Manau Ngeni Ir Kkewe Mi Filata Ewe Saram
“Jiowa, i mi ai saram o ai manau. Io upwe niuokusiti?”—KOL FEL 27:1, New World Translation.
1. Ikkefa ekkewe mettoch Jiowa a awora fan iten manau?
JIOWA, I populapen saramen ewe akkar mi atufichi manauen ekkewe monumanau meinisin won fonufan. (Keneses 1:2, 14) I pwal ewe Chon Forata ewe saram lon pekin ngun, ewe mi amoielo rochopwakin an Satan we fonufan mi efisi malo. (Aisea 60:2; 2 Korint 4:6; Efisus 5:8-11; 6:12) Ir kkewe mi filata ewe saram, repwe tongeni apasa ussun chok ewe sou kol: “Jiowa, i mi ai saram o ai manau. Io upwe niuokusiti?” (Kol Fel 27:1a) Iwe nge, ussun a fis lon fansoun Jises, ir kkewe mi filata ewe rochopwak repwe chok kuna kapwung.—Jon 1:9-11; 3:19-21, 36.
2. Lon fansoun lom lom, met a fis ngeni ir kkewe mi tunalo an Jiowa we saram me ir kkewe mi auseling ngeni alon?
2 Lon ranin Aisea we, lap ngeni noun Jiowa kkewe aramas meinisin fan ewe pwon lefiler me Jiowa ra u ngeni ewe saram. Mwiriloon, Aisea a kuna kiteterin ewe muun Israel mi nom ennefen. Lon 607 B.C.E., a talo Jerusalem me an we imwenfel, iwe, ekkewe chon Juta ra eolo. Iwe nge, ir kkewe mi auseling ngeni alon Jiowa ra kuna pochokkul pwe repwe u ngeni an aramas tokolo lon ena fansoun. Lon an kapas ussun 607 B.C.E., Jiowa a pwonetiu pwe ir kkewe mi auseling ngeni i repwe manau. (Jeremaia 21:8, 9) Ikenai, kich mi tongei ewe saram sipwe tongeni kaeo chommong lesen seni minne a fis lon ena fansoun.—Efisus 5:5.
Pwapwaan Ir kkewe mi Nonnom lon ewe Saram
3. Ikenai, sipwe tongeni eani lukuluk won met, ifa ewe “muu mi pwung” sia tongei, me ifa ewe “telinimw mi pochokkul” a nom ren ena “muu”?
3 “A wor rech eu telinimw mi pochokkul. [Kot] a isetiu manau ren tittin mi lukuluk. Oupwe suki asamalapen ewe telinimw, pwe ewe mwichen aramas mi pwung o allukuluk epwe tongeni tolong lon.” (Aisea 26:1, 2) Ina alon ekkewe aramas mi eani lukuluk won Jiowa. Ekkewe chon Jus mi tuppwol lon ranin Aisea we ra eani lukuluk won Jiowa pwe I wesewesen Popun ar lukulukoch, nge sap ekkewe kot chofona chon fonuer kewe ra fel ngeni. Ikenai, sia eani ena chok sokkun luku. Pwal eu, sia tongei an Jiowa we “muu mi pwung”—“ewe Israelin Kot.” (Kalesia 6:16; Mattu 21:43) Jiowa a pwal tongei ena muu pokiten an kkewe foffor mi tuppwol. Ren an alillis, a nom ren ewe Israelin Kot “eu telinimw mi pochokkul,” eu mwicheich mi ussun chok eu telinimw mi awora alillis me tumun ngeni.
4. Ifa ewe sokkun ekiek sipwe mochen amarata?
4 Ir kkewe mi nonnom lon ewe “telinimw” ra silei pwe “ewe ekiekin alillis [Jiowa] epwe tumunukemi lon kinamwe, pun lon [Jiowa] emon epwe eani lukuluk won.” Jiowa a alisi ir kkewe mi ekiekin eani lukuluk won me alleasochis ngeni an kkewe alluk mi pwung. Ina minne, ekkewe aramas mi tuppwol lon Juta ra alleasochisi an Aisea we kapasen pesepes, a era: “Oupwe luku Jiowa fansoun meinisin, ami kana aramas, pun Jiowa eu achau tori feilfeilo chok.” (Aisea 26:3, 4, NW; Kol Fel 9:10; 37:3; Proferp 3:5) Ekkewe mi eani ena sokkun ekiek repwe eani lukuluk won “Jiowa” pwe I eu achau mi lukulukoch. Ra pwapwaesini “kinamwe mi sopwosopwolo” ren.—Filipai 1:2; 4:6, 7.
Mitingau fan iten Ekkewe Chon Oput Kot
5, 6. (a) Ifa ussun Papilon lom lom a mitingau? (b) Ifa ussun “Papilon mi Lapalap” a mitingau?
5 Iwe, met ika ir kkewe mi luku Jiowa repwe kuna riaffou? Iwe, resap niuokus. Jiowa a mut ngeni ekkena mettoch ar repwe fis ren och fansoun, nge lo, lo, lo, epwe suki ewe alen ngaselo, nge ir kkewe mi efisata ewe riaffou repwe kuna an kapwung. (2 Tesalonika 1:4-7; 2 Timoti 1:8-10) Ekieki mwo ussun eu “telinimw won eu leeni mi tekia.” Aisea a apasa: “[Jiowa] a asaua chokewe mi imweni ewe telinimw won eu leeni mi tekia. A ataetiu ewe telinimw ngeni fonufan, o aturatiu tittin le pwul. Iwe, chokewe mi nom lon riaffou me woungau ra puri ewe telinimw.” (Aisea 26:5, 6, NW) Eni ewe telinimw won ewe leeni mi tekia epwe tongeni wewe ngeni Papilon. Ena telinimw a wesewesen eriaffou noun Kot kkewe aramas. Nge met a fis ngeni Papilon? Lon 539 B.C.E., a kuf ren ekkewe chon Metia me Persia. A ifa me watten an sau!
6 Lon ach ei fansoun, an Aisea kkewe kapasen oesini ra fokkun kapas ussun met a fis ngeni “Papilon mi Lapalap” seni 1919. Lon ena ier, ena telinimw won ewe leeni mi tekia a mitingau lupwen a angasalo noun Jiowa kkewe aramas seni kalapus lon pekin ngun fan osopwisek. (Pwarata 14:8) Minne a fis mwirin a awattei mitingauan. Ena mwichen Chon Kraist mi kisikis ra “aturatiu” ir kkewe mi pin kalapuser. Lon 1922 ra poputa le afalafal ussun warotoon amuchuloon Kristendom, iwe, ra afalafala aramas ussun tikkin rappwaan ekkewe fomon chonlang lon Pwarata 8:7-12 me ekkewe ulungat riaffou Pwarata 9:1–11:15 a oesini ussun.
“Alen ewe Emon mi Pwung Epwe Pwung”
7. Ifa ewe emmwen ir kkewe mi kul ngeni an Jiowa we saram ra kuna, ra eani lukuluk won io, me ifa ewe mettoch ra aucheani?
7 Jiowa a awora manau ngeni ir kkewe mi kul ngeni an we saram, iwe, a emmweni ar we al, ussun Aisea a aiti ngenikich: “Alen ewe emon mi pwung epwe pwung. Pokiten en emon mi pwung, kopwe asonosonochu ewe al ekkewe chon pwung repwe fetal won. Ewer, O Jiowa, am aua apilukulukok pokiten fetalin om kkewe kapwung. Letipem a chok mochen chechemeni itom.” (Aisea 26:7,8, NW) Jiowa, I emon Kot mi Pwung, iwe, ir kkewe mi fel ngeni repwe alleasochisi an kkewe alluk mi pwung. Lupwen repwe fori ena, Jiowa epwe emmwenir, epwe asonosonochu aler. Ren ar repwe akkamwochu an kkewe kapasen emmwen, ekkena chon tipetekison repwe pwarata pwe ra eani apilukuluk won Jiowa me aucheani itan seni lon letiper—“an we minen achechem.”—Ekistos 3:15.
8. Ifa ewe ekiek mi fokkun murinno Aisea a eani?
8 Aisea a acheni iten Jiowa we. A pwapwalo ren alon kkewe mwirin: “Iwe, ua posituk lepwin, ua kuttok ren unusen letipei. Lupwen ka apwungu fonufan, chon fonufan ra kaeo minne a pwung.” (Aisea 26:9) Aisea a tongei Jiowa ‘ren ngunun we’—ren unusen manauan. Anchangei mwo an ewe soufos aea ekkewe fansoun lepwin pwe epwe iotek ngeni Jiowa, an pwarata masouen letipan me an kukkuttafichi an Jiowa emmwen. Met ren ena leenien appiru mi fokkun murinno! Pwal eu, Aisea a kaeo seni an Jiowa kkewe fofforun kapwung mi pwung. Lon ei mettoch, a achema ngenikich lamoten ach sipwe mammasa fan iten ach sipwe mirititi letipen Jiowa.
Ekkoch Ra Filata ewe Rochopwak
9, 10. Ikkefa ekkewe foffor mi kirikiroch Jiowa a foffori ngeni an we muu mi rikirik, nge met ra fori?
9 Jiowa a pwarata watten kirikiroch ngeni ekkewe chon Juta, nge sap minne ir meinisin ra kilisou. Fan chommong, lap ngenir meinisin ra filata ewe alen u ngeni me ewe fofforun rikilo nge sap saramen an Jiowa we enlet. Aisea a apasa: “Inaamwo ika emon chon fofforingau epwe kuna chen, nge esap kaeo fofforun pwung. Lon fonuen chon wenechar a chok fori minne a ngau, iwe, esap kuna lingen Jiowa.”—Aisea 26:10, NW.
10 Lon fansoun Aisea lupwen poun Jiowa a tuttumunu ekkewe chon Juta seni ekkewe chon u ngenir, lap ngenir meinisin rese mochen ekieki pwe a popu seni Jiowa. Lupwen a efeiochur ren kinamwe, chon ewe muu rese pwarata ar kilisou. Ina minne, Jiowa a likitiirelo pwe repwe angang ngeni “pwal ekkoch masta,” iwe, mwirin och fansoun a mut ngeni ekkewe chon Jus ar repwe wiliti chon eolo lon Papilon lon 607 B.C.E. (Aisea 26:11-13) Iwe nge, lo, lo, lo, mwirin ar ra kuna kapwung, lusun chon ewe muu ra liwinsefal ngeni wesetan fonuer.
11, 12. (a) Met a fis ngeni ekkewe chon akkufu Juta? (b) Lon 1919, met epwap fis ngeni ekkewe mi pin kalapusei noun Jiowa kkewe chon angang mi kepit?
11 Nge met a fis ngeni ekkewe mi akkufu ekkewe chon Juta? Aisea a polueni lon ewe oesini: “Ra malo; resap manau. Ese chuen wor lamoter lon malo, iwe, resap pwatasefal. Ina minne, ka kul ngenir pwe kopwe niirelo, iwe, ka fori pwe esap wor emon a chuen chechemeniir.” (Aisea 26:14, NW) Ewer, mwirin an we a turutiu lon 539 B.C.E., Papilon esap chuen nomolo. Mwirin och fansoun, esap chuen wor ewe telinimw. “Ese chuen wor lamoter lon malo,” iwe, muun we epwe chok nonnom lon ekkewe puken uruwo. Met ren ena kapasen ourour ngeni ir kkewe mi eani lukuluk won ekkewe sou nemenemen ei fonufan!
12 A pwonueta eu kinikinin ei oesini lupwen Kot a mut ngeni noun kkewe chon angang mi kepit ar repwe kalapus lon pekin ngun lon 1918,iwe, mwirin, a angaserelo lon 1919. Seni ena fansoun, feffeilo, a kiroch ewe fansoun epwe feito fan iten ekkewe mi pin kalapuser, akkaeuin Kristentom. Nge epwe fokkun murinno ekkewe feioch fan iten noun Jiowa kkewe aramas.
“Ka fokkun achommongalo aramasen ei muu”
13, 14. Ikkefa ekkewe feioch mi amwarar noun Jiowa kkewe chon angang mi kepit ra pwapwaesini seni 1919?
13 Kot a efeiochu aierin noun kkewe chon angang lon 1919, iwe, a achommongerelo. Akkom, ra ioifengenni lusun chon ewe Israelin Kot, iwe mwirin, a poputa ewe angangen ioni “eu mwich mi lapalap” seni “ekkewe ekkoch siip.” (Pwarata 7:9; Jon 10:16) Aisea a fen oesini ussun ekkena feioch lupwen a makkei: “Ka fokkun achommongalo aramasen ei muu; O Jiowa, ka fokkun achommongalo aramasen ei muu; ka alinga pwisin en. Ka pwal awattelo meinisin kiannin ewe fonu. O Jiowa, lon fansoun riaffou ra kuttok; ra pwal iotek ngonuk lupwen ka apwungur.”—Aisea 26:15, 16.
14 Ikenai, kiannin ewe Israelin Kot a tori unusen fonufan, iwe, chochoon ewe mwich mi lapalap mi kapach ngenir ra tori wonu million chon achocho lon ewe angangen afalafala ewe kapas allim. (Mattu 24:14) A ifa me watten ewe feioch seni Jiowa! Iwe, a pwal watteta lingen itan we! Ikenai, ena it a esilefeil won 235 fonuen fonufan—a fokkun amwarar pwonuetaan an we pwon.
15. Ifa ewe manausefal lon kapas monomon a fis lon 1919?
15 A lamot ngeni ekkewe chon Juta ar repwe kuna alillis seni Jiowa pwe repwe ngaselo seni ar eolo lon Papilon. Resap tongeni pwisin fori ena mettoch. (Aisea 26:17, 18) Iwe, ussun chok ena, ngaseloon ewe Israelin Kot lon 1919, ina eu pisekin annet ussun an Jiowa alillis ngenir. Esap tongeni fis lukun an alillis. Iwe, pokiten a fokkun watte siwilin lapalaper, Aisea a alollo ena siwil ngeni eu manausefal: “Nge ir mi malo senikemi repwe manau, inisir epwe manausefal. Nei we soutup—repwe pwata. Nennelo o pupuchor ren pwapwa, ami kkana chon sussuun pwul! Ussun amurenipwin a amanaua iran fonufan, iwe, ewe fonufan epwe mut ngeni pwal mwo nge ir kewe mi malo ar repwe uputiu.” (Aisea 26:19; Pwarata 11:7-11, NW) Ewer, lon kapas monomon, ir kkewe mi malo repwe manausefal fan iten ar repwe popusefallita ewe angang!
Tumun lon Ekkewe Fansoun Riaffou
16, 17. (a) Lon 539 B.C.E., ifa ewe mettoch a lamot ngeni ekkewe chon Jus ar repwe fori ika repwe ngaselo atun a turutiu Papilon? (b) Eni, met weween ekkewe “ruum lon imw” ikenai, me ifa ussun repwe efeiochukich?
16 A lamot ngeni noun Jiowa kkewe chon angang an Jiowa tumun ngenir iteiten fansoun meinisin. Iwe nge, ekiselo chok, nge epwe eitielo poun pwe epwe apwungu an Satan we fonufan, iwe, lon ena fansoun epwe lamot ngeni noun kkewe chon fel an alillis lap seni lom. (Jon 5:19) Lon an kapas ussun ena fansoun efeiengau, Jiowa a ourourakich: “Oupwe tolong lon imwemi, ami nei aramas, o apungalo asamemi. Iwe, oupwe aopakemi eu fansoun mochomoch tori an Kot song epwe wesilo. Iwe, nengeni! Jiowa epwe towu seni lon leenian, pwe epwe apwungu chon fonufan pokiten ar tipis. Ewe angangen nimanau mi fis won fonufan le monomon epwe pwapwalo, nge ewe pwul esap chuen aopalo chokewe mi ninnilo.” (Aisea 26:20, 21, NW; Sefenaia 1:14) Ei kapasen ourour a aiti ngeni ekkewe chon Jus ifa ussun repwe ngaselo atun a turutiu Papilon lon 539 B.C.E. Ir kkewe mi alleasochis ngeni repwe nonnom lon imwer we, iwe, repwe kuna tumun seni ekkewe sounfiu mi nonnom lukun won ekkewe al.
17 Ikenai, eni ekkewe “ruum lon imw” lon ewe oesini a liosueta ekkewe fitu kit mwichefelin noun Jiowa kkewe aramas won unusen fonufan. Ekkena mwichefel, ir eu minen tumun pwal mwo nge iei, iwe, eu leeni ikkewe ekkewe Chon Kraist repwe tongeni kuna tumun lein pwiir kkewe ie, fan tumunun ekkewe elter mi tong. (Aisea 32:1, 2; Ipru 10:24, 25) Ei mettoch a akkaeuin enlet lupwen sipwe ekieki ussun kanotoon muchuloon ei otot, lupwen an aramas manaualo epwe alongolong won ar alleasochis.—Sefanaia 2:3.
18. Ekiselo chok, nge ifa ussun Jiowa epwe “nielo ewe trakon a nom leset”?
18 Lon an kapas ussun ena fansoun, Aisea a oesini: “Lon ena fansoun, Jiowa epwe apwungu Lefiatan ewe serepenit mi sulo, epwe apwungu Lefiatan ewe serepenit mi to rikirik ren noun ketilas mi ken me pochokkul manaman. Iwe, epwe pwal nielo ewe trakon a nom leset.” (Aisea 27:1, NW) Ifa ewe “Lefiatan” lon ach ei fansoun? Iwe, a wewe ngeni ewe “popun serepenit,” Satan fengen me an we ototen mettoch mi ngau, weween ewe mettoch a aea pwe epwe maun ngeni ewe Israelin Kot. (Pwarata 12:9, 10, 17; 13:14, 16, 17) Lon 1919, Lefiatan ese chuen tongeni amwochu noun Kot kkewe aramas. Mwirin och fansoun, epwe unusen morelo. (Pwarata 19:19-21; 20:1-3, 10) Iwe, Jiowa epwe “nielo ewe trakon a nom leset.” Tori ena fansoun, esap sopwoch och mettoch ena Lefiatan epwe tongeni sotun fori ngeni noun Jiowa kkewe aramas. (Aisea 54:17) A ifa me watten ach kinamwe ach sipwe silei ena mettoch!
“Eu Tanipin Wain mi Murinno”
19. Ifa lapalapen ewe lusun ekkewe mi kepit ikenai?
19 Lupwen sipwe ekieki mwo ukukun watten ewe saram seni Jiowa, esap wor popun ach sipwe pwapwa? Fokkun ewer! Aisea a kapas ussun pwapwaan noun Jiowa ekkewe aramas lupwen a makkei: “Lon ena ran oupwe kol ngeni, ami kkana aramas: ‘Ewe tanipin wain mi murinno! Ngang, Jiowa, upwe tumunu. Upwe achochonu iteiten fansoun. Iwe, upwe mammasa lepwin me leran, pwe esap wor emon epwe atai.’” (Aisea 27:2, 3, NW) Jiowa a tuttumunu an “tanipin wain,” weween, lusun ewe Israelin Kot me pwal chiener kkewe mi angang weires. (Jon 15:1-8) Mwiriloon, a efisata uwa mi alinga itan we me pwapwa chapur lein noun kkewe chon angang won fonufan.
20. Ifa ussun Jiowa a tuttumunu ewe mwichefelin Chon Kraist?
20 Sia tongeni pwapwa pwe a muchulo an Jiowa song ngeni noun kkewe chon angang mi kepit—ina ewe popun a mut ngeniir ar repwe fotek lon pekin ngun lon 1918. Jiowa a pwisin apasa: “Ese wor ai song. Io epwe ngeniei irafolufol me petewelingau lon fansoun maun? Upwe ipweri ekkena mettoch. Upwe kenirelo meinisin. Nge repwe eaniei leenien op, repwe akkomwen efisata kinamwe ngeniei; repwe efisata kinamwe ngeniei.” (Aisea 27:4, 5) Ren an epwe tumunu pwe an we tanipin wain epwe ukkuwa watten “wain mi murinno,” Jiowa a orosalo me atai etipatipaen ir kkewe mi ussun chok petewelingau ngeniir. Iwe, feiengau ngeni ewe emon mi efeiengaua ewe mwichefelin Chon Kraist! Ir meinisin repwe ‘akkamwochu an Jiowa leenien op,’ ren ar repwe kukkutta an chen me tumun. Lon ach foffori ena mettoch, sipwe efisata kinamwe lefilach me Kot—ina ewe mettoch a fokkun lamot watte pwe Aisea a apasa fan ruu.—Kol Fel 85:1, 2, 8; Rom 5:1.
21. Ifa ussun ewe fonu mi murinno a urelo ren “uwa”?
21 A sopweilo ekkewe feioch: “Lon fansoun epwe feito, ekkewe chon Israel, ir ekkewe mwirimwirin Jakop, repwe apwuku warer ussun efoch ira, repwe fasar me sot, repwe pwal amasoua unusen fonufan ren uwar.” (Aisea 27:6) A apwonueta ei wokisin seni 1919, iwe, a awora ekkewe pisekin pwarata mi amwarar ussun an Jiowa we manaman. Ekkewe Chon Kraist mi kepit ra auralo fonufan ren “uwar,” ekkewe mongo lon pekin ngun mi murinno. Won ei fonufan mi chok ngangaulo, ra pwapwaesini ar likiitu fan an Kot kkewe alluk mi tekia. Iwe, Jiowa a efeiochur ren an achommongelo ir kkewe mi fitir. Mwiriloon, fitu million chiener kkewe, ekkewe ekkoch siip, ra “angang ngeni i [Kot] le ran me lepwin.” (Pwarata 7:15) Iwe, sisap tunalo eu mettoch mi fokkun auchea ngenikich, weween, sipwe ani ena “uwa” me pwal ineti ngeni ekkewe ekkoch!
22. Ikkefa ekkewe feioch epwe toto ngeni ir kkewe mi nguuri ewe saram?
22 Lon ekkewe fansoun weires, lupwen rochopwak a pwonuelo fonufan me ekkewe muun fonufan, sisap kilisou pwe Jiowa a atittina saram lon pekin ngun won noun kkewe aramas? (Aisea 60:21; Rom 2:19; 13:12) Ren ir kkewe meinisin mi nguuri, ena saram a wewe ngeni kinamwe me pwapwa iei me pwal mwo nge manau esemuch lon fansoun mwach. Iwe, mei wor popun murinno pwe kich mi tongei ewe saram sipwe mwareiti Jiowa ren letipach mi mwanek me fiti ewe sou kol le apasa: “Jiowa, i mi ewe imwen maun ren manauei. Io upwe niuokusiti? Kopwe eani lukuluk won Jiowa; kopwe pwora me letipom epwe pochokkul. Ewer, eani lukuluk won Jiowa.”—Kol Fel 27:1b, 14, NW.
En mi Chechemeni?
• Met epwe fis ngeni ir kkewe mi aweiresi noun Jiowa kkewe aramas?
• Aisea a oesini ussun afeffeitaan met?
• Ikkefa ewe “ruum lon imw” sipwe mochen nonnom lon, iwe, pwata?
• Pwata lapalapen noun Jiowa kkewe aramas a mwareiti i?
[Picture on page 28]
Ekkewe chok aramas mi pwung repwe tongeni tolong lon an Jiowa we “telinimw mi pochokkul,” an we mwicheich
[Picture on page 30]
Aisea a kukkutta Jiowa “lepwin”