Ka Fokkun Aucheani An Jiowa Kkewe Kapasen Achechem?
“Nguni a akkamwochu om kkewe kapasen achechem, iwe, ua fokkun aucheani ir chapur.”—KOL FEL 119:167, New World Translation.
1. Ia sipwe akkaeuin kuna me ie an Jiowa kkewe kapasen achechem?
JIOWA a mochen pwe noun kkewe aramas repwe pwapwa. Pwungun pwe ren ach sipwe kuna pwapwa enlet, epwe lamot ach sipwe feffetal lon an Kot kkewe alluk me fon. Ren ach sipwe fori ena mettoch, a lamot ngenikich ekkewe minen achechem. Ekkeei mettoch a mak lon ewe Paipel fan chommong, akkaeuin lon Kol Fel 119, eni makkeien Hesekaia seni ewe muun Juta. Ei kol mi amwarar a poputa ren ekkewe kapas: “Mi pwapwa ir mi esor tipis lon aler, ir mi feffetal lon allukun Jiowa. Mi pwapwa ir mi alleasochisi an kkewe kapasen achechem; ren unusen letiper ra kukutta i.”—Kol Fel 119:1, 2, NW.
2. Ifa ussun an Kot kkewe kapasen achechem a riri ngeni pwapwa?
2 Sipwe ‘feffetal lon allukun Jiowa’ ren ach sipwe kaeo ewe enlet seni an Kapas me apwonueta lon manauach. Iwe nge, pokiten kich sise unusoch, epwe lamot ngenikich ekkewe kapasen achechem. Ewe kapas lon fosun Ipru mi wewe ngeni “kapasen achechem” a wewe ngeni an Kot achema ngenikich ussun an kkewe alluk, ekkewe kapasen fon, me ekkewe kapasen emmwen. (Mattu 10:18-20) Sipwe pwapwa ika sipwe chok likiitu lon ach alleasochisi ekkena kapasen achechem, pun repwe tumunukich seni ekkewe minen turulo lon pekin ngun mi popu seni osukosuk me letipechou.
Akkamwochu an Jiowa kkewe Kapasen Achechem
3. Seni Kol Fel 119:60, 61, met sipwe eani lukuluk won?
3 An Kot kkewe kapasen achechem ra achengicheng ngeni ewe sou kol, ewe mi eani ewe kol: “Ua chok muttir, usap mang, pwe upwe alleasochisi om kkewe alluk. Inaamwo ika selin ekkewe aramas mi ingau ra seraei, nge usap monuki om alluk.” (Kol Fel 119:60, 61) An Jiowa kkewe kapasen achechem ra alisikich pwe sipwe likiitu fan riaffou pokiten ach achifoua pwe Semach we lon lang epwe tongeni poku senikich ewe selin eppet an ekkewe chon u ngenikich. Mwirin och fansoun, epwe angasakichelo seni ekkewe minen eppet pwe sipwe tongeni apwonueta ewe angangen afalafala ewe Muu.—Mark 13:10.
4. Epwe ita ifa meefiach ussun an Kot kkewe kapasen achechem?
4 Fan ekkoch, Jiowa a apwungukich ren an kkewe kapasen achechem. Iwe, sipwe aucheani ena sokkun minen apwung iteiten fansoun meinisin, ussun chok ewe sou kol. Lon an we iotek, a apasa ngeni Kot: “Om kkewe kapasen achechem, iei ekkewe mettoch ua pwapwa ren . . . ua aucheani om kkewe kapasen achechem.” (Kol Fel 119:24, 119, NW) An Kot kkewe kapasen achechem mi nom rech ra chommong seni minne a nom ren ewe sou kol. Ekkewe fitepuku wokisin seni ewe Tesin Ipru mi mak lon ewe Tesin Krik rese chok achema ngenikich ussun an Kot kkewe kapasen emmwen ngeni noun kkewe aramas fan ewe Alluk, nge pwal an kkewe kokkot ngeni ewe mwichefelin Chon Kraist. Lupwen Kot a kuna pwe epwe murinno an epwe achema ngenikich ussun och mettoch seni an kkewe alluk, sipwe kilisou ren ena sokkun emmwen. Iwe, ren ach sipwe ‘akkamwochu an Jiowa kkewe kapasen achechem,’ sipwe tumunukich seni ekkewe minen otupotup mi aletipengaua ewe Chon Forikich me atai ach pwapwa.—Kol Fel 119:31.
5. Ifa ussun sipwe tongeni tongei chapur an Jiowa kkewe kapasen achechem?
5 Epwe ifa ukukkun ach tongei an Jiowa kkewe kapasen achechem? Ewe sou kol a eani ewe kol: “Nguni a akkamwochu om kkewe kapasen achechem, ua fokkun tongei ir chapur.” (Kol Fel 119:167, NW) Sipwe tongei chapur an Jiowa kkewe kapasen achechem ika sipwe eani ewe ekiek me ngurir pwe ir och kapasen pesepes seni emon Sam mi fokkun tongeikich. (1 Piter 5:6, 7) A lamot ngenikich an kkewe kapasen achechem, iwe, ach tonger epwe mammarita atun sipwe kuna ifa ussun repwe efeiochukich.
Pwata A Lamot ngenikich An Kot kkewe Kapasen Achechem
6. Ifa eu popun epwe lamot ngenikich an Jiowa kkewe kapasen achechem, iwe, met epwe alisikich pwe sipwe chechemenir?
6 Iei eu popun a lamot ngenikich an Jiowa kkewe kapasen achechem, pun a fokkun mecheres ach sipwe monukalo poraus. The World Book Encyclopedia a apasa: “Ren fetalin fansoun, epwe wattelo an aramas monuki poraus. . . . Eni a fen fis ngonuk pwe kese tongeni chechemeni iten emon are pwal eu sokkun poraus a lama sonuk nge ita kopwe resin chechemeni. . . . Ena sokkun fansoun kese tongeni chechemeni a fis fan chommong, iwe, a iteni “tufichingauen chechemeni”. Ekkewe sou tipatchem ra alollo ngeni an emon sotun kutta eu pisek lon eu ruum mi ur ren chommong sokkopaten pisek. . . . Ren om kopwe chechemeni eu poraus, epwe murinno ika kopwe kaeofichi ena poraus langattam fansoun mwirin om ekieki pwe ka fen unusen weweiti.” Ach kakkaeo epwe alisikich le chechemeni an Kot kkewe kapasen achechem me alleasochisir fan iten ach sipwe kuna feioch seni.
7. Pwata a lamot ikenai an Kot kkewe kapasen achechem lap seni lom?
7 A lamot ngenikich an Jiowa kkewe kapasen achechem ikenai lap seni lom pun fonufan a chok ngangaualo lap seni me lom lon unusen uruwoon aramas. Ika sipwe alleasochisi an Kot kkewe kapasen achechem, sipwe eani ewe sokkun mirit fan iten ach sipwe tumunukich pwe sisap tupulo me fetal won an ewe fonufan al mi ngau. Ewe sou kol a apasa: “Ua wewe lap seni ai kkewe sense meinisin, pun ua chok ekieki ussun om kkewe kapasen achechem. Ua wewefichi lap seni ekkwe aramas mi chinnap, pun ua alleasochisi om kkewe afalafal. Ua amwochu pechei seni ekkewe al mi ingau meinisin, pwe upwe alleasochisi om kapas.” (Kol Fel 119:99-101, NW) Ren ach sipwe alleasochisi an Kot kkewe kapasen achechem, sisap fetal won “ekkewe al mi ingau meinisin” nge sipwe tumunukich seni ach sipwe ussun chok ekkewe aramasen fonufan mi “nonnom lon rochopwak, pokiten ar ekiek, manauer mi sokkoseni manauen Kot.”—Efisus 4:17-19.
8. Ifa ussun sipwe tongeni lipwakochulo fan iten ach sipwe pworacho ngeni ekkewe sossotun ach luku?
8 An Kot kkewe achechem a pwal lamot pun ra apochokkulakich pwe sipwe likiitu fan ekkewe chommmong sossot repwe torikich lon ei “fansoun le sopolon.” (Taniel 12:4) Ika ese wor ekkena sokkun kapasen achechem, sipwe wiliti ‘chon rongorong chok.’ (Jemes 1:25) Nge ach pwisin kakkaeo me ach kaeofengen ren ewe mwichefel ren alillisen ekkewe puk seni “ewe chon angang mi tuppwol me tipatchem” epwe alisikich pwe sipwe sopwoch fan sossot. (Mattu 24:45-47) Ekkena minen alillis lon pekin ngun repwe atufichikich pwe sipwe silei met epwe lamot ach sipwe fori pwe sipwe apwapwai Jiowa lupwen epwe torikich fansoun weires.
Lamoten Ach kkewe Mwich
9. Io kkewe “liffang lon ekkewe mwan,” me ifa ussun ra alisi chiener kkewe chon luku?
9 Eu minen alillis ren an Kot kkewe kapasen achechem a kan kawor ngenikich lon an Chon Kraist kkewe mwich, ikkewe a katou me ie ekkewe kapasen emmwen seni ekkewe elter mi seikita. Ewe aposel Paul a makkei pwe lupwen Jises “a feita won, a emmwenata chommong chon eolo; o a pwal awora liffang lon ekkewe mwan.” Iwe, Paul a pwal apasa: “[Kraist] a ngeni ekkoch pwe repwe wiseni chon kuno, ekkoch soufos, ekkoch chon afalafal, ekkoch chon mas me sense, pwe repwe awenechara ekiekin ekkewe aramas mi fel, o repwe fori ewe angangen alisi, o repwe aufichieta ewe inisin Kraist.” (Efisus 4:8, 11, 12, NW) Sia kilisou pwe ekkeei “liffang lon ekkewe mwan” —ekkewe elter mi seikita—ra emmweni ach ekiek ngeni an Jiowa kkewe kapasen achechem lupwen sipwe mwichfengen lon ach fel!
10. Ifa menlapen Ipru 10:24, 25?
10 Ach kilisou ngeni ekkewe minen alillis seni Kot epwe amwokutukich pwe sipwe fiti ekkewe nimu mwich an ewe mwichefel iteiten wiik. Paul a apochokkula lamoten ach sipwe mwichfengen iteitan. A makkei: “O sipwe ekiekifichi ussun ach sipwe apochokkula emon me emon lefilach lon tong o foffor-murinno. O sisap ukutiu seni ach mwichfengen, ussun ekkoch ra fori, nge sipwe alolofengennikicheta, o alapalo ach achocho ngeni, pwe oua nengeni pwe ewe ran a arapoto.”—Ipru 10:24, 25.
11. Ifa ussun ekkewe mwich meinisin iteiten wiik ra kan efeiochukich?
11 En mi aucheani met ekkewe mwich ra fori fan itach? Iteiten wiik, ewe kaeo lon Ewe Leenien Mas a apochokkula ach luku, a alisikich le alleasochisi an Jiowa kkewe kapasen achechem, me a alikiitukich fan “ngunun ewe fonufan.” (1 Korint 2:12; Foffor 15:31) Lon ewe Public Meeting, a katou seni ekkewe chon afalafal ekkewe kapasen emmwen seni an Kot we Kapas, pachelong an Jiowa kkewe kapasen achechem me an Jises “kapasen manau esemuch” mi amwarar. (Jon 6:68; 7:46; Mattu 5:1–7:29) Lon ewe Theocratic Ministry School, sipwe tongeni lipwakochulo lon ach asukula aramas. Ewe Sevice Meeting a alisikich le amurinnolo ach afalafala ewe kapas allim imw-me-imw, lupwen sipwe liwiniiti aramas, lupwen sipwe kaeo ngeni aramas ewe Paipel, me lon pwal ekkoch kinikinin ach angangen afalafal. Pokiten a chokisikis chon eu me eu puk study, a awora ngenikich fansoun ach sipwe uwau ach memeef, nge fan chommong mi kkan katou an Kot kkewe kapasen achechem.
12, 13. Ifa ussun noun Kot kkewe aramas lon eu fonuen Eisia ra pwarata ar aucheani an chon Kraist kkewe mwich?
12 Ach fiffiti ekkewe mwich an ewe mwichefel iteitan epwe achema ngenikich ussun an Kot kkewe alluk me alisikich pwe sipwe akkamwochu ach pochokkul lon pekin luku lon fansoun maun, lon fansoun weires lon pekin moni, me ekkewe ekkoch sossotun ach luku. 70 Chon Kraist mi su seni imwer kkewe me nonnom lein petewel lon eu fonuen Eisia ra fokkun meefi lamoten ekkewe mwich. Pokiten ra lukuchar lon ar mochen mwimwichfengen iteitan, ra liwiniiti sopwur we mi talo lon ewe maun, iwe, ra atomwatiu me uwei minne ra tongeni seni ewe Kingdom Hall me ra auetasefalli lon ewe woluwol.
13 Lon pwal eu kinikinin ena chok fonu, noun Jiowa kkewe aramas ra chuen tinikken lon ar angang ngeni Kot mwirin ar likiitu fitu ier fan riaffoun maun. Emon a eisini emon elter lon ena leeni: “Ifa ewe minen alillis ngenikemi pwe oupwe nonnomfengen?” Ifa poluan? “Lon ekkewe 19 ier, ese fis fan eu pwe esap fis ekkewe mwich. Fan ekkoch, pokiten a pung pakutang are pwal ekkoch osukosuk, ekkoch pwich kkewe rese tongeni tori ewe leenien mwich, nge a chok fiffis ekkewe mwich.” Ekkena brother me sister mi achengicheng ra fokkun aucheani lamoten ar resap ‘ukutiu seni ar mwichfengen.’
14. Met sia kaeo seni fofforun ewe chinnap Anna?
14 Ewe fefin, 84 ierin itan Anna, ewe mi ma seni puluan we, “a kkan chok nonnom lon ewe imwenfel.” Mwirilon, a nonnom lupwen ra walong ewe monukol Jises ekisilo chok mwirin uputiuan. (Luk 2:36-38, NW) Ka akkachocho ngeni pwe kesap etiwalo ekkewe mwich? Ren ukukun om tufich, ka sotun nonnom fan iten iteiten afalafal meinisin lon ekkewe mwichelap? Ekkewe afalafal mi apochokkul ngenikich lon ekkena mwich a affata pwe Semach lon lang a tongei noun kkewe aramas. (Aisea 40:11) Ekkena fansoun ra pwal efisata pwapwa, iwe, ach fiffitir epwe pwarata ach kilisou ren an Jiowa kkewe kapasen achechem.—Nehemaia 8:5-8, 12.
Imulo ren an Jiowa kkewe Kapasen Achechem
15, 16. Ifa ussun ach alleasochisi an Jiowa kkewe kapasen achechem epwe kku ach kkewe foffor?
15 Ach alleasochisi an Kot kkewe kapasen achechem epwe aimukichelo seni ei fonufan mi ngau. Awewe chok, ach alleasochisi an Kot kkewe kapasen achechem epwe tumunukich seni ewe fofforun lisou-mwaal. (Tuteronomi 5:18; Proferp 6:29-35; Ipru 13:4) Sipwe tongeni sopwoch le u ngeni ach ekiekin kapas chofona, pwor, are solani pisekin aramas ren ach sipwe akkapwonueta an Kot kkewe kapasen achechem. (Ekistos 20:15, 16; Lefitikos 19:11; Proferp 30:7-9; Efisus 4:25, 28; Ipru 13:18) Ach alleasochisi an Kot kkewe achechem repwe pwal eppetikich seni ach sipwe liwiningau ngeni ekkewe ekkoch, ach sipwe akkamwochu ach song ngeni emon, are ach sipwe pweni emon.—Lifitikos 19:16, 18; Kol Fel 15:1, 3.
16 Ren ach sipwe alleasochis ngeni an Kot kkewe kapasen achechem, sipwe limelimoch, are imu seni ekkewe ekkoch fan iten ach angang ngeni. Iwe, a ifa me watten lamoten ach sipwe imulo seni ei fonufan! Lon an iotek ngeni Jiowa lon ewe amuchuloon pwinin manauan won ei fonufan, Jises a eani eu tingor fan iten noun kkewe chon appiru: “Ua fen ngenir om kapas nge ewe fonufan a oput ir; pun ir resap seni fonufan, ussun chok ngang usap seni fonufan. Usap tingor pwe kopwe angei ir seni fonufan, nge kopwe chok amwochu ir seni ewe mi ingau. Esap ir seni fonufan, ussun chok ngang usap seni fonufan. Kopwe epinalo ir ren ewe enlet, om kapas mi enlet.” (Jon 17:14-17) Sipwe akkaucheani an Kot we Kapas, ewe a aimukichelo fan iten an angang mi pin.
17. Met epwe tongeni fis ika sipwe tunalo an Kot kkewe kapasen achechem, iwe, met sipwe fori?
17 Kich noun Jiowa kkewe chon angang, sipwe mochen pwe Jiowa epwe ekketiwa ach angang ngeni. Iwe nge, ika sipwe tunalo an Kot kkewe kapasen achechem, sipwe tongeni tupulo ren ngunun ei fonufan mi pwapwalo lon an kkewe fos, puk, minen apwapwa me urumot, pwal an kkewe foffor. Iwe, sise fokkun mochen wiliti chon tongei moni, chon sikasini, lamalam tekia, sap meefi kilisou, chon afangema, aramas mi mocho, chon tumunungau, angolsa, chon aucheani chok minne sipwe pwapwa ren nge sise tongei Kot—ikkeei ekkoch chok me lein ekkewe lapalap ir mi touau seni Kot ra lapalapeni. (2 Timoti 3:1-5) Pokiten sia nonnom le muchuloon ekkewe ranin le sopolon ei otot mi ingau, sipwe mochen tingor alillis seni won pwe sipwe tongeni akkalleasochisi an Jiowa kkewe kapasen achechem me ‘mammasa me ren an we kapas.’—Kol Fel 119:9.
18. Met ach alleasochisi an Kot kkewe kapasen achechem epwe amwokutukich ach sipwe fori?
18 An Jiowa kkewe kapasen achechem rese chok achema ngenikich ussun ekkewe mettoch sisap foffori. Ach alleasochis ngeni an kkewe kapasen achechem epwe amwokutukich, epwe achungukich pwe sipwe unusen lukuluk won Jiowa me tongei i ren unusen letipach, ngunuch, ach ekiek, me ach pochokkul. (Tuteronomi 6:5; Kol Fel 4:5; Proferp 3:5, 6; Mattu 22:37; Mark 12:30) An Kot kkewe kapasen achechem epwe pwal amwokutukich pwe sipwe tongei chon oruch kkewe. (Lefitikus 19:18; Mattu 22:39) Sipwe akkaeuin pwarata ach tongei Kot me chon oruch kkewe ren ach sipwe foffori ewe letipen Kot me afalafala ekkewe ekkoch ewe “sile ussun Kot” mi amanau.—Proferp 2:1-5.
Akkalleasochisi An Jiowa kkewe Kapasen Achechem A Wewe ngeni Manau!
19. Ifa ussun sipwe tongeni aiti ngeni ekkewe ekkoch pwe repwe kuna alillis me feioch seni ar repwe alleasochisi an Jiowa kkewe kapasen achechem?
19 Ika sipwe alleasochisi an Jiowa kkewe kapasen achechem me alisi ekkewe ekkoch pwe repwe pwal foffori ena, sipwe amanaua pwisin kich me ir kewe mi auseling ngenikich. (1 Timoti 4:16) Ifa ussun sipwe tongeni aiti ngeni ekkewe ekkoch pwe repwe kuna alillis me feioch ren ar alleasochisi an Jiowa kkewe kapasen achechem? Ren ach sipwe akkapwonueta ekkewe kapasen emmwen lon pwisin manauach. Ir kkewe mi “fil ngeni manau esemuch” repwe tongeni kuna pisekin annet pwe ewe alen manau lon an Kot we Kapas a murinno seni meinisin. (Foffor 13:48) Repwe pwal kuna pwe ‘Kot a wesewesen nom rech,’ iwe, repwe mochen fitikich lon ach fel ngeni ewe Samol mi Unusen Tekia, Jiowa.—1 Korint 14:24, 25.
20, 21. Met an Kot kkewe kapasen achechem me an we ngun repwe atufichikich ach sipwe fori?
20 Ren ach sipwe kakkaeo ewe Paipel, akkapwonueta minne sia fen kaeo, me ekketiwa an Jiowa kkewe kokkotun alillis, epwe fokkun watte ach tongei an kkewe kapasen achechem. Ika sipwe alleasochisir, ekkeei kapasen achechem repwe alisikich pwe sipwe “pwilitalong ewe lapalap mi fo, ewe mi forieta ussun lapalapen Kot lon ewe pwung mi enlet pwal ewe tuppwol mi enlet.” (Efisus 4:20-24, NW) An Jiowa kkewe kapasen achechem me an we ngun mi fel repwe atufichikich ach sipwe pwarata tong, pwapwa, kinamwe, mosonoson, kirokiroch, lipwakoch, luku, tipefesir, forfichi—ekkewe lapalap mi fokkun sokko seni lapalapen ewe fonufan mi nom fan nemenien Setan! (Kalesia 5:22, 23; 1 Jon 5:19) Ina minne, sipwe tongeni kilisou lupwen epwe torikich kapasen achechem ussun an Jiowa kkewe alluk atun sipwe pwisin kaeo Paipel, seni ekkewe elter mi seikita, lon ach kkewe mwich, me ekkewe mwichelap.
21 Pokiten ach alleasochis ngeni an Jiowa kkewe kapasen achechem, sipwe tongeni pwapwa, pwal mwo nge atun sipwe kuna riaffou-mwaal fan iten minne mi pwung. (luk 6:22, 23) Sipwe eani lukuluk won Jiowa pwe epwe selanikich seni ekkewe minen efeiengau. A akkaeuin lamot iei lupwen a fis ewe angangen amwichafengenni ekkewe muu meinisin fan iten ewe “maun lon ewe ran mi lap, ranin Kot mi Lapalap” lon Armaketon.—Pwarata 16:14-16.
22. Epwe met meefiach ussun ekkewe kapasen achechem seni Jiowa?
22 Ika sipwe angei ewe liffangen manau esemuch seni chenin Kot, epwe lamot ach sipwe tongei chapur an Jiowa kkewe kapasen achechem me akkalleasochisir ren unusen letipach. Sipwe eani ngunun ewe sou kol, ewe emon mi kolu: “Om kkewe kapasen achechem mi chok pwung feilfeilo chok. Kopwe atipatchemaei pwe upwe manau.” (Kol Fel 119:144, NW) Iwe, sipwe pwal pwarata ewe sokkun tipeppos mi pwapwalo lon alon ewe sou kol: “Ua kokkoruk [Jiowa]. Kopwe angasaei, pwe upwe alleasochisi om kkewe kapasen achechem.” (Kol Fel 119:146, NW) Ewer, ren kapas me foffor, sipwe annetata pwe sia wesewesen tongei an Jiowa kkewe kapasen achechem.
Ifa Ussun Kopwe Polueni?
• Met meefien ewe sou kol ussun an Jiowa kkewe kapasen achechem?
• Pwata a lamot ngenikich an Kot kkewe kapasen achechem?
• Ifa ussun ach kkewe mwich ra alisikich ren an Kot kkewe kapsen achechem?
• Ifa ussun an Jiowa kkewe kapasen achechem ra aimukichelo seni ei fonufan?
[Picture on page 27]
Ewe sou kol a tongei chapur an Jiowa kkewe kapasen achechem
[Pictures on page 28, 29]
Ren om tapweilo mwirin an Anna we leenien appiru, en mi akkachocho ngeni om kesap etiwalo ekkewe mwich?
[Picture on page 30]
Ach alleasochisi an Jiowa kkewe kapasen achechem epwe aimukichelo pwe sipwe limelimoch me fich ngeni an we angang