Ach Likiitu Fan “efoch Folun Ira Lon Fitukach”

“Ai chen mi ku ngonuk.”​—2 KORINT 12:9.

1, 2. (a) Pwata sisap neneiruk ren an a tottorikich sossot me osukosuk? (b) Pwata sipwe tufichin meefi apilukoch lupwen epwe torikich sossot?

“MEINISIN mi mochen manaueni ewe manau mi fich ngeni Kot lon Kraist Jises repwe kuna riaffou.” (2 Timoti 3:​12) Met popun? Pun Setan a apasa pwe aramas ra kan angang ngeni Kot pokiten mocheniangauen letiper, me a umwesin ekiekin anneta pwe mi pwung alon. A iei ussun an Jises ouroura noun kewe aposel mi tuppwol lon eu fansoun: “Satan a fakkun mochen angeikemi pwe epwe seifeikemi usun chok wit.” (Luk 22:31) Jises a silefichi pwe Kot a kan mut ngeni Setan an epwe sotunikich ren fitikoko mi fokkun weires. Pwungun pwe esap weween nge fitikoko meinisin sipwe kuna lon manauach a popu seni Setan are noun kewe timon. (An Salomon Afalafal 9:​11) Nge Setan a tinikken le aea mettoch meinisin, ese lifilifil, pwe epwe atai ach tuppwol.

² Ewe Paipel a erenikich pwe sisap neneiruk ren ekkewe sossot mi torikich. Ese lifilifil minne epwe torikich, nge sap minne epwe sokkolo are och minen amairu. (1 Piter 4:​12) A enlet pwe “ekkewe chok sokkun riaffou a pwal tori [pwiich] Soulang lon unusen fonufan.” (1 Piter 5:9) Ikenai a mmen watte an Setan chouni iteiten chon angangen Kot meinisin. Ewe Tefil a pwapwa ika sipwe riaffou ren chommong sokkun fitikoko mi ussun folun ira. Ren an epwe fori ena, a kan aea ei otot minen lom le achommonga are etikalong ekkewe ‘folun ira lon fitukach.’ (2 Korint 12:7) Iwe nge, epwe tufich an esap talo ach tuppwol fan an Setan mammaun ngenikich. Ussun an Jiowa “forata alen angaselo” fan itach pwe sipwe tufichin likiitu fan sossot, iwe, epwe pwal ina ussun an epwe alisikich lupwen epwe torikich fitikoko mi ussun folun ira lon fitukach.​—1 Korint 10:13.

Ifa Ussun Sipwe Tufichin Likiitu fan Efoch Folun Ira

³ Ewe aposel Paul a tingorei Kot pwe epwe churawu seni fitukan ewe folun ira. “Fan ulungat ua tingor ren ewe Samol usun ei metoch, pwe epwe feil seniei.” A ifa ussun an Jiowa polueni an Paul tingor? “Ai chen mi ku ngonuk, pun unusochun ai manaman epwe pwarata lon apwangapwang.” (2 Korint 12:​8, 9) Sipwe atittina alon Kot ngeni Paul me pi ifa ussun epwe tongeni alisikich le likiitu fan sokkun folun ira meinisin mi eriaffoukich.

⁴ Nengeni mwo pwe Kot a pesei Paul an epwe menei ewe chen mi fen tori i ren Kraist. Mi enlet pwe Paul a fen kuna chommong feioch watte. Fan tong, Jiowa a mut ngeni an epwe emon noun Jises chon kaeo, inaamwo ika mesemwan a fen umwesin fiu ngeni noun Jises kewe chon kaeo. (Fofor 7:​58; 8:3; 9:​1-4) Mwirin, fan kirokiroch, Jiowa a awiisa ngeni Paul chommong angang me wiis mi fokkun amwarar. A ffat ewe lesen ngenikich. Lon pwal mwo nge fansoun mi fokkun weires ngenikich, a chuen nom rech chommong feioch sipwe kilisou ren. Lon fansoun ach kuna sossot, sisap monuki ekkewe chommong mettoch mi murinno Jiowa a fen fori fan itach.​—Kol Fel 31:19.

⁵ An Jiowa chen a nafoch lon pwal och lapalap. An Kot manaman a lu seni minne epwe naf fan iten ach kewe sossot. (Efisus 3:​20) Jiowa a aiti ngeni Paul pwe an manaman epwe “unusochulo lon minne mi apwangapwang.” (New World Translation) Ifa ussun? Fan tong, a awora ngeni Paul ukuukochun ewe pochokkul mi lamot ngeni fan iten an epwe likiitu fan an sossot. Iwe mwirin, an Paul likiitu me an eani lukuluk won Jiowa ren unusen letipan a pwarata ngeni meinisin pwe an Kot manaman eu minen pworacho lon manauen ena mwan mi apwangapwang me tipis. Nge iei, ekieki mwo ifa ussun ena mettoch a kku ewe Tefil, ewe mi apasa pwe aramas ra angang ngeni Kot lon chok fansoun manauer a kinamwe me esor fitikoko rer. An Paul tuppwol a ussun ita wewe ngeni an emon posapei ena sou pwen!

⁶ Paul emon mi fen piin peni Setan me lom lon an fiu ngeni Kot, me i emon mi tipeforea le eriaffou chon Kraist, me i emon Farisi mi tinikken, iwe, ese mwaal a pisekisek pokiten an uputiu lon eu tettelin aramas mi wouuoch. Nge mwirin, Paul a angang ngeni Jiowa me Kraist, nge i mi “kukkun seni ekkewe chon kuno meinisin.” (1 Korint 15:9) Pokiten an a ina ussun, fan tipetekison a alleasochisi nemenien an chon Kraist we mwichen sou pwungupwung lon ewe aewin senturi. Iwe, a pwal tuppwol, inaamwo ika a wor folun ira lon fitukan. Setan a fokkun letipengau pun an Paul kewe sossot rese akukkunatiu an tinikken. Esap fan eu an Paul arikalo mesan seni ewe apilukuluk a eani, apilukulukun an epwe wor wiisan lon an Kraist we Muu lon lang. (2 Timoti 2:​12; 4:​18) Esap tongeni wor efoch folun ira epwe akukkunalo an tinikken, inaamwo ika epwe wesewesen riaffou ren. Iwe pwal ussun chok, amwo epwe chuen chok watte ach tinikken! Ren an apochokkulakich lon ach kewe sossot, Jiowa a kan aitochukich ren an mut ngenikich ach sipwe tufichin anneta pwe Setan emon chon kapas chofona.​—An Salomon Fos 27:11.

A Wesewesen Lamot Minne Jiowa a Akkawora

⁷ Ikenai, Jiowa a akkapochokkula chon Kraist mi tuppwol ren an we ngun mi fel, an Kapas, me ach mwicheich, mwicheichen pwipwi lon Kraist. Ussun ewe aposel Paul, sipwe tongeni iseta won Jiowa osach kewe ren ach iotek ngeni. (Kol Fel 55:22) Inaamwo ika Kot esap amoielo ach kewe sossot, nge epwe tongeni awora ngenikich mirit pwe sipwe likiitu fan, pwal mwo nge ekkewe sokkun sossot mi fokkun chou. Jiowa epwe pwal tongeni apposa letipach​—weween, epwe ngenikich ewe “manaman mi somolo”​—pwe epwe alisikich fan iten ach sipwe likiitu.​—2 Korint 4:​7, NW.

⁸ Ifa ussun sia kan akkangei ena sokkun alillis? Sipwe tinikken le kaeo ewe Kapasen Kot, pun sia kan kuna an kewe kapasen achip mi alukuluk lon. (Kol Fel 94:19) Lon ewe Paipel, sia tongeni alleani alon noun Kot kewe chon angang lupwen ra siongau le tingor alillis seni Kot. Minne Jiowa a fori ren poluen ar kewe tingor, nge fan chommong a kapachelong an nounou kapasen achip, eu mettoch sipwe ekkekiekifichi. Ach kakkaeo epwe apochokkulakich pwe “ewe manaman mi somolo epwe popu seni Kot nge esap seni pwisin kich.” Ussun an a lamot ach sipwe akkaea mongoon aion iteiten ran meinisin fan iten amaarin me pochokkulen inisich, iwe, pwal ussun chok, a lamot ach sipwe mongo seni an Kot kewe kapas iteitan. Sia kan foffori ena mettoch? Ika ina, iwe, sipwe kuna pwe ach akkangei ewe “manaman mi somolo” epwe alisikich le likiitu fan sokkun folun ira meinisin mi eriaffoukich iei.

⁹ Ekkewe elterin Kraist mi niuokkusiti Kot repwe tongeni ar repwe “usun chok eu lenien chuno seni asepwal,” asepwalin riaffou, me “usun chok eu lenien op lupwen fansoun molumol,” molumolun fitikoko. Ekkewe elter mi mochen an epwe fichiitiir ena kapas awewe mi fel ra kan tingorei Jiowa fan tipetekison me letip mi wenechar pwe epwe ngeniir “chonauen chon kait” pwe repwe silei ifa ussun repwe polueni chon meefi riaffou ren kapas mi ochiitiir. Alon ekkewe elter epwe tongeni an epwe ussun och chichiin ut mi apata me aururu ngunuch lupwen epwe torikich fansoun weires. Ren an ekkewe elter eani kapas mi “aururu chon letipechou,” ra kan enletin apochokkula pwiir kewe lon pekin ngun, nge eli ir mi molulu are letipechou pokiten och folun ira lon fituker.​—Aisea 32:2; 50:4; 1 Tesalonika 5:​14.

¹⁰ Meinisin noun Jiowa kewe chon angang ra kapachelong lon an we famili mi tipeeufengen, familien chon Kraist. Ewer, kich “emon me emon, mi kifetfengen lefilach,” me “wiisach, ach sipwe tongfengen lefilach.” (Rom 12:5; 1 Jon 4:​11) Ifa ussun sipwe tongeni apwonueta wiisach na? Me ren 1 Piter 3:​8, sia kan fori ena mettoch ren ach “weweiti meefien chienach kewe, ach eani tongen pwipwi, [me ach] pwarata tong” ngeni meinisin mi riri ngenikich lon ewe luku. Nge ren ir mi likiitu fan och folun ira mi fokkun cheuch lon fituker, ese lifilifil ika ir mi kukkun are chinnap, oukich meinisin sipwe tongeni pwarata pwe sia ekilaper. Ifa ussun?

¹¹ Sipwe achocho ngeni ach sipwe wewefichiiti ar riaffou. Ika sipwe tenechepwak are tumunungau, eli sipwe alapalo ar riaffou. Ach afanni ar kewe sossot epwe amwokutukich pwe sipwe tumunufichi met sipwe apasa ngeniir, ifa ussun sipwe apasa, me ach kewe foffor. Ach kapas ngeniir ussun mettoch mi apwapwa me minne epwe efisata apilukoch epwe tongeni akukkunalo ewe riaffou ra meefi seni ewe folun ira mi aweiresiir. Epwe ina ussun sipwe tongeni alisir pwe repwe pochokkuleta.​—Kolose 4:​11.

Ifa Ussun Ekkoch ra fen Likiitu

¹² Pokiten ach akkarap ngeni muchuloon ekkeei ranin le sopwoloon, ekkewe “metekin riaffou” ra lapalapalo iteiten ran meinisin. (Mattu 24:8, NW) Ina minne, neman sossot epwe tori aramas meinisin won fonufan, akkaewin noun Jiowa kewe chon angang mi tuppwol, nge ir mi achocho ngeni ar repwe foffori letipan. Ren chok awewe, ekieki mwo emon chon Kraist mi afalafal full-time. Neminnewe a uri kanser, iwe, a reirei. Lupwen ir me puluwan we ra keran silei pwe a uri ena samau, ra muttir kulliiti Jiowa ren ar eani eu iotek mi ttam ngeni. Neminnewe a apasa mwirin pwe och kinamwe mi sokkolo watteen a pwoluurelo. Nge a chuen chok rokopwel an neminnewe meefi apilukoch me letipechou, akkaewin lupwen an safei a aweiresi inisin.

¹³ Ren an epwe likiitu fan an samau, ena sister a achocho le kaeo ussun kanser. A kapas ngeni noun kewe tokter. Lon Ewe Leenien Mas me Awake! fitifengen me pwal fitu puk fan iten chon Kraist, a kuna poraus ren ifa ussun fitemon ra fen likiitu fan ewe sokkun aurek ena sokkun samau a kan efisata. Neminnewe a pwal alleani wokisin lon Paipel mi kapas ussun an Jiowa tufichin alikiitu noun kewe aramas lon fansoun weires, iwe, a alleani pwal fitu sokkun poraus mi awora alillis ngeni.

¹⁴ Eu poraus fan iten alillis lon fansoun siongau a nounou ekkeei kapas mi mirit: “Eman mi pusin imwula a chok kutta an mochen.” (An Salomon Fos 18:1) Ina minne, ena poraus a awora ei fon: “Pi pwe kete alaemonulo.”a Ena sister a apasa pwe “Chommong ra ereniei pwe ra iotek fan asengesi; pwal fitemon ra koriei won phone. Ruuemon elter ra koriei iteitan pwe repwe aamwaei. Chommong ra tinato poon ira me taropwe. Ekkoch ra pwal kuuku anei. Chommong ra pwal apasa pwe repwe tongeni uweiei ngeni pioing fan iten ai upwe safei.”

¹⁵ Emon mi angang ngeni Jiowa fansoun langattam lon New Mexico, U.S.A., a aksiten fan ruu lupwen a fiti chitosa. A feiengau uan me afaran, ina minne, a alapalo och semmwenin itan arthritis, nge mi fen uri neminnewe ren lap seni 25 ier. Iei alon: “A mmen weires ai upwe awenata mokurei me ai upwe uwei mettoch mi lap seni limu paun choun. Nge ai tinikken le iotek ngeni Jiowa a fen wesewesen alikiituei. A pwal ina ussun ekkewe poraus lon Ewe Leenien Mas sia fen kaeo. Eu leir a kapas ussun Maika 6:8, iwe, a apasa pwe ach fitipachei Kot fan tipetekison a wewe ngeni ach silei pwe mi kauk minne sipwe tufichin fori. Ina eu poraus mi alisiei ai upwe miritiiti pwe inaamwo ika a watte ai apwangapwang, nge esor popun upwe letipechou, inaamwo ika ewe fansoun ai fiti ewe angangen afalafal a kisikis seni minne ua mochen. A akkaewin lamot ach sipwe angang ngeni Jiowa ren letip mi wenechar.”

¹⁶ Pwal iei alon: “Fansoun meinisin ekkewe elter ra apungaei ren ai achocho le fiffiti mwich me ewe angangen afalafal. Ekkewe kukkun ra kan foropacheiei. Ekkewe pioneer ra kan mosonottam ngeniei me fan chommong ra forsefalli ar kkotun afalafal lupwen a watte ai apwangapwang. Lupwen a ngau ran, ra uweiei ngeni ar kewe return visit are ra ereniei pwe upwe fiti ar kewe Bible study. Iwe, pokiten use tufichin uwei eu pwotoun afalafal, chienei kewe chon afalafal ra walong nei kewe puk me chassi lon ar kewe pwotou lupwen ua lo afalafal.”

¹⁷ Nengeni mwo ifa ussun ekkewe elter me chiener kewe chon luku ra alisi ekkena ruuemon sister pwe repwe tufichin likiitu fan ar kewe apwangapwang mi ussun folun ira. Ra awora ewe sokkun alillis mi wesewesen lamot, nge mi fiti kirokiroch, iwe, a fichiiti ar osupwang lon pekin ngun, aion, me letip. Esap pwe ina och poraus mi peseok om kopwe awora alillis ngeni pwiich kewe mi kuna osukosuk? Pwal ami kana kukkun, oupwe tongeni awora alillis ngeni chokewe lon om mwichefel, ir kewe mi osukosuk ren folun ira lon fituker.​—An Salomon Fos 20:29.

¹⁸ A fen mak lon ewe Leenien Mas me Awake! porausen chommong Chon Pwarata mi fen likiitu, are ir mi chuen likiitu, fan mettoch mi aweiresiir. Ika kopwe akkalleani ekkena poraus, kopwe kuna pwe chommong pwiich kewe won unusen fonufan ra fen likiitu fan osupwangen moni, maloon attonger kewe ren mettoch mi efeiengau, me mettoch mi efeiengau lon fansoun maun. Pwal fitemon ra uri samau mi fokkun watte. Chommong rese tongeni fori ekkewe mettoch ir kewe mi pochokkul inisir ra mecheresin fori. Ar kewe samau ra fokkun aweiresiir, akkaewin, lupwen resap tongeni fiffiti angangen chon Kraist ukuukun ar mochen. A mmen watte ar aucheani ewe alillis pwiir kewe mi kukkun me watte ra kan akkawora ngeniir!

Likiitu a kan Atoto Pwapwa

¹⁹ Paul a pwapwa ren an kuna ifa ussun Kot a apochokkula i. Iei alon: “Upwe fokkun pwapwa o sikasini ai apwangapwang, pwe ewe manamanen Kraist epwe nonnom rei. Iwe, fan asengesin Kraist, upwe pwapwa ren apwangapwang, ren pweni, ren feiengau, ren ninni, ren weires; pun fansoun ai apwangapwang, iei ai pochokkul.” (2 Korint 12:​9, 10) Pokiten minne a fis lon manauan, Paul a tongeni apasa ei mettoch fan an lukuluk mi pochokkul: “Use mo kapas ren ai osupwang, pun ua fen sinei pwe ua tongeni meefi kinamwe, inaamo ren minne epwe toriei. Ua sinei tekisonun, ua pwal sinei tekian. Ekis meinisin, are lon mettoch meinisin, ua fen sinei mot o echik, somelo o osupwang. Ngang mi tufich ren mettoch meinisin lon ewe emon mi apochokkulaei.”​—Filipai 4:​11-​13.

²⁰ Iwe, ren ach likiitu fan menni chok sokkun folun ira mi nom lon fitukach, sipwe tongeni kuna pwapwa mi lapalap ren ach pwarata ngeni meinisin pwe an Jiowa manaman a unusochulo lon ach apwangapwang. Iei makkeien Paul: “Iwe, sisap mo tilikop . . . nge letipach mi sefolo iteiten ran meinisin. Pun ach ei riaffou mi epwe nonnom fansoun mochomoch chok o mi pwas, a ammolata ngenikich eu ling feilfeilo chok, eu ling mi chou, o mi lap seni mettoch meinisin. Pun sia ekieki usun ekkewe mettoch aramas rese tongeni nengeni, . . . nge ekkewe mettoch aramas rese tongeni nengeni epwe nonnom feilfeilo chok.”​—2 Korint 4:​16-​18.

²¹ A lap me lein noun Jiowa kewe aramas ikenai ra apilukuluku ar repwe manau lon an we Paratis won fonufan me pwapwaesini ekkewe feioch a fen pwonei. Ikenai sise tongeni kuna ekkena feioch. Iwe nge, ewe fansoun a muttir arapoto lupwen sipwe kuna ekkena feioch ren mesach, iwe, sipwe pwapwaesiniir tori feilfeilo chok. Eu me lein ekkena feioch, iei ach sipwe ngaselo seni meinisin ekkewe osukosuk mi ussun folun ira! Noun Kot we epwe “atailo ekkewe angangen ewe tefil” me “atailo atewe mi samoluni malo.”​—1 Jon 3:8; Ipru 2:​14.

²² Ina popun, ese lifilifil met sokkun folun ira lon fitukach sia cheuch ren, nge sipwe chok likiitu fan. Ussun Paul, Jiowa epwe awora ewe pochokkul pwe sipwe tufichin likiitu fan, pun a limmol le awora an manaman ngenikich. Lupwen sipwe manau lon ewe Paratis won fonufan, sipwe mwareiti Jiowa ach Kot iteiten ran meinisin ren an kewe foffor mi amwarar meinisin fan asengesich.​—Kol Fel 103:2.

[Footnotes]

Ifa Ussun Kopwe Polueni?

• Met popun me ifa ussun ewe Tefil a kan sotuni le atai tuppwolun chon Kraist mi enlet?

• Ifa ussun an Jiowa manaman a kan “unusochulo lon minne mi apwangapwang”?

• Ifa ussun ekkewe elter me chon ewe mwichefel repwe tongeni apochokkula ir kewe mi riaffou ren ar kewe osukosuk?

3. Met Jiowa a apasa lupwen Paul a tingorei pwe epwe churawu ewe folun ira me lon fitukan?

4. Ifa ussun Paul a fen kuna feioch seni umoumochun Jiowa?

5, 6. (a) Ifa ussun Jiowa a aiti ngeni Paul pwe an manaman a “unusochulo lon minne mi apwangapwang”? (b) Ifa ussun manauen Paul a anneta pwe Setan emon chon kapas chofona?

7, 8. (a) Ifa ussun Jiowa a kan apochokkula noun kewe chon angang ikenai? (b) Pwata ach akkalleani me kakkaeo Paipel iteiten ran a wenewenen lamot fan iten ach sipwe tufichin likiitu fan folun ira lon fitukach?

9. Ifa ussun ekkewe elter repwe tongeni alisi ir kewe mi kuna osukosuk?

10, 11. Ifa ussun noun Kot kewe chon angang repwe tongeni apochokkula chiener kewe mi kuna sossot watte?

12-14. (a) Met emon chon Kraist a fori pwe epwe tufichin likiitu fan weiresin an uri kanser? (b) Ifa ussun pwiin kewe lon pekin ngun ra alisi me apochokkula ena fefin?

15-17. (a) Ifa ussun emon chon Kraist a likiitu fan an kewe osukosuk pokiten an kewe aksiten? (b) Met sokkun alillis chon an we mwichefel ra awora ngeni?

18. Met sokkun minen apochokkul sipwe tongeni kuna lon porausen manauen pwiich kewe mi mak lon ewe Leenien Mas me Awake! chassi?

19. Pwata Paul a tongeni meefi chengel, inaamwo ika a wor an kewe apwangapwang me an kewe sossot mi ussun folun ira?

20, 21. (a) Pwata sipwe tongeni kuna chengel seni ach ekkekieki ekkewe “mettoch aramas rese tongeni nengeni”? (b) Ikkefa ekkoch me lein ekkewe “mettoch aramas rese tongeni nengeni” en mi apilukuluku om kopwe kuna lon ewe Paratis won fonufan?

22. Letipach epwe lukuluk me pposolo fan iten met?

[Picture on page 10]

Fan ulungat Paul a iotek pwe Kot epwe churawu ewe folun ira lon fitukan