Pwarata Ewe Ekiekin Kraist

“Iwe, amwo ewe Kot mi awora likiitu o aururu epwe mut ngenikemi ami oupwe eani ewe chok ekiek neimi Kraist Jises a eani.”​—ROM 15:5, New World Translation.

1. Ifa ussun an emon ekiek epwe tongeni kku manauan?

ACH ekiek epwe tongeni nemeni minne epwe fis lon manauach. An emon chipwang are tinikken, an epwe eani ekiek positive are negative, an epwe songekai are kutta kinamwe, an epwe ngunungunungau are kilisou repwe fokkun tongeni nemeni an emon foffor me met aramas repwe meefi ussun i. Ren eu ekiek murinno, emon epwe tongeni pwapwa pwal mwo nge fan osukosuk watte. Nge ren emon mi eani ekiekingau, esap wor och mettoch epwe murinno, pwal mwo nge lupwen esor osukosuken manauan.

2. Ifa ussun emon epwe eani och sokkun ekiek?

² Ekkewe ekiek​—pwung are mwaal​—emon epwe tongeni kaeo. Pwungun pwe emon epwe wesewesen kaeo. Ren an kapas ussun emon upufo, Collier’s Encyclopedia a apasa: “Epwe kaeo ekkewe ekiek epwe eani, ussun chok epwe kaeo fos are pwal ekkoch tufich.” Epwe ifa ussun sipwe kaeo och sokkun ekiek? Inaamwo ika chommong mettoch epwe tongeni nemeni manauach, nge epwe watte nemenien lapalapen leeniach me chienach kkewe lon manauach. Ewe encyclopedia mi mak asan a apasa: “Sipwe kaeo are nguuri ekkewe ekiek seni ir kkewe sipwe kan chiechi ngeni.” Fite ngerou ier lom, ewe Paipel a eani eu poraus mi ussun chok ena, a era: “Emon mi chiechi ngeni aramas mi tipachem epwe tipachemelo, nge emon mi chiechi ngeni ekkewe chon tiparoch epwe feiengau.”​—Proferp 13:20; 1 Korint 15:33.

Eu Alen Ekiek Pwung

3. Io a fokkun murinno lon pekin ekiek, me ifa ussun sipwe tongeni appiru?

³ Ussun chok lon ekkewe ekkoch mettoch meinisin, a pwal ina ussun ren ewe mettoch ekiek, Jises Kraist a isetiu ewe leenien appiru. A apasa: “Pun ua ngenikemi eu leenien appiru, pwe ami oupwe fori pwal ussun chok ngang ua fori ngenikemi.” (Jon 13:15) Ika sipwe ussun chok Jises, epwe lamot ach sipwe akkom kaeofichi ussun i.a Sipwe kaeo ussun manauen Jises fan iten ach sipwe fori minne ewe aposel Paul a apasa: “Pun iei popun a fen korikemi, pwe Kraist a pwal kuna riaffou fan asengesimi, o a isetiu eu leenien appiru mwemi, pwe ami oupwe tapwelo mwirin lon ipwan.” (1 Piter 2:21) Ukukun ach tufich sia mochen ach sipwe ussun chok Jises. Iwe, a pwal wewe ngeni ach sipwe eani an ekiek.

4, 5. Rom 15:1-3 a apochokkula menni sokkun ekiekin Jises, iwe, ifa ussun ekkewe Chon Kraist repwe tongeni appiru an ekiek?

⁴ Met weween ach sipwe eani ekiekin Kraist Jises? Sopwun 15 lon noun Paul we taropwe ngeni ekkewe chon Rom a alisikich le polueni ena kapas eis. Lon ekkewe popun wokisin lon ei sopwun, Paul a kapas ussun eu lapalapen Jises mi fokkun auchea lupwen a apasa: “Iwe, kich mi pochokkul sipwe mosonoson ngeni mwaalin ekkewe aramas mi apwangapwang. Sisap apwapwai pwisin kich, sipwe apwapwai en me chon orun, pwe epwe murinnolo o feffeita. Pun Kraist ese mwo apwapwai pwisin i, nge ussun a makketiu, ‘Minne ra lalingau ngonuk, ra pwal lalingau ngeniei.’”​—Rom 15:1-3.

⁵ Ren ar repwe eani ekiekin Jises, a katou ewe kapasen pesepes ngeni ekkewe Chon Kraist pwe repwe mochen angang ngeni ekkewe ekkoch fan tipetekison, lap seni ar repwe chok apwapwai pwisin letiper. Pwungun pwe ena sokkun mochen le angang fan iten ekkewe ekkoch, ina lapalapen ir kkewe “mi pochokkul.” Jises, ewe emon mi pochokkul lon pekin luku seni aramas meinisin, a apasa ussun pwisin i: “Ussun ewe Noun-Aramas ese mwo feito pwe epwe kuna alillis seni aramas, nge a feito pwe epwe alisi aramas, o fangelo manauan pwe epwe penmanauen aramas mi chommong.” (Mattu 20:28) Kich Chon Kraist, sia pwal mochen angang fan iten ekkewe ekkoch, pachelong “ir kkewe rese pochokkul.”

6. Ifa ussun sipwe tongeni appiru an Jises ekiek ussun ekkewe fofforun u ngeni me oput?

⁶ Pwal eu lapalap Jises a pwarata ina ewe ekiek me foffor mi positive iteiten fansoun meinisin. Ese mut ngeni ekiekingauen ekkewe ekkoch aramas an epwe atai pwisin an ekiek murinno ussun an angang ngeni Kot, iwe, sipwe pwal ina ussun. Atun a kuna oput me riaffou pokiten an tuppwol lon an fel ngeni Kot, Jises a chok likiitu nge ese ngunungunungau. A silei pwe chon fonufan mi lukulukummang me wewengau repwe u ngeni ir kkewe mi sotun alisi chon orur “ren minne repwe pochokkuleta ren.”

7. Ifa ussun Jises a pwarata mosonottam, iwe, pwata sipwe pwal fori ina ussun?

⁷ Jises a pwarata ekiek murinno lon pwal ekkoch mettoch. Ese pwarata eu meefien atapwal ngeni Jiowa fan eu, nge a mosonottam lon an witiwiti pwonuetaan letipan. (Kol Fel 110:1; Mattu 24:36; Foffor 2:32-36; Ipru 10:12, 13) Pwal eu, Jises a mosonottam ngeni noun kkewe chon kaeo. A apasa ngenir: “Kaeo seniei”; pokiten i mi “mosonoson,” an kapasen emmwen a apochokkula me asoso ngunun aramas. Iwe, pokiten a “tipetekison,” ese kapas pochokkul me lamalam tekia. (Mattu 11:29) Paul a peseikich ach sipwe appiru ekkeei lapalapen an Jises ekiek lupwen a apasa: “Nge oupwe eani ei sokkun ekiek lefilemi, ussun chok ewe a wor remi lon Kraist Jises. Inaamwo ika i mi lapalapeni lapalapen Kot, nge ese mwo ekieki pwe epwe amwochu an lollo ngeni Kot. Nge a pwisin peluku itan, o a lapalapeni lapalapen emon chon kichiniwel, pun a uputiu ussun chok aramas.”​—Filipai 2:5-7.

8, 9. (a) Pwata a lamot ach sipwe achocho fan iten ach sipwe ekieki ekkewe ekkoch? (b) Pwata sisap nichipwung ika sise tongeni unusen apwonueta ewe leenien appiru Jises a isetiu mwach, iwe, ifa ussun Paul i eu leenien appiru ussun ei mettoch?

⁸ A mecheres ach sipwe apasa pwe sia mochen angang fan iten ekkewe ekkoch me sia kan akkom ekieki ussur. Nge eni ach enletin atittina pwisin ach ekiek epwe pwarata pwe letipach ese kon lien ina ussun. Pwata ese ina ussun? Aeuin, pun sia alemwiri ach sipwe akkomwa pwisin kich seni Atam me If; Oruuan, pun sia nonnom won eu fonufan mi apochokkula an aramas apwapwai pwisin letiper. (Efisus 4:17, 18) Ren ach sipwe eani ewe ekiekin ochiti ekkewe ekkoch, epwe kan wewe ngeni ach sipwe amarata eu ekiek mi touau seni ewe ekiek mwaal mi nom rech pokiten sise unusoch. Iwe, epwe wewe ngeni ach fokkun achocho ngeni.

⁹ Fan ekkoch, sipwe tongeni lichipung pokiten lapalapach kkewe ra fokkun towau seni ewe leenien appiru mi unusoch Jises a isetiu mwach. Eni sipwe tipemwaramwareiti ach tufichin eani ekiekin Jises. Nge nengeni an Paul we kapasen pesepes: “Pun ua chok meefi pwe esor och mi murinno mi nonnom lon ngang, lon fitukei. Ua tongeni meefi minne mi pwung, nge ngang use tongeni fori. Pun use mwo fori minne mi murrino, ewe ua mochen; nge minne mi ingau, ewe use mochen, iei ewe ua fori. Pun seni lon letipei ua pwapwa ren ewe allukun Kot, nge ua kuna lon kifetin inisi pwal eu alluk mi fiu ngeni allukun letipei, o mi fotekiniei ren ewe allukun tipis, ewe alluk a nonnom lon kifetin inisi.” (Rom 7:18, 19, 22, 23) Enlet, an Paul apwangapwang ra kkan eppeti i seni an epwe apwonueta letipen Kot ussun chok an a mochen, nge an ekiek​—an ekiek me memeef ussun Jiowa me An kkewe alluk​—a fokkun murinno. Iwe, epwe pwal tongeni ina ussuch.

Apwungu Ekkewe Ekiek Mwaal

10. Ifa ewe sokkun ekiek Paul a pesei ekkewe chon Filipai ar repwe amarata?

¹⁰ Epwe pwung pwe epwe lamot ngeni ekkoch ar repwe siwili ar ekiek mwaal? Ewer. Mei enlet ena wewe ekkoch Chon Kraist lon ewe aeuin senturi. Lon noun we taropwe ngeni ekkewe chon Filipai, Paul a kapas ussun ar eani ewe ekiek pwung. Iwe, a makkei: “Usaamwo fen angei ekkeei mettoch [manau lon lang ren ewe aeuin manausefal], o usaamwo fen unusoch, nge upwe chok achocho ngeni ai upwe angei, pun Kraist a fen angeiei. Iwe, ami pwii kana, use mwo ekieki pwe ua fen pwisin angei; nge eu chok me rei, upwe monukalo ekkewe mettoch mi nom mwiri, o upwe changeri ekkewe mettoch mi nom mwei, pwe upwe achocho ngeni ewe tepkiri ren winen ewe koko mi tekia, ewe koko seni Kot lon Kraist Jises. Iwe, kich mi tipen-mwan, sipwe ekieki iei ussun.”​—Filipai 3:12-​15.

11, 12. Ifa ussun Jiowa a pwarata eu ekiek murinno ngenikich?

¹¹ Alon Paul kkewe ra pwarata pwe ika emon a wiliti emon Chon Kraist, nge ese meefi lamoten an epwe feffeita, a eani eu ekiek mwaal. A tenechepwak lon an eani ekiekin Kraist. (Ipru 4:11; 2 Piter 1:10; 3:14) Weween, emonewe epwe poutmwaalilo? Aap. Kot epwe tongeni alisikich pwe sipwe siwili ach ekiek ika sia fokkun mochen. Paul a sopweilo le apasa: “Nge are oupwe ekieki och mi sokkofesen, iwe, Kot epwe pwal pwarata ngenikemi ei mettoch.”​—Filipai 3:15.

¹² Iwe nge, ika sia mochen pwe Jiowa an epwe pwarata ngenikich ewe ekiek pwung, sipwe akkapwonueta wisach. Fan iotek ach kaeo An Kot we Kapas ren alillisin ekkewe puken alillis mi kawor ren “ewe chon angang mi tuppwol o tipatchem” epwe atufichi ir kkewe mi “ekieki och mi sokkofesen” ar repwe eani eu ekiek pwung. (Mattu 24:45) Ekkewe elter Chon Kraist, ir kkewe mi seikita ren ewe ngun mi fel “pwe repwe foleni ewe mwichefelin Kot,” repwe pwapwa le awora alillis. (Foffor 20:28) Sia kilisou pwe Jiowa a chechemeni pwe kich mi apwangapwang, iwe, a awora ngenikich alillis! Iwe, sipwe etiwa.

Kaeo Seni Ekkewe Ekkoch

13. Ifa ewe lesen sia kaeo ussun ewe mettoch ekiek pwung seni porausen Job we lon ewe Paipel?

¹³ Lon Rom sopwun 15, Paul a pwarata pwe ach ekiekifichi ussun ekkewe leenien appiru lon uruwoon aramas epwe tongeni alisikich ach sipwe siwili ach ekiek. A makkei: “Pun minne mi makkeitiu lom, a makketiu pwe sipwe kaeo, pwe epwe wor rech ach apilukuluk allim ren likiitu o aururu me ren ekkewe puk.” (Rom 15:4) A lamot ngeni ekkoch noun Jiowa kkewe chon angang mi tuppwol me lom ar repwe siwili ar ekiek. Awewe chok, Job a kkan eani eu ekiek murinno. Ese tipimwaal ngeni Jiowa fan eu, iwe, ese pwal fis fan eu fan sossot an tipemwaramwareiti Kot. (Job 1:8, 21, 22) Nge, a kkan ekiekin pwarata pwungun an foffor. Jiowa a emmweni Elihu epwe epwe alisi Job le siwili an ekiek mwaal. Iwe, Job ese meefi song, nge a nguuri fan tipetekison ewe lamoten an epwe siwili an ekiek me muttir apwonueta.​—Job 42:1-6.

14. Ifa ussun sipwe tongeni ussun chok Job ika emon epwe fonoukich ussun ach ekiek?

¹⁴ Kich sipwe ussun chok Job ika emon chienach we Chon Kraist epwe esilei ngeni kich lon tong pwe sia eani och ekiek mwaal? Ussun chok Job, amwo sisap “etipisi Kot.” (Job 1:22) Ika sipwe kuna riaffou nge esor tipisich, sisap ngunungunungau are apasa pwe ach osukosuk a popu seni Jiowa. Sipwe tumunukich seni ach sipwe chok ekiekin pwarata pwungun ach kkewe foffor, nge sipwe chechemeni mwo pwe ese lifilifil met wisach lon ach angang ngeni Jiowa, nge sipwe chuen chok “chon angang mi chok mwaal.”​—Luk 17:10.

15. (a) Ifa ewe ekiek mwaal ekkoch noun Jises kkewe chon kaeo ra pwarata? (b) Ifa ussun Piter a pwarata eu ekiek murinno?

¹⁵ Lon ewe aeuin senturi, ekkoch aramas mi auseling ngeni Jises ra eani eu ekiek mwaal. Lon eu fansoun, Jises a apasa och mettoch mi weires ngenir ar repwe weweiti. Pokiten ena, “chommong me lein noun kkewe chon kaeo, lupwen ra rong, ra apasa, ‘Ei kapas mi chok forea. Io epwe tongeni auseling ena?’” A ffat pwe ir kkewe mi eani ena sokkon fos ra eani eu ekiek mwaal. Iwe, ar ekiek mwaal a amwokutur pwe resap chuen auseling ngeni Jises. Ewe Paipel a apasa: “Iwe, mwirin, chommong noun kkewe chon kaeo ra liwinlo, o rese chuen eti i le feilfetal.” Ir meinisin ra eani ewe ekiek mwaal? Aap. Ewe Paipel a sopweilo: “Iwe, Jises a kapas ngen ekkewe engol-me-ruemon, ‘Ifa ussun, ami ouse mochen pwal feilo?’ Saimon Piter a polueni: ‘Samol, io am aupwele feilo ren?’” Iwe, Piter a polueni pwisin an kapas eis: “Nge mi chok wor reom ekkewe kapasen manau esemuch.” (Jon 6:60, 66-68) Met ren an ekiek pwung! Atun epwe katou och awewe are ffatochun ekkewe wokisin mi weires ngenikich ach sipwe nguuri, esap ina ewe alen murinno ach sipwe eani ewe sokkun ekiek Piter a pwarata? Sipwe umwes ika sipwe ukutiu lon ach angang ngeni Jiowa are fos ren ekkewe mettoch mi sokko seni “ekkewe sokkun kapas murinno” pokiten a weires ngenikich ach sipwe muttir weweiti och poraus!​—2 Timoti 1:13.

16. Ifa ewe ekiek mi fokkun mwaal ekkewe nouwisen lamalamen Jus ra pwarata lon fansoun Jises?

¹⁶ Ekkewe nouwisin lamalamen Jus lon ewe aeuin senturi ra tenechepwak lon ar pwarata ewe sokkun ekiek Jises a eani. Ar oput le auseling ngeni Jises a pwapwalo lupwen a amanauasefalli Lasares. Ren ir mi eani ewe ekiek pwung, ena manaman epwe eu pisekin annet pwe Jises a feito seni Kot. Iwe nge, sia allea: “Iei minne, ekkewe samol-fel mi lap, pwal ekkewe Farisi, ra amwichafengenni ewe mwichen sou nemenem, o ra apasa, ‘Meeta sipwe fori? Pun atewe a fori chommong esisin. Are sia mut ngeni i iei ussun, iwe, aramas meinisin repwe luku i. O ekkewe re Rom repwe feito, o repwe atailo leeniach mi fel pwal aramasach.’” Met ra ekiekin fori? “Iwe, seni ewe chok ran, ra pwungupwungfengen ren ar repwe tongeni nielo i.” Iwe, lukun ar rauangau pwe repwe nielo Jises, ra pwal achocho le nielo ewe pisekin pwarata mi manau pwe i ewe chon fori manaman. “Iwe, ekkewe samol-fel mi lap ra pwungupwungfengen pwe repwe pwal nielo Laseres.” (Jon 11:47, 53; 12:9-11) A fokkun anioput ika sipwe eani ena sokkun ekiek pwe sipwe osukosuk are song ren ekkewe mettoch sipwe ita fokkun pwapwa ren! Ewer, ina eu minen efeiengau!

Akkappiru an Kraist Ekiek Pwung

17. (a) Fan met sokkun lapalap Taniel a pwarata eu ekiek mi pwora? (b) Ifa ussun Jises a pwarata pwe a pwora?

¹⁷ Noun Jiowa kkewe chon angang ra akkamwochu eu ekiek pwung. Lupwen ekkewe chon oput Taniel ra rauangau pwe epwe wor eu alluk mi pinei an aramas iotek ngeni emon kot are emon mwan ese lifilifil chilon chok ewe king ren 30 ran, Taniel a silei pwe epwe kku an riri ngeni Jiowa Kot. Epwe ukkutiu seni an iotek ngeni Jiowa ren 30 ran? Aap, fan pwora a sopweilo an ikkiotek ngeni Jiowa fan ulungat iteiten ran, ussun eorenian. (Taniel 6:6-17) Iwe, a pwal ina ussun Jises pun ese niuokusiti ekkewe chon u ngeni i. Lon eu Ranin fel, a chuuri emon mwan mi malo efoch poun. Jises a silei pwe chommong chon Jus ikkewe ie repwe oput ika epwe achikara emon lon ewe Ranin fel. Iwe, a tingorer ar repwe uwau meefier ussun ena mettoch. Lupwen ra chok fanafanelo, Jises a achikarata ewe mwan. (Mark 3:1-6) Jises ese ukkutiu fan eu seni an apwonueta wisan ika a pwung an epwe foffori.

18. Pwata ekkoch ra u ngenikich, nge epwe ifa ussun meefiach ussun ar ekiek mwaal?

¹⁸ Noun Jiowa kkewe Chon Pwarata ikenai ra pwal weweiti ewe lamoten ar resap niuokusiti fofforingauen ekkewe chon u ngenir. Ika esap ina ussur, resap pwapwarata an Jises ekiek. Chommong aramas ra u ngeni noun Jiowa kkewe Chon Pwarata, ekkoch pokiten rese sileifichi ekkewe poraus mi enlet me pwal ekkoch pokiten ar oputa ekkewe Chon Pwarata are masouen ar afalafal. Nge sisap mut ngeni ar ekiekin oputakich an epwe kku ach ekiek pwung. Sisap mut ngeni ekkewe ekkoch ar repwe nemeni ach fel.

19. Ifa ussun sipwe tongeni pwarata ewe chok sokkun ekiek Jises Kraist a eani?

¹⁹ Jises a pwapwarata eu ekiek mi murinno ngeni noun kkewe chon kaeo me an Kot kkewe kokkot iteiten fansoun meinisin, inaamwo ika epwe weires ngeni. (Mattu 23:2, 3) Sipwe akkappiru an we leenien appiru. Pwungun pwe rese unusoch pwich kkewe, nge a pwal ina ussuch. Iwe, ia sipwe tongeni kuna me ia chienach kkewe mi enletin tuppwol nukun ach mwicheichin pwich kkewe won unusen fonufan? Jiowa esaamwo ngenikich weweochun an we Kapas meinisin, nge menni lamalam ra silei lap seni ach? Iwe, sipwe akkamwochu ewe ekiek pwung iteiten fansoun meinisin, ewe ekiek pwung Jises Kraist a eani. Iwe, pwal och, epwe pwal pachelong ach silei ifa ussun sipwe witiwit won Jiowa, ussun ewe poraus sipwe kaeo lon ewe lesen mi kukumwir.

[Pworous fan]

En mi Tongeni Awewei?

• Ifa ussun lapalapen ach ekiek epwe kku manauach?

• Awewei mwo ewe ekiekin Jises Kraist.

• Met sipwe tongeni kaeo seni an Job ekiek?

• Ifa ewe ekiek pwung sipwe eani fan sossot?

[Sasing lon pekin taropwe 17]

Emon Chon Kraist mi eani eu ekiek pwung epwe sotun alisi ekkewe ekkoch

[Sasing lon pekin taropwe 19]

Ach kaeo an Kot we Kapas fan iotek epwe alisikich ach sipwe eani ekiekin Kraist