Ami Kana Sarafo, Mwareiti Jiowa!

“Mwareiti Jiowa seni won fonufan, . . . ami kana aluwol me ekkewe fopul meinisin.”​—KOL FEL 148:​7, 12, NW.

EKKEWE nau ra kan osukosuk ren minne esaamwo mumuta ngeniir ar repwe fori. Chommong leir repwe tongeni eronuk fite ierir atun epwe mumuta ngenir ar repwe pwisin feilo epek ewe al are annutomang lepwin are wisen untengi efoch chitosa. Fan ekkoch, eni emon nau epwe meefi pwe chommong ar kewe tingor epwe iei ussun poluan, “Witiwit tori om kopwe ekis watteta.”

² Ami kana sarafo oua silei pwe sememi kewe me inemi ra meefi lamoten ar repwe fori ekkoch alluk fan iten ar repwe tumunukemi. Iwe, oua pwal fokkun silei pwe Jiowa a pwapwa lupwen oupwe alleasochisi sememi kewe me inemi. (Kolose 3:20) Iwe nge, kese kan meefi fan ekkoch pwe ussun ita nge ka chok witiwiti ewe fansoun om kopwe nemeni pwisin manauom? Ita meinisin ekkewe mettoch mi lamot a pinepin sonuk tori om kopwe watteta? Aapwi, esap ina! Mei fiffis eu angang ikenai mi watte lamotan seni ekkewe ekkoch wis ka witiwiti. A ita mumuta ngenikemi sarafo oupwe fiti ena angang? Iwe, ese chok mumuta ngenikemi​—⁠nge ewe Kot mi Unusen Tekia a pwisin etiwakemi!

³ Ifa ewe angang sia kapas ussun? Nengeni alon ewe wokisin ei lesen a alongolong won: “Mwareiti Jiowa seni won fonufan, . . . ami kana aluwol me ekkewe fopul meinisin, ekkewe mi chinnap me ekkewe semirit.” (Kol Fel 148:​7, 12) A mak lon ekkena wokisin ewe wis auchea mi suuk ngenikemi: Oupwe tongeni mwareiti Jiowa. Ami kana aluwol me fopwul, ouse kan meseikapo pokiten ami fiffiti ena angang? Chommong ra pwapwa. Ren ach sipwe kuna ewe popun epwe murinno ach sipwe pwapwa, sipwe afanni ulungat kapas eis. Aeuin, pwata sipwe mwareiti Jiowa? Oruuan, ifa ussun sipwe tongeni angoch le mwareiti i? Aulungatin, ineet epwe murinno ach sipwe poputa le mwareiti Jiowa?

Pwata Sipwe Mwareiti Jiowa?

⁴ Iei popunlapen ach sipwe mwareiti Jiowa, pun i ewe Chon Forikich. Kol Fel 148 a alisikich le ekilapei ei poraus mi enlet. Anchangei mwo: Ika kopwe chuuri eu pwiin aramas mi kolfengen echo kol mi ngingioch, epwe met meefiom? Epwe ifa ussun ika ka silei pwe kapasen ewe kol ra enlet, porausan a lamot, apwapwa, me apochokkul? Kopwe tipeni om kopwe kaeo kapasen ewe kol me fiti ewe pwiin aramas le kol? A lap me leich ar repwe ina ussun. Iwe, Kol Fel 148 a pwarata pwe ka pwal ina chok ussun nge ka fokkun murinno seni. Ena kol a kapas ussun eu pwiin aramas mi lapalap, iwe, ir meinisin ra mwareiti Jiowa. Iwe nge, atun kopwe alleani ewe kol, eni kopwe kuna eu mettoch mi sokkolo. Met ena?

⁵  Chommong ekkewe mettoch lon Kol Fel 148 mi mwareiti Jiowa rese tongeni kapas are ekiek. Awewe chok, sia alleani ussun an ewe akkar, maram, ekkewe fu, sno, asapwal, ekkewe chuuk, me ekkewe ppan mwareiti Jiowa. Ifa ussun ekkeei mettoch rese manau nge ra tongeni fori ena mettoch? (Wokisin 3, 8, 9) Pwungun pwe epwe pwal ina chok ussun ekkewe ira, ekkewe monun leset, me ekkewe man. (Wokisin 7, 9, 10) Ka fen katol tuputiuen ewe akkar mi lingoch are nenneta me kuna ewe maram mi unus mi fetalelo fan lang fan ekkewe fu are takiri ekkewe man mi urumotfengen are meseikapo om kuna eu leeni mi fokkun lingemwaramwar? Weween pwe ka fen ita “rongorong” ewe kolun mwareiti seni minne Kot a forata. Forien Jiowa kewe meinisin ra achema ngenikich pwe i ewe chon Forata mi unusen tekia, iwe, esor pwal emon mi lollo ngeni ren an manaman, tipatchem are tong.—Rom 1:20; Pwarata 4:11.

⁶ Kol Fel 148 a pwal era pwe forien Kot kewe mi tufichin ekiek ra mwareiti Jiowa. Lon wokisin 2, a kapas ussun noun Jiowa we “mwichen sounfiu” lon lang ra mwareiti Kot. Lon wokisin 11, a etiwa ekkewe aramas mi nennemeni aramas, awewe chok, ekkewe king me soukapwung ar repwe mwareiti Kot. Ika ekkewe chonlang mi manaman ra pwapwaiti ar mwareiti Jiowa, ita menni aramas epwe tongeni pwung le apasa pwe esap mwareiti Kot pun a kon watte pwisin tekiaan? Iwe, lon wokisin 12 me 13, a etiwa ami kana nau pwe oupwe pwal mwareiti Jiowa. En mi tipeni om kopwe fori ena mettoch?

⁷ Ekieki mwo won ei kapas awewe. Ika mei wor emon chienom mi lipwakoch le fori och mettoch—eni eu sokkun urumot, are tufichin kol—kesap aporausa chon om famili me chienom kewe ussun? Ese mwaal. Iwe, epwe pwal ina ussun meefiach lupwen sipwe kaeo meinisin minne Jiowa a fen fori. Awewe chok, Kol Fel 19:1, 2, [NW], a apasa pwe ekkewe fu lon lang ra “foffoseta.” Ren kich, lupwen sia ekkekieki ussun ekkewe mettoch mi amwarar Jiowa a fen apwonueta, sise tongeni ukutiu seni ach foffos ngeni aramas ussun ach Kot.

⁸ Iei pwal eu popun sipwe mwareiti Jiowa, pun a tipeni ach sipwe fori. Pwata? Pun a ita lamot ngeni an epwe angei kapasen mwareiti seni aramas? Aap. Eni epwe lamot ngenikich aramas kapasen mwareiti fan ekkoch, nge Jiowa a fokkun tekia senikich. (Aisea 55:8) Esor an tipemwaramwar ussun pwisin i are lapalapan kewe. (Aisea 45:5) Iwe nge, a mochen ach sipwe mwareiti i me a pwapwa lupwen sia fori. Pwata? Ekieki ussun ruu popun. Aewin, a silei pwe a lamot ngenikich ach sipwe mwareiti i. A anapanapakich pwe sipwe meefi lamoten ach sipwe feffel. (Mattu 5:3) Jiowa a pwapwa lupwen sia fori ena, ussun chok an a kan apwapwai semom kewe me inom ar ra kuna om ani mongo mi murinno fan asengesum.—Jon 4:34.

⁹ Oruuan, Jiowa a silei pwe a lamot ngeni aramas ar repwe rongorong ach mwareiti i. Ewe aposel Paul a makkei ekkeei kapas ngeni ewe aluwol Timoti, a era: “Kopwe tumunufichi pwisin en, o om kena afalafal; kopwe likiitu lon ei sokkun fofor, pun are om fofor epwe iei usun, iwe, kopwe amanaua pwisin en o pwal ir ekkewe mi auseling en.” (1 Timoti 4:16) Pwungun pwe lupwen kopwe aiti ngeni aramas ussun Jiowa Kot me mwareiti i, eni repwe pwal silelo Jiowa. Ena sile epwe tongeni emmwen ngeni ar repwe kuna amanau! —Jon 17:3.

¹⁰ Mei wor pwal eu popun sipwe mwareiti Jiowa. Chechemeni ewe kapas awewe ussun chiechiom we mi amwarar. Ika ka rongorong an aramas mwakeleta poraus ussun i, me aitengaua itan we mi murinno, esap lapelo om tipeppos le mochen mwareiti i? Iwe, a choufetal an aramas aitengaua Jiowa me won ei fonufan. (Jon 8:44; Pwarata 12:9) A chung letipen ir mi tongei i ar repwe pwari ewe enlet ussun i, me affata pwungun ewe poraus. Kopwe pwal mochen pwari om tong me kilisou ngeni Jiowa me aiti ngeni pwe ka mochen i epwe om Sou Nemenem nge sap Satan, ewe chon oputa mi lapalap? Kopwe tongeni fori ena ren om mwareiti Jiowa. Iwe, iei sipwe eis, ifa ussun?

Ifa Ussun Ekkoch Nau Ra Mwareiti Jiowa

¹¹ Ewe Paipel a aiti ngenikich pwe fan chommong ekkewe nau ra lipwakoch le mwareiti Jiowa. Awewe chok, mei wor emon nengnginin Israel mi eolo ren ekkewe chon Siria. A pwora le pwari ngeni puluen noun we masta ussun noun Jiowa we soufos itan Elisa. An poraus a emmwen ngeni eu manaman, iwe, a efisi eu pisekin pwarata mi watte lamotan. (2 King 5:1-17) Le atin Jises, a pwal pwora le afalalafal. Me lein ekkewe mettoch meinisin ra fis le kukkunun Jises mi tongeni mak lon ewe Paipel, Jiowa a filata eu chok, atun an a 12 ierin lupwen Jises a pwora le kapas eis ngeni ekkoch nouwisen lamalam lon ewe imwenfelin Jerusalem. Iwe, ra fokkun mairu ren an weweochiti alen Jiowa kewe. —Luk 2:46-49.

¹² Lupwen Jises a emon mwan, a pwal amwokutu ekkewe semirit pwe repwe mwareiti Jiowa. Awewe chok, fitu chok ran me mwen an epwe malo, Jises a nonnom lon ewe imwenfel lon Jerusalem. Ewe Paipel a apasa pwe a fori “ekkewe manaman mi amwarar.” A asuolo ekkewe mi siwili ewe imwenfel pwe epwe imwen chon sola. A pwal achikara ekkewe mi chun me ekkewe mi pechema. Ita epwe amwokutu ir meinisin, akkaeuin ekkewe nouwisen lamalam ar repwe mwareiti Jiowa me Noun we, ewe Messaia. Iwe nge, lon ena fansoun chommong rese eani ekkewe kapasen mwareiti. Ra fen silei pwe Kot a tinatiu Jises, nge ra niuokkusiti ekkewe sou emmwen lon pekin lamalam. Iwe nge, eu pwin aramas ra akkafalafal fan pwora. En mi silei ika io kana? Ewe Paipel a apasa: “Nge lupwen ekkewe samol-fel me ekkewe soumak ra nengeni ekkewe manaman [Jises] a fori, o pwal ekkewe at ra pupuchor lon ewe imwen fel, ‘Osanna ngeni Noun Tafit!’ ra chok chou, o ra apasa ngeni i, ‘Kose mo rong minne ra apasa?’”—Mattu 21:15, 16; Jon 12:42.

¹³ Ekkena samol-fel ra ekieki pwe Jises epwe mina ekkena semirit mi mwareiti i. Iwe, a ita fori ena? Aapwi! Jises a apasa ngeni ekkewe samol-fel: “Ewer, nge ouse mo alleani pwe ‘Seni auen semirit me monukol ka aunusaochu kapasen mwareiti’?” A ffat pwe Jises me Seman we ra pwapwaiti an ekkewe at kapasen mwareiti. Ekkena semirit ra fori minne ekkewe watte repwe ita fori. A ffatafatoch lon ekiekin ekkewe semirit. Ra kuna ei mwan an a fori ekkewe manaman mi amwarar, afalafal fan pwora me luku, me pwarata tong mi alollol ngeni Kot me noun kewe aramas. A pwung alon lupwen a apasa pwe i Noun Tafit,” ewe Messaia mi pwonetiu. Ra feioch ren ar luku, iwe, ekkena at ra pwal mwo nge wisen apwonueta eu oesini. —Kol Fel 8:2.

¹⁴ Met sipwe tongeni kaeo seni ekkena leenien appiru? Iwe, a tufich ngeni ekkewe nau ar repwe lipwakoch le mwareiti Jiowa. Fan chommong me rer, ewe enlet a ffatafatoch me mecheres, iwe, ra pwarata ar luku ren tinikken me mwasangasang. Ra pwal eani minne a mak lon An Salomon Fos 20:29 “Aramas ra ingeiti pochokulen alual.” Ewer, a nom ren ami kana aluwol me fopwul pochokkul me manaman—ekkewe mettoch repwe atufichikemi pwe oupwe mwareiti Jiowa. Iwe epwe ifa ussun oupwe tongeni aeafichi ekkena sokkun tufich?

Ifa Ussun Kopwe Tongeni Mwareiti Jiowa?

¹⁵  Ach lipwakoch le mwareiti Jiowa epwe popu seni ewe letip. Sise tongeni lipwakoch ika sia chok mochen apwapwai aramas. Chechemeni mwo ewe alluk mi lapalap seni meinisin: “Kopwe tongei om Samol Kot ren unusen letipom, o ren unusen ngunum, o ren unusen ekiekum.” (Mattu 22:37) En mi silei Jiowa seni om pwisin kaeo an we Kapas? Mi fich pwe ena sokkun kaeo epwe efisi ach tongei Jiowa. Sia kan pwappwarata ena tong ren ach mwareiti i. Lupwen a ffat ngonuk pwe tong a amwokutuk, kopwe mwasangasang le mwareiti Jiowa.

¹⁶ Iwe, pwal mwo nge me mwen om kopwe afanni minne kopwe apasa, ekieki ussun om kewe foffor. Ika ena nengnginin Israel lon ranin Elisa we a kan lamalam tekia, sufolungau, are kapas chofona, om luku nge ekkewe chon Siria repwe auseling lupwen a kapas ussun noun Jiowa we soufos? Neman resap. Pwal ina chok ussun, aramas repwe auseling ngonuk ika ra kuna pwe ka kan sufoluti aramas, wenechar, me foffor murinno. (Rom 2:21) Ekieki ussun eu leenien appiru.

¹⁷ Emon nengnginin Portugal, 11 ierin, a kuna sossot pwe epwe fiti ekkewe ranin apwapwa mi u ngeni miritiin letipan mi longolong won Paipel. Fan sufol a awewei ngeni noun we sense ewe popun esap fiti, nge ewe sense a esiita i. Mwirin och fansoun, ewe sense a sotun asaua i me esiita an we lamalam fan fitu. Iwe nge, ewe nengngin a chok pwarata sufol ngeni. Fitu ier mwirin, ewe nengngin, i emon pioneer, emon chon afalafal full-time. Lon eu mwichelap, a katol ekkewe aramas atun ra papatais nge a esinna emon leir. Ina i noun we sense me lom! Mwirin ar foropachfengen fan kechiuen pwapwa, ewe fefin a ereni ewe fopwul pwe ese monuki an foffor mi fiti sufol ngeni. Emon Chon Pwarata Jiowa a chuuri, iwe, ewe sense a kapas ussun fofforochun noun we chon sukul. Mwiriloon, a poputa le kakkaeo ewe Paipel, me neminewe a luku ekkewe poraus mi enlet lon Paipel. Ewer, lapalapen om kewe foffor epwe wor manamanen le mwareiti Jiowa!

¹⁸ Fan ekkoch lon sukul, kese meefi nge a weires om kopwe poputaani porausfengen ussun om luku? Kese alaemon chok. Iwe nge, kopwe tongeni amecheresi aramas ar repwe kapas eis ussun om luku. Awewe chok, ika mei mumuta, pwata kese uwei noum kewe puken aweween Paipel me alleaniir atun ka asoso leonowas are pwal eu fansoun? Eni, chienom kewe chon sukul repwe eisinuk ussun minne ka alleani. Ren om polueniir me ereniir minne ka efich lon ewe lesen are lon ewe puk ka kamwoch, eni epwe amecheresi poputaan ami popporausfengen. Chechchemeni om kopwe eani kapas eis, pwe kopwe silei minne chienom kewe chon sukul ra achifoua. Auseling fan mennin, aiti ngenir minne ka fen kaeo seni ewe Paipel. Ussun ekkewe poraus lon pekin taropwe 29 ra aiti ngenikich, chommong sarafo ra mwareiti Kot lon sukul. A atoto rer pwapwa chapur me alisi chommong ar repwe silei Jiowa.

¹⁹ Ewe angangen afalafal imw me imw, ina eu esin angangen mwareiti Jiowa mi murinno seni meinisin. Ika kesaamwo fiti, pwata kese achocho ngeni? Ika ka fen fiffiti ena angang, mei wor pwal ekkoch mettoch kopwe tongeni achocho ngeni? Awewe chok, sisap eani eu esin afalafal ngeni chon ekkewe imw meinisin, nge sipwe sotun lipwakochulo me tingor alillis seni semom kewe me inom me pwal ekkoch mi lipwakoch. Kopwe lipwakochulo le nounoufichi ewe Paipel, foffori liwiniti chon mochen auseling, me poputaani kaeoon Paipel. (1 Timoti 4:15) Ika a ina ussun an epwe lapelo om mwareiti Jiowa, iwe, epwe pwal lapelo lipwakochum me om pwapwa lon ewe angangen afalafal.

Ineet Kopwe Poputa le Mwareiti Jiowa?

²⁰ Lon ei poraus, poluen ei aulungatin kapas eis a mecheres seni meinisin. Nengeni an ewe Paipel polueni: “Iwe, lealualum kopwe chechemeni ewe mi foruk.” (An Salomon Afalafal 12:1) Ewer, iei ewe fansoun ach sipwe poputa le mwareiti Jiowa. A fen kon mecheres ach sipwe apasa: “Ngang ua kon kukkun le mwareiti Jiowa. Ua lipwakingau. Upwe ekis witiwit tori ai upwe watteta.” Sap minne en chok ka meefi ina ussun. Awewe chok, le kukkunun, Jeremaia a ereni Jiowa: “Ai Kot Samol mi Lapalap, nengeni, usap sile fos, pun ngang eman mi chok ier kukun.” Jiowa a alukuluku ngeni pwe esor popun an epwe niuokkus. (Jeremaia 1:6) Pwal ina chok ussun, esor popun sipwe niuokkus lupwen sipwe mwareiti Jiowa. Esor och feiengau epwe torikich nge Jiowa esap tongeni amoielo. —Kol Fel 118:6.

²¹ Iwe, sia peseikemi sarafo: Ousap ammanga ami mwareiti Jiowa! Iei le kukkunumi, iei ewe fansoun mi murinno seni meinisin oupwe fiffiti ewe angang mi lamot seni meinisin mi fiffis won fonufan lon ach ei fansoun. Lupwen kopwe fori, kopwe choni eu mettoch mi fokkun amwarar—ewe famili lon lang me won fonufan mi mwareiti Jiowa. Jiowa a pwapwa pwe en ka kapachelong lon ei famili. Nengeni ekkeei kapas ewe sou makkei kol fel a ereni Jiowa: “Noum aramas repwe asoresini pwisin manauer seni lon letiper lon ewe ran kopwe emmweni noum mwichen aramas won ekkewe chuk mi fel. Seni leluken lesesor, om pochokkul epwe feito reom, usun chok amurenipwin.”—Kol Fel 110:3.

²² A mmen lingoch amurenipwin mi monupunup fan akkaren lesesor, ika met? Ra asosokich, saramaram, iwe, esor emon epwe tongeni alleani. A ina ekiekin Jiowa ussun ekkewe nau mi likiitu le mwareiti i lon ekkeei fansoun weires. A ffat pwe om mwareiti Jiowa a apwapwai letipan. (An Salomon Fos 27:11) Ina minne, oupwe mwareiti Jiowa, ami kana nau!

Ifa Ussun Kopwe Polueni?

• Ikkefa ekkoch popun mi lamot ach sipwe mwareiti Jiowa?

• Ikkefa ekkewe leenien appiru lon Paipel mi pwarata pwe mei tufich ekkewe nau repwe lipwakoch le mwareiti Jiowa?

• Ifa ussun ekkewe nau repwe tongeni mwareiti Jiowa lon ach ei fansoun?

• Inet epwe murinno ngeni ekkewe nau ar repwe poputa le mwareiti Jiowa, iwe, pwata?

[Ekkewe kapas eis fan iten ewe lesen]

1, 2. (a) Chommong sarafo ra silei pwe ese mumuta ngenir met sokkun mettoch? (b) Met popun ekkewe sarafo resap mangau ren ekkewe pinepin semer kewe me iner ra fori fan asengesir?

3. Jiowa a etiwa ekkewe nau pwe repwe eani menni wis, iwe, ikkefa ekkewe kapas eis sipwe kaeo ussun iei?

4, 5. (a) Me ren Kol Fel 148, ifa nonnomuch we mi amwarar? (b) Ifa ussun forien Kot kewe rese tongeni fos are ekiek nge ra chuen mwareiti Jiowa?

6, 7. (a) Kol Fel 148 a kapas ussun menni forien Kot kewe mi tufichin ekiek ra mwareiti Jiowa? (b) Met popun epwe chung letipach ach sipwe mwareiti Jiowa? Eani kapas awewe.

8, 9. Met popun Jiowa a mochen ach sipwe mwareiti i?

10. Met popun letipach a amwokutukich ach sipwe mwareiti ach Kot?

11. Ikkefa ekkewe leenien appiru lon Paipel ra pwarata pwe ekkewe nau repwe tongeni lipwakoch le mwareiti Jiowa?

12, 13. (a) Met Jises a fori lon ewe imwenfel fitu ran me mwen an we malo, iwe, met meefien ekkewe aramas ikewe ie? (b) Met meefien Jises ussun an ekkewe semirit kapasen mwareiti?

14. Ifa ussun ekkewe sokkun tufich ekkewe nau ra eani ra atufichiir le mwareiti Kot?

15. Ifa ewe minen amwokut a lamot fan iten ach sipwe lipwakoch le mwareiti Jiowa?

16, 17. Ifa lamoten ach kewe foffor lon ach mwareiti Jiowa? Eani kapas awewe.

18. Met emon sarafo epwe fori ika a ekis sau an epwe kakkapas ussun ewe Paipel me Jiowa Kot?

19. Ifa ussun ekkewe sarafo repwe lipwakochulo lon ewe angangen afalafal imw me imw?

20. Pwata esor popun ekkewe sarafo repwe meefi pwe ir mi kon kukkun le mwareiti Jiowa?

21, 22. Pwata ekkewe nau mi mwareiti Jiowa ra ussun chok amurenipwin, me pwata ena mettoch epwe apochokkulakich?

[Lios lon pekin taropwe 27]

Ika chienom we a lipwakoch lon eu angang, kesap aporausa ekkewe ekkoch aramas ussun?

[Lios lon pekin taropwe 29]

Eni ekkewe chon sukul repwe mochen silei minne ka luku

[Lios lon pekin taropwe 30]

Ika ka mochen lipwakochulo lon om angangen afalafal, tingor alillis seni ekkewe Chon Pwarata mi lipwakoch