Kapas Eis Seni Ekkewe Chon Allea

Ia Taniel a nonnom ie lupwen ekkewe ulumon re Ipru ra kuna sossot mwen ewe uluulun watte Nepukatnesar a auta won ewe masiesin Tura?

Ewe Paipel ese apasa, ina popun, ikenai esor emon epwe tongeni apasa ia Taniel a nonnom ie atun ena sossot a fis.

Ekkoch ra ekiekieta pwe pokiten wiisen Taniel are pokiten an Nepukatnesar acheni lap seni Satrak, Mesak, me Apetnego ina popun Taniel ese wiisen feilo ngeni ewe masiesin Tura. Taniel 2:​49 a pwaralo pwe ren och fansoun wiisan a lap seni wiisen chienan kewe ulumon. Nge sise tongeni anetata pwe ina ewe popun a mutata an esap fiti ekkewe aramas mwen ewe uluulun.

Lupwen ekkoch ra sotun awewei ewe popun Taniel ese nom, ra apasa pwe eli a fen sailo pokiten wiisan are pokiten a semmwen, iwe, ese tongeni fiti. Nge, ewe Paipel ese apasa ena. Pwal och, esor ngauen fofforun Taniel, pokiten ika mei wor, ese mwaal pwe ekkewe nouwisin Papilon mi lolowo repwe fen tipi ngeni. (Taniel 3:⁠8) Mwen me mwirin a fis ei poraus, Taniel a fen pwarata pwe i chon luku mi likiitu, tuppwol ngeni Kot ese lifilifil fan met sokkun sossot. (Taniel 1:8; 5:​17; 6:​4, 10, 11) Ina popun, inaamwo ika ewe Paipel ese affata ewe popun Taniel ese nonnom won ewe masiesin Tura, nge sipwe tongeni luku pwe ese fangeta an tuppwol ngeni Jiowa Kot.​​—⁠Isikiel 14:14; Ipru 11:⁠33.