Kukkuna Pwapwaan Liffang!
“Pwapwaan liffang a lap seni pwapwaan angei.”—FOFFOR 20:35.
1. Ifa ussun Jiowa a pwarata ewe pwapwaan liffang?
EWE pwapwa sipwe kuna seni ach silei ewe enlet me ekkewe feioch mi popu seni, ir liffang mi auchea seni Kot. A nom ren ir kkewe mi silei Jiowa chommong popun ar repwe pwapwa. Inaamwo ika mei wor pwapwaan ach sipwe angei eu liffang, nge mei pwal wor pwapwaan ach sipwe liffangelo. Jiowa, I emon Sou Awora “meinisin sokkun liffang mi murinno, o meinisin sokkun minen liffang mi unusoch,” iwe, i pwal emon “Koten pwapwa.” (Jemes 1:17; 1 Timoti 1:11) A kait ngeni ir kkewe meinisin mi auseling, iwe, a pwal kuna pwapwa ren ar alleasochis, ussun chok ekkewe sam me in repwe pwapwa lupwen nour kkewe repwe alleasochisi ar kkewe kapasen emmwen mi popu seni ar tong.—Proverbs 27:11.
2. (a) Met Jises a apasa ussun ewe mettoch liffang? (b) Ifa ewe pwapwa sipwe kuna lupwen sipwe asukula aramas ewe enlet seni Paipel?
2 Pwal ussun chok, lupwen a nonnom won fonufan, Jises a meefi pwapwa lupwen aramas ra alleasochis ngeni minne a afalafaler. Ewe aposel Paul a makkei minne Jises a apasa: “Pwapwaan liffang a lap seni pwapwaan angei.” (Foffor 20:35) Ewe sokkun pwapwa sipwe kuna lupwen sipwe asukula ekkewe ekkoch lon ewe Paipel esap chok popu seni an emon epwe tipeeu ngeni ach luku lon pekin lamalam. Lap seni ena, ina ewe sokkun pwapwa mi popu seni ach silei pwe sia fang ngeni eu mettoch mi enlet me nomofochelo. Ren ach sipwe awora ngeni ekkewe ekkoch eu liffang lon pekin ngun, sipwe tongeni alisi aramas pwe repwe efeiochu pwisin ir iei chok me pwal tori feilfeilo chok.—1 Timoti 4:8.
Ewe Fofforun Liffangelo A Atoto Pwapwa
3. (a) Ifa ussun ewe aposel Paul me Jon ra pwarata ar pwapwa le alisi ekkewe ekkoch lon pekin luku? (b) Pwata ach afalafala nouch kkewe ewe enlet seni Paipel a pwarata tong?
3 Ewer, ussun chok Jiowa me Jises ra kuna pwapwa lon ar fang ngeni aramas ekkewe liffang lon pekin ngun, a pwal ina ussun ekkewe chon Kraist. Ewe aposel Paul a pwapwa le silei pwe a fen alisi ekkewe ekkoch ar repwe silei ewe enlet seni an Kot we Kapas. A mak ngeni ewe mwichefel lon Korint: “Epwe meeta am apilukuluk allim, are pwapwa, are mwarin sikasini—are esap ami?—fan mesen ach Samol Jises lupwen epwe waroto? Pun ami mi am ling, pwal am pwapwa.” (1 Tesalonika 2:19, 20) Ussun chok ena, ewe aposel Jon, lon an kapas ussun noun kkewe lon pekin ngun, a makkei: “Esor och pwapwa mi lap seni ai pwapwa lupwen ai rong pwe nei kena ra feffetal lon ewe enlet.” (3 Jon 4) Pwal ekieki mwo ussun ewe pwapwa sipwe kuna lupwen sipwe alisi pwisin nouch kkewe pwe repwe wiliti nouch kkewe lon pekin ngun! Ar foleniochu ekkewe nau “ren sokkun amirit me fonou me ren ekiekin Jiowa” a pwarata an ewe sam me in tong. (Efisus 6:4) Epwe ina ussun ekkewe sam me in repwe pwarata pwe ra ekkekieki ussun met epwe ochiti nour kkewe tori feilfeilo chok. Lupwen ekkewe nau repwe tipeeu ngeni, ekkewe sam me in repwe kuna pwapwa chapur.
4. Ifa ussun minne emon a kuna a pwarata ewe pwapwaan liffang lon pekin luku?
4 Dell, i emon full-time pioneer chon afalafal, iwe, a pwal wor nimon noun kkewe. A apasa: “Ua tongeni weweiti alon ewe aposel Jon, pun ngang ua fokkun kilisou pwe fomon nei kkewe ra ‘feffetal lon ewe enlet.’ Ua silei pwe a mwareiti me alinga Jiowa lupwen ekkewe famili repwe tipeeufengen lon ewe fel mi enlet, ina popun, ua meefi kilisou lupwen ua kuna an efeiochu ai achocho le fotuki ewe enlet lon letipen nei kkewe. Ai tufichin kuna manau esemuch lon ewe paratis fengen me ai famili a auralo letipen ren apilukuluk allim me pwal amwokutuei pwe upwe likiitu inaamwo ika a kan tottoriei weires me minen eppet.” Iei eu poraus mi alolilen pwe emon noun Dell we fopwul a katowu seni ewe mwichefel pokiten an aleni efoch al ese fich ngeni Chon Kraist. Iwe nge, Dell a angang weires pwe epwe akkamwochu eu ekiek mi positive. A apasa: “Ua aneanei pwe eu ran, nei we epwe tipetekisonatiu me letip-wenechar pwe epwe liwinsefalliti Jiowa. Nge ua kilisou ngeni Kot pwe lap ngeni nei kkewe meinisin ra likiitu le angang ngeni ren tuppwol. Ewe pwapwa ua meefi, ina eu minen apochokkul ngeniei.”—Nehemaia 8:10.
Foralo Chiechi mi Epwe Nom Tori Feilfeilo Chok
5. Lupwen sipwe fiti ewe angangen foralo chon kaeo, ach silei met epwe apwapwai letipach?
5 Jises a alluku ngeni noun kkewe chon kaeo pwe repwe foralo chon kaeo me aiti ngeni ussun Jiowa me minne a kan kukkutta senir. (Mattu 28:19, 20) Jiowa me Jises ra fen kirokiroch le alisi aramas pwe repwe silei ewe alen enlet. Ina minne, lupwen sipwe achocho lon ewe angangen foralo chon kaeo, sipwe tongeni pwapwa le silei pwe sipwe akkappiru an Jiowa me Jises kkewe leenien appiru, ussun chok ekkewe Chon Kraist lom lom. (1 Korint 11:1) Lupwen sipwe angangfengen me ewe Kot mi Unusen Tekia me Noun we mi achengicheng, epwe wor popun manauach. Met ren watten ach pwapwa pwe sipwe nom lein noun Kot kkewe “chon angang”! (1 Korint 3:9) Iwe, esap pwal eu minen apwapwa pwe pwal mwo nge ekkewe chonlang ra eti ei angangen afalafala ewe kapas allim?—Pwarata 14:6, 7.
6. Atun sipwe liffang ngeni ekkewe ekkoch lon pekin ngun, io kkewe repwe wiliti chiechiach kkewe?
6 Iwe, ren ach fiffiti ei angangen liffangelo mettochun ngun, sipwe wiliti eu mettoch mi lu seni ach sipwe chok chienen Kot le angang—sipwe tongeni chiechioch ngeni tori feilfeilo chok. Pokiten an luku, Eperiam a iteni chiechien Jiowa. (Jemes 2:23) Lupwen sipwe achocho le foffori letipen Kot, sipwe pwal tongeni wiliti chiechien Kot kkewe. Ika sipwe fori ena mettoch, sipwe pwal chiechi ngeni Jises. A apasa ngeni noun kkewe chon kaeo: “Ua fen eita ngenikemi pwe kich chiechi, pun mettoch meinisin ua rong seni Semei we ua chok esilei ngenikemi.” (Jon 15:15) Chommong aramas repwe pwapwa ika repwe iteni chiechien aramas mi itefoulo are ekkewe meilap, nge epwe tufich ach sipwe chiechien ekkewe ruuemon mi lapalap seni meinisin!
7. (a) Ifa ussun emon fefin a nouni emon chienan we mi enlet? (b) A fen fis ngonuk?
7 Pwal eu, lupwen sipwe alisi aramas pwe repwe silei Kot, repwe pwal wiliti chiechiach kkewe, iwe, epwe atoto rech eu sokkun pwapwa mi sokkolo aucheaan. Joan, emon fin Merika, a poputa le kaeo Paipel ngeni emon fefin itan Thelma. Inaamwo ika an Thelma famili a u ngeni an kakkaeo ewe Paipel, nge a chok likiitu me papataiselo mwirin eu ier. Joan a makkei: “Am chiechifengen ese ukutiu me ikana ie; iwe nge, a fen mammarita ngeni eu chiechiochfengen mi likiitu tori ikenai mwirin 35 ier. Fan chommong am aua angangfengen lon ewe angangen afalafal me mwinfengen le fiti ekkewe mwichelap. Lo, lo, lo, ua mwokut ngeni pwal eu leeni mi 500 mail towauan. Nge Thelma a chuen tinato ngeniei noun kkewe taropwe mi ur ren tong, iwe, a ereniei pwe a ekieki usi ren tong me a kilisou ngeniei pokiten ai chiechi ngeni me pwal ewe leenien appiru ua isetiu mwan, me ai asukula ewe enlet seni Paipel. Ei chiechifengen lefilem mi fokkun achengicheng, ina eu liwinin mi fokkun murinno fan iten ai achocho le alisi an epwe kakkaeo ussun Jiowa.”
8. Ifa ewe ekiek murinno epwe alisikich lon ewe angangen afalafal?
8 Ewe tufichin chuuri emon mi mochen kaeo ewe enlet epwe tongeni alisikich le likiitu inaamwo ika chommong aramas sia chuuri ra tenechepwak ussun an Jiowa we Kapas. Ena sokkun tenechepwak a sotuni ach luku me ach likiitu. Nge ach eani ekiek mi positive epwe tongeni alisikich. Fausto, emon chon Guatemala, a era: “Lupwen ua afalafal ngeni aramas, ua chok ekieki pwe epwe ifa me watten murinoon ika emonewe ua fos ngeni epwap wiliti ai brother are sister lon pekin ngun. Ua ekieki pwe eni epwe tufich emon me lein ekkewe aramas meinisin ua fos ngeni epwe etiwa ewe enlet seni an Kot we Kapas. Ena ekiek a alisiei pwe upwe sopweilo le afalafala aramas, iwe, a pwal atoto rei pwapwa chapur.”
Isoni Ekewe Pisek Auchea lon Lang
9. Met Jises a apasa ussun ekkewe pisek auchea lon lang, iwe, ifa ewe mettoch sia tongeni kaeo seni?
9 Esap kon lien mecheres ach sipwe foralo chon kaeo seni nouch kewe semirit are pwal ekkoch aramas. Sipwe fangelo ach fansoun, me sipwe pwarata mosonottam me likiitu. Iwe nge, sipwe chechemeni pwe chommong aramas ra tipeeu ngeni ar repwe angang weires fan iten ar repwe isoni chommong pisek, nge pisek esap atoto rer pwapwa me resap pwal nomofochofoch. Jises a ereni chon auseling ngeni pwe epwe murinno ar repwe akkangang fan iten ekkewe mettoch mi auchea lon pekin ngun. A apasa: “Ousap iseni pisekimi won fonufan, ikkewe macholap me paarang ra ani me ie, o chon sola ra atai o solani me ie. Nge oupwe iseni pisekimi lon lang, ikkewe macholap me paarang resap ani me ie, o chon sola resap atai are solani me ie.” (Mattu 6:19, 20) Ren ach achocho ngeni ekkewe mettochun ngun—mi kapachelong ach sipwe fiffiti ewe angangen foralo chon kaeo—sipwe tongeni pwapwa le silei pwe sia foffori letipen Kot me epwe efeiochukich. Ewe aposel Paul a makkei: “Pun Kot mi pwung, o esap monukalo ami angang me tong fan asengesin itan.”—Ipru 6:10.
10. (a) Pwata Jises a eani ekkewe pisek auchea lon pekin ngun? (b) Ifa ussun Jises a awora pwisin an alillis ngeni ekkewe ekkoch, iwe, ifa ussun an a efeiochur?
10 Ika sipwe tinikken lon ach foralo chon kaeo, sipwe isoni “ekkewe pisek auchea lon lang” fan iten pwisin kich, ussun Jises a apasa. Ena mettoch epwe atoto rech pwapwaan angei. Ika sipwe liffang nge sisap ekiekin angei, lo, lo, sipwe pwisin feioch ren. Jises a pwisin angang ngeni Jiowa fitu billion ier. Ekkekieki ussun ekkewe pisek auchea lon pekin ngun a eu iseis lon lang! Iwe nge, Jises ese kutta chok pwisin letipan. Ewe aposel Paul a makkei: “[Jises] a fangelo pwisin i fan asengesin ach tipis, pwe epwe angasakichelo seni ei fansoun ingau, ussun mi fich ngeni letipen ach Kot me Semach.” (Kalesia 1:4) Jises ese chok angang weires lon an angangen afalafal, nge a fangelo pwisin manauan pwe epwe awora ewe moon kepich fan iten ekkewe ekkoch repwe tongeni isoni ekkewe pisek auchea lon lang.
11. Pwata ekkewe liffang lon pekin ngun a murinno lap seni ekkewe liffangen pisek?
11 Ren ach sipwe kaeo ngeni aramas ussun Kot, sipwe alisir ar repwe kuna ifa ussun repwe pwal tongeni isoni ekkewe pisek auchea lon pekin ngun mi epwe nomofochelo. Ita ifa eu liffang kopwe fangelo epwe tongeni an epwe murinno lap seni? Ika kopwe liffang ngeni emon chienom we eu was mi mommong, efoch chitosa, are pwal mwo nge eu imw, chienom we epwe fokkun kilisou me pwapwa, iwe, kopwe meefi ewe pwapwaan liffang. Nge epwe met lapalapen ewe liffang mwirin 20 ier? Mwirin 200 ier? Mwirin 2,000 ier? Iwe nge, ika kopwe pwisin liffang ngeni emon om fansoun le alisi pwe epwe angang ngeni Jiowa, epwe kuna feioch seni ena liffang tori feilfeilo chok.
Kukkutta Ir kkewe mi Efich ewe Enlet
12. Ifa ussun chommong ra awora minne a nom rer fan iten ar repwe alisata ekkewe ekkoch lon pekin luku?
12 Ren ar repwe kuna pwapwaan liffang ngeni aramas ekkewe mettochun ngun, noun Jiowa kkewe aramas ra afalafala aramas won unusen fonufan. Fite ngerou ra likitalo imwer kkewe me ar famili pwe repwe fiti ewe angangen misineri lon pwal eu fonu ikkewe repwe kaeo pwal eu fosun me eorenien aramas ie. Pwal ekkoch ra mwokut ngeni pwal eu leeni lon pwisin fonuer, ikkewe a nafangau ekkewe chon afalafal ie. Iwe, pwal ekkoch ra kaeo pwal eu fosun fonufan fan iten ar repwe tufichin afalafala ekkewe chon ekis mi nonnom lon pwisin ar kkewe leenien afalafal. Awewe chok, mwirin ar amarata nour kkewe ruuemon at, nge iei ra angang lon ewe ofiselapen Chon Pwarata Jiowa, eu pean pupulu lon New Jersey, U. S.A., ra poputa ewe angangen pioneer me kaeo fosun Saini. Lon ukukun ulungat ier, ra kaeo Paipel ngeni 74 chon Saini mi fiti eu college mi kan ngenir. En mi tongeni awattelo om angangen afalafal fan iten an epwe feffeita om pwapwa lon ewe angangen foralo chon kaeo?
13. Met kopwe tongeni fori ika ka mochen alapalo om uwaoch lon ewe angangen afalafal?
13 Eni ka mochen kaeo ngeni emon ewe Paipel nge esaamwo fis. Lon ekkoch fonu a fokkun weires ach sipwe chuuri ir kkewe mi mochen auseling. Eni ekkewe aramas ka kkan chuuri rese ekieki ussun ewe Paipel. Ika a ina ussun, eni kopwe tongeni alapalo om tingor ussun lon om kkewe iotek, pun ka silei pwe Jiowa me Jises Kraist ra alisata ewe angang, iwe, eni repwe tongeni emmwenuk ngeni emon mi nikinikin emon siip. Kutta alillis seni ir mi lipwakoch lon om we mwichefel are ir kkewe mi uwaoch lon ewe angangen afalafal. Angei alillis seni ewe fofforun asukul me emmwen lon an Chon Kraist kkewe mwich. Kopwe pwal kuna alillis seni ekkewe kapasen fon seni ekkewe elter mi saifetal me puluer. Iwe, iei ewe mettoch mi lamot seni meinisin, kosap fangeta. Emon mwan mi tipatchem a makkei: “Lessosor kopwe amorafeili foun ira, kopwe pwal amorafeili lekuniol. Pun kosap silei menni leir epwe maroch, ika repwe maroch meinisin.” (Eklesiastis 11:6) Nge iei, chechemeni ekkewe mwan mi tuppwol ussun Noa me Jeremaia. Inaamwo ika chokisikis chok ra auseling ngeni ar afalafal, nge a sopwoch ar angangen afalafal. Iwe, lap seni meinisin, a apwapwai Jiowa.
Foffori Ukukun mi Tufich Ngonuk
14. Ifa ekiekin Jiowa ussun ir kkewe mi fen chinlapelo lon ar angang ngeni?
14 Eni pokiten minne a fis lon manauom, ese tufich ngonuk om kopwe foffori ukukun om mochen lon ewe angangen afalafal. Awewe chok, om chinlapelo a aukuku minne en mi tongeni fori lon an Jiowa we angang. Nge, chechemeni met emon mwan mi tipatchem a makkei: “Meten mokur mi uwan epa mwaramwar mi ling, a fis ngeni emon mi manau fan pwung.” (An Salomon Fos 16:31) Me ren Jiowa, an emon aea manauan pwe epwe angang ngeni a fokkun apwapwai letipan. Pwal eu, ewe Paipel a apasa: “Pwal mwo nge tori fansoun ami chinlap, ngang [Jiowa] mi lollo chok; lupwen meten mokuremi a pwechelo, ngang upwe tumunukemi. Iwe, ua forikemi o tumunukemi, upwe pwal alisikemi o amanauakemi.” (Aisea 46:4, NW) Semach we mi tong lon lang a pwonei pwe epwe alisi me apochokkula noun kkewe mi tuppwol.
15. En mi luku pwe Jiowa a weweiti lapalapen manauom? Pwata?
15 Eni en mi likiitu fan och sokkun semmwen, are puluom we a u ngonuk, are a chou wisom kkewe ngeni om famili, are pwal ekkoch osukosuk. Jiowa a silei met ese tufich ngenikich me lapalapen manauach, iwe, a tongeikich pokiten ach achocho le angang ngeni seni lon letipach. A enlet ena poraus, inaamwo ika ach kkewe foffor repwe kisikis seni minne ekkewe ekkoch repwe fori. (Kalesia 6:4) Jiowa a silei pwe kich sise unusoch, iwe, epwe kutta senikich minne chok a tufich ngenikich. (Kol Fel 147:11) Ika ukukun ach tufich sipwe achocho ngeni, sipwe tongeni achifoua pwe kich mi auchea mwen mesen Kot me esap monuki ach kkewe fofforun luku.—Luk 21:1-4.
16. Ifa ussun meinisin chon ewe mwichefel repwe alillisfengen lon ewe angangen foralo emon chon kaeo?
16 Pwal chechemeni pwe ewe angangen foralo chon kaeo, ina epwe popu seni an chommong pwiich kkewe angangfengen. Sap minne emon chok epwe foralo emon chon kaeo, ussun chok esap echi chok konik epwe achochonu efoch ira. A enlet pwe eni emon Chon Pwarata epwe chuuri emon mi mochen auseling me kaeo ngeni ewe Paipel. Nge lupwen ewe minefoon chon kaeo a feito ngeni ewe Kingdom Hall, meinisin chon ewe mwichefel repwe alisi le silei ewe enlet. Pwapwaan ar pwipwifengen epwe pwarata angangen an Kot we ngun mi fel. (1 Korint 14:25) An ekkewe semirit me sarafo uwau meefier a pwarata ngeni pwe nouch kkewe ra sokko seni noun ekkewe chon lukun. Ir kkewe mi semmwen, ekkewe mi apwangapwang lon pekin inis, me ekkewe chinlap lon ewe mwichefel ra aiti ngenir weween ewe mettoch likiitu. Ese lifilifil fite ierich are minne sia tufichin foffori, nge a lamot minne oukich meinisin sipwe fori le alisi ekkewe mi koran fitikich atun an epwe wattelo ar tongei ewe enlet seni Paipel me ar feffeita ngeni ar repwe papatais. Iteiten aua sipwe eani lon ewe angangen afalafal, iteiten return visit, iteiten fansoun sipwe fosfengen me ekkewe mi koran fitikich lon ewe Kingdom Hall, eni epwe ussun ita nge a lamot kisikis, nge ina eu kinikinin ewe angang mi lapalap Jiowa a akkapwonueta.
17, 18. (a) Lukun ach fiffiti ewe angangen foralo chon kaeo, ifa ussun sipwe tongeni eani ewe pwapwaan liffang? (b) Ren ach sipwe eani ewe pwapwaan liffang, io kkewe sipwe akkappiru?
17 Pwungun pwe lukun ach fiffiti ewe angangen foralo chon kaeo, kich Chon Kraist sipwe pwal eani ewe pwapwaan liffang lon pwal eu mettoch. Sipwe tongeni isetiu moni pwe sipwe awora liffang le alisata angangen ewe fel mi enlet me pwal ir kkewe mi osupwang. (Luk 16:9:1 Korint 16:1, 2) Sipwe tongeni kutta fansoun pwe sipwe awasolaochu aramas. (Rom 12:13) Sipwe tongeni achocho le “foffor murinno ngeni aramas meinisin, nge lapaloon ngeni chon ewe einangen luku.” (Kalesia 6:10) Iwe, sipwe tongeni liffang ngeni ekkewe ekkoch ren ach fori och mettoch mi kukkun nge lamot, awewe chok, sipwe tongeni mak ngenir echo taropwe, korir won telephone, ngenir eu liffang, awora alillis, me awora och kapasen apochokkul.
18 Ren ach lilliffang ngeni ekkewe ekkoch, sipwe pwarata pwe sia akkappiru Semach we lon lang. Sipwe pwal pwarata ewe tongen pwipwi, esissinen ekkewe Chon Kraist mi enlet. (Jon 13:35) Ach sipwe chechemeni ekkeei mettoch epwe alisikich pwe sipwe eani ewe pwapwaan liffang.
En mi Tongeni Awewei?
• Ifa ussun Jiowa me Jises ra isetiu eu leenien appiru lon ewe mettoch liffang lon pekin ngun?
• Ifa ussun sipwe tongeni foralo chiechiach kkewe tori feilfeilo chok?
• Met sipwe tongeni fori le alapalo sopwochun ach angangen afalafal?
• Ifa ussun meinisin lon ewe mwichefel repwe tongeni angangfengen lon ewe pwapwaan liffang?
[Pictures on page 13]
Lupwen ekkewe semirit repwe alleasochisi ar kait ngenir, ekkewe sam me in repwe kuna pwapwa chapur
[Picture on page 15]
Lon ewe angangen foralo chon kaeo, sipwe tongeni eani chiechiach kkewe mi enlet
[Picture on page 16]
Jiowa a tumunukich lon ach fansoun chinlap
[Pictures on page 17]
Lon mettoch mi kisikis nge lamot, sipwe tongeni kuna pwapwaan liffang