meinisin, amwo sipwe kilisou ngeni Jiowa, ewe emon a atufichi ach pworacho ngeni malo ren ach we Samol Jises Kraist!

Met Kopwe Polueni?

• Menni pisekin annet Paul a awora ussun an Jises manausefal?

Ifa ewe “chon oput,” me ifa ussun epwe morolo?

• Met a fen fotukatiu me manaueta ren ekkewe Chon Kraist mi kepit?

• Io kewe lon Paipel kopwe mochen fos ngeni mwirin ar manausefal?

[Sasing lon pekin taropwe 14]

Ewe aposel Paul a eani eu afalafal mi manaman ren an epwe awewei ewe manausefal

[Ekkewe sasing lon pekin taropwe 18]

Manausefallin Jop me an we famili, me chommong, chommong aramas, epwe efisata chengel wachemuk!