Mut Ngeni Alon Kot An Epwe Asarama Om We Al
“Om kapas . . . saramen ai al.”—KOL FEL 119:105.
ALON Jiowa epwe asarama ach we al ika pwe sipwe mut ngeni. Ren ach sipwe kuna alillis seni ewe saram lon pekin ngun, a lamot ach sipwe tinikken le kakkaeofichi an Kot we Kapas me apwonueta an kewe kapasen fon. Mwirin chok ach sipwe fori ena mettoch, sipwe tongeni eani ekiekin ewe sou makkei ewe kol fel, a era: “Om kapas a wewe ngeni eu lamp ren pechei, o pwal saramen ai al.”—Kol Fel 119:105.
2 Iwe iei, sipwe kaeo Kol Fel 119:89-176. A ifa me watten ewe silelap a kawor lon ekkeei wokisin, iwe, ra tettelilo lon 11 wokisin! Iwe, repwe tongeni alisikich le aleni ewe al ngeni manau esemuch.—Mattu 7:13, 14.
Pwata Sipwe Aucheani Alon Kot?
3 Ach aucheani alon Jiowa epwe efisata ach lukuchar lon pekin ngun. (Kol Fel 119:89-96) Ewe sou makkei ewe kol fel a kolu: “Samol, om kapas mi chok murinno lon ekkewe lang feilfeilo chok. . . . Ka fen foriata fonufan, o a pwal nukuchar.” (Kol Fel 119:89, 90) Ren alon Kot—an “kewe alluk lon ekkewe lang”—weween, ewe akkar, ewe maram, me ekkewe fu ra mwokutukut lon en me pwisin leenian me ewe fonufan epwe lukuchar tori feilfeilo chok. (Jop 38:31-33; Kol Fel 104:5) Sipwe tongeni lukuluk won iteiten kapas a katou seni auen Jiowa; minne Kot a apasa epwe “wesewesen fis” ren pwonuetaan letipan.—Aisea 55:8-11.
4 Ewe sou makkei ewe kol fel epwe ‘poutmwalilo lon an riaffou ika ese fen pwapwaesini an Kot we alluk.’ (Kol Fel 119:92) An we riaffou ese popu seni ekkewe chon ekis; ekkewe chon Israel mi atai alluk ra oputa i. (Lifitikos 19:17) Nge ena mettoch ese aosukosuka i, pun a tongei an Kot we alluk mi apochokkula i. Lon Korint, ewe aposel Paul a kuna “feiengau seni pwipwi chofona,” eni a kapachelong ekkewe “chon kuno mi chofona chok” ra kukkutta minne repwe tongeni tipimwaal ngeni i. (2 Korint 11:5, 12-14, 26) Iwe nge, Paul a pworacho lon pekin ngun pokiten an pwapwaesini alon Kot. Pokiten kich sia pwapwaesini an Kot we Kapas me apwonueta minne a apasa, sia tongei pwiich kewe. (1 Jon 3:15) Pwal mwo nge an ewe fonufan oputakich ese efisi ach monukalo an Kot kewe kapasen emmwen. Sipwe akkapwonueta letipan fan tipeeu fiti tong ngeni pwich kewe atun sia pwapwaesini ach angang ngeni Jiowa tori feilfeilo chok.—Kol Fel 119:93.
5 Lon ach apasaou ach acheni Jiowa, eni sipwe tongeni iotek usun ewe sou mak: “Ngang emon noum aramas, iwe, kopwe amanauaei; pun ua kukutta om kewe afalafal.” (Kol Fel 119:94) King Asa a kukkutta Kot me limetau seni Juta fel mi chofona. Lon eu mwichelap lon ewe 15th ierin an Asa nemenem (963 B.C.E.), ekkewe chon Juta ra “eani eu pwon pwe repwe kutta Jiowa.” Iwe, Kot “a etiweer” me “fang ngeniir kinamwe seni ekewe mwu mi nom unukur.” (2 Kronika 15:10-15, NW) Ena leenien appiru epwe alisi ekkewe mi pase seni ewe mwichefelin Chon Kraist ar repwe kuttasefalli Kot. Iwe, epwe efeiochu me tumunu ir kewe mi chiechisefal ngeni noun kewe aramas.
6 Alon Jiowa a awora tipatchem mi tongeni tumunukich seni feiengau lon pekin ngun. (Kol Fel 119:97-104) An Kot kewe alluk ra atipatchemakich pwe sipwe tipatchem lap seni ekkewe chon oputakich. Ach alleasochisi an kewe kapasen achechem epwe emiritikich, me ach ‘alleasochisi an kewe afalafal epwe atufichikich ach sipwe wewefichi lap seni ekkewe aramas mi chinnap.’ (Kol Fel 119:98-100) Ika alon Jiowa kewe ra ‘ngar lap seni chonun pulech lon auach,’ sipwe oputa me ti senikich “iteiten al chofona meinisin.” (Kol Fel 119:103, 104) Iwe, ei mettoch epwe tumunukich seni feiengau lon pekin ngun lupwen sipwe chuuri ekkewe aramas mi lamalam tekia, mwocho, me ingau lon ekkeei ranin le sopolon.—2 Timoti 3:1-5.
Eu Lamp Ren Pechech
7 Alon Kot, ina popunlapen tittinochun ewe saram lon pekin ngun. (Kol Fel 119:105-112) Ese lifilifil ika kich Chon Kraist mi kepit are kich chiener kewe “ekkewe ekkoch siip,” nge sipwe apasa: “Om kapas a wewe ngeni eu lamp ren pechei, o pwal saramen ai al.” (Jon 10:16; Kol Fel 119:105) Alon Kot a ussun chok eu lamp mi asarama ach we al pwe sisap turukap me turulo lon pekin ngun. (An Salomon Fos 6:23) Nge a lamot ach sipwe pwisin mut ngeni alon Jiowa an epwe asarama pechech kewe.
8 A lamot ach sipwe uppos ussun chok ewe sou makkei Kol Fel 119. A posselo letipan pwe esap rikilo seni an Kot kewe alluk. A apasa: “Ua ani eu pwon, o ua pwal anukucharasefal, pwe upwe alleasochisi om kewe alluk mi pung.” (Kol Fel 119:106) Iwe, sisap fokkun akisikisatiu lamoten ach sipwe kakkaeo ewe Paipel iteitan me ach uwau meefiach lon an Chon Kraist kewe mwich.
9 Ewe sou makkei ewe kol fel ese ‘rikilo seni an Kot kewe alluk,’ nge epwe tongeni fis ngeni emon mi fen fangelo manauan ngeni Jiowa. (Kol Fel 119:110) King Salomon a rikilo, inaamwo ika i chon ewe muu mi nom lon eu atipeeufengen me Jiowa me inaamwo ika le poputaan an we nemenem, an kewe foffor ra tipeeu ngeni tipatchemen Kot. “Iei mwo ei, nge ekewe fin ekis ra tongeni emmwenalong Salomon lon tipis” ren ar etipetipa i pwe epwe fel ngeni ekkewe kot chofona.—Nehemaia 13:26; 1 Kings 11:1-6.
10 “Ewe chon liapeni machang,” Setan, a isetiu chommong sser. (Kol Fel 91:3, NW) Awewe chok, eni emon mi piin fitikich lon ach fel epwe sotun etipetipaakich pwe sipwe tokko seni alen ewe saram lon pekin ngun ngeni rochopwakun ekkewe chon rikilo. Lein ekkewe Chon Kraist lon Taiatira, a wor “ena fefin Jesepel,” iwe, eni epwe tongeni wewe ngeni eu mwichen fefin mi afalafala ekkewe ekkoch pwe repwe fel ngeni ekkewe ululun me foffori ewe fofforun lisoumwaal. Jises a oputa ena sokkun fofforingau, iwe, sisap pwal tipeeu ngeni. (Pwarata 2:18-22; Juta 3, 4) Ina minne, sipwe iotek fan iten an Jiowa alillis pwe sisap rikilo seni an kewe alluk nge nonnom chok lon ewe saram seni an Kot we Kapas.—Kol Fel 119:111, 112.
Alon Kot A Alikiitukich
11 Ika sise rikilo seni an kewe alluk, Kot epwe apposa letipach. (Kol Fel 119:113-120) Sise acheni “aramas mi lamalam ruu,” ussun chok Jises a oputa ekkewe mi era pwe ir Chon Kraist ikenai, nge rese pwichikar are patapat. (Kol Fel 119:113; Pwarata 3:16) Pokiten sia akkangang ngeni Jiowa ren unusen letipach, i ‘ach we leenien op’ me epwe alikiitukich. Epwe ‘poutalo meinisin mi tok seni an kewe alluk’ ren ar eani fofforun michimich me kapas chofona. (Kol Fel 119:114, 117, 118; An Salomon Fos 3:32) A eani ewe ekiek pwe ekkewe mi ingau ra “ussun chok och mettoch mi anioput”—ekkewe mettoch mi limengau sia kan limetau seni ekkewe mecha auchea, awewe chok ren silifer me kolt. (Kol Fel 119:119; An Salomon Fos 17:3) Amwo iteiten fansoun meinisin sipwe acheni an Kot kewe kapasen achechem, pun sise fokkun mochen nom lein ekkewe mi ingau lon ar leenien pii epwe kiteterelo!
12 Ewe sou makkei ewe kol fel a apasa: “Fitukei a chechech ren ai niuokusituk.” (Kol Fel 119:120) A lamot ach sipwe eani ewe niuokkusun Kot mi fich, ewe epwe pwapwalo ren ach su seni minne Kot a oput, pwe epwe nounikich chon angang ngeni i. An niuokkusiiti Jiowa a amwokutu Jop an epwe manaueni eu manau mi pwung. (Jop 1:1; 23:15) Ach niuokkusiiti Kot epwe tongeni atufichi ach sipwe likiitu won ewe al Kot a pwapwa ren, nge ese lifilifil met epwe torikich. Iwe nge, ewe mettoch likiitu a wewe ngeni ach sipwe iotek fan luku.—Jemes 5:15.
Iotek Fan Luku
13 Sia tongeni iotek fan ach luku pwe Kot epwe mwokutukut fan itach. (Kol Fel 119:121-128) Ussun chok ewe sou makkei ewe kol mi fel, sia luku pwe epwe polu ach kewe iotek. Pwata? Popun, pun sia tongei an Kot kewe alluk “lap seni kolt, ewe kolt mi fakkun auchea.” Iwe, ‘sia meefi pwe a wesewesen pwung an Kot kewe alluk meinisin.’—Kol Fel 119:127, 128.
14 Jiowa a rongorong ach kewe tingor pun sia iotek ren luku me akkalleasochisi an kewe alluk. (Kol Fel 65:2) Nge met sipwe fori ika, pokiten watten ach kewe osukosuk, fan ekkoch sise silei met sipwe apasa lon ach iotek? Lon ekkena fansoun “ewe Ngun a pwisin iotek fan asengesich, ren sokkun ngungu sise tongeni pwisin apasata.” (Rom 8:26, 27) Lon ekkena fansoun, Kot a etiwa ekkewe iotek lon an we Kapas mi weneiti ach kewe osupwang.
15 Ewe Paipel a ur ren chommong iotek me ekiek mi kku ach kewe ‘sokkun ngungu sise tongeni pwisin apasata.’ Awewe chok, ekieki ussun Kol Fel 119:121-128. Eni ena ititin fos repwe kku minne a fis ngenikich. Awewe chok, ika sia niuokkus pwe aramas repwe michiikich, sipwe tongeni tingor seni Kot an alillis ussun chok ewe sou makkei ewe kol fel a fori. (Wokisin 121-123) Nge met sipwe fori ika epwe wor eu kefil mi fokkun weires? Iwe, sipwe tongeni iotek pwe an Jiowa we ngun epwe alisikich pwe sipwe chechemeni me apwonueta an kewe kapasen achechem. (Wokisin 124, 125) Inaamwo ika sia ‘oputa meinisin ekkewe al mi ingau,’ eni epwe lamot ach sipwe tingorei Kot an epwe alisikich pwe sisap kuf ren sossot me atai an we alluk. (Wokisin 126, 128) Ika sipwe alleani ewe Paipel iteiten ran meinisin, eni epwe chemeto ekkoch wokisin mi alillisoch ngenikich atun sia iotek ngeni Jiowa.
Alillis Seni An Jiowa Kewe Kapasen Achechem
16 Ika sia mochen pwe Kot epwe auseling ngeni ach kewe iotek me ika sia mochen kuna an Kot chen, a lamot ach sipwe alleasochisi an Kot kewe kapasen achechem. (Kol Fel 119:129-136) Pokiten sia kan monukalo poraus, a lamot ngenikich an Jiowa kewe achechem mi amwarar, ekkewe mi achema ngenikich ussun an kewe kapasen emmwen me an kewe alluk. Pwungun pwe sia kilisou ren ewe saram lon pekin ngun mi katou seni iteiten minefoon aweween alon Kot. (Kol Fel 119:129, 130) Iwe, sia pwal kilisou pwe Jiowa a ‘asarama mesan wooch,’ lon an achenikich, inaamwo ika ‘chonun mesach a pupulo’ pokiten ekkewe ekkoch aramas ra atai an we alluk.—Kol Fel 119:135, 136; Numperis 6:25.
17 A alukuluku ngenikich an Kot achenikich ika sipwe atipeeufengenni manauach ngeni an kewe kapasen achechem mi pwung. (Kol Fel 119:137-144) Kich noun Jiowa kewe chon angang sia miritiiti pwe a pwung an epwe ngenikich an kewe kapasen achechem mi pwung me kutta senikich ach sipwe alleasochisi. (Kol Fel 119:138) Pokiten ewe sou makkei ewe kol fel a alleasochisi an Kot kewe alluk, pwata a apasa: “Ngang emon mi kisikis o anioput”? (Kol Fel 119:141) Ese mwaal, a kapas ussun ekiekin ekkewe chon oputa i. Ika sipwe lukuchar fan iten minne mi pwung, eni ekkewe ekkoch aramas repwe oputakich. Nge a wesewesen lamot an Jiowa achenikich pun sia manaueni ewe manau mi tipeeu ngeni an kewe kapasen achechem mi pwung.
Lukulukoch Me Kinamwe
18 Ach alleasochisi an Kot kewe achechem epwe atufichi ach ririoch ngeni. (Kol Fel 119:145-152) Pokiten sia alleasochisi an Kot kewe kapasen achechem, sia silei pwe sipwe tongeni kori i ren unusen letipach, me luku pwe epwe auseling. Eni sipwe nennelo “unumweiran” me koko fan iten alillis. A ifa me watten murinno ena fansoun pwe sipwe iotek! (Kol Fel 119: 145-147) Kot a pwal kkan ngenikich pokiten ach ti senikich fofforun sikepwach me eani ewe ekiek pwe a enlet alon kewe, ussun chok Jises a foffori. (Kol Fel 119:150, 151; Jon 17:17) Ach riri ngeni Jiowa a alikiituukich lon ei fonufan mi ur ren fitikoko me epwe alikiitukich lon an we maun mi lapalap, Armaketon.—Pwarata 7:9, 14; 16:13-16.
19 Pokiten ach sufol mi alollol ngeni alon Kot, sia pwapwaesini lukulukoch mi enlet. (Kol Fel 119:153-160) Sise ussun ekkewe mi ingau, pun ‘sise rikilo seni an Jiowa kewe achechem.’ Sia aucheani an Kot kewe alluk, ina minne sia kuna lukulukoch lon an tong enlet. (Kol Fel 119:157-159) An Jiowa kewe achechem ra alisikich pwe sipwe chechemeni minne wisach lon eu me eu fansoun. Iwe nge, an Kot kewe alluk, ir kapasen emmwen ngenikich, iwe, sia miritiiti pwe a wor an ewe Chon Forikich pwung le emmwenikich. Pokiten sia miritiiti pwe ‘a enlet alon Kot’ me sise tongeni pwisin nemeni manauach lukun Kot, sia pwapwa le nguuri emmwen seni Kot.—Kol Fel 119:160; Jeremaia 10:23.
20 Ach tongei an Jiowa we alluk a atoto rech watte kinamwe. (Kol Fel 119:161-168) Riaffou esap atai ach “kinamwe seni Kot.” (Filipai 4:6, 7) Pokiten a watte ach aucheani an Jiowa kewe apwung, sipwe mwareiti I fan chommong—”lon eu ran ua mwareituk fan fisu.” (Kol Fel 119:161-164) Ewe sou makkei ewe kol fel a kolu: “Ekkewe mi aucheani om alluk ra fakkun kinamwe; esor och mettoch mi tongeni oturukapa ir.” (Kol Fel 119:165) Ika kich sipwe pwisin tongei me akkamwochu an Jiowa we alluk, sisap turukap lon pekin ngun ren minne pwal emon epwe fori are pwal och mettoch epwe tongeni fis ngenikich.
21 Chommong aramas, porauser a mak lon ewe Paipel, rese mut ngeni och mettoch an epwe eu minen oturukap ngeniir ren langattam fansoun. Awewe chok, ewe Chon Kraist itan Kaios ese turukapelo nge ‘a feffetal lon ewe enlet’ inaamwo ika a ngau fofforun Taiotrefis. (3 Jon 1-3. 9, 10) Paul a pesei ekkewe fin Kraist Iuotia me Sintike ar repwe “tipeeufengen lon ewe Samol,” eni pokiten eu osukosuk a piita lefiler. Ese mwaal, a kawor alillis ngeniir pwe repwe awesalo ar we osukosuk, iwe, ra sopweilo ar angang ngeni Jiowa fan tuppwol. (Filipai 4:2, 3) Ina minne, sisap turukapelo ika och osukosuk epwe piita lon ewe mwichefel. Sipwe ekilapei ach akkalleasochisi an Jiowa kewe alluk, iwe, sipwe chechemeni pwe ‘ach kewe al meinisin ra nonnom mwen mesan.’ (Kol Fel 168; An Salomon Fos 15:3) Iwe, esap wor och mettoch epwe sola senikich ach watten “kinamwe.”
22 Ika fansoun meinisin sipwe alleasochisi Jiowa, sipwe pwapwaesini ach mwareiti i. (Kol Fel 119:169-176) Ren ach sipwe manaueni ewe manau mi tippeu ngeni an Kot kewe alluk, sisap chok pwapwaesini lukulukoch lon pekin ngun nge ‘epwe pupuseni auach kapasen mwareiti Jiowa.’ (Kol Fel 119:169-171, 174) Ina ewe wis mi auchea seni meinisin sipwe tongeni eani lon ekkeei ran le sopwolon. Ewe sou makkei kol fel a mochen mammanau me mwareiti Jiowa, nge lon eu lapalap ese akkaffat, a fen ‘fetal-mwaal, ussun chok emon siip mi mwalechelo.’ (Kol Fel 119:175, 176) Eni ekkoch mi fen mwalechelo seni ewe mwichefelin chon Kraist ra chuen tongei Kot me meni ra chuen mochen mwareiti I. Ina minne, sipwe achocho le alisir ukukun ach tufich pwe repwe kunasefalli lukulukoch lon pekin ngun me eti noun Jiowa kewe aramas le pwapwaesini ar mwareiti I.—Ipru 13:15; 1 Piter 5:6, 7.
Saram Tori Feilfeilo Fan Iten Ach We Al
23 Kol Fel 119 epwe tongeni efeiochukich lon sokkopaten lapalap. Awewe chok, epwe tongeni alapalo ach apilukuluk won Jiowa, pun a pwarata pwe pwapwa enlet a popu seni ach “feffetal lon allukun Jiowa.” (Kol Fel 119:1) Ewe sou makkei kol fel a achema ngenikich pwe an Kot kewe kapas meinisin ‘mi chok enlet.’ (Kol Fel 119:160) Epwe fokkun alapalo ach kilisou fan iten unusen Kapasen Kot mi makketiu. Ach ekkekiek won Kol Fel 119 epwe amwokutukich ach sipwe tinikken le kakkaeofichi ewe Paipel. Ewe sou makkei kol fel a tittingorei Kot: “Kopwe aiti ngeniei om kkewe alluk!” (Kol Fel 119:12, 68, 135) A pwal tingor: “Kopwe aiti ngeniei tipatchem pwe upwe silei, pun ua luku om kewe alluk.” (Kol Fel 119:66) Epwe murinno ika sipwe pwal eani ena sokkun iotek.
24 Aitien Jiowa a kan atufichi ach sipwe pacheoch ngeni Jiowa. Ewe sou makkei kol fel a kan eita ngeni pwisin i noun Kot we chon angang. Pwungun pwe a fos ngeni Jiowa ren ekkeei sokkun kapas mi achungu letipach, a era: “Ngang noum chon angang.” (Kol Fel 119:17, 65, 94, 122, 125; Rom 14:8) A ifa me watten aucheaan wisach ach sipwe angang ngeni me mwareiti Jiowa pun kich emon me lein noun kewe Chon Pwarata! (Kol Fel 119:7) En emon chon esilefeili ewe Muu mi angang ngeni Kot ren pwapwa? Ika ina, kopwe lukuluk pwe Jiowa epwe sopweelo an alisuk me efeiochuk lon ei angang mi auchea ika kopwe luku alon fansoun meinisin me mut ngeni an epwe asarama om we al.
Ifa Ussun Kopwe Polueni?
• Met popun sipwe tongei alon Kot?
• Ifa ussun alon Kot epwe apposa letipach?
• Ifa ussun an Jiowa kkewe kapasen achechem ra kan alisikich?
• Pwata noun Jiowa kewe aramas ra nonnom lon lukulukoch me kinamwe?
[Ekkewe kapas eis fan iten ewe lesen]
1, 2. Fan met sokkun lapalap alon Jiowa epwe asarama ach we al?
3. Ifa ussun Kol Fel 119:89, 90 a pwarata pwe sipwe tongeni lukuluk won alon Kot?
4. Ifa ussun ar aucheani alon Kot a kan alisaata noun kewe chon angang mi kuna riaffou?
5. Ifa ussun King Asa a kukkutta Jiowa?
6. Menni al epwe tumunukich seni feiengau lon pekin ngun?
7, 8. Met sipwe fori fan iten ach sipwe atipeeupenfengenni manauach ngeni Kol Fel 119:105?
9, 10. Ifa ussun sia silei pwe aramas mi fen fangelo manauer ngeni Jiowa repwe tongeni ‘mwalechelo seni an kewe alluk’ nge ifa ussun sipwe tumunukich seni?
11. Me ren Kol Fel 119:119, ifa an Kot ekiek ussun ekkewe mi ingau?
12. Pwata a lamot niuokkusiti Kot?
13-15. (a) Met popun sipwe tongeni luku pwe epwe polu ach kewe iotek? (b) Met epwe tongeni fis ika sise silei met sipwe apasa lon ach iotek? (c) Awewei ifa ussun Kol Fel 119:121-128 epwe riri ngeni ‘ewe sokkun ngungu sise tongeni apasata’ lon ach iotek.
16, 17. (a) Pwata a lamot ngenikich an Kot kewe kapasen achechem, me met meefiach ussur? (b) Met aramas repwe ekieki ussuch, nge met a lamot chapur?
18, 19. Met mwiriloon ach alleasochisi an Kot kewe kapasen achechem?
20. Pwata a wor rech “kinamwe chapur”?
21. Ikkefa ekkoch poraus lon Paipel a pwarata pwe sisap turukapelo ika osukosuk epwe fisita lon ewe mwichefel?
22. (a) Ika sipwe alleasochisi Kot, ifa ewe wis auchea sipwe tongeni pwapwaiti? (b) Epwe ifa ach ekiek ussun ekkoch mi fen mwalechelo seni ewe mwichefelin chon Kraist?
23, 24. Ikkefa ekkoch minen alillis ka angei seni Kol Fel 119?
[Lios lon pekin taropwe 27]
Saram lon pekin ngun a popu seni alon Kot
[Lios lon pekin taropwe 28]
Ika sia tongei an Jiowa kkewe kapasen achechem, esap ekieki pwe kich mi ussun “piipi mi limengau”
[Lios lon pekin taropwe 29]
Ika sipwe alleani ewe Paipel iteiten ran, sipwe muttir chechemeni ekkoch poraus lupwen sipwe iotek