Pwata Kopwe Kaeo ewe Paipel?
BILL, i emon aluwol, a angoch lon urumot, a sukul tekia, me a pisekisek. Iwe nge, ese kkon lien pwapwa. Ese wor popun manauan, iwe, a fokkun osukosuk ren. Lon an sotun weweiti popun manauan, a atittina ekkoch lamalam, nge ese kuna minne a kukkutta. Lon 1991, a chuuri emon Chon Pwarata Jiowa, iwe, a ngeni Bill eu puk mi kapas ussun minne ewe Paipel a apasa ussun popun manauen aramas. A poputa eu kaeo lon ewe Paipel pwe Bill epwe tongeni kaeo ei poraus me pwal ekkoch.
Bill a chechemeni: “A fis ewe aeuin kaeo, iwe, pokiten am aua alleani seni Paipel fan chommong, ua silei pwe iei ewe mettoch ua kukkutta. A fokkun amwarar ngeniei ifa ussun ewe Paipel a polueni ai kkewe kapas eis. Mwirin ena kaeo, ua wawa wai we ngeni won ekkewe chuuk, iwe, ua tou seni wai we, me pupuchor ren pwapwa. Ua fokkun pwapwa pwe ua kuna poluen ai kkewe kapas eis.”
Pwungun pwe sap minne iteiten aramas meinisin mi kuna ewe enlet seni Paipel repwe pupuchor ren pwapwa. Nge, chommong aramas ra kuna pwapwa chapur seni ar sileilo poluen ekkewe kapas eis mi lamot ussun manauer. Ra meefi ussun chok ewe mwan lon an Jises kapas monomon mi kuna eu pisek auchea lon eu malamal. Jises a apasa: “Iwe, ren an pwapwa a feilo o amomolo mettoch meinisin minne mi wor ren, o moni ewe malamal.”—Mattu 13:44.
Ewe Ki ngeni eu Manau mi Auchea Popunlapan
Bill a kkan ekieki ussun ewe kapas eis, Ifa popunlapen manauach? Ren fite ngerou ier, ekkewe sou ekiek, ekkewe nouwisen lamalam, me ekkewe sou tipatchem ra achocho le polueni ena kapas eis. Chommong puk ra mak ren ir kkewe mi sotun polueni ena kapas eis. Ra resin achocho le polueni nge rese tongeni, iwe, chommong ra apasa pwe esor poluan. Iwe nge, mei wor poluan. Inaamwo ika a alollol poluan, nge ese weires ach sipwe weweiti. Ewe Paipel a awewei. Iei kien eu manau mi pwapwa me auchea: A lamot ach sipwe ririoch ngeni Jiowa, ewe Chon Forikich me Semach lon lang. Epwe ifa ussun sipwe fori ena mettoch?
Mei wor ruu mettoch repwe atufichikich ach sipwe arap ngeni Kot, nge ussun ita nge ra ufengen lefiler. Ir kkewe mi arap ngeni Kot repwe niuokkusiiti me tongei i. Sipwe kaeo ruu wokisin mi aiti ngenikich pwungun ena poraus. Lom, lom, emon King mi tipatchem itan Salomon a kaeofichi lapalapen manauen aramas, iwe, a makkei minne a kuna lon ewe puken Paipel itan An Salomon Afalafal. Ren an menlapei minne a fen kaeo, a makkei: “Iei ewe kapasen le sopolon, mwirin ai nenengeni mettoch meinisin: “Niueiti ewe Kot mi enlet me alleasochisi an kkewe alluk. Pun iei a fichiiti aramas meinisin.” (An Salomon Afalafal 12:13) Fitepuku ier mwirin, lupwen emon a eisini Jises ifa ewe alluk mi lapalap seni meinisin lon ewe Allukun Moses, a polueni: “Kopwe tongei Jiowa om Kot ren unusen letipom me unusen ngunum me unusen ekiekum.” (Mattu 22:37, NW) A ita ina eu mettoch mi umwes ngonuk ach sipwe niueiti me pwal tongei i? Sipwe nennengeni lamoten ekkewe mettoch niuokkus me tong, me pwal ifa ussun repwe angangfengen le alisi emon an epwe ririoch ngeni Kot.
Met Weween ewe Mettoch Niueiti Kot
A lamot eu niuokkus mi fiti sufol ika sipwe eani ewe sokkun fel Kot epwe etiwa. Ewe Paipel a apasa: “Niuokkusiti Jiowa, iei poputaan tipatchem.” (Kol Fel 111:10, NW) Ewe aposel Paul a makkei: “Sipwe pwal fel ngeni Kot ren sokkun fel mi epwe apwapwai i, ren mennin o niuokus.” (Ipru 12:28) Pwal ussun chok ena, ewe aposel Jon a kuna lon eu langepwi emon chonlang mi akkas fan lukanapen lang, iwe, a poputa an afalafala ewe kapas allim ren ekkeei kapas: “Oupwe niuokusiti Kot o alingalo i.”—Pwarata 14:6, 7.
Ei sokkun niuokkusun Kot, ewe mi fokkun lamot ngeni popunlapen manauach, ese wewefengen me ewe sokkun niuokkusun ninni. Eni sipwe niuokkusiti emon chon furio mi amosokukich. Nge ach niueiti Kot a wewe ngeni ach sipwe ingemwareiti ewe Chon Fori mettoch meinisin. A pwal wewe ngeni ach sipwe niuokkusiti ach sipwe aletipengaua Kot pun I ewe Soukapwung mi Lapalap me ewe Emon mi Unusen Tekia, iwe, a wor ren ewe manaman me pwungun nemenem pwe epwe apwungu ekkewe chon alleasolap.
Niuokkus me Tong Ra Angangfengen
Iwe nge, Jiowa ese mochen aramas ar repwe angang ngeni pokiten chok ar ingemwareiti I. Jiowa, I wesewesen emon Kot mi tong. Ewe aposel Jon a makkei: “Kot mi tong.” (1 Jon 4:8) Lon an kkewe foffor meinisin ngeni aramas, Jiowa a pwarata an tong, iwe, a mochen pwe aramas repwe pwal tongei I. Iwe nge, ifa ussun ena sokkun tong a tipeeu ngeni an aramas niuokkusiti Kot? Iwe, ir me ruu mettoch ra ririfengen. Ewe sou kol a makkei: “Jiowa epwe chiechi ngeni ir kkewe mi niueiti i.”—Kol Fel 25:14, NW.
Ekieki mwo ussun ewe sufol me ingemwaramwar emon semirit epwe meefi ussun seman we mi pochokkul me tipatchem. Iwe nge, ewe semirit epwe pwal pwapwaesini an seman we tong. Ewe semirit epwe eani lukuluk won seman we me kutta kapasen emmwen seni, iwe, epwe achifoua pwe epwe kuna alillis seni an kapasen emmwen. Epwe pwal ina ussuch, ika sia tongei me niueiti Jiowa, iwe, sipwe alleasochisi an kkewe kapasen emmwen me kuna feioch seni. Nennengeni minne Jiowa a apasa ussun ekkewe chon Israel: “Amwo leluker epwe iei chok ussun iteiten fansoun, pwe repwe niueti o alleasochisi ai kkewe alluk meinisin, pwe repwe feioch me mwirimwirir tori feilfeilo chok!”—Tuteronomi 5:29.
Ewe mettoch niueti Kot esap emmwen ngeni an aramas fotek fan nemenemengau nge repwe fen ngaselo ren, iwe, esap efisata letipechou pwe pwapwa. Aisea a oesini ussun Jises: “Iwe, epwe pwapwa ngeni an epwe alleasochisi Jiowa fan niuokus.” (Aisea 11:3, NW) Iwe, ewe sou kol a pwal makkei: “Mi pwapwa atewe mi niuokusiti Jiowa, atewe mi fokkun pwapwaesini an kkewe alluk.”—Kol Fel 112:1, NW.
Pwungun pwe sisap tongeni niueiti me tongei Kot ika sise silei i. Ina ewe popun a fokkun lamot ach sipwe kaeo ewe Paipel. Ena kaeo epwe alisikich le weweiti lapalapen Kot kkewe me aucheani ewe alen tipatchem pwe sipwe alleasochisi an kkewe kapasen emmwen. Lupwen sipwe arap ngeni Kot, sipwe mochen foffori letipan, iwe, epwe amwokutukich pwe sipwe alleasochisi an kkewe alluk pun sipwe kuna feioch seni.—1 Jon 5:3.
Ina eu minen apwapwa an emon silei pwe a pwung alen manauan. A ina ussun Bill, atewe sia chuuri le poplutaan ei proaus. Lon eu fansoun mi kukuto, a apasa: “Lon ekkewe tiu ier ra lo seni ai we keran popuuta le kaeo ewe Paipel, a fokkun mammarita ai riri ngeni Jiowa. Ewe pwapwa ua akkom meefi a lapalapelo ngeni ai manaueni eu manau mi enletin pwapwa. Ua kan eani ekiek mi murinno ussun manauei. Iteiten ran a ur ren foffor mi lamot chapur, nge use chuen kukkutta pwapwaan inisin mi chok lamot-mwaal. Jiowa, I wesewesen emon ngeniei, iwe, ua silei pwe a wesewesen mochen pwe mettoch meinisin minne upwe fori epwe sopwoch.”
Lon ewe poraus mwirin, sipwe kaeo ifa ussun ewe silei ussun Jiowa epwe atoto pwapwa me feioch ngeni ir kkewe mi apwonueta ena sile lon manauer.
[Blurb on page 5]
Ach Arap Ngeni Kot A Wewe Ngeni Ach Sipwe Tongei Me Pwal Niueiti I
[Picture on page 6]
Jises a kuna pwapwa lon an niueiti Jiowa