Mwareiti Jiowa Ren An Kewe Foffor Mi Lapaplap!
“Letipei a mwareiti ewe Samol . . . pun Ewe mi Manaman a fen for ngeniei ekkeei mettoch mi lap.”—LUK 1:46-49.
1. Sia mochen mwareiti Jiowa ren menni foffor mi lapalap?
POKITEN an kewe foffor mi lapalap, a fich ngeni Jiowa ach sipwe mwareiti. Lupwen ewe soufos Moses a enniwili an Israel ngaselo seni Isip, a apasa: “Oua pusin kuna ren mesemi ekei fofor mi manaman meinisin ewe Samol mi Lapalap a fori.” (Tuteronomi 11:1-7) Ussun we chok, lupwen ewe chonlang itan Kapriel a esile ngeni Meri porausen an Jises uputiu, Meri a apasa: “Letipei a mwareiti ewe Samol . . . pun Ewe mi Manaman a fen for ngeniei ekkeei mettoch mi lap.” (Luk 1:46-49) Pokiten kich Chon Pwarata Jiowa, sia mwareiti i ren an kewe foffor mi lapalap, ussun chowean angasalo Israel seni fotek lon Isip me ewe manaman a fis lupwen Jises a kolu.
2. (a) Ifa weween an Kot “kokkot esemuch” ngeni aramas mi alleasochis? (b) Ifa ewe mettoch Jon a kuna lupwen a nonnom won ewe to itan Patmos?
2 Chommong lein an Jiowa kewe foffor mi lapalap ra weneiti an “ekiek me lom lom” le efeiochu chon fonufan ren nemenemen ewe Messaia me an we Muu. (Efisus 3:8-13) Ena kokkot a feffeita ngeni pwonutaan lupwen a mumu ngeni ewe aposel mi chinnap itan Jon, atun eu langepwi, an epwe nennelong lon eu asam mi suukulo ngeni lang. A rongorong leuwen emon nge leuwan a ussun chok tikkin rapwa: “Kopwele feita ikei, o upwe pwar ngonuk minne epwe fis mwirin ekkeei mettoch.” Lupwen Muun Rom a asualo Jon ngeni ewe to itan Patmos pokiten an kakkapas ussun Kot me “an Jises Kraist we pwarata,” Jon a angei “ewe pwarata me ren Jises Kraist.” Met ewe aposel a kuna me rongorong a pwaralo chommong poraus ussun an Kot we kokkot esemuch. A awora saram lon pekin ngun me kapasen pesepes ngeni Chon Kraist mi enlet meinisin.—Pwarata 1:1, 9, 10.
3. Ekkewe 24 elter ra liosueta io lon an Jon langepwi?
3 Lupwen a nennelong lon ewe asam mi suukulo lon lang, Jon a kuna 24 elter mi mommot won leenien motun king me ra imweimw akkauen king. Ra chapetiu mwen Kot me ra apasa: “Mi fich ngonuk, ach Samol o ach Kot, pwe kopwe angei ling o iteuoch o manaman, pun ka fen forata mettoch meinisin, o mettoch meinisin a fis o a nom ren letipom.” (Pwarata 4:11) Ekkena elter ra liosueta ekkewe Chon Kraist mi kepit, chokkewe mi fen manausefal, lon ewe wiis mi tekia Kot a pwon ngeniir. Ra mochen mwareiti Jiowa pokiten an kewe foffor lupwen a forata fonufan. Sia pwal ingelo ren ewe pisekin annet mi anneta “an we manaman esemuch o pwal lapalapan feilfeilo chok.” (Rom 1:20) Ren lapeloon ach sile ussun Jiowa, epwe chommongolo ekkewe popun sipwe mwareiti i ren an kewe foffor mi lapalap.
Esilei Fofforun Jiowa Mi Fich Ngeni Ach Sipwe Mwareitiir!
4, 5. Awewei ifa ussun Tafit a mwareiti Jiowa.
4 Ewe soumak Kol Tafit a mwareiti Kot ren an kewe foffor mi lapalap. Awewe chok, Tafit a kol: “Oupwe kol o mwareiti ewe SAMOL, ewe mi nonnom lon Saion! Oupwe aporausa porausen an kewe fofor lein ekkewe aramas! SAMOL, kopwe chok kirokiroch ngeniei. Kopwe nengeni ai keei riaffou me ren ekkewe chon oputaei, en mi ekieita seni ekkewe asamen malo; pwe upwe aporausa mettoch meinisin minne ua mwareituk ren, pwe lon ekkewe asamen noun Saion we nengngin upwe pwapwaeisini om angasaeilo.” (Kol Fel 9:11, 13, 14) Mwirin a fen ngeni noun we Solomon ewe alapalap ren ewe imwen fel, Tafit a efeiochu me mwareiti Jiowa ren an apasa: “Ai Samol mi Lapalap, en ewe mi tekia me manaman me ling me pwora me itefoula. . . . Ai Samol mi Lapalap, om chok ewe mwu, en ka tekia o nemeni meinisin. . . . Iei am aia kilisou ngonuk, am Kot, aia pwal mwareiti itom mi ling.”—1 Kronika 29:10-13.
5 Ewe Paipel a ekketiwakich—ewer, a peseekich—le mwareiti Kot, ussun chok Tafit a fori. Mei wor chommong poraus mi mwareiti Kot lon ewe puken Kol Fel, me orun lesopwun makkeien Tafit. Fansoun meinisin Tafit a mwareiti me kilisou ngeni Jiowa. (Kol Fel 69:30) Pwal och, seni chok loom, aramas ra fen eani ekkewe kol mi pop seni ngunun Kot, makkeien Tafit me ekkewe ekkoch, ren ar repwe mwareiti Jiowa.
6. Ifa ussun ekkewe Kol mi Fel mi tongeni alisikich?
6 A ifa me watteen aucheaan ekkewe Kol mi Fel ngeni chokkewe mi fel ngeni Jiowa! Lupwen sia mochen kilisou ngeni Kot fan iten an kewe foffor mi lapalap fan itach, neman sipwe ekieki ussun ekkewe kapas mi ling mi makketiu lon ewe puken Kol Fel. Lupwen sia pwata le lesossor, eli sipwe mochen mwareiti Kot ren ei esin kapas: “Mi chok murinno ach sipwe apasa ach kilisou ngeni ewe SAMOL, o kol ren mwareiti itom, En mi Fakkun Tekia; o arongafeili om we tong enlet lesesor, pwal om tuppwel lepwin, . . . pun en, SAMOL, ka fen apwapwaiei ren om angang; ua kol ren ai pwapwa pokiten ekkewe angangen poum.” (Kol Fel 92:1-4) Lupwen sia akkufu och mettoch a eppeti ach feffeita lon pekin ngun, neman sipwe pwaralo ach chengel me kilisou lon iotek, ussun chok ewe soumak kol a fori lupwen a kol: “Oupwe feito, sipwe kol ngeni ewe SAMOL; sipwe pupuchor ren pwapwa ngeni ewe achauen ach amanau! Sipwe tolong mwen mesan ren kilisou; sipwe pupuchor ren pwapwa ngeni i, eti kolun mwareiti!”—Kol Fel 95:1, 2.
7. (a) Met sipwe chechchemeni ussun ekkewe kol Chon Kraist ra eani iei? (b) Ifa eu popun sia mochen muttirito ngeni mwich me nonnom tori an a wes?
7 Fan chommong sia eani kolun mwareiti Jiowa lupwen sia fiti mwich me mwichelap. Chommong lein ekkena kol ra longolong won ekkewe poraus mi mak fan emwenien ngunun kot lon ewe puken Kol Fel. A ifa me watteen ach pwapwa pwe a nom rech ekkewe kolun mwareiti Jiowa mi achungu letipach lon ei fansoun! Sia mochen muttir ngeni mwich me nonnom tori sopwoloon ewe mwich, pwe sipwe tongeni fiti chienach chon fel ngeni Kot le mwareiti Jiowa ren kol me iotek.
“Oupwe Mwareiti Ewe SAMOL!”
8. Ifa weween ewe kapas “Aleluia,” me a kan wewe ngeni met?
8 Mwareiti Jiowa ina ewe ekiek a nom lon ewe kapas “Aleluia,” eu kapas seni Fosun Ipru mi makketiu ren mesen makken Merika, a wewe ngeni “Oupwe mwareiti Jah.” Ren chok awewe, Kol Fel 135:1-3, sia kuna ei kapasen etiwetiw mi tong: “Oupwe mwareiti ewe SAMOL. Oupwe mwareiti ewe SAMOL. Ami kena chon angangen ewe SAMOL, oupwe mwareiti, ami kena mi uta lon imwen ewe SAMOL, lon ekkewe weipen imwen ach Kot! Oupwe mwareiti ewe SAMOL, pun ewe SAMOL i mi murinno. Oupwe kokkol ren itan, pun i mi kirokiroch!”
9. Met a amwokutukich le mwareiti Jiowa?
9 Ewe kilisou lon letipach a amwokutukich le mwareiti Kot lupwen sia ekieki ussun ekkewe mettoch a fen forata me ekkewe mettoch a fen fori fan itach. Lupwen sia chechchemeni ekkewe manaman Jiowa a fori fan iten noun kewe aramas loom, letipach a pesekich le mwareiti i. Lupwen sia ekkekieki an kewe pwon, ekkewe mettoch mi amwarar epwe fori lon mwach kkan, sia kutta ifa ussun sipwe mwareiti me pwaralo ach kilisou.
10, 11. Ifa ussun nonnomuch chok a ngenikich eu popun sipwe mwareiti Kot?
10 Nonnomuch chok a ngenikich ekkewe popun sipwe mwareiti Jah. Tafit a kol: “Upwe mwareituk [Jiowa] pun lapalapen om forieita mi amwarar me aniuaniu. Nguni a fokkun silei pwe om kewe angang mi amwarar.” (Kol Fel 139:14, New World Translation) Ewer, sia fen foruta lon eu ‘lapalap mi amwarar’ me a nom rech ekkewe liffang mi auchea ussun chok ach tufichin kuna, rongorong, me ekiek. Sisap fen emmweni manauach lon och lapalap mi apwapwai ewe Chon Forikich? A ina ussun meefien Paul lupwen a makkei: “Iwe, ika ami oupwe mongo are un, are fori och mettoch, oupwe chok fori mettoch meinisin pwe oupwe alinga Kot ren.”—1 Korint 10:31.
11 Sipwe ekiekin alinga Kot ren mettoch meinisin sia fori ika sia fokkun tongei Kot. Alon Jises iei ewe aewin alluk: “Kopwe tongei om Samol Kot ren unusen letipom, o ren unusen ngunum, o ren unusun ekiekum, pwal ren unusen tufichum.” (Mark 12:30; Tuteronomi 6:5) Sipwe tongei Jiowa me mwareiti pokiten i ewe Chon Forikich me ewe Chon Liffangolo ekkewe “liffang mi murinno” meinisin. (Jemes 1:17; Aisea 51:13; Fofor 17:28) Iwe, ach tufichin ekiek, ach tufichin pwapwaiti mettoch lon pekin ngun, me ach pochokkul—lapalapach me ach kewe tufich meinisin—ra feito seni Jiowa. Pokiten i ewe Chon Forikich, a fich ngeni ach mwareiti.
12. Met meefiom ussun fofforun Jiowa mi lapalap me ekkewe kapas lon Kol Fel 40:5?
12 An Jiowa kewe foffor mi lapalap ra ngenikich fokkun chommong popun sipwe tongei me mwareiti! “SAMOL, ai Kot, ka fen alapalo om kewe fofor mi amwarar o om kewe ekiek ngenikem; esor emon mi usun chok en! Are upwe pwarata o aporausa usun foforum kewe, repwe chommong seni minne aramas ra tongeni alleani.” (Kol Fel 40:5) Tafit ese tongeni enniwili an Jiowa kewe foffor mi amwarar meinisin, me kich sise pwal tongeni. Nge amwo sipwe chechchemeni le mwareiti Kot lupwen sia kaeo ussur.
Foffor Mi Riri Ngeni An Kot Kokkot Esemuch
13. Ifa ussun ach apilukuluk a riri ngeni an Kot kewe foffor mi lapalap?
13 Ach apilukuluk fan iten mwach kkan a riri ngeni ekkewe foffor mi lapalap ra weneiti an Kot kokkot esemuch. Mwirin aramas ra u ngeni Kot lon Ichen, Jiowa a awora ewe aewin oesini me a ngenikich och apilukulukoch. Lupwen a apwungu ewe serepenit, Kot a apasa: “Upwe afiukemi me ewe fefin, pwal mwirimwirum me mwirimwirin. Men epwe puri mokurom, nge en kopwe kuw apilipilin pechen.” (Keneses 3:15) Apilukulukoch mi alongolong won Mwirimwirin ewe Fefin mi pwonetiu a sopwosopwolo lon letipen chokkewe mi tuppwol mwirin Jiowa a fori och mettoch mi lapalap ren an amanaua Noa me an famili seni ewe Nooter a fen ataielo eu fonufan mi ngau. (2 Piter 2:5) Ekkewe oesini ngeni aramas mi tuppwol ussun chok Eperiam me Tafit a pwal pwaralo met Jiowa epwe fori ren Mwirimwirin ewe fefin.—Keneses 22:15-18; 2 Samuel 7:12.
14. Ifa an Jiowa foffor mi lapalap seni meinisin fan iten aramas?
14 Ewe foffor mi amwarar seni meinisin mi pwarata pwe Jiowa ewe Chon Fori mettoch mi lapalap fan iten chon fonufan a fisita lupwen a fangolo Noun we alaemon—mwirimwirin ewe fefin mi pwonetiu, Jises Kraist—ussun chok eu moon kepichilo. (Jon 3:16; Fofor 2:29-36) Ewe moon kepichilo a awora ewe longolongun an aramas chasefal ngeni Kot. (Mattu 20:28; Rom 5:11) Jiowa a amwichefengeni chokkewe mi akkom le chasefal lon ewe mwichefelin Kraist, ewe a fisita lon ranin Pentekos 33 C.E. Ewe ngun mi fel a alisir le afalafalafetalei ewe kapas allim, me aiti ngeni aramas ifa ussun maloon Jises me an manausefal a fen suuki ngeni aramas ewe tufichin kuna feioch esemuch fan nemenemen an Kot we Muu.
15. Ifa ussun Jiowa a eani eu angang mi amwarar lon ach ei fansoun?
15 Lon ach ei fansoun, a fen amwarar ifa ussun Jiowa a angang ngeni an epwe ionfengenni ekkewe saingoon Chon Kraist mi kepit. Ekkewe chonlang ra chuen amwochu ekkewe asapwalin kata pwe lusun ewe 144,000, chokkewe repwe nemenem ren Jises lon lang, repwe mechen. (Pwarata 7:1-4; 20:6) Kot a fen atufichi an ekkewe Chon Kraist mi kepit ngaselo seni fotek lon pekin ngun lon “Papilon mi Lapalap,” ewe nemenemen lamalam chofana won fonufan. (Pwarata 17:1-5) Ar ngaselo a fis lon 1919 me ewe tumun seni lang ra fen meefi seni ena fansoun a fen atufichi ar fori met? Iwe, ra tittinoch ren ar pwarata ngeni aramas me mwen Jiowa epwe awesalo an Setan otot mi ngau lon ewe “riaffou mi lapalap” mi muttirito.—Mattu 24:21; Taniel 12:3; Pwarata 7:14.
16. Met a fiffis pokiten ewe angangen afalafala ewe Muu won unusen fonufan ikenai?
16 Noun Jiowa kewe Chon Pwarata mi kepit ra achocho le emmweni eu angangen afalafala ewe Muu won unusen fonufan. Pokiten ar angang, a lapelo chochoon “ekkewe ekkoch siip” mi fel ngeni Jiowa. (Jon 10:16) Sia pwapwa pwe aramas mi mosonoson mi chuen tongeni fitikich le mwareiti Jiowa. Chokkewe mi aucheani ewe etiwetiw pwe repwe “feito” mi tongeni manau seni ewe riaffou mi lapalap, me mwareiti Jiowa tori feilfeilo chok.—Pwarata 22:17.
Fite, Fite Ngerou Ra Etiwa Fel Mi Enlet
17. (a) Ifa ussun Jiowa a foffori och angang mi lapalap fan iten ach angangen afalafal? (b) Ifa ussun Sekaraia 8:23 a pwoppwonuta?
17 Jiowa a foffori mettoch mi amwarar mi fich ngeni ach mwareitiir, fan iten ach angangen afalafal. (Mark 13:10) Lon ekkewe ier mi kanoto chok, a fen ‘suuki ekkewe asamalap ngeni angang.’ (1 Korint 16:9) Iei, chommong aramas mi nonnom lon ekkewe leeni ikewe ie chon u ngeni ra piin eppeti ewe angangen afalafal, ra tongeni rongorong ewe kapas allim. Chommong aramas mi fen nonnom lon kiroch lon pekin ngun ra fen etiwa ewe etiwetiw le fel ngeni Jiowa. Ir mi apwonueta ei oeisini: “Lon ekena ran engol mwan seni ekewe mwu mi sokola ar kapas repwe amwochu lepwulun ufen eman chon Juta o ura, ‘Kose mochen kopwe mwut ngenikem pwe aipwe etikemi, pun am aia rong pwe Kot a etikemi.’” (Sekaraia 8:23) Chokkana ekkena ‘engol mwan’ ra fos ngeni, ir Chon Jus lon pekin ngun, lusun ekkewe Chon Kraist mi kepit. Pokiten engol mi tongeni wewe ngeni mettoch mi unus won fonufan, “engol mwan” a wewe ngeni ewe “mwich mi lapalap” mi chiechi ngeni “ewe Israelin Kot,” me repwe wiliiti “eu pwin siip.” (Pwarata 7:9, 10; Kalesia 6:16) A ifa me watteen ach chengel le kuna chommong chon fel ngeni Jiowa Kot mi apwonueta ar angang mi fel!
18, 19. Ifa ewe pisekin annet mi anneta pwe Jiowa a efeiochu ewe angangen afalafal?
18 Sia pwapwa lupwen fitu kit—pwungun fite puku ngerou—ra etiwa fel mi enlet lon ekkewe fonu ia lamalam chofona a kon pochokkul ie nge a ussun ita me loom pwe aramas resap etiwa ewe kapas allim. Nengeni ewe Yearbook of Jehovah’s Witnesses, me kutta ekkena fonu a fen tori lefilen 100,000 me 1,000,000 chon afalafala ewe Muu. Ina ewe pisekin annet pwe ewe angangen afalafala ewe Muu a kukkuna an Jiowa feioch.—An Salomon Fos 10:22.
19 Pokiten kich noun Jiowa kewe aramas, sia mwareiti me kilisou ngeni Semach lon lang pokiten a fen ngenikich eu popun sia manau, eu angang mi apwapwa, me eu apilukuluk allim fan iten mwach kkan. Sia ekiekifichi pwonutan an Kot kewe pwon me sia apposa letipach le ‘iseis pwisin kich lon ewe tongen Kot me witiwiti ewe manau esemuch.’ (Juta 20, 21) A ifa me watteen ach pwapwa pwe chochoon ewe mwich mi lapalap a fen lu seni 6,000,000! Pokiten an Jiowa we feioch, lusun ekkewe mi kepit me ekkewe ekkoch siip ra kokkotolo lon 91,000 som mwichefel lon 235 fonu. Kich meinisin mi mot lon pekin ngun pokiten angangen ewe “chon angang mi tuppwel o tipatchem.” (Mattu 24:45) Eu mwicheich mi feffeita fan an Kot nemenem a emmweniochu ewe angang fan iten ewe Muu seni 110 branch ofes. Sia kilisou pwe Jiowa a fen amwokutu letipen noun kewe aramas le ‘asomolu ewe Samol mi Lapalap ren wour.’ (An Salomon Fos 3:9, 10) Ina popun ach angang won unusen fonufan mi tongeni sopwosopwolo ren kautaan ekkewe leenien ffor puk me chassi, imwen Bethel me misineri, Kingdom Hall, me Assembly Hall lupwen a wor lamotan.
20. Ifa ussun ach ekkekieki an Jiowa kewe foffor mi lapalap epwe kku letipach?
20 Sise tongeni eiteita unusen an Semach lon lang kewe foffor mi lapalap mi fich ngeni ach mwareitiir meinisin. Nge epwe wor aramas mi letip wenechar resap mochen choni ewe mwichen aramas mi mwareiti Jiowa? Aapwi! Ina ewe popun chon tongei Kot meinisin repwe puchor ren pwapwa: “Oupwe mwareiti ewe SAMOL! Oupwe mwareiti ewe SAMOL seni ekkewe lang, mwareiti i seni ekkewe leeni mi tekia! Ami, noun kena chonlang, . . . ekkewe aluwol me ekkewe fopul meinisin, ekkewe mi chinnap me ekkewe semirit! Repwe mwareiti ewe SAMOL, pun itan mi tekia seni fonufan o pwal seni lang.” (Kol Fel 148:1, 2, 12, 13) Ewer, seni iei me feilfeilo chok, amwo kich sipwe mwareiti Jiowa fan iten an kewe foffor mi lapalap!
Ifa Ussun Kopwe Polueni?
• Ikkefa ekkoch an Jiowa kewe foffor mi fich ngeni ach mwareitiir?
• Met popun ka meefi ewe lamoten om kopwe mwareiti Jiowa?
• Ifa ussun ach apilukuluk a riri ngeni an Jiowa kewe foffor mi lapalap?
• Ifa ussun Jiowa a foffori och angang mi fich ngeni ach mwareiti fan iten ach angangen afalafala ewe Muu?
[Picture on page 6]
En ka eani kolun mwareiti Jiowa ren unusen letipom?
[Pictures on page 9]
Sia pwapwa pwe chokkewe mi mosonoson ra chuen tongeni chonikich lon ach mwareiti Jiowa