Ifa Ussun Kinamween Ewe Kraist Epwe Tongeni Nemenem Lon Letipach?
“Iwe, ewe kinamwe an Kraist epwe nemeni lon letipemi, pun a pwal korikemi ngeni kinamwe lon eu chok inis.”—KOLOSE 3:15.
1, 2. Ifa ussun “kinamween ewe Kraist” a kan nemenem lon letipen emon chon Kraist?
NEMENEM eu kapas chommong ra kan oput, pun a ieto le mokurer an aramas ekiekin erianiir me achimwer pwe repwe fori mettoch lukun tiper. Ina minne, eli ekkoch repwe meefi pwe ese pwung an Paul kapasen pesepes ngeni chienan kewe chon Kraist lon Kolose, a era, “Ewe kinamwe an Kraist epwe nemeni lon letipemi.” (Kolose 3:15) Esap pwe kich aramas mi eani ewe tufichin pwisin filata fofforuch? Met popun sipwe mut ngeni och mettoch are emon an epwe nemenem lon letipach?
2 Sap minne Paul a ereni chon Kolose pwe repwe likitalo ar tufichin pwisin nemeni manauer. Ewe kapasen Kriik mi afou ngeni “nemenem” lon Kolose 3:15 a kan ngeni ewe kapas ampayiya, ewe mi wiisen ngeni aramas en me winnan lon ekkewe urumot lom lom. Chon emiis lon ekkena urumot ra tufichin pwisin nemenemenir fan allukun ewe urumot, nge ewe ampayiya a wiisen apwungalo ika io a wesewesen apwonueta ekkewe alluk me io a nampa eu. Pwal ussun chok, a wor chommong mettoch sipwe pwisin filata lon manauach, nge lon filiach meinisin, kinamween ewe Kraist epwe wiisen “ampayiya” woch—are, ussun ewe chon afou Edgar J. Goodspeed a makkei, epwe ina “ewe mettoch mi nemenem” lon letipach.
3. Meta “kinamween ewe Kraist”?
3 Meta “kinamween ewe Kraist”? Iei ewe kinamwe lon letipach mi torikich lupwen sia wiliiti noun Jises chon kaeo me sia miritiiti pwe Jiowa Kot me Noun we ra tongeikich me ar chen a nom rech. Lupwen Jises epwele lo seni noun kewe chon kaeo, iei alon ngeniir: “Upwe ngenikemi ai kinamwe. . . . Ou pi pwe letipemi ete lolilen are nimeremersefal ren niuokkus.” (Jon 14:27, New World Translation) Ren arapakan 2,000 ier, chon kepit mi tuppwol, nge ir kifetin inisin Kraist, ra fen pwapwaesini ena kinamwe, iwe ikenai, chiener kewe, ekkewe “pwal fitemon siip,” ra pwal ina ussun. (Jon 10:16) Ururun pwe ena kinamwe epwe nemenem lon letipach. Lupwen sipwe nom fan sossot mi fokkun watte, epwe tongeni alisikich pwe sisap nom fan nemenien niuokkus are sisap kon lolilen. Sipwe pi ifa ussun ena mettoch a enlet lupwen epwe torikich mettoch ese pwung, lupwen sipwe aurek, me lupwen sipwe meefi pwe ese auchea manauach.
Lupwen epwe Torikich Mettoch ese Pwung
4. (a) Ifa ussun Jises a kuna mettoch ese pwung? (b) Met chon Kraist ra fen fori lupwen mettoch ese pwung a fis ngeniir?
4 Iei kunaen King Solomon: “Aramas ra fen nemeni aramas, iwe, ra feiengau ren.” (An Salomon Afalafal 8:9, NW) Jises a silei pwe mi enlet ekkena kapas. Lupwen a nonnom lang, a kuna pwe a kon watte an aramas kewe foffor ese pwung ngeni aramas. Won fonufan, a pwisin kuna ewe foffor ese pwung mi lap seni meinisin lupwen aramas ra tipi ngeni pwe i emon chon esiita Kot, iwe, a nninniilo ussun ita nge i emon chon ipweri alluk, inaamwo ika i emon mwan esor tipisin. ( Mattu 26:63-66; Mark 15:27) Ikenai, a chuen chok choufetal mettoch ese pwung, me a kon ssenuk ewe riaffou chon Kraist mi enlet ra fen kuna, pun “ekkewe einang meinisin repwe oput” ir. (Mattu 24:9) Iwe nge, inaamwo ika ra fen kuna watte riaffou lon ekkewe leenien nninniiloon aramas fan ewe muun Nazi me pwal lon ewe Soviet Gulag, are pwal an aramas rangeitiir me awater, me an aramas tipimwaal ngeniir, me ar pweniir, nge kinamween ewe Kraist a fen alikiituur. Ra kan appiru Jises, nge iei makkeien Piter ussun i: “Lupwen ra lalingau ngeni i, ese mo lalingau-sefal; lupwen ra eriaffoua i, ese mo amosoku ir; nge a chok likitalo pwisin i ren ewe Sou Apung mi pung.”—1 Piter 2:23.
5. Lupwen sia rong pwe ussun ita a fen fis och mettoch ese pwung lon ewe mwichefel, met sipwe akkom ekieki ussun?
5 Ren porausen och mettoch mi fokkun kisikis seni ena, eli sipwe meefi pwe ese pwung och mettoch ewe mwichefelin Kraist a fori ngeni emon chon ewe mwichefel. Ika ina, eli meefiach epwe ussun meefien Paul, pwe iei alon: “Io mi chepetek, nge usap pwal song ren?” (2 Korint 11:29) Met sipwe tongeni fori? A lamot ach sipwe eis, ‘A wesewesen fis eu mettoch ese pwung?’ Fan chommong, sise silei mettoch meinisin ussun minne a fen fis. Eli epwe pochokkul meefiach mwirin ach auseling ngeni emon mi ussun ita silei minne a fen fis. A pwung ewe popun ei kapas a mak lon Paipel: “Eman mi wewemang a luku mettoch meinisin.” (An Salomon Fos 14:15) Ina minne, a lamot ach sipwe tumunuoch.
6. Met sipwe tongeni fori ika ussun ita pwe a fen fis och mettoch ese pwung lon ewe mwichefel?
6 Iwe nge, epwe ifa ussun ika sia meefi pwe och mettoch ese pwung a fen fis ngenikich? Met emon aramas mi eani kinamween ewe Kraist lon letipan epwe fori? Eli sipwe meefi pwe a lamot ach sipwe fos ngeni ewe emon mi ussun ita tipis ngenikich. Mwirin, sap minne sipwe fos ngeni io kkan mi mochen rong ussun ewe poraus, nge pwata sise le likiti le poun Jiowa ewe osukosuk ren ach iotek ngeni me ach eani lukuluk won i pwe epwe fori minne mi pwung? (Kol Fel 9:10; An Salomon Fos 3:5) Eli mwirin ach fori ena mettoch, sipwe meefi pwe epwe naf ach sipwe amoielo seni letipach ewe osukosuk me “fanafanelo” chok. (Kol Fel 4:4) An Paul ei fon epwe weneiti lap ngeni meinisin osukosuk epwe fis: “Oupwe songomangfengen lefilemi o omusamusfengen, are emon a tipi ngeni emon. Usun chok ach Samol a fen omusakemi, ami oupwe pwal omusamusfengen.”—Kolose 3:13.
7. Met sipwe chechchemeni fansoun meinisin ussun ach kewe foffor ngeni pwiich kewe?
7 Iwe nge, ren minne sipwe fori, a lamot ach sipwe chechchemeni pwe inaamwo ika sisap tufichin nemeni minne a fen fis, nge sipwe tufichin nemeni met sipwe fori mwirin. Ika sia ekieki pwe emon a fori och mettoch ese pwung ngenikich, nge sipwe mwokut fan miritingau mwirin, eli ena mettoch epwe atai ach kinamwe lap seni minne ewe emon a fen fori. (An Salomon Fos 18:14) Sipwe tongeni pwal mwo nge chepetek ren me ukutiu seni ach fiti ewe mwichefel tori ewe fansoun ach sipwe meefi pwe a fen pwonuta minne mi pwung. Ewe chon makkei kol fel a makkei pwe ren chokewe mi tongei an Jiowa kewe alluk, “esor och mettoch mi tongeni oturukapa ir.” (Kol Fel 119:165) A enlet pwe fan ekkoch mettoch ese pwung epwe fis ngeni aramas meinisin. Kosap mut ngeni ena sokkun mettoch an epwe eppeti om angang ngeni Jiowa. Nge kopwe mut ngeni kinamween ewe Kraist an epwe nemenem lon letipom.
Lupwen Aurek epwe Chounikich
8. Ikkefa ekkoch mettoch mi efisata lolilen, me met epwe tongeni fis pokiten lolilen?
8 Aurek eu mettoch mi wesewesen fiffis lon manauen aramas lon ekkeei “ran le sopolon.” (2 Timoti 3:1) Mi enlet pwe iei alon Jises: “Ousap aurek usun manauemi, minne oupwe ani, are pwal usun inisimi, minne oupwe ufouf.” (Luk 12:22) Nge sap minne aurek meinisin a kan weneiti mettochun aion. Lot a fokkun “lolilen” pokiten ngauen Sotom. (2 Piter 2:7) Paul a “aureki ekkewe mwichefel meinisin.” (2 Korint 11:28) A kon watte riaffoun Jises lon ewe pwinin mwen an malo pwe “pwichin a suputiu won pwul, usun chok supusupun cha.” (Luk 22:44) A ffat pwe sap minne aurek meinisin esissinnen luku mi apwangapwang. Iwe nge, ika ach aurek a fokkun watte me a nomottam, epwe tongeni atai ach kinamwe. Aurek a fen pworaiti ekkoch, iwe, a ameef ngeniir pwe resap tufichin apwonueta wiiser kewe lon ar angang ngeni Jiowa. Iei alon ewe Paipel: “An eman aramas ourek lon lelukan a afisata lolilen.” (An Salomon Fos 12:25) Iwe, met sipwe tongeni fori ika aurek a chounikich?
9. Met sipwe tongeni fori ren ach sipwe akukkunalo lolilen, nge sisap tongeni amoielo met sokkun mettoch mi efisata lolilen?
9 Lon ekkoch fansoun, sipwe tongeni kutta alillis. Ika pwe och samau a kan efisata ach aurek, sipwe mirit ika sipwe safei ren, nge pwisin filiach minne sipwe fori.a (Mattu 9:12) Ika sia choutiu pokiten an a chommong wiisach, eli epwe tufich ach sipwe awiisa ngeni pwal fitemon ekkoch ekkena wiis. (Ekistos 18:13-23) Iwe nge, ifa ussun chokewe mi wiiseni wiis mi chou, nge resap tongeni likiti ngeni pwal emon wiiser kewe, awewe chok ren ami kana sam me in? Ifa ussun emon chon Kraist mi pupulu ngeni emon mi oput an lamalam? Ifa ussun eu famili mi wesewesen watte an osupwangen tufichin manauan are ir mi nonnom lon eu fonu a fiffis maun ie? A ffat pwe sisap tufichin amoielo mettoch meinisin mi efisata aurek lon ei otot minen lom. Iwe nge, sipwe tongeni akkamwochu kinamween ewe Kraist lon letipach. Ifa ussun?
10. Ikkefa ruu mettoch emon chon Kraist epwe tongeni akukkunalo lolilen ren?
10 Aewin, sipwe kutta minen achipa letipach lon ewe Kapasen Kot. Iei makkeien King Tafit: “Lupwen letipei a aureki chommong mettoch, om kewe kapasen achipa ra apwapwai nguni.” (Kol Fel 94:19) An Jiowa kewe “kapasen achipa” ra nom lon ewe Paipel. Ach akkalleani ena Puk mi fel epwe alisikich le akkamwochu kinamween ewe Kraist lon letipach. Iei alon Paipel: “Kopwe chok likiti ngeni ewe SAMOL osom we, o epwe amwochuk; esap mut ngeni emon pwe epwe amokutu ekkewe aramas mi pung.” (Kol Fel 55:22) Pwal ussun chok, iei makkeien Paul: “Ousap aurek ren och mettoch, pwe ren mettoch meinisin oupwe chok esinei ngeni Kot ami mochen ren iotek o tingor o pwal eti kilisou. Iwe, an Kot we kinamwe, ewe mi somelo seni ach ekiek meinisin, epwe mamasa letipemi o ami ekiek lon Kraist Jises.” (Filipai 4:6, 7) Ach ikkiotek iteitan fan tinikken epwe alisikich le akkamwochu ach kinamwe.
11. (a) Ifa ussun Jises eu leenien appiru mi murinno fan iten iotek? (b) Epwe fet ach ekiek ussun iotek?
11 Jises eu leenien appiru mi nampa eu fan iten ena mettoch. Fan ekkoch a iotek ngeni Seman we lon lang fitu awa. (Mattu 14:23; Luk 6:12) Iotek a alisi i le likiitu fan ekkewe sossot mi watte seni meinisin. Lon ewe pwinin mwen an malo, an riaffou a fokkun lapalo. Met a fori? A “alapalo an iotek.” (Luk 22:44) Ewer, Noun Kot we mi unusoch emon sou iotek. Ina minne, pokiten noun kewe chon kaeo rese unusoch, a mmen lamot ar repwe eorenalo iotek! Jises a aiti ngeni noun kewe chon kaeo ar repwe “fakkun iotek, o resap chipwang ngeni.” (Luk 18:1) Iotek eu minen porausfengen mi wesewesen enlet me lamot lefilach me ewe Emon mi sileikich lap seni ach pwisin sileikich. (Kol Fel 103:14) Ren ach sipwe akkamwochu kinamween ewe Kraist lon letipach, sisap “ukutiu seni iotek.”—1 Tesalonika 5:17.
Ach Pworaiti Ekkewe Minen Eppet lon Manauach
12. Ikkefa ekkewe popun eli ekkoch repwe meefi pwe ese naf ar angang?
12 Ekiekin Jiowa pwe mi auchea meinisin noun kewe chon angang. (Akai 2:7) Iwe nge, a weires ngeni chommong ar repwe luku ena mettoch. Eli ekkoch repwe letipechou pokiten ar chinnapelo, are lapaloon wiiser lon ar kewe famili, are apwangapwangeloon inisir. Eli pwal ekkoch ra meefi pwe ra tufichingau pokiten ngauen manauer me lom. Eli pwal fitemon ra riaffou pokiten tipisir kewe lom, iwe, ra meefi pwe Jiowa esap tongeni omuserelo. (Kol Fel 51:3) Met sipwe tongeni fori ussun ekkena sokkun memmeef?
13. Ifa ussun ewe Paipel epwe tongeni auruuru chokewe mi meefi pwe ra tufichingau?
13 Kinamween ewe Kraist epwe alukulukatiu ngenikich an Jiowa tong. Sipwe tongeni atotosefallielong lon letipach ena kinamwe ren ach ekieki pwe esap fan eu an Jises apasa pwe aucheaach a aukuk won ach apopofengenni ach angang me angangen chienach kewe. (Mattu 25:14, 15; Mark 12:41-44) A menlapei ewe mettoch tuppwol. Iei alon ngeni noun kewe chon kaeo: “Nge are emon epwe likiitu tori sopolon, iwe, epwe manau.” (Mattu 24:13) Jises a pwisin kuna “turunufas” seni aramas, nge esor an tipemwaramwar ussun an Seman tongei i. (Aisea 53:3; Jon 10:17) A pwal ereni noun kewe chon kaeo pwe ir mi achengicheng. (Jon 14:21) Ren an epwe affata ena mettoch, iei alon Jises: “Esap liwinin ruuemon litchok senis eu? Nge emon leir esap turutiu won pwul lukun tipen Sememi. Nge meten mokuremi meinisin ra fen allea. Iei minne, oute niuokus, pun ami mi auchea lap seni chommong litchok.” (Mattu 10:29-31) A fet ochchun ena kapas mi affata watteen an Jiowa tongeikich!
14. Met a affata pwe Jiowa a aucheani emon me emon leich?
14 Pwal iei alon Jises: “Esor emon epwe tongeni feito rei, ika ewe Sam mi tinieito esap emmwenato i.” (Jon 6:44) Pokiten Jiowa a fen lukikich pwe sipwe tapwelo mwirin Jises, a ffat pwe a mochen ach sipwe kuna manau. Iei alon Jises ngeni noun kewe chon kaeo: “Esap iei usun tipen Semei we mi nonnom lang, pwe emon me lein ekkewe mi kisikis epwe poutmwalilo.” (Mattu 18:14) Ina popun, ika en mi angang ngeni Jiowa ren unusen letipom, kopwe tongeni meefi chengel ren om kewe foffor mi murinno. (Kalesia 6:4) Ika ka mengiringir ren tipisum kewe lom, kopwe luku pwe Jiowa epwe kan “muttir amusala tipis” ika aramas repwe wesewesen aier. (Aisea 43:25; 55:7) Ika a wor pwal och popun ka letipechou, chechchemeni mwo pwe Jiowa a “arap ngeni chon letipeta, a pwal amanaua ekkewe mi ta lon ngunur.”—Kol Fel 34:18.
15. (a) Ifa ussun Setan a kan sotuni le atai ach kinamwe? (b) Met sipwe tongeni eani lukuluk won Jiowa ren?
15 Setan a wesewesen tipeni an epwe atai om kinamwe. I ewe chon poputani ewe tipis mi toki aramas meinisin, iwe, sia weiresin likiitu fan. (Rom 7:21-24) A enletin mochen ameef ngonuk pwe Kot esap tongeni pwapwaiti om angang pokiten an ese unusoch manauom. Kosap mut ngeni ewe Tefil an epwe aletipengauok! Kopwe pippi an kewe ekiek, me kopwe apposa lelukom pwe kopwe likiitu pokiten om silei minne a ekiekin fori ngonuk. (2 Korint 2:11; Efisus 6:11-13) Chechchemeni mwo pwe “Kot mi lapalap seni letipach, o a fen sinei mettoch meinisin.” (1 Jon 3:20) Jiowa a kuna lap seni minne sia lipwakingau ren. A pwal kuna masouen letipach me ekiekich me leutuch. Ina minne, mut ngeni makkeien ewe sou makkei kol fel an epwe aururuuk: “Pun ewe SAMOL esap likitalo noun kewe aramas; esap pwal poutalo an we alemwir.”—Kol Fel 94:14.
Tipeeufengen lon Kinamween ewe Kraist
16. Ifa ussun sise kan alaemon lon ach achocho ngeni ach sipwe likiitu?
16 Paul a makkei pwe sipwe mut ngeni kinamween ewe Kraist an epwe nemenem lon letipach pun sia kokko ngeni “lon eu chok inis.” Ekkewe chon Kraist mi kepit Paul a makkei ngeniir ra kokko pwe repwe kapachelong lon inisin Kraist, iwe, a pwal ina ussun ekkewe lusun chon kepit ikenai. Chiener kewe “pwal fitemon siip” ra riri ngeniir, iwe, ir fengen meinisin “eu chok mwich” fan “emon chok chon maser,” Jises Kraist. (Jon 10:16) Won unusen fonufan, ir meinsin ra chufengen lon eu “mwich,” nge a wor fite milion mi choni, iwe, ra mut ngeni kinamween ewe Kraist an epwe nemenem lon letiper. Ach silei pwe sise kan alaemon a alisikich pwe sipwe likiitu. Iei makkeien Piter: “Iwe, oupwe u ngeni i [Setan], o oupwe nukuchar lon ami luku, pun oua sinei pwe ekkewe chok sokkun riaffou a pwal tori pwimi Soulang lon unusen fonufan.”—1 Piter 5:9.
17. Met a kan amwokutukich ach sipwe mut ngeni kinamween ewe Kraist an epwe nemenem lon letipach?
17 Iwe, amwo meinisin repwe sopweelo le amaarata kinamwe, nge ina eu uwa mi fokkun lamot, uwaan an Kot ngun mi fel. (Kalesia 5:22, 23) Iwe, ren chokewe Jiowa a kuner pwe ir mi limoch, me esor och sor rer, me ir mi kinamwe, repwap kuna ewe feiochun manau esemuch lon eu paratis won fonufan, ikewe pwung epwe nonnom ie. (2 Piter 3:13, 14) Iwe, a wor chommong popun ach sipwe mut ngeni kinamween ewe Kraist an epwe nemenem lon letipach.
[Ppii ekkewe pwóróus fan]
a Fan ekkoch och samau epwe tongeni efisata are alapalo aurek, awewe chok ren ewe mettoch letipechou.
En mi Chechchemeni?
• Meta kinamween ewe Kraist?
• Ifa ussun kinamween ewe Kraist epwe tongeni nemenem lon letipach lupwen epwe torikich mettoch ese pwung?
• Ifa ussun kinamween ewe Kraist a kan alisikich le akukkunalo lolilen?
• Ifa ussun kinamween ewe Kraist a kan auruurukich lupwen sia meefi pwe ese lien auchea manauach?
[Picture on page 13]
Lupwen Jises a uta mwen mesen chon atipisi, a likiti le poun Jiowa manauan
[Picture on page 14]
Ussun chok an emon sam foropachei noun, an Jiowa kewe minen auruur epwe tongeni akukkunalo ach lolilen