Asor Mi Apwapwai Jiowa, Asorun Kapasen Mwareiti I
“Oupwe fangalo inisimi usun chok asor mi manau, asor mi fel, asor Kot epwe pwapwa ren.”—ROM 12:1.
1. Met ewe Paipel a apasa ussun ekkewe asor fan ewe Allukun Moses ren aucheaar mi kauk?
“POKITEN a wor ren ewe alluk nurun chok ekkewe mettoch mi murinno repwe feito, o sap wesewesen ununur, ewe alluk ese tongeni aunusochuelo ekkewe chon arap ngeni ren chok ekkewe asor ra iseta iteiten ier meinisin.” (Ipru 10:1) Lon ena eu kapasettam mi ffatoch, ewe aposel Paul a anneta pwe ese nomofoch aucheaan ekkewe asor meinisin aramas ra fori fan ewe Alluk fan iten ewe angangen amanaua aramas.—Kolose 2:16, 17.
2. Pwata esap lamot mwaal ach sotun weweiti ekkewe poraus mi tichchik lon Paipel ussun ekkewe liffang me asor lon ewe Alluk?
2 A ita wewe ngeni pwe ewe poraus lon ewe Pentateuch ussun ekkewe liffang me asor ese lamot ngeni chon Kraist ikenai? Ren wesewesen enletin, kanoto chok ekkewe mi choni ewe Theocratic Ministry School lon ekkewe mwichefelin Chon Pwarata Jiowa won unusen fonufan ra allealo ekkewe limu puk mi akkom lon Paipel lon ekis lap seni eu ier. A mmen weires ngeni ekkoch ar repwe alleani me weweiti meinisin ekkewe poraus tichchik lon. A ita weween pwe mi lamot mwaal ar achocho ngeni? Esap fokkun ina ussun, pun “minne mi makketiu lom, a makketiu pwe sipwe kaeo, pwe epwe wor rech ach apilukuluk allim ren likiitu o aururu me ren ekkewe puk.” (Rom 15:4) Iwe, iei eu kapas eis a piita: Ifa ussun ewe poraus lon ewe Alluk ussun liffang me asor epwe tongeni emiritikich me oururukich?
Fan Iten An epwe Emiritikich me Oururukich
3. Ifa ewe mettoch mi wenewenen lamot ngenikich?
3 Inaamwo ika esap wiisach ach sipwe awora asor me ren minne ewe Alluk a affatatiu, nge mi chuen lamot ngenikich minne ekkewe asor ra fori fan iten chon Israel, weween, fan iten ach sipwe kuna omusomusen ach kewe tipis me pwapwaesini an Kot chen. Pokiten sise chuen uwouto wesewesen asor, ifa ussun sipwe tongeni kuna ekkena feioch? Iei makkeien Paul mwirin an affata tufichingauen ekkewe asorun man: “Lupwen Kraist a feitiu fonufan, a apasa, ‘Kose mo efich asoren anu are ekkewe ekkoch asor, nge ka amolata ngeniei eu inis; kose mo pwapwa ren ekkewe asor ra fisi, are ekkewe ekkoch asor fan asengesin tipis. Iwe, upwe apasata, ‘Nengeni, ua feito pwe upwe fori letipom, Kot, usun chok a fen mak usi lon taropween ewe puk.’”—Ipru 10:5-7.
4. Ifa ussun Paul a akku ngeni Jises Kraist Kol Fel 40:6-8?
4 Ren an nounou Kol Fel 40:6-8, Paul a affata pwe Jises ese war ren an epwe sopweelo ewe “asoren anu are ekkewe ekkoch asor,” ekkewe “asor ra fisi, are ekkewe ekkoch asor fan asengesin tipis,” pun lon ewe fansoun an Paul makkei ena poraus Kot ese chuen pwapwaiti ekkena mettoch. Nge Jises a war fan eu inis Seman we lon lang a fen ammolnata, iwe, lon mettoch meinisin ena inis a lollo ngeni ewe inis Kot a ammolnata lupwen a forata Atam. (Keneses 2:7; Luk 1:35; 1 Korint 15:22, 45) Pokiten i Noun Kot mi unusoch, Jises a wiiseni ewe wiis “mwirimwirin” ewe fefin, ussun Keneses 3:15 a fen oesini. Jises epwe pi pwe epwe ‘puri mokuren Setan,’ nge i epwe ‘feiengau won epinipinin pechen.’ A ina ussun an Jises wiliiti ewe minen amanaua aramas Jiowa a awora, nge ina ewe mettoch chon lukuluk ra fen eani apilukuluk won seni fansoun Epel we.
5, 6. Ifa ewe al mi lap seni meinisin, alen arap ngeni Kot, mi suuk ngeni chon Kraist?
5 Iei alon Paul lupwen a kapas ussun ewe wiis mi sokkolo aucheaan Jises a wiiseni: “Atewe ese mo sinei tipis, iei i mi Kot a fori pwe i chon tipis fan asengesich, pwe sipwe wiliti pungun Kot lon i.” (2 Korint 5:21) Ena kapas mi era “a fori pwe i chon tipis fan asengesich” epwe pwal tongeni affou ngeni ‘a fori pwe epwe eu asor fan iten tipis.’ Iei alon ewe aposel Jon: “I ewe asor ren omusomusen ach kewe tipis, iwe nge, esap ach chok, pwe pwal ren unusen fonufan.” (1 Jon 2:2, New World Translation) Iwe, inaamwo ika ren och fansoun a nom ren chon Israel eu alen arap ngeni Kot ren ar kewe asor, nge a nom ren chon Kraist eu alen arap ngeni Kot mi fokkun lap seni ena—nge iei asorun Jises Kraist. (Jon 14:6; 1 Piter 3:18) Ika sipwe pwarata pwe sia luku asorun ewe moon kepich Kot a awora me alleasochisi i, sipwe pwal tongeni kuna omusomusen ach kewe tipis me pwapwaesini an Kot chen me feioch. (Jon 3:17, 18) Esap ina eu minen ouruuru letipach? Iwe nge, ifa ussun sipwe tongeni pwarata pwe sia luku ewe asor fan iten ewe moon kepich?
6 Mwirin an awewei pwe a nom ren chon Kraist eu alen arap ngeni Kot mi fokkun lapalap, ewe aposel Paul a affata ulungat mettoch sipwe fori ren ach sipwe pwarata pwe sia luku me aucheani minne Kot a awora pokiten an tong, nge mi mak lon Ipru 10:22-25. Inaamwo ika an Paul pesepes a akkaewin weneiti chokewe repwe “tolong lon ewe leeni mi fel”—weween, chon Kraist mi kepit mi eani ewe kokkoon lang—nge a fokkun enlet pwe mi lamot ngeni aramas meinisin ar repwe auselingochu makkeien Paul kewe mi fel ika ra mochen kuna feioch seni asorun Jises fan iten omusomusen tipis.—Ipru 10:19.
Uwouto Asor mi Limoch me Unusoch
7. (a) Ifa ussun a pwalo lon Ipru 10:22 minne a fis lupwen emon epwe uwouto eu asor? (b) Epwe fet eu asor ren an epwe eu minen apwapwa ngeni Kot?
7 Iei akkomen an Paul pesepes ngeni chon Kraist: “Sipwe arap ngeni ren letipach enlet, mi ur ren luku, o ren letipach mi limelimoch seni ekiek ingau, o ren inisich mi totol ren konik mi limoch.” (Ipru 10:22) A mmen ffatoch pwe ekkena kapas ra weneiti minne a fis ren eu asor fan ewe Alluk. Mi fich ena pun ren an epwe eu minen apwapwa, eu asor epwe kawor ren eu popun mi pwung, iwe, epwe limoch me unusoch. Ewe man mi asor epwe seni ewe pwin man, weween, seni ekkewe man mi limoch, iwe, epwe “aumanau,” nge esap wor tterin. Ika ewe asor emon matchang, epwe emon lisom are muro. Ika a ina ussun lapalapen ewe asor, iwe, “epwe angei seni fan umoumoch pwe epwe wor omusomusen tipis ren emonnewe.” (Lifitikos 1:2-4, 10, 14; 22:19-25, NW) Esor lefen lon ewe asorun uwaan atake pwe lefen a liosueta minne ese pwung; me esap pwal wor chonun pulech lon, nge neman a wewe ngeni chonun foun ira pun a tongeni amwmwanna ewe asor. Lupwen ra iseta ekkewe asor won ewe roong, ra pwal ninaalong soon, pwe ina eu minen eppetin an esap mwmwaan.—Lifitikos 2:11-13.
8. (a) Epwe fet ewe aramas mi uwouto eu asor? (b) Ifa ussun sipwe tongeni pi pwe ach feffel ngeni Jiowa eu minen apwapwa ngeni?
8 Epwe fet ewe aramas mi uwouto ewe asor? Ewe Alluk a apasa pwe emon mi feito pwe epwe uta mwen Jiowa epwe limoch me esap wor mwaallin. Emon mi fen fori och mettoch mi mwaal, ese lifilifil ika met popun, epwe akkom uwouto eu asor fan iten tipis are mengiringir ren an epwe uochsefal mwen Jiowa fan limoch pwe an we asorun kek are asorun komunio epwe eu minen apwapwa ngeni. (Lifitikos 5:1-6, 15, 17) Ina minne, sia kan aucheani lamoten ach sipwe limoch le uta mwen mesen Jiowa fansoun meinisin? Ika sia mochen pwe Kot epwe pwapwa ren ach feffel ngeni i, sipwe muttir awenechara fofforuch ika sipwe ipweri an Kot kewe alluk. Sipwe muttir angei ewe alillis Kot a awora—weween, “ekkewe mwan mi asimau lon ewe mwichefel” me ewe “asor fan iten omusomusen ach kewe tipis,” Jises Kraist.—Jemes 5:14; 1 Jon 2:1, 2.
9. Ifa eu mettoch mi fokkun lamot a asokkolo ekkewe asor mi kawor fan iten Jiowa me ekkewe mi kawor fan iten ekkewe kot chofona?
9 Ewe mettoch mi akkaewin asokkolo ekkewe asor aramas ra fori fan iten Jiowa me ekkewe mi kawor ngeni ekkewe kot chofona seni chon ekkewe muu orun Israel, iei an ewe Alluk menlapei pwe esap wor och mettoch mi limengau ren chokewe mi uwouto ar kewe asor. Iei alon eu puk ussun ena lapalap mi sokkolo e nom ren ekkewe asor lon ewe Allukun Moses: “Sia kuna pwe ese pacheri fofforun pwee are kutta esissin; me ese fiti foffor mi puch, me ewe fofforun akinasa inis, are lisowu mwaal, iwe, a wesewesen pinepin foffor mi sikepwach are luangau; me esor asorun aramas; me esor asor fan iten ir mi fen malo.” Ena poraus a affata ei mettoch: Jiowa a pin, me i ese mutata are tipeeu ngeni sokkun tipis are foffor mi limengau meinisin. (Apakuk 1:13) An aramas fel ngeni i me ekkewe asor repwe mwei ngeni epwe limoch me unusoch—lon pekin inis, pekin letip, me pekin ngun.—Lifitikos 19:2; 1 Piter 1:14-16.
10. Ren ach sipwe tipeeu ngeni an Paul pesepes lon Rom 12:1, 2, ifa ussun sipwe atittina pwisin kich?
10 Pokiten ach silei ekkena mettoch, sipwe atittina unusen manauach ren ach sipwe pi pwe ach angang ngeni Jiowa eu minen apwapwa ngeni. Sisap ekieki fan eu pwe ika sipwe chok fiffiti an chon Kraist kewe mwich me ewe angangen afalafal, iwe, ese lamot met sia foffori lon ekkewe lusun fansoun lon manauach. Sisap pwal meefi pwe ach akkapwonueta angangen chon Kraist epwe ussun ita angasakichelo seni wiisach, wiisen ach sipwe alleasochisi an Kot kewe alluk lon lusun fofforuch kewe. (Rom 2:21, 22) Sisap ekiekin kuna an Kot feioch are chen ika sipwe mut ngeni och mettoch mi limengau are ese pwung mwen mesan an epwe angaua ach ekiek are foffor. Chechchemeni mwo alon Paul ei: “Iwe, upwe fonou ami pwii kena, ren umoumochun Kot, pwe oupwe fangalo inisimi usun chok asor mi manau, asor mi fel, asor Kot epwe pwapwa ren, pwe iei angangen ami fel lon pekin ngun. Ousap appiru pwomen fonufan, nge oupwe wililo ren asefosefallin letipemi, pwe oupwe pwarata minne letipen Kot, minne mi murinno o fich o unusoch.”—Rom 12:1, 2.
Akkeani Asorun Mwareiti Kot ren Letip mi Unus
11. Met a kapachelong lon ei ititin kapas, a era “sia fen pwarata,” ewe mi mak lon Ipru 10:23?
11 Lupwen Paul a mak ngeni chon Ipru, a epiieta eu mettoch mi fokkun lamot lon ewe fel mi enlet: “Sipwe akamwochu ach apilukuluk allim sia fen pwarata, o sisap mokutukut, pun ewe emon mi pwonei, i mi tuppwel.” (Ipru 10:23) Ena ititin kapas “sia fen pwarata” a wesewesen wewe ngeni “kapasen esilesil,” me Paul a pwal kapas ussun “eu asorun mwareiti [Kot].” (Ipru 13:15) A achchema ngenikich ussun ewe sokkun asor Epel, Noah, me Eperiam ra mwei ngeni Kot.
12, 13. Lupwen emon chon Israel a uwouto eu asorun kek, a pwarata met ren ena asor, me met sipwe tongeni fori ren ach sipwe pwarata ewe chok sokkun memmeef?
12 Lupwen emon chon Israel a uwouto eu asorun kek, a fori ena mettoch “me ren pwisin letipan mwen Jiowa.” (Lifitikos 1:3, NW) Ren ena sokkun asor, a pwisin uwawu och kapas esilesil, are kapasen pwarata, ussun an Jiowa kewe feioch mi somolo me an tong mi enlet ngeni noun kewe aramas. Chechchemeni mwo pwe a wor eu mettoch mi sokkolo e nom ren ewe asorun kek, nge iei an unusen karelo won ewe roong—iwe, iei eu minen lios mi fichiiti ena asor pwe a liosueta an emon angang ngeni Jiowa ren unusen letipan me unusen manauan. Iwe, pwal ussun chok, sia kan pwarata ach luku ewe asorun moon kepich me ach kilisou ren ena mettoch lupwen sia ukkuwouto ach “asorun kapasen mwareiti, weween, uwaan tinauach,” ngeni Jiowa seni wesewesen me unusen letipach.
13 Inaamwo ika chon Kraist rese ukkuwouto wesewesen asor—weween, man are uwaan atake—nge wiiser ar repwe chon pwarata ussun poraus allimen ewe Muu me repwe pwal wiisen alisi aramas ar repwe wiliiti noun Jises chon kaeo. (Mattu 24:14; 28:19, 20) En mi kan akkalamota ekkewe fansoun mi suuk ngonuk ren om kopwe ekkesilefeili poraus allimen an Kot Muu pwe epwe chommongolo ekkewe aramas mi tufichin silei ekkewe mettoch mi amwarar Kot a fen ammolnata fan iten aramas mi alleasochis? Seni wesewesen letipom en mi kan akkaea om fansoun me pochokkul le akkasukula chon mochen auseling me akkalisir pwe repwe wiliiti noun Jises chon kaeo? Ussun chok pwoannoon eu asorun kek, ach fiffiti ewe angangen afalafal fan tinikken eu minen apwapwa ngeni Kot.—1 Korint 15:58.
Chengel ren Ach Riri Ngeni Kot me Aramas
14. Ifa ussun alon Paul lon Ipru 10:24, 25 a tipeeu ngeni weween ewe asorun komunio?
14 Saingoon, Paul a epiieta ach ririfengen me chienach kewe chon Kraist lupwen sia feffel ngeni Kot. “Sipwe ekiekifichi usun ach sipwe apochokkula emon me emon lefilach lon tong o fofor-murinno. O sisap ukutiu seni ach mwichfengen, usun ekkoch ra fori, nge sipwe alolofengennikicheta, o alapalo ach achocho ngeni, pwe oua nengeni pwe ewe Ran a arapoto.” (Ipru 10:24, 25) Ekkena kapas, a era “apochokkula emon me emon lefilach lon tong o fofor-murinno,” “ach mwichfengen,” me “alolofengennikicheta,” ra achchema ngenikich ussun minne ewe asorun komunio lon Israel a fori fan asengesin noun Kot kewe aramas.
15. Ifa ussun ewe asorun komunio a tipeeufengen me an chon Kraist kewe mwich?
15 Fan ekkoch ewe kapas “asorun komunio” a affou ngeni “asor fan iten kinamwe.” Ewe kapasen Ipru fan iten “kinamwe” me ikena ie a kku lap seni eu, pun eli a esissinata pwe an emon fiti ena esin asor epwe efisata an kinamwefengen me Kot me pwal an kinamwefengen me chienan kewe chon fel. Iei alon emon sou kaeo ussun ewe asorun komunio: “Iei wesewesen eu fansoun chiechifengen mi apwapwa ren ewe Koten Pwon, iwe, a ussun ita a pwisin atekisona pwe epwe noun Israel Wasola lon ewe mongoon asor, ussun pwal mwo nge i ewe Chon Awasola Israel fansoun meinisin.” A achchema ngenikich ussun an Jises pwon: “Pun ikewe ruemon are ulumon ra mwichfengen ie fan itei, upwe pwal nonnom lefiler.” (Mattu 18:20) Iteiten fansoun sipwe fiti an chon Kraist mwich, sipwe kuna feioch seni ewe chiechifengen mi akkapochokkulakich, ekkewe lesen mi akkachungu letipach, me pwal seni ach silei pwe ach Samol Jises Kraist a nonnom leich. Ina popun, eu an chon Kraist mwich wesewesen eu fansoun atoto chengel me eu fansoun mi apochokkula ach luku.
16. Lupwen sia ekieki ewe asorun komunio, met popun a sokkolo watteen ewe chengel sia kukkuna seni an chon Kraist kewe mwich?
16 Lon ewe asorun komunio, meinisin kirisin ewe man—ewe mi apwolu affan, ewe fourupwung, kifetin ewe ammun, me lewon pechen, me pwal kirisin won nisamutun ewe siip—a kaimulo fan iten Jiowa ren an kek won ewe roong pwe epwe otuotuta. (Lifitikos 3:3-16) Kirisin ewe man a auchea me murinno seni kifetin meinisin. An kek won ewe roong a liosueta pwe minne mi nampa eu epwe asor ngeni Jiowa. An chon Kraist kewe mwich ra akkaewin eu minen atoto chengel, esap pokiten chok ach kait seniir pwe pwal pokiten ach mwareiti Jiowa. Sia kan fori ena mettoch ren ach achocho le peppeni kokkotun ach kewe mwich—fan tipetekison me pwal ren unusen ach tufich—lon ach kokkol seni letipach, ach akkauselingoch, me ach ukkuwawu meefiach lon fansoun mi fich. Ewe sou makkei kol fel a apasa, “Oupwe mwareiti ewe SAMOL! Oupwe kol ngeni ewe SAMOL echo kol mi fo, kolun mwareiti i lon ewe mwichen ekkewe aramas mi tuppwel!”—Kol Fel 149:1.
Feioch Chommong Seni Jiowa epwe Sounikich
17, 18. (a) Ifa ewe asor mi fokkun lapalap Solomon a fori lupwen a afinun ewe imwen fel lon Jerusalem? (b) Ewe afinun fan iten ewe imwen fel a atoto met sokkun feioch ren chokewe mi eti?
17 Lupwen a afinun ewe imwen fel lon Jerusalem, lon ewe afisuen maramen ewe ier 1026 B.C.E., King Solomon a fori “eu asor mi lapalap mwen Jiowa,” iwe, a wor “ewe asorun kek me ewe asorun uwaan atake me kirisin ewe asorun komunio” lon. Me lukun minne a asor lon ewe asorun uwaan atake, a pwal pacheta asorun 22,000 kowu me 120,000 siip lon ena fansoun.—1 King 8:62-65.
18 En mi tongeni ekieki watteen ewe moni me angang epwe kawor fan iten ena esin afinun mi wachemuk? Iwe nge, a ffat pwe ekkewe feioch Israel a angei a fokkun lap seni liwinin ena afinun. Le sopwoloon ena fansoun apwapwa, Solomon a “afeilai ekewe aramas. Iwe, ra afeiochu ewe king o feila ngeni en me lenian fan meseik me pwapwan leluker pokiten ekewe feioch meinisin ewe Samol mi Lapalap a awora ngeni Tafit noun we chon angang, pwal ngeni noun kewe aramasen Israel.” (1 King 8:66) A enlet makkeien Solomon ei: “Feioch seni ewe Samol mi Lapalap a awouukich, nge i esap apacha och riafou ngeni.”—An Salomon Fos 10:22.
19. Met sipwe tongeni fori ren ach sipwe angei feioch mi lapalap seni Jiowa iei me pwal tori feilfeilo chok?
19 Iei sia manau lupwen “nurun chok ekkewe mettoch mi murinno” a fen akkasiwil me “wesewesen ununur.” (Ipru 10:1) Jises Kraist, lon wiisan we, wiisen Samol Fel mi Lapalap, a fen tolong lon wesewesen lang, iwe, a fen uweialong aucheaan pwisin chchaan we pwe epwe iseta ewe minen omusomus ren ir meinisin mi pwarata ar lukuluk lon an we asor. (Ipru 9:10, 11, 24-26) Pokiten a wor ena asor mi lapalap me pwal ren ach mwei ngeni Kot ach kewe asor mi limoch me unusoch ren unusen letipach, asorun mwareiti i, kich sipwe pwal tongeni feffetalelo fan “chengel me pwapwaan letipach,” iwe, sipwe nennelo ngeni mwach kkan ren feioch mi chommong seni Jiowa.—Malakai 3:10.
Ifa Poluan me Reom?
• Ifa ussun ewe poraus lon ewe Alluk ussun asor me liffang epwe tongeni emiritikich me ouruurukich?
• Ren an epwe eu minen apwapwa eu asor, akkom epwe fet, me ifa weween ena mettoch ngenikich?
• Sipwe tongeni uwouto met sokkun liffang an epwe ussun chok eu asorun kek?
• Ifa ussun an chon Kraist kewe mwich ra ussun eu asorun komunio?
[Sasing lon pekin taropwe 12]
Jiowa a awora asorun Jises fan iten ewe moon kepich ren an epwe amanaua aramas